Ijambo ry'Imana ryo kumunsi/Abagenzi ba Radio Maria Burundi

20/08/2022

Utilise ce lien pour intégrer mon groupe WhatsApp:

WhatsApp Group Invite

30/04/2021

*_Ku wa 1 Rusama : Yozefu mweranda, umukozi_*

```Mu Burundi, ni Umusi Mukuru cane```

*IGISOMWA CA MBERE*

_Ivyo dusoma mu gitabu c’Amamuko (1, 1. 26-2, 3)_

Mu ntango, Imana yaremye ijuru n’isi. Imana iraheza ivuga iti: «Ingo tureme umuntu tumwishushanye, ase natwe; agabe ifi zo mu kiyaga, ibikoko, inyamaswa zose, be n’ubwoko bwose bunyogomba hasi.» Imana iraheza irema umuntu iramwishushanya, irema uwufise agashusho k’Imana, irema umugabo n’umugore. Imana irabahezagira ibabwira iti: «Nimurondoke, mugwire, mwuzure isi, muteko muyigabe. Mugabe ifi zo mu kiyaga, inyoni zo mu kirere, be n’ibikoko vyose vyagamba kw’isi.» Imana iraheza ivuga iti: «Ndabahaye ibiremwa vyose vyama imbuto bikwiye isi yose, be n’ibiti vyose bifise ivyamwa birimwo imbuto; bizobabere imfungurwa. Inyamaswa zose be n’inyoni zose zo mu kirere, ivyikwega hasi vyose kandi biri n’ubuzima, ndabagabiye ibimera vyose kandi biri n’itoto ngo bibabere indya.» Bica biba gutyo. Imana ikubitiza ijisho ku vyo yari yagize: vyari vyiza cane. Haba umugoroba, haba n’igitondo: uba umusi ugira gatandatu. Gutyo rero, ijuru n’isi hamwe n’inteko zavyo, vyari bihejeje guhingurwa. Ku musi ugira indwi, Imana irasozera igikorwa yari yagize; hanyuma ku musi w’indwi iraruhuka, imaze kurangiza ico gikorwa cose yari yagize. Ng’ayo amamuko y’ijuru n’isi igihe vyaremwa.

*IZABURI 89 (90) 2, 3-4, 12-13, 14. 16b*

_Icit.: N’udushimangirire, Mukama, ivyo dukora n’amaboko yacu._

Imisozi itarabaho, utararema isi n’ibihugu, Weho wamye uri Imana kuva kera na rindi.

Abantu urabasubiza mw’ibumba, urababarira uti: «Bana b’abantu, nimusubireyo!» Mu maso yawe, imyaka igihumbi imeze nk’umusi w’ejo wahise, canke nk’igishingo kimwe c’ijoro.

N’utwigishe guharūra imisi yacu, kugira ngo dukerebuke mu bwenge. Ewe Mukama, garuka: uzogeza ryari? Niwirimbuze mu vyo ugirira abasavyi wawe.

N’udukwize urukudo rwawe mu gitondo ca kare, niho twoheza tukamara umusi wose mu karirimbo no mu kanyamuneza. Igikorwa cawe niciserure ku basavyi bawe, be n’agahimbare kawe ku bana bawe.

*IGISOMWA CA KABIRI*

_Ivyo dusoma mw’Ikete Umutumwa Pawulo yandikiye Abanyakolosi (3, 14-15. 17. 23-24)_

Ncuti zanje, ico mwokwitwararika imbere ya vyose, ni uko mwokwamana urukundo, kuko ari rwo rutuma umuntu aba intungane ish*tse. Vyongeye, amahoro ya Kristu n’ahangame mu mishaha yanyu, ayo mahoro ni yo mwahamagariwe gusangira mu Mubiri umwe, maze, mwame mukenguruka na ntaryo. Ivyo muvuga canke ivyo mukora vyose, murame mubigira kw’izina ry’Umukama Yezu, mumwihekeko mu gukengurukira Imana, Umuvyeyi wacu. Ivyo mukora vyose, mubikore bivuye ku mutima nk’abakorera Umukama, ntimube nk’abakorera abantu: murazi neza ko Umukama ari We azobaronsa impera mu kubagira ba Samuragwa biwe. Umukama Yezu ni We mukorera.

