29/03/2020
Faatalofa atu i si o tatou aiga Lotu i lenei afiafi o lona Sapati. Faafetai i lona alofa ma lona agalelei ua mafai ai ona tatou fesoota'i ai I luga o lenei auupega tafa'i lagi.
E fia faailoa atu i le mamalu, ua fa'atino ma amata lenei page mo lo tatou aiga ina ia mafai ai ona tatou fesoota'i pea a o feagai i tatou ma nei suiga ma tulafono a le malo, ona o le taumafaiga ina ia fa'aitiitia le fa'ama'i o feagai ma lenei atunu'u ae le gata i lea le lalolagi atoa.
O lo’o tatou i ai pea ma le lē mautonu i nei a*o e lē masani ai le lalolagi i nei ona po, ma o le mea ua mautinoa ua a’afia eseese i tatou i le fa’ama’i o le COVID-19. Ma ua atili ai ona tāua le mata’itūina e lē gata o le soifua maloloina i le tino (physical welbeing), ae fa’apea fo’i le soifua maloloina o le mafaufau (mental wellbeing), ma le agaga (spiritual wellbeing), auā o mea nei e tolu o lo’o fausia ai le tagata, ā afaina se tasi o nei mea, e afaina le tagata atoa.
O le saogalemu ma le soifua maloloina o le tino e mafai ona togafitia auā tatou te va’aia. O le saogalemu ma le soifua malolona o le agaga, o le matafaioi lea a Lotu ma Tapua’iga eseese. A’o le saogalemu ma le soifua maloloina o le mafaufau, e iloa gatā, ma e faigatā fo’i ona togafitia.
O le tagata e maua i le popole ma le fefe pe ā feagai ma mafatiaga ma ma’i ogaoga e pei o le COVID-19, e telē lona afaina i le mafaufau, e o’o lava iā tatou fanau. O le mea lea, e ui ina ua fa’asāina le toe feiloa’i i le tino, ae tāua mo le soifua maloloina o le mafaufau le fa’aaogaina pea o isi auala e feso’ota’i ai le tasi i le isi.
O taimi fa’apenei ia tatou manatua e malosi le agalelei ma le alofa i lō se isi lava mea. Ma ē moni o le tele o mea o lo’o tutupu i lenei fa’ama’i e lē o’o i ai so tatou malosi e taofia, ae i ai lava mea e mafai ona tatou faia e fa’atumauina le soifua maloloina o le mafaufau.
Ae tatou te le popole, tatou te le atuatuvale aua o lo o soifua lo tatou Atua. Ia mau pea le to'ovae, mauaa le fa'atuatua ma ia malosi le ola tatalo, tatalo atu mo outou si o tatou aiga Lotu Smithfield, tatalo mo e ua puapuagatia ma ua mana'omia le fesoa*oani.
Ia manuia tele lenei vaia*o, take care of yourselves, take care of our children and be safe. God Bless and God Be our refuge and our stronghold.
Alofaaga, Rev Va'alele Tapaleao & Tupulagafou ma le fanau. ♥️
