Eglise du Bon Berger au Burundi

08/06/2026

💫Ubuvyeyi bw'Imana✨

📆Kuva umwaka utangura, nakomeje kwiyumvira ingene umuntu yokwegukira iragi ry'Imana. Ndashima Imana ko igenda intahuza. Iragi ni ivyo umuntu asigirwa n'abavyeyi canke uwundi muntu wese yahisemwo kumuraga. Iyo uravye ingene ijambo iragi risigurwa muri kazinduzi, dusanga bavuga ko ari ibintu, nk'inzu, itongo, imodoka,...umuntu asigira abana biwe canke uwundi yashimye kubisigira iyo apfuye.Tweho rero aho bitandukaniye, iragi tuvuga duharanira kwegukira uno mwaka si irisanzwe ry'abantu baraga ababo, ahubwo ni iragi duhabwa n'Imana nzima Data wa twese wo mw'ijuru.

📖Yohana 1:12~[Ariko abamwakiriye bose yabahaye ububasha bwo gucika abana b'Imana, ni bo bizeye izina ryiwe.]

↪️Nta ragi rindi na rimwe ryongana n'iryo twahawe ryo kuba abana b'Imana kuko twagabanye ubuvyeyi bw'Imana. Abavyeyi bo mw'isi boba ibigaba, bikabagora kuba abavyeyi beza uko bibereye ariko Imana yo ni umuvyeyi arenze abandi bose kuko yama ari agahore (mwiza cane). Ni we nyene ubwiza, ni we ubwiza bwose bukomokako.

🔅Abaroma 8:16-17 ~[Mpwemu ubwiwe abwiririkanya n'impwemu yacu, ar'icabona, y'uko tur'abana b'Imana. Ariko ko tur'abana bayo, tur'abaragwa; tur'abaragwa b'Imana, tur'abaragwana na Kristo, namba tubabazanywa nawe, ngo tubone guhanwa ubwiza nawe.]

Imana ntitubane mu vyiza gusa, ahubwo tubane n'iyo bigoye. N'iyo bitariko bigenda uko dushaka, dukwiye kuguma tunezererewe ubuvyeyi bw'Imana kuko yatugize abaraganwa na Kristo.

Luka 15:11-32: Hano tubona umwana w'icangazi asesagura itunga ryiwe, arisesagurira mu bwangazi n'ubuhumbu. Igitangaje, akiri icangazi nyene, yitwa umwana. Iragi rishobora kuhaba ariko nyene kuragwa ntirigire ico rimumarira. Uwashinze intahe yavuze ko yabuze umunezero wa Se kandi akiriho gushika aho amufata nk'uwapfuye.

❓Twibaze ikibazo hano:Imana dupfana iki? Mbega dupfana ivyo ikora canke dupfana ico iri?Mbega itarakora ivyo tuyisaba ica ireka kuba umuvyeyi? Mbega umutima wanje unezerererwa Imana kubera ico iri canke kubera ivyo impa. Uwu mwana avugwa hano mw'ijambo ry'Imana, imbere y'uko aba icangazi, hari ivyatanguye. Yabanje kubona ko ico bapfana na se ari iragi gusa. Mbega nawe nanje ntitwoba dufata ko ico dupfana n'Imana ari ivyo iduha gusa? Uno mwana vyatanguye atanezererewe se, atanezererewe imigenderanire na se, atumvira impanuro za se; gushika aho amubwira ngo mpereza ivyanje (iragi ryanje) nigire. Amaze kumuha ivyiwe nkuko yabisavye, yabijanye kubisesagurira mu buhumbu, asigara yicuza bimaze guhera. Avuga ngo yishwe n'inzara kandi kwa se abashumba bafungura bagahaga, bakanabisigaza. Kuko yabona ko yamenje mu guhemukira se.Yagarutse kumutakambira avuga ati:Dawe,nacumuye k'uwo mw'ijuru nongera ngucumurako; basi nyemerera ungire umushumba wawe kuko sinkibereye kwitwa umwana wawe.

❗Igitangaje hano, ni ingene umwana amaze kugaruka, vyanezereje se akamwakirana icubahiro n'urukundo rurengeje, gushika aho ategeka abakozi kumukorera bino bintu 4 bidasanzwe:

1. Kumwambika ikanzu nziza y'icubahiro. Izi mpuzu nziza zo kwakira abash*tsi b'icubahiro zamaho mu bayuda baguwe neza (b'abatunzi). Naho Bibiliya itabitubwira, nibaza ko imbere yo kumwambika iyo kanzu y'icubahiro babanje kumwoza neza kuko birumvikana ko yaje asa nabi nk'uwuvuye mu gisyogororo c'ingurube nyene kuko yasangira na zo iyo yari agorerewe inyuma yo kuba icangazi no gusesagura ivyiwe bigaherera mu buhumbu. Iyo kanzu yari iyo kumusubiza iteka.