*INKURU NZIZA*

*_Aleluya, aleluya._*

_Umukama n’ashimagizwe imisi n’iyindi, We Mana Mukiza wacu, yiremetseko ibituremereye._

*_Aleluya._*

_Ivyo dusoma mu Nkuru Nziza ya Yezu Kristu nk’uko yashikirijwe na Matayo (13, 54-58)_

*Muri irya misi, Yezu yagarutse mu ntara iwabo, arigishiriza mw’isinagoga ryabo. Abantu baratamarirwa bavuga bati: «Mbega ubwo bwenge n’ivyo bitangaro biva hehe? None, urya si wa muhungu w’umubaji? Nyina ntiyitwa Mariya, benewabo si Yakobo, Simoni na Yuda, bashikibe bose ntitubana? None, ivyo bintu vyose abikura hehe?» Bibatera umutima mubi. Yamara Yezu We ababwira ati: «Umuhanuzi ntiyigera aninahazwa mu gihugu yavukiyemwo no mu muryango iwabo.» Nta bitangaro vyinshi rero yahagiriye kubera ubugaba bwabo.*

29/04/2021

*_Indwi ya 4 ya Pasika : ku wa gatanu_*

*IGISOMWA CA MBERE*

_Ivyo dusoma mu gitabu c’Ibikorwa vy’Abatumwa (13, 26-33)_

Muri irya misi, Pawulo yabariye Abayuda mw’isinagoga y’i Antiyokiya ya Pisidiya, ati: «Bana ba mama, mwebwe bana bo mu muryango wa Aburahamu namwe mwubaha Imana, ni mwebwe iri jambo ry’ubukiriro ryarungikiwe. Abanyayeruzalemu n’abakuru babo barahakanye Yezu, barahakana n’ivyo abahanuzi bari barategekanije vyama bisomwa kw’isabato, barabiheraheza mu kumucira urwo gupfa, basaba Pilato ngo amwice kandi ata kintu c’ukumwicisha bamusanzeko. Bamaze kurangura ivyanditswe kuri we vyose, bamukura ku musaraba baramuhamba. Ariko Imana iramuzura mu bapfuye, na we amara imisi itari mike yiyerekana urudasiba abari baduganye na we kuva mu Bugalile gushika i Yeruzalemu, ubu ni bo vyabona vyiwe imbere y’igihugu. Natwe nyene, turabamenyesha ya Nkuru nziza Imana yaraganiye ba sokuru, ko Imana yaduhanguriye twebwe abana babo, mu kuzura Yezu nk’uko vyanditswe mw’izaburi ya kabiri ngo: Uri umwananje, nakwibarutse uyu musi.»

*IZABURI 2, 6-7, 8-9, 10-11*

_Icit.: Urakaninahazwa Mana yamaho, kubera Umwana wawe yazutse! Canke: Aleluya._

«Ni jewe niyimikiye umwami wanje, kuri Siyoni umurwa wanje mweranda.» Nzoyaga ingingo yashinzwe n’Umukma: Yambwiye ati: «Uri Umwana wanje ni jewe nakwivyariye uyu musi.»

Nsaba, nzoca ndaguha ibihugu vyose bikubere iragi, isi yose iyo iva ikagera izoca icika rwawe. Uzobimenaguza intahe y’icuma, maze ubijanjagure nk’uwujanjagura imibehe y’umubumvyi.

Noneho rero, mwa bami, nimuturure, namwe bacamanza b’ibihugu, nimuhumure: nimukorere Umukama n’icubahiro cinshi, mumushemeze, mumusenge muhinda agash*tsi.

*INKURU NZIZA*

*_Aleluya._*

_Kristu yazutse, ntagishobora gupfa; urupfu ntirukimushobora._

*_Aleluya._*

_Ivyo dusoma mu Nkuru nziza ya Yezu Kristu nk’uko yashikirijwe na Yohani (14, 1-6)_

*Muri irya misi, Yezu yabariye abigishwa biwe ati: «Ntimusimbwe n’umutima! Muremere Imana, munyemere nanje. Mu ngoro ya Data, hari ibibanza vyinshi; ahandi ho nari kubibabwira, kuko ngiye kubategurira ikibanza, nzoheza ngaruke, mbajane hafi yanje, kugira ngo aho ndi habe ari ho muba namwe. Kandi aho ngiye, murazi inzira irorayo.» Toma amubwira ati: «Mukama, ntituzi iyo ugiye, inzira irorayo twoyïmenya dute?» Yezu aramwishura ati: «Jewe ndi Inzira, Ukuri n’Ubuzima; ntawuja kwa Data atanciyeko.»*

26/04/2021

*_Indwi ya 4 ya Pasika : ku wa kabiri_*

*IGISOMWA CA MBERE*

_Ivyo dusoma mu gitabu c’Ibikorwa vy’Abatumwa (11, 19-26)_

Muri irya misi, abari bahunze kubera amarushwa yatewe n’ivya Sitefano bari baciye mu Bufenisiya, mu Bushipure be n’i Antiyokiya, ata bandi bariko barigisha ijambo ry’Imana atari Abayuda bonyene. Ariko rero, bamwe muri bo b’Abanyashipure n’Abanyasireni bari baje i Antiyokiya bakaza barigisha Abagereki Inkuru nziza y’Umukama Yezu. Bitayeko, Umukama yari kumwe na bo kandi benshi muri bo baremera bakagirako bagahinduka bakemera Umukama. Biraheza bishikira Ekleziya y’i Yeruzalemu. Baca batuma Baranaba i Antiyokiya. Ngo ashike, abonye ivyo ubutore bw’Imana bwahakoze aranezerwa, arabahanura ngo bose bagumize umutima ku Mana. Kanatsinda, Baranaba yari umuntu mweranda, afise ukwemera kwinshi kandi ari kumwe na Mutima Mweranda. Abantu benshi baraheza begukira Umukama. Araheza aja i Tarsi kurondera Sawuli. Ngo bahwane amujana i Antiyokiya. Bamara umwaka wose bigisha abantu indiri. Kandi i Antiyokiya, ni ho izina «abakristu» ryatanguriye.

*IZABURI 86 (87) 1 -2-3, 4-5, 6-7*

_Icit.: Ntara zose, ni muninahaze Umukama. Canke: Aleluya._

Ese ingene Umukama agukunda, wewe wubatswe ku mirambi myeranda! Ewe Siyoni, urakundwakazwa kuruta izindi nyubakwa zose za Yakobo. Bakuvuga baguhaya, wewe gisagara c’Imana

«Jewe mparura Imisiri na Babiloni mu ntara zimaze kumenya.» Umuntu wese avuga ati: «Navukiye i Tiri canke mu Bufilisti canke muri Etiyopiya». Ariko, Siyoni yo umuntu wese ayibwira ati: «Uri Mawe, kuko umwe wese ari ho yavukiye.»

