Tongan Catholic Chaplaincy Diocese of Parramatta

Tongan Catholic Chaplaincy Diocese of Parramatta Mālō e Lelei, Welcome to the Tongan Catholic Chaplaincy Diocese of Parramatta Official page

09/09/2026

Tu’apulelulu uike 23 Taimi Angamaheni
1 Kolinito 8: 1-7, 11-13
Luke 6: 27-38

Ko e ‘aho ni ‘oku tau toe fakafoki mai e fakahinohino pe ko e tohi ‘a Paula ke tali ki he ngaahi fehu’i e kaingalotu ‘o Kolinito. ‘Oku mahu’inga ko e ki’i kulupu ne kamata e Paula pea ko e ‘uhinga e ngaahi akonaki fakalaumalie ke fakatotonu ‘enau tui. Ka ko e fehangahangai mo e ngaahi tui kehe pe lotu pangani. Na’e kei fakahoko pe fokj he tui pangani e feilaulau monumanu, he ‘oku nau vaeua e monumanu ‘o tutu feilaulau e konga. Ko e konga pe vaeua e taha ‘oku nau ma’u me’atokoni leva mei ai pea ko e ‘uhinga leva e fehu’i. ‘Oku ngofua nai kenau kau he kai e monumanu ne momoi he feilaulau e ngaahi ‘Otua kehe. Ko e kolo foki a Kolinito ‘o kau ta’e tui ‘Otua pea na’e faingata’a pe ki he kalisitiane kenau tau’ataina. Ka ko e tali e kainga Kalisitiane na’e ua ko e ni’ihi ne tui ‘oku hala pea ‘oku tapu kenau kai. Ko e konga leva e taha ne malohi ‘enau tui, ne nau pehe koe feilaulau ki he Otua loi. Koia ai tau kai e tautolu e kakano’i manu ke ‘aonga he ‘oku ‘ikai ketau tui kitautolu ia kiai. Ka ko e tali ‘a Paula ne feinga ma’u pe ke malu’i loua e ongo tafa’aki ka ko e akonaki eni ke fanongo kiai e kau taki mo e kau Patele.

Ko e akonaki ‘a Paula ‘o pehe ‘e saipe tafa’aki ia e kau tui malohi te nau kai pea ‘e kei tu’uma’u pe ‘enau tui. Ka ko Paula ne fu’u tokanga ki he kau vaivai e tui he ko e ni’ihi ia ‘oku pelepelengesi ‘enau tui. ‘Oku totonu pe kenau faka’ehi’ehi mei ai ko e ‘uhi pe ko e kau vaivai ke kei malu’i pe ‘enau tui. Ko e ‘aho ni ia ko e kakai ia ‘oku lahi ‘aupito hono li’aki he ‘oku lau ia he kau tui malohi ko e fakakavenga mo e fakaefiefi. Ko Paula ne hange tonu peia ko Sesu, ko e kakai ia ‘oku mahu’inga pe ‘oku hoifua kiai e ‘Otua. ‘Oku mahu’inga ke malu’i ‘enau tui mo fakaloloto he ‘oku nau kei fononga mo e veiveiua. He ko ‘ene ai pe ha me’a e hoko ko e kakai pe ‘eni ia e ‘uluaki tafoki pe tui ka ko e kakai vaivai. Ko e kau malohi ‘oku fiema’u ma’u pe keke sio fakalukufua pea toe fakakaukau ki he kau vaivai he tui. Ko e fehu’i kuo ke ‘osi sio ha kakai pehe ho’o kaingalotu, komunio pe Palokia. Ko e fakamanatu mai ia e Paula he ‘aho ni ko e ‘Otua ‘oku tokanga makehe ia ki he kakai pehe.

Ko e Ongoongo ‘a Luke ‘oku ne fakamo’oni mai hotau natula tangata, ko e tangata kotoa pe ‘oku tau loto ketau mu’omu’a ma’u pe. ‘Oku ‘ikai ketau ako’i ha taha ke fakamuimui ka ‘oku tau ako’i ke ne lava ha me’a mo lava lelei. Ka ko Sesu ia ‘oku ne ako’i ia kitautolu ketau mu’omu’a ‘i he mahu’inga ‘o hevani ‘ikai ko mamani. He ko e Folofola ia ‘oku tau fanonga ko e fakahinohino ‘a Seau, ko ko e koia ‘oku fie muimui kiate ia. Ko koe leva teke mu’omu’a he ‘ofa, tamu’omu’a he fakamolemole pea toe tamu’omu’a ke foaki. Ko e ‘uhinga ia ‘oku ‘uluaki fonu ma’u pe ‘a e konga kimui e falelotu ia he konga kimu’a e falelotu. He ko hono ‘uhinga pe ko e ngaahi fakahinohino koia ‘a Sesu ‘oku mamahi ia ki he fanongo. ‘Oku fefe ho’o fakakaukau koia ki he ngaahi tu’uaki loi he tv moe net. Na’a ku kamata kau foki moau ai he feinga ke holo e sino pea muimui he ngaahi founga. Ko e tu’uaki talamai ko e faingofua mo vave hili ange koia ko e ngaue lahi mo e kalusefai lahi. ‘Oku ‘ikai keke fakakaukau ‘oku pehe mo e fakahinohino ‘a Sesu ki he mo’ui fakalaumalie. ‘Oku pehe he kakai tokolahi ia ko e me’a faingofua e lotu mo e mo’ui fakalaumalei. Ko e ‘aho ni kataki ‘oku famanatu mai ‘e Sesu ko e ngaue ia ‘oku lahi pea ‘oku mo’oni ki he kakai mo’oni ‘ikai ko e kau pelesitiki.