2. Kumwambika impeta nk'ikimenyetso c'icubahiro kugira se amusubize icubahiro hagati mu bantu biwe bamenye ko ico amwita ataho gihwaniye n'ivyo yakoze.

3. Kwambikwa ibirato (inkweto) kugira amusubize ikibanza ciwe n'abashumba bamenye ko atari umushumba aje ahubwo haje umwana wiwe bwite.

4. Kumubagira ikimasa ciza kinuze. Ikimasa nk'iki cabagwa ku musi mukuru udasanzwe.

Ibi bintu muri make vyerekana impano zine zidasanzwe uno mwana yakirijwe:Iteka, icubahiro, gusubizwa mu kibanza no kunezerezwa. Se w'uyu mwana ntiyigeze amuhora ingene yitwaye nabi ubwa mbere. Ahubwo yanezerejwe cane n'uko yihanye akagaruka. Uku ni ko Imana inezerwa iyo umwe muri twebwe ayihindukiriye naho yoba yahora mu vyaha. Ntiraba ivyaha yakoze ahubwo iraba umutima wo kwihana azanye maze ikamuharira ivyo yakoze vyose, ikamwakirana igishika n'umunezero, ikamusubiza mu bana bayo, bose bagatera impundu banezerewe.

Ikibazo twotaha twibaza hano ni iki: Iyo uri ahantu wenyene, uticaye mw'isengero, utari muri "fraternité" , utari imbere y'ishengero uvuga ubutumwa canke uririmbira Imana, wiherereye ahantu ha wenyene; wibaza ko Imana mupfana iki?Mupfana ico iri canke mupfana ivyo ikora n'ivyo iguha? Ukwiye kumenya ko Imana igufitiye ivyiza bisumba kure cane ivyo ushobora kwiyumvira.

Rino jambo ry'Imana twarishikirijwe na Pasteur Jean Pierre NSENGIYUMVA kuri uno w'Imana igenekerezo rya 7/6/2026.

Wipfuza kumviriza inyigisho yose, woca hano⤵️

Yesu abahezagire.

07/06/2026

Igikorane twagishize kurubuga rwa Youtube gusa; murashobora gukurikirana igikorane hano👇🏽
YESU abahezagire🙏🏽

Sunday Service (07-06-2026) | Eglise du Bon Berger au Burundi

06/06/2026

💬" Naramara amacupa umunani y'inzoga niga mu mwaka w'umunani "

Nitwa Nicaise Hakizimana. Mu muryango wacu ndi umuhererezi. Narafyinishijwe nk’abahererezi benshi. Nize neza amashure mato mato. Ngeze mu mwaka w’indwi ntangura ingeso mbi. Nahuye n’abagenzi babi, banyigisha kunywa inzoga, itabi no gukwegana n'abakobwa (copinage). Abavyeyi baragera igihe baravuga bati "uyu mwana yatunaniye".

Umusi umwe, niga mu mwaka w’umunani, narirukanywe burundu (renvoi définitif) kw'ishure bivuye ko nahakanye ko mw’ishure bazanyeyo inzoga. Kandi koko bari bazizanye, turanazisangira kandi ndi uwuserukira abandi banyeshure (délégué). Abavyeyi baracika intege, barungitse umwana kw'ishure none bamuhaye arirukanywe kubera inzoga. Ico gihe baca bahitamwo kuja kunsabira ishure ahandi, nca nza kwiga i Bujumbura. Nsh*tseyo hoho biba bibi kurusha kubera ko naronseho abagenzi bafise amafaranga, bangurira izo nzoga.

Ico gihe ndahura n'umuntu antumira muri "fraternité" aho naba, nkagenda ariko nkumva umengo nta bishasha. No ku musi w'Imana (dimanche) naraza. Ico gihe namaze amezi umunani nja muri "fraternité", nza no mw'ishengero ariko ntarakizwa, kandi nkinywa za nzoga. Nari ngeze ku rugezo rwo kunywa amacupa umunani.

Igihe kimwe nasohokanye n'umwe muri abo bagenzi yari afise amahera. Arambaza ko nywa inzoga, nanje nti:"ndazinywa". Nashaka kumweza. Ndanywa, umunani ndaziheza, hama kuy'icenda nca nsohoka hanze, kugira ndamwereke ko namutsinze nca ndayisesa ngaruka ndamubwira nti:"wabonye ko nagusumbije?" Ico ni co nirata, kwari ukutamenya. Nirata ububegito, nirata ko namara amacupa umunani.