Uwo mw’ijuru arayigumizako ubwo bukuru; ariko akandika mu gitabu intara zose, ati: «Kanaka ni ho yavukiye.» Abaririmba n’abavyina bazovuga bati: «Amasôko yanje yose ari muri wewe.»

*INKURU NZIZA*

_*Aleluya.*_

_Umukama yavuze ati: «Intama zanje zirumviriza ijwi ryanje. Jeho ndaz**i, na zo zikankurikira.»_

*_Aleluya._*

_Ivyo dusoma mu Nkuru nziza ya Yezu Kristu nk’uko yashikirijwe na Yohani (10, 22-30)_

*Ico gihe, i Yeruzalemu bahimbaza imisi mikuru y’uguhezagira isengero; hari mu rushana. Yezu aragendagenda mu gisengero, munsi y’ubwugamo bwa Salomo. Abayuda baramuhundarako rero, baramubwira bati: «Uzoduhagarika umutima kugeza ryari? Niwaba uri Kristu, bitubwire icese.» Yezu arababwira ati: «Narabibabwiye ntimwemera. Ibikorwa nkora kw’izina rya Data ni vyo binshingira ingingo; ariko ntimwemera kuko mutari abo mu ntama zanje. Intama zanje zirumviriza ijwi ryanje, kandi ndaz**i vyongeye zirankurikira. Ndaziha ubuzima budahera, ntizizokwigera zipfa, bisubiye nta wuzozinkura mu minwe. Data yazimpaye aruta bose kandi nta wushobora kuzikura mu minwe ya Data. Jewe na Data turi umwe.»*

25/04/2021

*_Indwi ya 4 ya Pasika : ku wa mbere_*

*IGISOMWA CA MBERE*

_Ivyo dusoma mu gitabu c’Ibikorwa vy’Abatumwa (11, 1-18)_

Muri irya misi, Abatumwa na benewabo bari mu Buyuda bari bumvise yuko n’abapagani nyene bemeye Ijambo ry’Imana. Petero aduze i Yeruzalemu, abari bavuye mu Bayuda bamugirira umwikomo bati: «Warinjiriye abapagani ugirako murasangira?» Niho rero Petero yabasigurira uko vyakurikiranye, avuga ati: «Nari mu gisagara c’i Yope ndiko ndasenga, hanyuma ndabonekerwa. Niho nabona ikintu gishusha n’umutamana, gihagatiwe mu mpande zine, kimanuka kiva mw’ijuru kiza kingana, kirateba kiranshikira. Ndacitegereza mbona ibikoko vy’imiryango yose, ibigenza amaguru ane, ibinyogomba n’inyoni zo mu kirere. Numva ijwi rimbarira riti: « Haguruka ufungure. » Nanje nti: « Oya, Muhanyi, sindigera mpumana. » Rya jwi rirasubira ubwa kabiri kuvugira mw’ijuru riti: « Ntuzokwigera uziririza ico Imana yazirukanije. » Iryo jwi ndaryumva gatatu kose. Hanyuma, ivyo nari nabonye vyose vyisubirira mw’ijuru. Buno nyene, abantu bantumweko bavuye i Sezareya baduturako amaguru. Mutima arahava arambwira kubaherekeza ntahigima. N’aba bagenzi batandatu mubona baramperekeje gushika kwa nyenukudutumira. Koroneriyo atubwira ingene Umumarayika yamubonekeye akamubarira gutuma i Yope kuri Simoni bita Petero, kugira ngo aze kumubwira icomukiza we n’abiwe bose. Ngo mbe ngitangura kuvuga, Mutima Mweranda abururukirako nk’uko yabitugiriye mu ntanguro. Nca nibuka ijambo ry’Umukama aho yavuga ati: “Yohani yabatirishije amazi, ariko mweho muzobatirizwa muri Mutima Mweranda.” None ko Imana yari yabahaye ingabirano nkatwe kuko bari bemeye Yezu Kristu, n’inda n’indesho nari guhaririza Imana!» Ngo bumve gutyo, basubiza hasi baninahaza Imana bati: «Yaragiriye n’abapagani imbabazi ngo bigaye babone gukira!»

*IZABURI 41 (42) ; 42 (43) 2, 3 ; 3, 4*

_Icit.: Umutima wanje uranyotewe Imana nzima, nzogenda ryari kuyihweza imbonankubone? Canke: Aleluya._

Kumwe inyemera inyotewe yirukira isôko, ni ko umutima wanje uguhurumbira, Mana mfise.

Umutima wanje waranyotewe Imana, ari yo Mana nzima; mbega, nzogenda ryari kuyihweza imbonankubone?

Ndungikira umuco wawe n’ukuri kwawe, maze bindongōre, binjane ku murwa wawe mweranda, nshike no mu birimba vyawe.

Nzoheza nshike ku ruhimbi rw’Imana, kwa Mana nyene ari yo kanyamuneza kanje. Nzonezerwa, nkuninahaze, ngucurarangire, Mukama, Mana mfise.