Ko e taha foki ‘eni ia e fakahinohino ‘a Sesu ‘oku ne tuku mai ketau fakakaukau’i e tali. Ko e me’a pe a Sesu ke fakahaa mai pea ko koe leva ia pea moau keta fakakaukau pe anga fefe. ‘Oku hange pe ko e Ongoongo lelei ‘o e ‘aho ni, ko e Folofola ia ‘a Sesu; ofa ki ho’o fili, fai lelei ki he kakai ‘oku fai kovi atu pea ke tapuaki’i e kakai ‘oku fakatupu mala atu. ‘Oku ke fakakaukau tatau mo e me’a ‘oku tala atu e Sesu? ‘Oku ‘ikai pe ke toe tala atu e Sesu a me’a ke ua keke fili ai ‘oku taha pe ho’o fili ia. Ko e konga mahu’inga ‘e taha ko e tui, ‘oku pehe he kakai ‘e ni’ihi ko e tui ‘oku malava kenau vahevahe. Ka ko e akonaki ‘a Sesu koe tui ia ko e ngaue ka ‘oku ‘ikai ko e vahevahe pe. Hange pe koia kuo tau sio ai he media e tu’u e kakai ke malu’i e malanga pe akonaki e kau faifekau. Ko e takitaha taukave’i ‘enau tokatelino pe tui he ko e kakai ia ‘oku nau pehe ko e tui ia. Ko e malu’i pe poupu’i pea tu’u vahevahe e mo’oni ka ‘oku fakamanatu mai ‘e Luke. Ko e tui ko e to’onga mo’ui pe ko e ‘ulungaanga ka ko e ‘ulungaanga ia ‘ia Kilisito. Ko e ‘uhinga te ke sio ai he angapalaku lea palaku mo e to’onga palaku ne media ka ko e kakai hotau fonua. He ‘oku nau fakakaukau ko e tui ko e taukave’i mo e mamahi’i me’a kae tekeutua mai e angapalaku. ‘Eiki e keke ‘alo’ofa mai a ki homau mamani.

08/09/2026

Pulelulu uike 23 Taimi Angamaheni
1 Kolinito 7: 25-31
Luke 6: 20-26

‘Oku ui foki e Luke ia e fakahinohino ko ‘eni ko e malanga ‘i he tele’a. Ko e to’o pe ‘e Luke ‘a e akonaki mo e fakahinohino ko ‘eni mei he Kosipeli ‘a Matiu. Ko e ngaahi me’a peia na’a tau vahevahe kiai he ngaahi uike kuo mahili atu. Ka na’e ui foki ia e Matiu ko e malanga ‘i he funga mo’unga pe ko e fekau fo’ou ‘a Sesu. Ko e talanoa foki ia e Kosipeli ‘a Luke na’e ‘i he funga mo’unga ‘a Sesu ‘o lotu ko e me’a angamaheni peia. Na’a ne hifo leva mei he funga mo’unga ke fili ‘ene kau Akonga e toko 12. Ko e ‘uhinga ‘a Luke ko e hifo a Sesu ke levolo moe kakai ke fai ai ‘ene malanga. ‘Oku manatu’i e Teolosia ‘a Matiu ne to’o ia mei he fuakava motu’a ke fakatatau kia Mosese. Ko e mo’unga e feitu’u totonu e fakahinohino ‘a e ‘Otua, ka kia Luke ia ‘oku kehe ‘ene sio ia kiai. Ko e Teolosia leva ia ‘a Luke ko Sesu ia na’e malanga ia ki he fu’u kakai kehekehe. Ka ko e malanga ia ‘i he tokalelei kia Luke ko e akonaki ‘a Sesu ki he kakai kehekehe mo e kau ta’e tui ‘Otua. He ko ‘enau ‘aukolo mai kia Sesu ke fakamo’ui kinautolu ka ko e tui ‘a Luke ‘oku fiema’u kenau fanongo kae toki fakamo’ui.