Uwo mugenzi amaze kuntumira gusenga, umusi umwe haba igikorane. Pasteur Patrick ni we yigishije. Uwo musi ndumva nanje nkeneye gukizwa mugabo ndatinya, niyumvira nti: "ba bantu banzi muri fraternité, ba bantu banzi muri Bon Berger bace babona ngiye gukizwa uno musi?" Ndaheza naturira mu ntebe, ariko ntashe njana kwiyagiriza mu mutima, numva nari nkwiye kuja imbere abakozi b'Imana bakansengera, bakandambikako ibiganza. Umusi w'Imana wakurikira natumiwe n'uwundi mugenzi kw'ishengero El Shaddai. Bari bafise igikorane c'Ubutumwa bwiza. Kuko nari numva mfise ideni, bagihamagara abaja kwakira Yesu nk'Umwami n'Umukiza nabaye uwa mbere. Ico gihe ndakizwa, nakira Yesu nk'Umwami n'Umukiza koko. Ubuzima bwanje bwaciye buhinduka.

Maze gukizwa, ya nyota y'inzoga Imana yaramfashije yose iragenda. Wa mukobwa twakundana naramwandikiye ndamusaba duhagarike imigenderanire twarimwo, ndamubwira nti:"Imana ibishatse tuzobandanya". Ndaheza ntangura inyigisho z'urufatiro rw'ubuzima rukristo (Lundi & Vendredi). Ntangura kuba ku murongo, kuko no kw'ishure naciye nja ndaba uwa mbere, uwa kabiri canke uwa gatatu. Ngeze no guheza naronse amanota meza cane mu kibazo ca Reta, ndonka uburenganzira bwo kuja kwiga kaminuza. Nagiye nshingira intahe abagenzi twagendana, kandi bamwe muri bo barakijijwe.

Ndashima Imana kuko maze gukizwa, ubuzima bwanje bwarahindutse. Mfise amahoro mu mutima wanje. Ikindi nezerererwa ni ko Imana yampaye umunezero.

Muri 2022 narabuze umuvyeyi "maman". Nari ndamukunda cane. Sinatahura ko yapfuye. Naragiye ndamusengera nizeye ko azuka ariko ntiyazuka, bamushira muri morgue. No ku musi wo kumufuba ndizera ko igitangaza kikigishoboka, ndamusengera, na ho nyene ntiyazuka. Ariko muri ayo mahoro Imana yampaye, ntahura ko gupfa atari bibi, ko ikibi ari ugupfa utakiriye Yesu nk'Umwami n'Umukiza. Maman yari yarakiriye Yesu nk'Umwami n'Umukiza. Uwo musi ndavuga n'Ubutumwa bwiza ndanaronka n'umuntu umwe yihana. Abo tuvukana baranshingira intahe ko vyabateye intege, bari bacitse intege.

Ikindi batwigishije mu nyigisho z'urufatiro rw'ubuzima rukristo (Lundi-Vendredi) ni uguha Imana. Narize gutanga ikigiracumi nk'uko Ijambo ry'Imana rivuga no gutanga amashikanwa. Numva hanjemwo iciyumviro kivuga ngo: umuntu ukunda kandi wubashe iyo umuhaye amafaranga, uyamuha mw'ibahasha. Nca mfata ingingo ko buri musi w'Imana nzoza nzanye ibahasha irimwo amafaranga nshikaniye Imana. Vyarampaye guhezagirwa nanje, bigenda neza.

Maze kuja kw'ishure, muri kaminuza, nabikorana no kuba umu "convoyeur" (w'ama "bus"). Kw'ishure bikagenda neza no mu kazi bikagenda neza, nkomeza guhezagirwa. Nari mfise rero, guhera mu 2021, umugambi wo kugira ishirahamwe ryo kwunguruza abantu n'ibintu (agence de transport). Natanguye kubisengera ntabona inzira bizocamwo. Abo nabibwira bambwira ngo:"izo ni indoto, ntibizoshika". Ariko nanje mu kwizera nkavuga nti: "nta cananiye Imana. Imana izobikora".

Mu 2024, harabaye igikorane twitwa "Open Heaven". Mw'ishengero baratangaza ko hari abemeye kurihira uburyo bwo kwiyunguruza abantu bazotumirwa mu gikorane. Kubera ko jewe nabikoreramwo, ndabona ko hari agahaze gashobora gutuma bitagenda neza. Ndumva uburyo bwiza dukwiye kubikora, ni ko kubibwira umurongozi wanje, nawe abibwira abarongozi bamukuriye gushika birashikira umwe mu barongozi b'ishengero. Baciye bampamagara baca banzeza ico gikorwa. Nticari igikorwa coroshe kuko hari mw'ibura ry'ibitoro. Twaronse ama "bus" 37 dukorana uwo musi, akora ama "tours" 89. Ico gihe Imana ingirira ubuntu iranshoboza, bigenda neza. Sinarinzi ko hari ikintu nokorera Imana mw'ishengero ryayo iruhande yo kuba umurongozi wa "fraternité". Nca mbandanya kuza ndabikora mur'ubwo buryo, buri musi w'Imana nkakora igikorwa c'ubuhuzabikorwa (coordination) c'ama bus azana abantu gusenga.

Ivyo vyatumye ntangura kuza ndaronka n'amasoko, wa mugambi utangura kuvyuka. Ni ho navuga nti "bwa bundi wa mugambi (agence de transport) Imana izowush*tsa, kubera ubu buryo bwo gukorera Imana". Mbandanya ndabisengera nongera nkorera Imana nk'uko bisanzwe.