*INKURU NZIZA*

*_Aleluya._*

_Umukama yavuze ati : «Jewe ndi wa Mwungere mwiza ; ndazi intama zanje, na zo zikamenya. »_

*_Aleluya._*

_Ivyo dusoma mu Nkuru nziza ya Yezu Kristu nk’uko yashikirijwe na Yohani (10, 1-10)_

*Muri irya misi, Yezu yabariye Abayuda ati : «Ni ukuri ni ukuri ndabibabwiye : uwutinjiriye mw’irennbo ariko akamenera ahandi urugo rw’intama, ni umwivyi n’umushimusi. Uwinjiriye mw’irembo we ni umwungere w’intama. Ni we umurindarembo yugururira, intama na zo zikumva ijwi ryiwe ; ahamagara intama imwimwe izina ryayo, akaziturutsa. Amaze kuzisohora zose, akazija imbere, na zo zikamukurikira, kuko z**i ijwi ryiwe. Ntizikurikira kavantara, ziramuhunga riho, kuko zitazi ijwi ry’ab’ahandi.» Uwo ni wo mugani Yezu yabaciriye, ariko ntibategereye ico yashaka kubabwira. Yezu rero asubiramwo ati : «Ni ukuri ni ukuri ndabibabwiye : Jewe ndi irembo ry’intama. Abaje imbere yanje bose ni abivyi n’abashimusi , ariko intama ntizabumvirije. Jewe ndi irembo : uwunyinjiriyemwo azokira, azokwinjira ateko asohoke, aronke n’ubwatsi. Umwivyi azanwa n’ukwiba gusa, kuniga n’ugutikiza. Jeho naje ngo intama zironke ubuzima kandi ubuzima bwuzuye.»*

25/04/2021

IJAMBO RYA PAPA FRANSISKO KU MUSI MPUZAMAKUNGU UGIRA 58 WO GUSABIRA ITORWA

«Yozefu Mweranda : Indoto z’umuhamagaro»
Bavukanyi,
Igenekerezo rya 08 Kigarama 2020, aho twahimbaza imyaka 150 Yozefu
Mweranda atangajwe nk’Umuvunyi w’Ekleziya yose, niho hatangurwa umwaka udasanzwe wamuhariwe . Ku ruhande rwanje, naranditse ikete ry’ubutumwa nise «Umutima Kivyeyi» mu ntumbero yo guteza imbere urukundo dufitiye uwo Mweranda.
Yozefu Mweranda ni ishusho idasanzwe kandi iri hagufi y’ukubaho kw’umw’umwe muri twebwe. Yozefu Mweranda ntiyari umuntu atangaje, w’ingabirano zihebuje ngo aboneke nk’umuntu w’agatangaza mu maso y’abamubona. Ntiyari umuntu amenyekana, bisubiye nawe nyene ntiyashima kumenyekana: Inkuru nziza ntiyerekana ijambo na rimwe ryoba ryaravuzwe na Yozefu. Ariko mu buzima bwiwe bubayabaye, yaranguye ibintu bihambaye mu maso y’Imana.
Imana irabona umutima (Raba igitabu ca mbere ca Samuweli16,17), kandi no muri Yozefu Mweranda yarabonyemwo umutima kivyeyi ushoboye gutanga no gukabura ubuzima bwa buri musi.
Iyo ni nayo ntumbero y’imihamagaro yose: gukabura no gusubiza itoto ubuzima buri musi. Umukama yipfuza ko tugira umutima kivyeyi : imitima yugurutse, ishoboye kuja imbere abandi, yitanga bish*tse, yitwararika abababaye, idahugumbwa kugira ikomereze umwizero abandi.
Nico ibanga ry’ubusaserdoti n’ukwihebera Imana bikeneye uyu musi mu buryo budasanzwe, muri ibi bihe aho benshi ari ba ntamagara bikunyurwa n’ububabare buva kuri iki kiza c’indwara yugarije isi catumye hongerekana amakenga n’ubwoba kuri kazoza, bamwe bagatakaza n’intumbero y’ubuzima nyene. Yozefu Mweranda aje kudusanganira n’ubwitonzi bwinshi nk’umwerandamubanyi, tubangikanije umuryango; vyongeye, akarorero k’intahe yiwe karatwerekeza mu nzira nyayo.
Yozefu Mweranda atwigisha amajambo atatu yofasha umwe wese mw’ihamagarwa ryiwe:
Ijambo rya mbere ni «Indoto». Umuntu wese arafise indoto yipfuza ko yoranguka mu buzima bwiwe. Birabereye guteza imbere no gukomeza umwizero w’ibiramba kuruta ivyo bintu vy’umwanya muto : ishimagizwa, amafaranga, kuryoherwa … bitigera bihaza. Uwobaza abantu ngo bavuge mw’ijambo rimwe indoto y’ubuzima bwabo, ntivyogora kwiyumvira iyi nyishu : « urukundo ». Urukundo nirwo ruha intumbero ubuzima, rurabwerekanamwo ikinyegezwa. Kubisanzwe, ubuzima uburonka ari uko nawe wabutanze ; utunga vy’ukuri ari uko nawe watanze bikwiye.
Kuri ico Yozefu Mweranda afise vyinshi yotubwira kubera ko ukubaho kwiwe kwabaye ingabirano ifatiye ku ndoto Imana yamwoheje.