Ko e Kosipeli ia ‘o e ‘aho ni ko e fakahinohino ‘a Sesu ki he fu’u kakai ka na’e sio fakamama’u ‘a Sesu ki he’ene kau Akonga. Ko e ‘uhinga ko e fakahinohino ko ‘eni ‘oku felave’i ia mo e nunu’a pe fakamole ‘o e muimui pe hoko ko ‘ene tisaipale. Ko e founga ia hono tohi pe fakahinohino ‘oku fai e Luke ke fakamahino mai e tefito e misiona mo e mo’oni ‘a e ui ‘a Sesu. ‘Oku ne ‘omai e mo’oni mo e uho ‘a e fakahinohino ‘a Sesu ‘i he kamata’anga pe, ‘oku kehe ‘aupito peia meia Matiu mo Ma’ake. He ko e teolosia mo e mo’oni faka-‘Otua ke faka’amu kiai ‘a Luke; ko e mahu’inga e tangata ‘o fakatatau ki he ui ‘a Sesu. Ko e fakahinohino ia ‘oku tau ‘amanaki ke fanongo kiai, ko ‘ene ngaue ‘aki e ngahai lea talatuki. Ko e hili pe ‘a e ngaahi tapuaki pea toe fakamahino atu pe mo e ngaahi fakamala pe ngaahi me’a fakamala’ia. ‘Oku tau ui foki e ngaahi lea koia ko e ngaahi talatuki pe fakamala’ia. ‘Oku ‘uhinga ‘a Luke ko e ‘ikai pe ke tau fakahoko e ngaahi fekau ‘o e tele’a ko e teuteu leva ke mala’ia.

Ko e taumu’a foki ia e Kosipeli ‘a Luke ko e natula mo’oni e tangata ki he fili ki he muimui kia Seau. Ko ‘ene ‘ikai pe ke hoko ko e tapuaki pe fakamonu’ia pea teuteu leva ki he fakamala’ia. Ka teu lave au ki he talatui pe lea mamafa ‘a Sesu, ‘oiaue si’i kau tu’umalie kuo fonu ho’o kete he ‘aho ni. Ko e hoko mai koia e Pule’anga ‘o e ‘Otua e pakoko pea lafalafa ho’o kete he fiekaia. Kainga manatu’i ko ‘eku feinga pe ‘eni ke mahino e fakahinohino ‘a Sesu ka ‘oku ‘ikai ko e lea mo’oni ia. ‘Oku ‘ikai ke ‘uhinga ‘a Luke ‘oku kovi e tu’umalie pe ma’u me’a pe ma’u pa’anga. Ka ko e ‘ofa he pa’anga mo e koloa ko e me’a ia ‘oku palopalema pea ko e me’a ia ‘oku fakatokanga mai kiai ‘a Sesu. Ko e ‘uhinga ‘a Luke ‘oku pehe; ko e taimi pe ‘oku lahi ai ho’o koloa pe fonu ho’o tohi pangike. ‘Oku to leva e tangata he illusion pe ko e mohe misi koia ko e ‘ikai ketau toe fiema’u e ‘Otua. Ko e ‘uhinga pe ‘etau fiema’u e ‘Otua kapau ‘oku ‘ikai ke ai ha’o koloa pea ko e palopalema ‘eni kuo hake uta ‘i Tonga. Na’a tau tupu masiva ko e melino mo vaaelei ka ko e ma’u me’a pe. Kuo ‘ulu pupula pea lea lahi lea palaku mo ta’e faka’apa’apa ko e ‘uhinga ia ‘oku fonu ai hotau kete he ‘aho ko e kovi. Ka ko e hoko mai e Pule’anga e ‘Otua e lafalafa ho’o kete ko e ‘uhi teke masiva mo pakupaku. He ko e fakatokanga mai ia mo e akonaki ‘a Sesu ‘oiaue si’i kakai Tonga mou ‘ofa mai a ‘o tui mo’oni kia Sesu.

07/09/2026

Tusite uike 23 Taimi Angamaheni
Maika 5: 1-5
Matiu 1: 1-16, 18-24

“Ko e ‘aho katonga ‘o e fa’ele’i ‘o Malia”

Ko e talateu mo e Palofita ko Maika pea mo hono fili he Siasi ke hoko ko e Folofola ke ngaue ‘aki he ‘aho katoanga ko ‘eni. Ko e tu’i e 3 he kuonga ‘o Maika ‘a ia ko Soakimi, ‘Ahasi pea mo Hesekaia. Ko e mahu’inga
‘ene palofisai he ko e ta’u ia kimu’a pea faka’auha e Pule’anga Siuta pe ko Selusalema. Ka ko e taimi ne nofo tailiili mo manavahe ai ‘a Siuta ki he kau tau mei he fakatonga. ‘A ia ne ai e kau ‘Asilia na’a nau takihee’i ‘a e vahe Samelia kae pehe foki ‘enau nofo ‘o toe ilifia ki Papilone. Ka ko Maika ‘i he’ene sio tonu mo mamata hono faka’auha pea mo taki hee’i e kakai Samelia. Na’e hoko ia ko ‘ene fakatokanga ki Selusema pe vahe Siuta he ko e founga tatau pe ‘e hoko kia kinautolu. Ko e me’a lalahi e ua na’a nau maumau’i, ko e tauhi ki he ‘Otua loi pe tamapua, pea moe taki pe tu’utu’uni’i ta’e faitotonu. Ko e me’a koia ketau ako meia Maika ne hiki ‘ene Palofisai ia mei Selusalema he kuo hoko ia ko e uhouhonga e kovi. Kuo fa’ofale ‘a e ta’e faitotonu mo ngaohi kovia e kakai pea mo e kau masiva he founga hala e kau taki. Ne ‘alu leva ‘a Maika ia ‘o palofisai mo talaki e palani e ‘Otua ‘i Petelihema pe mo e fale ‘o e maa. Ko e talaki ia he Palofita ko Maika ki he kakai ‘Isileli ka neongo e ta’efaitotonu mo e taki hala. ‘Oku palomeesi mai he ‘Otua te ne toe ‘omai ha taki pe ko e tokotaha ‘i Petelihema pe ke hoko ko e Misaia ‘E ‘ikai ke fanau’i e Misaia ‘i Selusalema ka ko e ki’i kolo si’isi’i mo e kolo ‘oku ‘ikai ke malu. Ko e kolo e kakai ngaue mo tauhi monumanu pe ka kuo fili ia he ‘Otua ke toe fanau’i mei ai e Misaia.