Muri kino gikorwa rero co kuza turashikanira Imana kubw'ingoro yayo ni ho badutangariza ko tugiye gusubira gutanga. Mbonye ko uburyo bukenewe mu ma "dollar" nigira inama yo kuzotanga nanje mur'ayo mafaranga (dollars), ndabisengera. Ngifata iyo ngingo, ni ho numva umuntu andondeye, arambaza amakuru yanje n'imigambi mfise, nanje ndamushingira intahe vyose, ndamubarira n'umugambi mfise wo kugira ishirahamwe ryunguruza abantu n'ibintu (agence de transport). Yararyohewe, aca aransengera agirako anambwira ati "uyu mwaka utarahera, uyo mugambi ufise uzoba wawutanguye". Umwaka utarahera, nza numva arandondeye, arambwira ati "bwa buryo bwabonetse, akira utangure gukora wa mugambi". Nca ndatangura, gukora. Ubu "agence" irahari, turi abayungukiramwo (bénéficiaires).

Mu kurangiza, notera intege abantu batarakizwa. Wobesha abantu ariko mu mutima uriyizi. Nimba utarakizwa fata ingingo yo gukizwa.

Notera intege kandi umuntu yakijijwe ariko yumva adafise umunezero w'agakiza. Ijambo ry'Imana rivuga ngo " Mwame munezererwa mu Mwami wacu imisi yose; ndabivuze ubugira kabiri: ni munezerwe" (Ab'i Filipi 4:4). Yesu arahari kugira aguhe umunezero. Natahuye ijambo rivuga ngo "n'aho vyose vyose vyoba vyagenze nabi, mfise Yesu mba mfise vyose".

Uwundi muntu notera intege ni umuntu yabuze umuntu wiwe. Ncuti yanje va mu kigandaro, Yesu arahari kugira ngo agutere intege, akwirure.

Yesu abahezagire.

31/05/2026

🙋🏾Reka Imana ikugwanire

Mu buzima bwacu duhura n'intambara nyinshi z’ubuzima. Ikintu kigoye mu buzima bwacu, igihe ibibazo bije, mutumberanye na vyo, umuntu agira guhungabana. Ariko ijambo ry'Imana riratubwira ngo “Imana ni yo itugwanira, namwe ni mwinumire gusa”. Ariko nk’abamenye Imana dukwiye gutekana imbere y’ivyo bibazo. Kandi birashoboka. Iyo utekanye ushobora kwumva Mpwemu w’Imana uko akurongora.

Uhoraho ni we agira ngw abarwanire, namwe ni mwinumire gusa.
Kuvayo 14:14

📖 Itanguriro 40:1-14

Yosefu ni igishingantahe ko ivyo Imana ivuga ibihagararira. Yahamagawe n’Imana afise imyaka 17. Satani arahaguruka kuko yumvise kazoza k’uwo mwana. Aciye muri benewabo, bano bagira umugambi wo kumwica. Ariko barabireka, bahitamwo kumwangaza mu gihugu c’amahanga biciye mu kumudandaza. Wibaze umwana angana uko atandukanijwe n’umuryango uko akajanwa mu gihugu c’amahanga muri ubwo buryo! Ariko agiye muri ico gihugu ca Egiputa, Imana yakomeje kubana nawe.

Ash*tse kwa Potifari, uno abona ikiganza ciza kiri kuri we, amugira umukuru mu vyo afise vyose. Ariko satani akomeza kumugwanya, atabwa mw’ibohero. Ariko no mw’ibohero ikiganza ciza c’Imana gikomeza kuba kuri we, agirwa umukuru w’izindi mbohe. Kumbure yaribaza ati bimwe wavuga bizoba ryari? Nzobishikira ryari? Kuko, ivyo yariko arabona vyari bitandukanye n’ivyo Imana yamweretse. Iyo uri mu bibazo biroroshe kwibaza ko ivyo Imana atari vyo. Ariko Yosefu yakomeje gushira umutima ku Mana yiwe, kubana no kunywana na yo.

Yosefu akiri muri iryo bohero haza imfungwa z’umwami wa Egiputa. Bano bararota. Yosefu agira umutima wo kwitwararika kubumviriza no kubafasha kuzitahura. Ntiyagize ishari ngo avuge ati “naje iz'iwanje ntazo ndabona nimwimenye”. Arabegera, arabitaho, bigenda nk’uko yazibasobanuriye. Uwasubijwe mu kazi i bwami aribagira Yosefu kandi yari yamusavye ngo azomuvugire ku mwami, kuko yarenganijwe. Uno amaze gusohoka yibagira Yosefu, imyaka ibiri irahera. Icigwa kirimwo? Umuntu arashobora kukwibagira ariko Imana ntiyibagira.