Inkuru nziza itubwira indoto zine za Yozefu (Raba Matayo 1,20 ; 2,13.19.22). Ni imihamagaro y’Imana ariko itoroshe kwakira. inyuma y’indoto yose, Yozefu yategerezwa guhindura imigambi yiwe akinjira mu migambi ihambaye y’ibinyegezwa vy’Imana. Yaragize ukwizigira kudasanzwe gushika mu mpera y’ubuzima bwiwe. Ariko rero, turashobora kwibaza: « Ni iyihe ndoto y’ijoro twoshiramwo umwizero ungana uko?» Iyo twitegereje cane kahise, nta kintu kinini kiboneka mu buzima bwacu gikomotse ku ndoto zidushikira.
Yozefu we, yaremeye kuyoborwa n’indoto adahigimanze. Kubera iki ? kuko umutima wiwe waguma werekeye ku Mana, akaguma agabiye kwakira ishaka ryayo. Kubera ko yaguma agavye imbere mu mutima, Yozefu yapfa kuronka akamenyetso gato gusa, agaca ategera ko ari ijwi ry’Imana. Ico turagikeneye natwe kugira ngo dutegere insiguro y’amajwi twumva mu mutima: Imana ntishima kwimenyesha mu buryo burangutse, mu guhata umwidegemvyo wacu.
Iturungikira imigambi yayo mu bwitonzi, itadutera ubwoba n’ibintu bica ibibatsi. Iregera nyabuna buke buke intimatima y’ubuzima bwacu, ikigira umwe natwe, igaheza ikatuganirira iciye mu vyiyumviro n’ivyipfuzo vyacu. Vyongeye, nk’uko yabigiriye Yozefu Mweranda, Imana ishaka kutwerekeza ku migambi ikomeye kandi ihambaye.
Indoto, zafashije Yozefu mweranda ivyo atari n’ugushobora kwiyumvira. Iya mbere yahungabanije umugambi wiwe w’ukwubaka urwiwe, ariko imugira se w’Umukiza; iya kabiri imugira impunzi mu Misiri, mugabo ararokora ubuzima bw’Umuryango wiwe ; iya gatatu yamubwira guhunguka agaruka mu gihugu ciwe ; iya kane ica iramuhinduza aho yashaka kuba i Betlehemu, imurungika i Nazareti aho Yezu yatanguriye kwigisha Ubwami bw’Imana. Muri ayo mahindagu yose, ukugumiza umutima kw’ishaka ry’Imana vyamuhaye intsinzi. N’uko bitegerezwa kumera no mu muhamagaro wose : Ijwi ry’Imana rirasunika imisi yose risaba gusohoka, kwitanga, kugenda gushika kure. Nta kwemera kutagira ikigeragezo. Igikenewe, n’ukwiheba mu kwizigira inema y’Imana, maze imigambi yawe n’ivyawe vyose ukabishira ku ruhande kugira ngo ushobore kwishura Imana uti : « Ego ». « Ego » yose itanga ivyamwa kuko iba ifatanye n’umugambi w’Imana uhambaye uza uratwiyereka muri iki na kiriya buke buke.
Muri iyo ntumbero Yozefu Mweranda aratubera akarorero k’ukwakira imigambi y’Imana. We yakira akarangura ico yakiriye, ntiyigeze aja kubiri n’ishaka ry’Imana. Yari umuntu akomeye kandi w’ishaka . Arashobora gufasha uwo ari we wese, cane cane urwaruka rugitohoza umuhamagaro warwo bagategera indoto z’Imana kuri bo; akabosha gufata ingingo y’ukwishura Imana bati « Ego », ata bwoba, bigana we igihe cose vyamushikira giturumbuka ariko akabirangura.
Ijambo rya kabiri ryerekana amerekero ya Yozefu Mweranda be n’umuhamagaro wiwe, ni «Ugusukurira abandi». Inkuru nziza iratwereka ingene yabayeho kubw’abandi atari ku bwiwe. Igihugu c’Imana kimwita «Yozefu Muziranenge». Iryo zina ryerekana ubushobozi afise bw’ugukunda mu kwiheba we nyene ataco yiziganirije. Kugira ngo urwo rukundo rwiwe ntihagire ikindi kiruboha, yarihebeye ugukenurira abandi bimwe birangutse, ubwo butumwa buraheza burarondoka. Ubukenuzi bwiwe bwuzuye urukundo bwabereye imfashanyo inzaruka zose; ukwama agavye kwiwe kwamugize Umuvunyi w’Ekleziya yose. Kuberako yabaye akarorero mu guheba ubuzima bwiwe, Yosefu yabaye Umuhagarikizi w’abacikana, kuko arazi neza agaciro k’imperezwa y’ubuzima. Ukwitanga kwiwe be n’utwigoro yagira vyarashobotse kuko vyari bikomotse ku rukundo rwiwe rutagira imbibe. Na none, « Umuhamagaro nyakuri wose ukomoka ku kwiheba, ari naco camwa c’ubusuku bwa misi yose». Ukwo kwiheba mu butumwa nikwo gusabwa mw’ibanga ry’ubusaserdoti niry’ukwihebera Imana. Aho umuhamagaro w’ukwubaka, ukwigumira uri umusore canke umwigeme udashikira urugero nyarwo rwo kwivako, ukagarukira gusa ku ciyumviro c’ukwiheba, aho kukubera ikimenyetso c’ubwiza n’akanyamuneza k’urukundo ; ushobora guhinduka amagorwa, umubabaro n’ukwijirwa.