Ko e tefito e akonaki ‘a Maika ke fakamahino ko e ‘Otua ‘oku ‘ikai ke ne ngaue’aki e ivi malohi fakakautau, pe pa’anga pe koloa. ‘Oku ‘ikai ke fakafalala e ‘Otua ki he ivi e tangata ke fakahaofi ‘aki hono kakai. Ko e ‘Otua ‘oku fili ha me’a angama’ulalo mo angavaivai mo me’a angamaheni pe ke kamata mei ai hono fakahaofi ‘o ‘Isileli. Ko e to’onga tatau peia ne fili ‘aki he ‘Otua ‘a Malia ke hoko ko e Fa’e ‘a e Misaia. Ko e fefine na’e angavaivai, fakamasivesiva mo fakatokilalo he ko e me’a ia ‘oku hoifua kiai e ‘Otua. Ko e ‘uhinga leva ia hono ngaue ‘aki ‘o Maika he ‘aho ni ko e fakamo’oni ia ki he fakakakato he ‘Otua ‘ene palomeesi. Kuo fakakakato e palomeesi ne tala he Palofita ko Maika he feitu’u ko Petelihema. Ka ko e hositolia hotau fakahaofi ne kamata ia mei he fefine pea ko e fefine koia ko e fili peia ‘a e ‘Otua. Ko e fefine kuo pau ke ne ma’u e ‘ulungaanga tatau mo Petelihema ‘i he lau ‘a Maika. Ko e kamata’anga e ngaue ‘a e ‘Otua mo e me’a ‘oku hoifua kiai ko e angamaheni. Ka ko e kakai ‘oku nau falala ki he ‘Otua ka ‘oku ‘ikai ko e kakai ‘oku nau falala ki he ivi, malohi mo e koloa pe pa’anga. Ko e talaki ia e Maika ka ko e taimi koia ‘e hanga ai he fefine ‘o fanau’i e Misaia ‘i Petelihema.

Ko e fakamahino mai he Folofola mo e katoanga e ‘aho ni, ko e ‘Otua ‘oku ‘ikai ke sio ia ki ho’o lahi ka ‘oku sio ia ki ho’o ma’u ‘anga mo’ui. He ko e ‘uhinga ‘uluaki peia e Palofita ‘e ‘ikai ke ha’ele mai e Misai mei he ha’a tu’i, pe palasi, pe koloa, ivi mo e malohi. Ka ‘oku ha’u ia mei he founga ‘o e falala pe ki he ivi ‘o e tangata, ko e tokotaha ia ‘oku falala ki he ‘Otua. Ko e ‘Otua ia ‘oku ‘ikai ke vaka mai he mo’ui polepole pe malohi ka ‘oku ha’ele mai ia he me’a ta’e’iloa. Ko e ‘Otua ia mo e kamata ‘ene ngaue na’a ne fiema’u ha loto mo’oni ka ‘oku ‘ikai ko ha kalauni pe fakalangilangi’i. Ko Malia na’a ne ‘osi ‘ilo pe ‘e ia ‘a hino fika’i ‘o hevani he ko ‘ene tali ia he’ene hiva fakavikiviki. Ko hono laumalie ke fakahikihiki ki he ‘Eiki ko hono ‘Otua, he ko e anga fakatokilalo ia ‘a Malia ko e ‘ilo hono laumalie. Ko e fili ‘e he ‘Otua ‘a Petelihema ke fakatatau ki he to’onga ‘o Malia ke fanau’i ai ‘a e Tu’i ‘o e ngaahi tu’i mo e ‘Eiki ‘o e ngaahi ‘Eiki. Ko e taimi kotoa pe ‘oku ke ongo’i si’isi’i, pe li’aki pe si’aki pe to mei ha fili ‘o ha me’a pea ke manatu’i leva ‘a e founga ko ‘eni ‘a e ‘Otua. He ko e taimi pe ‘oku hanga kehe ai e kakai ko e taimi ia ‘oku tokanga atu ai e ‘Otua kiate koe.