Imana ishiraho akandi karyo, Farawo umwami wa Egiputa arota inzozi. Wa mukevyi yahoze apfunganywe na Yosefu yiganira Farawo inkuru za Yosefu no gushobora gurotora inzozi kwiwe. Ni ko kuja kurondera Yosefu mw’ibohero ngo aje kurotora inzozi z’umwami. Izere! Muri ivyo bibazo uriko uracamwo tekana, Umwami ariko araguhamagara ngo akugirire neza. Reka Imana ikugwanire!

Inyuma yo kumudondera ivy’indoto vyose, Farawo aravuga ngo: “nta wundi yombera icegera mu bwami bwose atari wewe”. Yosefu yicara aho atari gushobora kwicara kubera ikiganza ciza c’Uhoraho cari kuri we.

💬Hari ibintu bitatu bisaba kugira bikunde ushobore kugwanirwa n’Imana:

1️⃣ Ibanga rya mbere ryo kugwanirirwa n’Imana ni kuyizigira muri vyose (confiance totale). Ni kuvuga iki? Umuntu yizigiye Imana ni umuntu arondera ubucuti n’Imana mu kuyegera, mu kuyikorera. Umutima wawe ntushobora kwizigira Imana ata gusabana na yo guhari.

Uwavugishwa n’Imana Elisa, Imana yama imuhishurira imigambi umwami w’i Siriya arimwo yo gutera abisirayeri. Umwami w’i Siriya abibonye yibaza ngo ni umuhemu ari mu ngabo ziwe, atanga amakuru ku mwami w’abisirayeri. Ariko bamubwira amakuru ya Elisa, ni ko kuvuga ngo baje kumufata. Biragenda ariko ntivyakunda. Kuki? Kuko Elisa yari yizigiye Imana ( 2 Abami 6:8-23).

2️⃣ Ibanga rigira kabiri ryo kugwanirirwa n’Imana ni kugumana amahoro hagati mu mipfunda, hagati mu ntambara. Urashobora kugira amahoro ibibazo bigihari. Impamvu ni ko Yesu yavuze ngo “ndabahaye amahoro, ndabagabiye amahoro yanje”. Ufise amafaranga canke utayafise amahoro y’Imana agumaho. Iyo ugwaje, amahoro agumaho kuko atangwa n’Imana. Wapfushije umuntu ayo amahoro agumaho. Abana bawe vyagenze nabi amahoro y’Imana agumaho.

3️⃣Ibanga rigira gatatu ryo kugwanirirwa n'Imana ni kugira umutima wo gutazira Imana. Pawuro na Sila bakubiswe bagapfungwa, bahimbaje Imana na yo iraza irabagwanirira. Iryo na ryo ni ibanga ryo kugwanirirwa n’Imana: kugira umutima wo gushima Imana, ng'aho ibintu vyoba biriko biragenda nabi.

Uhoraho akugirire neza, agutabare aho uri. Uduze ijwi ryawe usenge. Indirimbo ndagutuye iravuga ngo:

🎵Ntibizokwama biri uko
Ni kw’agize
Umuremyi aravuze
Birarangiye
Amarira warinze ndayahinduye indirimbo Naha🎵

Ukaba wipfuza gukurikirana Ubutumwa bwiza bwose twigishijwe n’umuvugabutumwa Lambert Muyombana n’amasengesho twagize kur’uyu musi w’Imana itariki 31/05/2026 ushobora guca hano ⤵️

Yesu abahezagire!

31/05/2026

Kumvo zuko connexion internet twahora dukoresha yagize ikibazo, igikorane twagishize kurubuga rwa Youtube gusa; murashobora gukurikirana igikorane hano👇🏽
YESU abahezagire🙏🏽

Sunday Service (31-05-2026) | Eglise du Bon Berger au Burundi

29/05/2026

Dufise Imana itanga indirimbo nsha

Kaze kur'uyu munsi wa gatatu w'iminsi itatu yacu y'amasengesho. Twasangijwe ijambo ry'Imana n'umukozi w'Imana Pasteur Mamie.

Yesu yagendagenda agirira neza bose (Actes 10: 38-39). Kur'uyu mugoroba wakire ukugira neza kw'Imana yacu. Kuko yumva iyo dutaka, wizere ko nawe akwumva.

Yesu arahindura ibihe kandi iryo ni iragi ryanje na we. Yesu iyo ashatse guhindura ibihe nta we asaba uruhusha, y'aba umukoresha y'aba abo muzinanye.
Uyu mugoroba, wakire ivyo kuko ivyo n'ubu biracashoboka, aracashobora guhindura identité yawe, akagukurako isoni zose.
Ni Nteturuye, agukura ahantu h'amaganya akakuzana aho uririmba.