Ugusukurira abandi, n’insiguro ifadika y’ukwitanga ; Yozefu Mweranda we yari inama nziza y’ubuzima bwiwe bwa misi yose, ntivyaherera mu cipfuzo gusa. Yaragerageje kurondera no gutunganya uburaro bwo gufasha mw’ivuka rya Yezu ; aritanga agira urugendo gihutihuti kugira akingire umwana ishavu rya Herodi ahungira mu Misiri ; arabanguka mu gusubira i Yeruzalemu kurondera Yezu yari yazimiye ; yafashije umuryango yaragijwe mu gukora n’igihe nyene yari inyambukira. Muri make, ivyamushikiye bitandukanye, yabibayemwo n’inyifato y’umuntu atihebura na gato iyo ubuzima butariko bumera nk’uko avyipfuza : aguma ari wa wundi ariho kugira yitangire abandi. Ni muri uwo mutima Yozefu yakiriye ingendo nyinshi z’ubuzima kandi kenshi giturumbuka : ava i Nazareti aja i Yeruzalemu kwisansumisha, ava mu Misiri asubira i Nazareti, ku mwaka ku mwaka agenda i Yeruzalemu ; igihe cose akama agabiye guhangana n’ibimushikira bishasha ata kwidoga ku nkuririkizi yoshobora kuba, agakora kugira ibintu bitonde. Twoshobora kuvuga ko yari ikiganza c’Imana k’Umwana wayo ngaha kw’isi. Ni akarorero k’imihamagaro yose, ihamagariwe : « kuba ibiganza bifasha Data ku bahungu n’abakobwa biwe».
Ndakunda kwiyumvira Yozefu Mweranda umurinzi wa Yezu n’Ekleziya nk’umurinzi w’imihamagaro. Mu mwitwarariko wiwe wo gufasha vyamuviriyemwo igikorwa co kuba Umurinzi. « Avyuka ijoro, afata umwana na nyina, ahungira mu Misiri » (Raba Matayo 2,14). Inkuru nziza irerekana ububangutsi n’ukwitanga afitiye umuryango wiwe. Ntiyata umwanya yiyumvira ku bidashoboka kugira ntatakaze canke ngo yakwe uwo yashizwe mu biganza.
Uwo mwitwarariko wo kwumviriza be n’ugushaka, n’ikimenyetso c’ihamagarwa rirangutse. Ni intahe y’ubuzima bwakozweko n’urukundo rw’Imana. Mbega akarorero k’ubuzima rukristu duhereza igihe tudakurikira ivyiyumviro vy’ivyo duhahamiye, tukareka gukongatazwa n’imibabaro yacu, ariko tukitwararika kuzigama ico Imana yatujeje iciye kuri Ekleziya. Imana iraheza ikadushungururirako Mutima wayo akatwosha ivyo dukora, igaheza ikikorera ivyiza nko muri Yozefu mweranda.
Hanyuma kandi, ijwi ry’Imana, rirangura indoto nyamukuru zacu, n’inyishu yacu, birangukira mu kwitanga kwa buri mwanya be n’ukwumviriza.
Ijambo rya gatatu ryaranze ubuzima bwa Yozefu Mweranda ari naryo ryoranga umuhamagaro rukristu uwariwo wose, rikawuyobora imisi yose, ni ijambo «Ubutungane». Yozefu ni « Umuntu w’intungane » (Raba Matayo 1,19), kandi mu gacerere ko gukora, imisi yose yaguma yitura Imana, akakira ishaka ryayo. Mu gihe kigoye, yariyubara akaringaniza neza vyose, akazirikana, akiyumvira, ntiyahuruduka na gato, kandi ntiyakurikira inyosha mbi za kamere-muntu, ntiyari njanye n’abaja. Yari umuntu abush*tse atakoreshwa n’ibishobisho. Vyose yabikora mu bwitonzi. Yarategera neza ko ubuzima bwa muntu bwubakwa no gufata ingingo zihambaye. Ivyo vyaragaragaye mu bwitonzi yaranguranye umwuga wiwe wo kubaza (Raba Matayo13,55), ntiyabereye akarorero abantu ba kera gusa, ariko gushika n’ubu niwe karorero k’umuvyeyi wese, k’umukozi wese, k’umukristu wese. Atwigisha ko umuhamagaro wose n’ubuzima bwose, bitanga icamwa gikomotse ku buzigamabanga bwa misi yose. None ubwo buzigamabanga buvomerwa n’iki?
Buvoma umuco wabwo mu budahemuka bw’Imana. Amajambo ya mbere Yozefu Mweranda yabwiwe mu ndoto ziwe, yamutumirira kutagira ubwoba kubera ko Imana ari mudahemuka kw’isezerano yayo. Yamubwiye iti : « Yozefu mwene Daudi, ntutinye » (Raba Matayo 1,20).
Ntutinye : iryo niryo jambo Umukama akubwira wewe mubikira hamwe na wewe mufurera, igihe cose ubura ico ufata n’ico woreka, ukagira amakenga; iryo jambo riragukabura ukumva ko utoreka gutanga ubuzima bwawe. Niryo jambo aguma akwongorera, aho uri hose, na cane cane muri ca gihe udategerwa ariko ukihatira gukurikiza imisi yose ishaka ryiwe. Ni ijambo ryama rigaruka igihe cose, mu muhamagaro wawe, ugarutse kuri rwa rukundo rwawe rwa mbere. Niryo jambo rigaruka nk’icitabirizo, rigaherekeza uwo wese abwira Imana mu buzima bwiwe ya « ego » imeze nk’imwe ya Yozefu Mweranda, mu buzigamabanga bwa misi yose.