Ko e Ongoongo lelei ‘a Matiu mo e tohi hohoko ‘o Sesu ka ko e founga ne fakahoko ‘e Matiu. ‘Oku ‘ikai foki ke tau fakatokanga’i he tohi hohoko e maumau’i e Matiu e anga faka-Siu. Ko hono hiki mo ha kakai fefine he tohi hohoko, he ‘oku ‘asi ai ‘a Tamala, Lehapi pea mo Lute ko e ‘uhi ke nau hohoko kia Malia. Ko e kau fefine ko ‘eni na’a nau tonounou pe ka ko e fakamahino mai he Ongoongo lelei. Ko e ‘Otua ‘oku ne fiema’u e haohaoa faka-e-tangata pe ko e lelei fakamamani ke fakakakato ‘aki ‘ene palani. Ko e fili ia e ‘Otua mei ha kolo ta’e’iloa pea mo ha fefine ne anga vaivai pe. Ka ko e kakai ia pe fefine ia ne hoifua kiai e ‘Otua ke vaka mai ai hono ‘Alo ki mamani. Ko e tohi hohoko ‘oku vahevahe ki he konga lalahi ‘e 4 ‘i he vahevahe ‘o e ha’a pe hako ‘e 14. Ko e talanoa fakafika ia ‘a Matiu ko e 7 tanaki mo e 7 pea ko e kuonga ia e taha. Ko e talanoa fakafika ia ‘a Matiu ki he ta’u lahi e tatali ‘a ‘Isilelei ke hoko mai e Misaia. Ka ko e fakamanatu mai e Malia koia pe e fefine ne fe’unga mo e loto vaivai ke tatali fiemalie pe ki he taimi ‘o e ‘Otua. Ko e kakai kitautolu ‘oku hanu, launga pe ‘ikai malava ke ki’i tatali ka ko e fakamanatu mai e Malia ko hotau fakamonu’ia ‘anga peia. ‘E Malia keke hufaki mai pea mo ke tataki atu kimautolu ki he hala ‘oku totonu!!

06/09/2026

Monite uike 23 Taimi Angamaheni
1 Kolinito 5: 1- 8
Luke 6: 6- 11

‘Oku aipe me’a mahu’inga ketau talanoa kiai pea ke mahino e tu’unga koia ‘i Kolinito fekau’aki mo e 1 Kolinito vahe 5. ‘Oku anga ta’e faka’apa’apa ia ketau talanoa ‘i he’etau lea ka ko e fa’ahinga mo’oni mo e palopalema ‘oku kei hoko pe he ‘aho ni. ‘Oku fekau’aki ‘eni mo e ma’u hala e kakai Kolinito fekau’aki mo e kalasia pea ko e tau’ataina. Kuo kamata ke ‘asi e anga ta’etaau fakasekisuale (sexual immoral) he kainga lotu pea fakakaukau pe ‘oku saipe ia. Ko e ‘uhinga e tohi ‘a Paula ke fakamavahe’i e tangata anga fuli kivanu koia pe ‘ikai ke fie fakatomala. Kuo pau ke ui leva e tokotaha ia koia kuo tuku ia kia Setane kae ‘oua kuo ne fakatomala. Ko e faka’amau ‘a Paula ke malava he tangata ko ‘eni ‘o fakatomala kae malava ke ne ma’u e fakahaofi fakalaumalie. Ko e ma’u hala ia e kakai ki je tau’ataina mo e kalasia ‘o e pekia ‘a Sesu he kolosi. Ko e fakakaukau ko e tui pe kia Sesu kuo tau ‘osi fakahaofi kitautolu ia pew neongo aipe ha angahala. ‘Oku kei fakahaofi pe kitautolu ia he pekia ‘a Sesu ‘i Kalevale ka ko e pekia ta tu’otaha kae fakamolemole ta’engata. Ko e palopalema ia ne fekuki mo e kakai Kolinito ka ko e fakahinohino ‘a Paula ke fakamavahe’i e kakai koia. ‘Oku fiema’u kenau ‘ilo ko e ‘ulungaanga kovi ‘aupito ia ka ko e faka’uliki ‘aupito e laumalie mo e fakahaofi e tangata.

Ko e taha e me’a ‘oku toe fakamanatu’i he Ongoongo ‘oku fekau’aki ia mo e sio ‘a Sesu ki he Falesi ko e fai fakamaau fekau’aki mo e Sapate. ‘Oku fa’a ui e sio ko ‘eni ko e (rock bottom) pe ‘oku tatau ia mo e konga aisi ne tui’i he Titanic. Ko ha me’a ‘oku ngali ha si’isi’i ‘i ‘olunga ko ko e konga palaku taha ‘oku puli ia pe ‘ikai ke ‘ilo ha taha. Ko e fekau’aki ia ko e fakakaukau faka’otua e kau Falesi ‘o fekau’aki mo e Sapate. Ko e ha koa e taumu’a e Sapate? Ko e taimi foki ‘eni ne kamata ke manakoa pe ‘iloa ai ‘a Sesu, ka ‘i he tafa’aki ‘e taha ne hange ia ha fanga monumanu e kau Falesi mo e kau Sikalaipe he fehi’a kia Sesu. Ko e konga hono ua ‘eni he Ongoongo lelei ‘a Luke, ko e ‘alu ‘a Sesu ki honau vahe pe ko e sinakoke. Ko e me’a ia ne kakaha ai e ‘ita e kau Falesi ko ‘ene maumau Sapate he sinakoke. Ka ko e fehu’i ko e ha ne loto aipe ‘a Sesu ia ke faka’ita mo feinga ke pakalava pe kau taki lotu he ‘ita.