Hana yarabibonye, yarabonye agakiza k'Imana araririmba ati :"Ni we akura umugorwa mu mukungugu, Agashira hejuru umukene, amukuye mu mwavu, Kugira ngw'abicarikane n'abahambaye, Bararwe intebe z'icubahiro: Kukw inkingi z'isi ar' iz' Uhoraho, kandi ni zo yayiteretseko" ~1 Samweli 2:8

Naho utoba uri umuririmvyi, Yesu arashoboye kuguha indirimbo nshasha uyu mugoroba.

Ico yanka n'uwumubangikanya, wewe wizere gusa.
Yesu arashobora kugukura mu bucocerwa. Ubucocerwa ni ico cose ugendana kigutera isoni. Uyu mugoroba, ureke Yesu agukureko ubugorwa bwose. Kuko iragi ryacu ar'ugutotahara (Zaburi 92: 12).

Biraryoshe kuko aba Yesu ntibatinya kuvuga ubutunzi bwabo kuko bazi iyo ubutunzi bwabo buva, ku Mana yabo gusa. Imana itanga indirimbo nsha, ntirobanura, nta we irashobora kubikorera.

Ico kintu cose kiriko kiratuma wumva umerewe nabi, wumva ugowe ahataboneka n'ahaboneka hose.
Kumwe Mariya yavuga: " Ico ababwira cose mugikore", na we ico Mpwemu Yera akubwira ugikore, aho uharira uharire, aho wihana wihane.

📖 Zaburi 92: 12-15
Dusengere n'igihugu cacu. Imana ntizorindira ko igihugu cacu gitunga nk'uko babivuga, kuko nta we ibaza kugira igirire neza umuntu, imukure ku cavu.

Na we winjire mur'uwo mugende kuko bimuhimbaye kugutabara.

Yesu abahezagire.

28/05/2026

3 jours de jeûne et prière [Jour 3] (28-05-2026)| Eglise du Bon Berger au Burundi

28/05/2026

Guma kw’isôko!
-----------
Umugororotsi azototahara nk'ikigazi, Azoshirwa hejuru nk'igiti c'isederi c'i Lebanoni. Abatewe mu rugo rw'Uhoraho
Bazototaharira mu nyubakwa z'Imana yacu. No mu busaza bazoba bacama; Bazogira ubukame bginshi n'itoto: kugira ngo vyerekane yuk' Uhoraho atunganye; Ni we gitandara canje, atarimwo kugabitanya na gukeya ~Zaburi 92:12-15

Hahirwa umuntu atagendera mu nama z'ababi, Adahagarara mu nzira y'abanyavyaha, Aticarana n'abacokoranyi. Arikw ibimuhimbara biri mu vyagezwe vy'Uhoraho, Kand' ivyagezwe vyiwe ni vyo ashirak' umutima ku murango no mw ijoro. Azoba nk'igiti gitewe hafi y'imigezi y'amazi,
Cama igihe caco, Ibibabi vyaco ntivyuma: Ic' azokora cose kizomubera ko ~Zaburi 1:1-3

Aya majambo twarayasomye ejo haheze. Ni amajambo ngenderwako y'ano masengesho turimwo. Twarasomye ko harimwo ijambo “guterwa” n’Ijambo “gutotahara”. Gutotahara na kwo kuvana n’aho utewe. Uyu musi tuganira ijambo rivuga ngo “Guma kw’isoko”.

Turabona mur’iyo Zaburi ko uwo umuntu aguma kw’isoko ameze nk’igiti gitotahaye. None ikibazo cabereye he kugira ngo habe kwuma? Tubirabe.

Itanguriro 3: 7-11

Umuntu, Imana yari yaramwiyumviriyeko. Yamuremye inyuma y’ibindi, imutereka mw’itongo rya Edeni aho ata na kimwe cari kibuze. Ariko ibintu vyatanguye kwononekara umuntu akoze icaha co kutumvira Imana. Ibara riragwa. Umuhora (connexion) uracika.

Nk’uko umwana avuka umuvyeyi yamuteguriye vyose, Imana ntiyaturemye ngo twigwaneko. Ikibazo ni umuntu yagiye kure y’Imana. Iyo “connexion” imaze gucika ni ho y'umuntu yatanguye kwigereragereza ngo arabe uko yobaho. Iyo watakaje umuhora (connexion) uguhuza n’Imana ni ho ibintu bica biyangara, ugatangura kwigeragereza. Guma kw’isoko.

Birakwiye ko tuguma turi connectés n’Imana. Ni ho bikunda. Biratangaje ukuntu hari abantu batandukanya ubuzima busanzwe ubayemwo, canke bw’akazi, hamwe n’ubw’impwemu. Umusi ubitandukanije ni wo musi ibara riba riguye.

Ngikizwa narasaba Imana nti: “Mana umfashe sinze nigere ndonka akazi kantandukanya na we, kanshira kure yawe n'igikorwa cawe”. Kandi mwen’ubwo buzi naraburonse ariko ndabwanka. Numva kuba mfise Imana ni kwo guhazwa (satisfaction). Kuja kure gato ni rwo rupfu rwanje. Guma kw’isoko.