Ubwo buzigamabanga niko kabanga n’isoko ry’akanyamuneza. Mu rugo rw’i Nazareti, nkuko akaririmbo kamwe kabivuga, harangwamwo « akanyamuneza kamuje kandi keranda». Ako kanyamuneza kari aka misi yose kandi kari kuzuye ubwitonzi. Ni ka kanyamuneza kuzura uwamaze gufata ingingo yo kudahemukira Imana n’abagenzi. Ese ingene vyoba vyiza ako kanyamuneza keranda kandi kuzuye, akanyamuneza katarenza urugero kandi kuzuye ukwizigira, kosaga amaseminari yacu, kagasaga imiryango yose y’Abihebeyimana be n’amaparuwasi yacu yose! Ako kanyamuneza niko mbipfurije bafurera namwe babikira, mwebwe mwitanze mutiziganije mukagira
Imana indoto y’ubuzima bwanyu, ngo muyikorere muri benewanyu mujejwe. Na none muri ubwo buzigamabanga bwanyu, murabera akarorero keza isi ya none, ikunda guhitamwo ibitagira mvura, igatwarwa n’ibishobisho bishira umwanya ariko ntibitange akanyamuneza. Ese Yozefu Mweranda, we Muhagarikizi w’imihamagaro yose, yobaherekeza n’umutima wiwe kivyeyi.

Bigiriwe i Roma, ku cicaro citiriwe Yohani Mweranda w’i Laterano, igenekerezo rya 19 Ntwarante 2021
Ku musi mukuru wa Yozefu Mweranda
Papa Fransisko


Vyahinduwe mu kirundi n’Ibiro Ndemeshabutumwa bw’Ibikorwa vya Papa vyo kumenyesha Inkuru Nziza ya Yezu Kristu mu Burundi.

24/04/2021

*_Idominika ya 4 ya Pasika B_*

*IGISOMWA CA MBERE*

_Ivyo dusoma mu gitabu c’Ibikorwa vy’Abatumwa (4, 8-12)_

*_Nta wundi muntu n’umwe ashobora kudukiza._*

Muri irya misi, Petero yuzuye Mutima Mweranda avuga ati: «Batware b’igihugu namwe bakurambere, ko uyu musi mutubazagiza kubera iciza twagiriye umuntu w’ikimuga, mukatubaza ico twamukirishije, nimuze mwabimenya mwese n’igihugu c’Israyeli cumve ko ico kimuga cakijijwe n’izina ry’Umukama wacu Yezu Kristu Umunyanazareti, umwe mwebwe nyene mwabamba, Imana ikamuzura akava mu bapfuye. Iryo Zina, ni ryo ryakijije uwo muntu ahagaze imbere yanyu. Yezu ni we rya buye, mwebwe abubatsi mwataye, ryabaye ishimikiro ry’imfuruka. Nta handi hari ubukiriro atari muri we, nkako, munsi y’ijuru, nta rindi zina abantu bahawe ryagenewe kudukiza.»

*IZABURI 117 (118) 1. 8-9, 21-23, 26. 28cd, 29*

_Icit.: Ibuye abubatsi bari bataye Imana yarigize iry’ishimikiro. Canke: Aleluya._

Shemeza Umukama, kuko ari mwiza, kuko Ubuntu bwiwe bwamaho imyaka yose! Hako wishimira abantu, worondera amahungiro ku Mukama; hako wishimira beningoma, worondera amahungiro ku Mana.

Ndagushemeza kuko wanyumviye, ukambera Umukiza. Rya buye batora bagashibura, ni ryo ryabaye iremezo: ivyo bitangaza twabonye vyabonetse ku bw’Umukama.

Aragahezagirwa Uwuje kw’izina ry’Umukama! Ni Wewe Mana yanje, nzogushemeza: ngushimagize, Mana yanje! Shemeza Umukama, kuko ari mwiza, kuko ubuntu bwiwe bwamaho imyaka yose

*IGISOMWA CA KABIRI*

_Ivyo dusoma mw’Ikete rya mbere ry’Umutumwa Yohani (3, 1-2)_

*_Tuzomubona nk’uko ari._*

Bakunzi banje, nimurabe urukundo Data yadukunze uko rungana tukitwa abana b’Imana, kandi turi bo. Igituma isi itatuzi, ni uko na we itamumenye. Bakunzi banje, n’ubu turi abana b’Imana, ariko ico tuzoba ntikiraboneka. Ico tuzi, ni uko aho kizobonekera, tuzosa na we, kuko tuzomubona uko ari.