‘Oku foki e talanoa e Folofola ia ki he fuakava motu’a ki he Torah, ko e ‘aho Sapate ko e ‘aho ‘o e malolo mo e fakahaofi. Na’e toe fa’u foki e kau Sikalaipe ia e lao ko e lao fakamatala pe, pea ‘oku ‘uhinga ia ko e ngaahi ngaue kehekehe ‘e 39. Ko e ngaahi ngaue ia ne nau fa’u ke ta’ofi ‘aki e tangata ko e ‘uhi ko e maumau Sapate. Ne kau mo e fakahaofi pe tokoni fakafalemahaki kia taha he ta’ofi he Sapate. Ka e ‘oleva pe kuo ‘amanaki ke mate ha taha pea toki fakangofua leva keke tokoni ki he tokotaha koia. Ko e konga mahu’inga leva he vahe 6 ne ‘ikai ke ‘alu e kau Falesi ia ki he Sinakoke ke fanongi Folofola. Ko e ‘uhinga pe ‘enau ‘i ai ke lama’i mo fakamaau’i ‘a Sesu pe te ne fakamo’ui e tangata nima mamatea. He ‘oku hiki tohi pe ‘e Luke na’a nau nofo pe ‘o sio mo tatali pe ‘e hanga ‘e Sesu ‘o fakamo’ui e tangata nima mamatea. Nae ‘ikai ke fakataumu’a e ave ‘a e tangata nima mamatea ke fanongo mo fakamo’ui hono laumalie. Ka na’a nau ave e tangata nima mamatea ake tauhele’i ‘aki ‘a Sesu ke ne maumau’i e lao ‘o e Sapate.

Na’e ui leva e Sesu e tangata ke tu’u he uhouhonga e kakai he sinakoka, ko e faka’amu ‘a Sesu kenau sio ki he’ene faingata’a’ia. Ko e fa’ahinga founga poto ia ‘a Sesu ki hono ‘omai pe ‘enau tauhele ‘o toe tauhele’i ‘aki pe ‘a e kakai kovi. Na’e fehu’i leva ‘e Sesu kia kinautolu pe ‘oku ngofua nai he lao ‘o e kakai Siu kenau ngaue lelei pe fai angahala he ‘aho Sapate? Ko e fa’ahinga losika koia ‘o e ‘ikai ke mahino ha tali e kau Falesi. Kuo nau hoko ai ko e kau fakalongolongo pea ko e ‘uhinga leva ‘a Sesu. ‘Oka pau leva ‘oku ‘ikai kenau lava o tali e fehu’i ‘a Sesu ta ‘oku nau kau mo e tafa’aki ‘e taha. Kuo kau fili kenau faka’auha pe faikovi he ‘aho Sapate he ‘oku ‘ikai kenau tali e fehu’i ‘a Sesu. Ko e ‘uhinga tefito foki e fakahinohino ‘a Sesu ko hotau ui ke muimui kiate ia. Ko e ui ketau ngaue’i ‘etau to’onga mo’ui ka ‘oku ‘ikai ko e fakalongolongo’i e to’onga ‘oku kovi. He ko e taimi lahi ‘oku tau hange pe ko e kau Falesi ‘oku haa matamatalelei mai pe ka ‘oku puli e konga lahi e kovi. Ko e konga palaku taha ‘oku kei puli pea ‘oku ‘ikai pe ke ngaue’i ia he ‘oku nofo peia ‘o talitali. Ka ko e ngaue lelei pe ui ki he ngaue ‘ofa ‘oku ne fakatupulekina e mo’ui mo e fakahaofi fakalaumalie. Fakamo’ui mo tapuaki’i a kimautolu he ‘aho ni ‘Eiki, ‘i he Huafa ‘o e Tamai mo e ‘Alo mo e Laumalie Ma’oni’oni!!!

Koe ngaahi ‘ata ‘ena he lava lelei e Ouau Misa Fakafeta’i ‘a e Kautaha Malia e Taiosisi ‘o Parramatta na’e fakahoko he p...
05/09/2026

Koe ngaahi ‘ata ‘ena he lava lelei e Ouau Misa Fakafeta’i ‘a e Kautaha Malia e Taiosisi ‘o Parramatta na’e fakahoko he pongipongi ‘o e ‘aho ni he Falelotu e Holy Famil ‘i Emerton. Na’e fakahoko ‘e Patele Taliai Hausia ‘a e Misa pea ko e faifatongia ko e Kautaha Malia e Komunio e Tauhi Sipi Lelei mei Plumpton.