Yohana 21:1-8,12-14

Yesu amaze gupfa abigishwa bari bazi ko birangiye. Biyumvira kwisubirira kuroba. Bigaragara ko batari barashize umutima ku majambo yiwe kuko bari bifatiye izindi nzira. Yesu araza arabasanga. Umuntu yama ahunga Imana, na yo ikama iza kumurondera mu rukundo rwayo.

Ikibazo ca mbere ni ko umwana w’umuntu aca connexion. Ikibazo ca kabiri ni ko atandukanya ivy’impwemu n’ivy’ubuzima busanzwe. Nta co wokora udafise Yesu (Yohana 15:).

Ibihe birahinduka ariko niwaguma kw’isoko uzobandanya gutotahara. Mu gihe gikwiye na ho uzokwama ivyamwa. Ni igiki cakujanye kure y’isoko? Mbega ni icaha? Mbega ni imyitwarariko y’ubuzima? Muri kano kanya ko gusenga, saba Imana ikugarukane kw’isoko.

🎵Nta gikomeye imbere Ayo
Ifata imisozi ikayigira amataba🎵

Ariko weho Isirayeli musavyi wanje, Yakobo uwo natoranije, ruvyaro rwa Aburahamu umukunzi wanje: wewe uwo natoye, nkagukura ku mpera z'isi, nkaguhamagara ng'uve ku mfuruka zayo, nkakubgira, nt' Ur' umusavyi wanje, naragutoranije sinagutaye; ntutinye, kuko ndi kumwe nawe; ntukihebure, kuko nd' Imana yawe: nzogukomeza, nzogutabara, mbere nzokuramira n'ukuboko kw'i buryo kw'ukugororoka kwanje. Eh' abakurakiye bose bazoteterwa bamaramare: abagutonganya bazocika ubusa, baranduke. Abaguhaririza uzobarondera ubabure, kand' abakurwanya bazocika ubusa, bakamangane.
Yesaya 41:8-12

Impahazwa n'abakene barondera amazi bakayabura, ururimi rwabo rukagwa umwumwa; jewe Uhoraho nzobishura, jewe Imana ya Isirayeli sinzobaheba. Nzoziburura inzuzi mu mpinga z'imisozi y'uruharabuga, n'amasoko hagati mu myonga: ubugaragwa nzobuhindura ikidengeri c'amazi, n'igihugu cumye nzogihindura imbizi z'amazi. Mu bugaragwa nzohatera ibiti vy'amasederi n'ivy' imish*ta n'ivy' imihadasi n'ivya elayo; kandi mu gahinga nzohashira ibiti vy'akajwari n'ivy' imitidari n'ivy' imiteyashuri bikurane; kugira ngo barabe, bamenye, bitegereze, batahurire hamwe yuk' ukuboko kw'Uhoraho ari kwo gukoze ivyo, kandi k'Uwera w'Abisirayeli ari we yabiremye.
Yesaya 41:17-20

Dufise Imana ituma bikunda. Turafise Imana itatureka twenyene, no mu bugaragwa iraturwanira. Iyo Mana yishura impahazwa, yitazire!

🎵Mfise Imana, mfise umuzigamyi
Impande zose ankikije urukundo
…
Yaraciye inzira
Ubu ndishikira🎵

Imana ihezagire Diacre Richard Uwimana yaturongoye yisunze ayo amajambo kur’uyu munsi ugira kabiri w’amasengesho y’imisi itatu turimwo. Hari ku mugoroba wo kur’uyu wa kabiri itariki 27/05/2026.

Mwipfuza gukurikirana amasengesho y'umusi wa kabiri, mushobora kuyasanga hano⤵️

Yesu abahezagire.

27/05/2026

3 jours de jeûne et prière [Jour 2] (27-05-2026)| Eglise du Bon Berger au Burundi

27/05/2026

Abatewe mu rugo rw'uhoraho bazototahara.
---------
Twaje gusenga Imana kandi twaje twiteze guhura na yo, kandi irahura na we. Hari ijambo ry'Imana rivuga ngo: "Ni musabe muzohabwa", ntishobora kutubwira ngo tuyisabe ititeguriye kutugabira.

📖[Umugororotsi azototahara nk'ikigazi, Azoshirwa hejuru nk'igiti c'isederi c'i Lebanoni. Abatewe mu rugo rw'Uhoraho. Bazototaharira mu nyubakwa z'Imana yacu.
No mu busaza bazoba bacama; Bazogira ubukame bginshi n'itoto: Kugira ngo vyerekane yuk' Uhoraho atunganye; Ni we gitandara canje, atarimwo kugabitanya na gukeya]~ Zaburi 92:12-15

Iri ni ryo jambo ndongozi muri iyi misi itatu. Ririmwo isezerano ry'umugororotsi. Harimwo amajambo y'urufatiro nka "Guterwa" hakabaho n'aho "Uterwa" ivyo bikaguhesha "Gutotahara".