*INKURU NZIZA*

*_Aleluya, aleluya._*

_Umukama yavuze ati: «Jewe ndi wa Mwungere mwiza: ndazi intama zanje, na zo ziranzi.»_

*_Aleluya._*

_Ivyo dusoma mu Nkuru nziza ya Yezu Kristu nk’uko yashikirijwe na Yohani (10, 11-18)_

*_Umwungere mwiza yigura intama ziwe._*

*Muri irya misi, Yezu yavuze ati: «Jewe ndi wa Mwungere mwiza. Umwungere mwiza yigura intama ziwe. Umucangero atari umwungere kandi atari we nyenintama, abona imfyisi ije, akazita aho, agahunga, nya mfyisi na yo ikazitwara kandi ikazishwiragiza. Ubwo rero, ahunga kuko ari umucangero atababaye izo ntama. Jewe ndi wa Mwungere mwiza, ndazi intama zanje na zo nya ntama zikamenya, nk’uko Data anzi nanje nkamumenya. Kandi ndigura intama zanje. Ndafise n’izindi ntama zitari muri uru rugo, na zo nyene mbwirizwa kuzizana zizokwumve ijwi ryanje kandi hazobe ubusho bumwe n’umwungere umwe. Ico Data ankundira ni uko ntanga ubuzima bwanje kugira ngo nze ndabusubireko. Nta wubunyaka, ni jewe nyene ubwanje ndabutanga. Ndi n’ububasha bwo kubutanga n’ubwo kubusubirako. Ni ryo bwirizwa nahawe na Data.»*

23/04/2021

Niwaba ufise Ingwara ikurembeje twakure tuguhe ububasha, dushobora kugukorera umuti w'indwara iyariy

22/04/2021

*_Indwi ya 3 ya Pasika : ku wa gatanu_*

*IGISOMWA CA MBERE*

_Ivyo dusoma mu gitabu c’Ibikorwa vy’Abatumwa (9, 1-20)_

Muri irya misi, Sawuli yahora ahama abigishwa b’Umukama abipfuriza urupfu, agenda ku muherezankuka mukuru, amwaka amakete ngo ashobore kuja mu masinagoga y’i Damasi kugira ngo niyabona abantu bakurikira inzira ya Yezu, abagabo n’abagore, abafate abajane i Yeruzalemu baboshwe. Ageze mu nzira ari mu gushikira i Damasi, buno nyene umuco uvuye mw’ijuru uramuhwikira. Agwa hasi, yumva ijwi rimubarira riti: «Sawuli, Sawuli, umpamira iki?» Arishura ati: «Uri nde, ga Mukama?» Umukama ati: «Ndi Yezu uriko urahama. Va hasi, ugende mu gisagara, ni ho bazokubwira ico ubwirizwa gukora.» Abantu bari bamuherekeje baca barahagarara, ubwoba bwabatekeye, batamariwe kuko bumva ijwi ata muntu babona. Sawuli ava hasi, ariko n’aho yakanura nta co yabona, bamufata ukuboko bamujana i Damasi. Amaraho gatatu ata co abona, ata co anywa, ata co arya. Ico gihe, i Damasi hariho umwigishwa yitwa Hananiya. Umukama aramubonekera amubwira ati: «Hananiya!» Na we yishura ati: «Ndi hano, Mukama.» Umukama amubwira ati: «Va hasi, ugende kw’ibarabara rigororotse, urondere mu nzu ya Yuda umuntu yitwa Sawuli w’i Tarsi, ariko arasenga.» Kandi Sawuli abona mu ndoto umuntu yitwa Hananiya yinjira akamugaranzurirako iminwe ngo abone. Hananiya arishura ati: «Mukama, numvise bavuga ko uyo muntu yagiriye nabi abatagatifu bawe i Yeruzalemu. Kandi ngaha afise ubukuru yahawe n’abaherezankuka bakuru ngo abohe abasenga bose.» Umukama na we ati: «N’ugende, kuko uyo muntu ari intumwa nitoreye ngo imenyeshe izina ryanje abanyamahanga, abami n’abana b’Israyeli. Kandi nzomwereka amagorwa azobona kubera izina ryanje.» Hananiya aragenda, ash*tse mu nzu, agaranzurira iminwe kuri Sawuli avuga ati: «Sawuli, mwenewacu, Umukama Yezu, umwe yakubonekera mu nzira, aho waza, yandungitse ngo ubone kandi uhabwe Mutima Mweranda.» Buno nyene homoroka utuntu ku maso yiwe, aca arabona. Ava hasi, amaze kurya arakomera. Sawuli amara imisi hamwe n’abigishwa bari i Damasi, aca atangura kwigisha ivya Yezu, ko ari we Mwana w’Imana.

*IZABURI 116 (117) 1-2*

_Icit.: Kwire isi yose, mushikirize Inkuru nziza ikiremwa cose. Canke: Aleluya._

Ntara zose, nimuninahaze Umukama! Bihugu vyose, nimumushemeze!

Kuko ubuntu bwiwe bwabaye akayazwe mu bantu, none na ryo iteka ryiwe ryamaho imyaka yose.

*INKURU NZIZA*

*_Aleluya._*

_Kristu yarazutse; umuco wiwe waratuboneshereje, twebwe yacunguje atnaraso yiwe._

*_Aleluya._*

_Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 52-59)_

*Muri irya misi, Abayuda baja mu gaharira, bavuga bati: «Uwo ashobora ate kuduha umubiri wiwe ngo tuwufungure?» Yezu arababwira rero ati: «Ni ukuri ni ukuri ndabibabwiye: mudafunguye umubiri w’Umwana w’umuntu, ntimunywe n’amaraso yiwe, nta buzima muzogira. Uwufungura umubiri wanje akanywa n’amaraso yanje, arafise ubuzima budahera. Nanje rero nzomuzura ku musi w’imperuka. Na none umubiri wanje ni imfungurwa y’ukuri, amaraso yanje na yo ni inyobwa y’ukuri. Uwufungura umubiri wanje akanywa n’amaraso yanje, aba muri jewe, nanje nkaba muri we. Nk’uko Data Nyenubuzima yantumye ari we ambeshaho, ni ko n’uwumfunguye ndamuha ubuzima. Uyo rero ni wo mukate wamanutse uva mw’ijuru. Ntumeze nk’umwe basokuru banyu bafunguye, hanyuma bagapfa. Uwuzofungura uyo mukate azoramba mu myaka yose.» Ivyo Yezu yabivuze yigishiriza mw’isinagoga i Kafaranawumi.*