Na’e lava lelei aipe ‘a e Inservice mo e Ako Ma’ae Kakai Lalahi ‘i he hili pe Misa ‘a e Kautaha Malia koe inservice faka’osi peia ki he Ta’u ni. ‘Oku ‘oatu ha fakamalo ki he Taki e Taki Mo’ui Kalisitiane ‘a e PTCC Hingano mo e Timi, Kaufaiako mo kimoutolu nemou lavamai ki he polokalama ako ni. Talamonu atu ki he toenga e ngaahi fatongia ki he Ta’u ni🙏

04/09/2026

‘Aho Tokonaki uIke 22 Taimi Angamaheni
1 Kolinito 4: 6-15
Luke 6: 1- 5

Luke vahe 6 ko e kamata ‘eni ke kakaha e fakafep**i mo e fakafili e kau taki lotu kia Sesu. Ko e taha ia e me’a ne nau mamahi lahi ai kia Sesu ko e ‘uhi pe ko e ‘aho sapate. Ko ‘enau tui leva kuo maumau’i e Sesu e lao ‘o e ‘Otua fekau’aki mo hono tauhi e sapate. He ko e talanoa foki ia e Ongoongo lelei ‘o e ‘aho ni ‘oku fekau’aki ia mo e fononga atu he sapate ‘i ha ngoue’anga. Na’a nau p**i pe toli e koane he ‘aho Sapate ‘o nau kai pea ‘oku tapu ‘aupito ‘eni he kakai Siu. Ka na’e ai pe taimi ‘oku ngofua ai pea ‘oku fakatefito peia ki he kakai masiva. ‘Oku ngofua ia ke nau ‘alu ki ha ngoue ‘anga pea ke nau ma’u me’a tokoni mei ai. Teutalonome 23: 25 Kapau te ke hū ki he ngoue uite ‘a ho kaungā‘apí, ‘e ngofua ke ke toli ‘a e ngaahi koane ‘aki ho nimá, ka ‘e ‘ikai te ke ‘ai ha hele ke tu‘usi ki he tu‘unga ‘aki e koane. Na’e fa’a ui pe ‘eni ia ko e lao ‘o e faimeesi ke fakafaingamalie kakai masiva kenau ma’u me’atokoni. ‘Oku ke manatu ki ne lao ‘o e ta’u siupeli, ko e lao tatau pe ko hono tukuange ‘a e fua e ngoue ke kai mo mo’ui ai e kakai kae pehe pe ki he fanga monumanu.

Ko e taha ia e uho mo e fakahinohino ‘a Sesu, ko e ha e lao ‘oku hoifua kiai e ‘Otua? Ko e fakataputapu kae mate fiekaia e kakai pe ko e lao ‘o e faimeesi pea mo fiu ai ‘a hono kakai. ‘Oku ‘ikau ko e palopalema ‘enau hala loto’api pea toe ala noa’ia ki he ngoue e kakai. Ko e palopalema ia he Ongoongo lelei ko ‘enau p**i e koane he Sapate. Ko e faka’amu ia e kau taki lotu kenau ongo’i tautea he kovi na’a nau fakahoko ka ko e maumau’i e sapate. ‘Oku ‘ikai ko e p**i e koane ka ko ‘enau mili koia e koane pea nau kai. Ko e fiema’u kenau ongo’i tautea he kovi pe maumau lao ne nau fakahoko. Ko e fakakaukau ia e kakai Siu ka ‘oku ‘ikai ko e lao ia hange pe ko e ‘ene ne fai ‘e Sesu. Ki he kakai Siu ko e me’a lahi ‘eni ia pea ‘oku hange ia ha fakamaau ki he tangata ke mo’ui pe mate. He ko e fehu’i ia e kau Falesi, ko e ha ‘oku mou fakahoko ai e me’a ‘oku tapuhaa? Ko e tali ‘a Sesu na’a ne ‘omai e talanoa ‘o Tevita ka ‘oku te’eki ke hoko ia ko e tu’i. Ko e taimi ‘eni ne kei hola takai holo meia Saula hono kumi ‘a Tevita ke tamate’i. 1 Samiuela 23: 1-6 ko e talanoa ia fekau’aki mo e me’a a Tevita na’a ne fakahoko ki he maa toputapu pe ko e maa ‘o e faka’afio.

Ko e ‘uhinga ‘a Sesu he talanoa ko ‘eni kia Tevita pea mo ‘Ahimeleki ko e faifekau na’a na maumau’i e lao. ‘Oku ‘ikai ke ‘uhinga ‘a Sesu ko e maumau lao ‘a ‘Ahimeleki pe ko Tevita. He ko e ‘uhinga ‘a Sesu kapau na’e kovi ki he ‘Otua na’e kaunga kovu kia Tevita pea mo ‘Ahimeleku. Ka na’a na mo’ui pe naua ia ‘o ‘ikai ha palopalema pe tautaea’i ki naua ‘e he ‘Otua. Ko e fakamo’oni ‘a Sesu ko e me’a ‘oku hoifua kiai e ‘Otua ko e ‘ofa ka ‘oku ‘ikai ko e fai fakamaau. Ko e taha ‘eni e fakahinohino faka’efika ke ne ako’i kitautolu ki he ‘etau mo’ui faka’aho. Ko e tauhi lao ‘oku mahu’inga pe ko e mo’ui e tangata ‘oku mahu’inga ki he ‘Otua. ‘Oku ‘ikai ke ‘uhinga mai ‘a Sesu ketau maumau lao ka ko e finangalo ‘a Sesu ke fakamu’omu’a e tangata ‘i he lao. ‘Oku ‘ikai ke fakamu’omu’a e lao ia ‘i he tangata he ko e me’a ia ‘oku polepole ai e tangata ‘i he ‘aho ni ke nau hoko ko e kau maumau lao. He ‘oku ongo’i he tangata ‘oku ‘ikai ke ‘ofa’i kinautolu pea nau tafoki leva hoko ko e kau maumau lao.

