22/05/2026
Samuel Ndacayisaba, Umwigisha w’abana mw’ishengero Guérison des Ames-Gitega aratubwira ingene Inyigisho z’Ivugabutumwa zazanye umusaruro mu kibano.
👏“Nari nsazwe mfise inyota yo kwigisha abana, kubera nabona umenga n’igisata kititaweho. Nabona umenga abana bashizwe ukwabo, bigishwa indirimbo, kugira ntibagore abakuze bariko bumviriza Ubutumwa Bwiza, ukamenga abana ntibabukeneye. Mu mwaka wa 2018, narumvise ko hari inyigisho z’ivugabutumwa ku bana nca ndaja kwiga.
📘Muri 2020, naciye ntangura kwigisha abana inyigisho z’ivyizigiro ku bana. Hari igihe nacika intege nkibaza ingene bazobifata ku mutwe, nkibaza nimba bazobikunda, ariko narakomeje sinacitse intege kuko nsanzwe nkunda abana nagumijeko kandi abana barabikunze cane, twarabonye n’umusaruro ukomeye kw’ishengero.
Twatanguranye abana 30 twarangije ishure abana barenga 50. Abana bagwiriye cane kubera bagiye bavuga ubutumwa bwiza, bagaca baza kw’ishengero. Mu nyuma, twaciye dutangura irindi shure ryarimwo abandi bana 30, nabo nyene tukaja turasohoka kuvuga ubutumwa bwiza mu kibano abana baraza ari benshi mw’ishengero. Inyuma y’iryo naho, dutangura irindi shure ririmwo abana 40, nabo twimirije kubasohora. Bararangije inyigisho ubu turiko dukora igikorwa co gusohoka kuvuga ubutumwa bwiza mu kibano.
⛪️Ubu kw’ishengero dufise abana bababa 150 kandi kubw’igwirirana ry’abana ubu dufise amashure atatu. Rero abana bagenda barahinduka, kandi bagenda barakunda Imana kandi bayikorera banezerewe.
Dushima Imana cane ikomeza kudushoboza gutegura abana bakiri bato, kuko n’iryo shengero ry’ejo kandi umwana akuriye mw’Ijambo ry’Imana bigira ikimazi ku muryango, mu kibano ndetse no mu gihugu."