Iryo ni isezerano ry'uko ivyizigiro dufise si ivy'ubugararwa, ni ivyo gutotahara. Umuntu arashobora guca yibaza ibibazo vyinshi bivanye n'ivyo ariko aracamwo. Ibihe nk'ivyo bizokwamaho. Ni uguhindagurika kw'ibihe. Mu gitabo c'Itanguriro 8: 22 havuga ngo
"Isi ikiriho, ibiba n'iyimbura, n'imbeho n'ubushuhe, n'ici n'agatasi, n'umurango n'ijoro ntibizovaho."Ibi bihe bifise ico bikora ku buzima bwawe. Igihe co kubiba, ni igihe ibigega vyawe ata kiba kirimwo. Ariko igihe c'iyimvura biruzura. Ibihe uriko uracamwo hari igihe biba bitariko bisa na rino jambo twasomye. Ikibazo nyamukuru ni : "Utewe hehe?" Kuko aho utewe, hazotuma utotahara.

💬 [Uhoraho ni we mpungirako. Mubaririra iki umutima wanje, Muti Hungira ku musozi wanyu nk'inyoni? Kukw'abanyakibi bariko barafora umuheto, Bashira umwampi mu ruge,
Kugira ngo barasire mu mwiza abafise imitima itunganye. Namb' amatanguriro asambuwe,
Ivyo umugororotsi yakoze vyapfuye iki? Uhoraho ari mu rusengero rwiwe rwera,
Uhoraho, intebe yiwe iri mw ijuru. Acacisha inyonga ziwe abana b'abantu, mu kigohe ciwe harabasuzuma] ~ Zaburi 11:1-4

Igihe Dawidi yandika aya majambo, ashobora kuba yari mu bihe bitamworoheye. Urabona ko avuga ko ahungira k'Uhoraho. Arabaza kandi ati ni igiki gituma mundangira izindi nzira zitari iz'Imana. Muri ivyo bihe ducamwo, bihinduka indirimbo utateguye, wari witeguriye ko buca, ugasanga iwawe burije; amahoro canke gutotahara kwawe, ntibiva ko abandi batotahaye.

"None mu bihe mwen'ivyo, iyo ivyo wari wubakiyeko, bitanguye gusambuka, umugororotsi yokora iki?" Ubandanije usoma urabona ko Uhoraho ari mu rusengero rwiwe rwera. Inyonga z'Uhoraho ziragusuzuma kandi ntikubita urugohe. Uhoraho ntasinziriye, ntanyirengagiza arankunda. Umugororotsi azototahara. Utewe hehe? Ubuhungiro bwawe ku musi w'amagorwa buri hehe ?

Ivyo twubakiyeko binyiganyize, dukomesha induru amaboko n'amaguru nk'abatagira umutabazi. Umutekano wawe uri k'Uhoraho, Imana yaremye ijuru n'isi. Kandi inyonga ziwe zihora kuri wewe. Guterwa mu rugo rw'uhoraho ni kumwizigira (Lui faire confiance). Iyo dushikiwe n'ikibazo ntitwitwararike kurondera uko tubivamwo gusa ahubwo twitwararike kurondera ubwiza bw'Imana kuko ifise umugambi munini wo gusa nayo ngo ushike ku rundi rugero utari bwigere wiyumvira. Ni Imana itabura inzira ibicishamwo. Ni Imana ikoresha abantu, ibikona n'ibindi ishatse. Iyo ivyo wubakiyeko binyiganyize ukwiye (1) kuyizigira, (2) gusenga ubudasiba no kwama ukenguruka muri vyose (1Tesalonike 5:18).

Mu gihe ibintu biriko birahinduka, shima ko hariho ibintu bidahinduka.
(1) Shimira Imana ko idahinduka. (2) Ko urukundo rwayo rudahinduka. ( 3) Ko amasezerano yiwe adahinduka. (4) Ko ijambo ryayo ridahinduka. Muri ivyo bihe bihinduka twebwe dufise Imana idahinduka. Komeza umwizigire n'aho utabitahura. Shishikara gushima Imana. Iyo ugize umwete wo gusenga, hari igihe Imana ikwishura ibirenze ivyo wasavye.

Iri ni ijambo ry'Imana twasangijwe na Pasteur Jean Pierre NSENGIYUMVA kuri uyu musi wa mbere w'imisi itatu y'amasengesho, kuwa kabiri itariki 26/05/2026.

Turaguhaye ikaze na we uyu musi bitakunze ko uhaba, ukaba uba mu gisagara ca Bujumbura. Kaze kandi no ku bari kure, murashobora gukwirikirana igikorane ku mbuga hwaniro zacu za YouTube canke Facebook.

Indirimbo y'107 mu gitabu c'indirimbo zo guhimbaza Imana z'ikirundi (cantique) ikubere iyawe uyu mugoroba.

🎼Nshinzwe kuri urwo rutare Na h'ahandi ni umusenyi
Na h'ahandi ni umusenyi 🎼