‘Oku ‘ikai ke ‘uhinga mai ‘a Sesu ketau hoko ko e kau maumau lao ‘o hange ko e ngaahi kolo Katolika. He ko ‘ene hu’unga lelei pe lao pea fekau’aki lelei pea mo e mo’ui mo e lelei e tangata pea ‘oku faka’ofo’ofa peia. Ka ko e hoko pe lao ke ne tapalasia e mo’ui e tangata, ‘oku pole’i leva kitautolu ‘e he ‘Otua. ‘Oku ou loto pe ke faka’osi ‘aki e konga mahu’inga ko ‘eni ka ko e lao ‘o e mali ‘i he Siasi. ‘Oku fu’u lahi ‘aupito e kakai kuo nau Siasi kehe ko e ‘uhi pe ko e palopalema e nofo mali. ‘Oku lahi e kakai ‘oku nau ‘ekea e founga mo e lao e Siasi ki he mali. ‘Oku mo’oni pe palopalema ia e nofo mali pea kapau ‘e muimui lelei pe mo faitotonu e teuteu mali. Ko e kau Patele ki hono fakapapau’i e ongo me’a mali ‘aki e founga totonu e Siasi, ‘e ‘ikai pe ke palopalema ha mali ia he Siasi. Ko e kole ke tau ‘uluaki faka’ehi’ehi ‘aupito pe mei he ngaahi tu’utu’uni kuo ako’i ‘i he teuteu mali. ‘Oku ngali mama’o ‘eku talanoa mei he Ongoongo lelei ka ko e feinga pe ke mahino e palopalema kuo hake uta hotau kuonga. He kuo hange pe mali ia ha me’a faingofua kae ngalo he tangata ko e fakatupu ia ‘a e ‘Otua. Ke mali e tangata mo e fefine pea ke na faitotonu mo ma’oni’oni pea te na sio ai ki he tapuekina ‘e he ‘Otua hona loto fale. ‘Ameni

03/09/2026

Falaite uike 22 Taimi Angamaheni
1 Kolinito 4: 1-5
Luke 5: 33-39

Ko e taha foki ‘eni e fakahinohino ‘a Sesu ‘oku fu’u mahu’inga ki he ‘aho ni pea mo e kuonga kotoa pe.
Ko e kole koia ‘e Sesu kuo taimi ke ta’ofi ‘a ‘etau ngaue ‘aki e hina kili’i manu motu’a ke ‘utu ai e uaine fo’ou. Ko e ‘uhinga pe ‘a Sesu ‘e maumau e uaine fo’ou ia pea ‘e mahua ‘o mole ‘a e tapuaki koia e ‘Otua mei he’etau mo’ui. Ko e Folofola ‘uluaki ‘o e ‘aho ni ‘a e Tohi ‘a Paula ki he kakai Kolinito, ‘oku tatau pe mo e akonaki ‘a Sesu he Ongoongo lelei. He ko e vailasi tatau pe ‘oku ne uesia e kakai, he ko e fakahinohino ko ‘eni ‘oku makatu’unha ia he ui ‘e Sesu ‘a Matiu. He na’a ne teuteu leva ha fu’u katoanga pea fakaafe’i kiai ‘a Sesu mo ‘ene kau Akonga. Ko e fehu’i leva ia e kau Falesi mo e kau Sikalaipe pe ko e ha ‘oku ma’u me’atokoni fakataha ai ‘a Sesu mo e kau angahala? Ko hono hoko atu aipe ‘a e fakafehu’ia ‘a e kehekehe ‘a e founga ‘a Sesu mei he kau Lapai pea pehe foki kia Sione Papitaiso. Ko e tali leva ‘a Sesu e fehu’i ko ‘eni ‘oku ne akonekina lahi ai ‘etau mo’ui fakalaumalie.

Ko e kau tanaki tukuhau hange ko Matiu na’e ui ia ko e kau lavaki’i ki he kakai Siu pea ne ‘ikai tali kenau hu ki he Temipale. Ne toe ui foki kinautolu ko e kau faka’uli pe fakakohu ki he Temipale kapau te nau ‘i ai. Ko e ‘uhinga ia ‘enau kilikilia he sio ki ha Lapai ‘oku nofo fakataha pea toe ma’u me’atokoni mo e kau tanaki tukuhau. Ko e founga foki ne fakahoko he kau Falesi ne ui ko e kau nitpicker pe ko e me’a ia ‘oku fai e Lavulavu mo e kau tufi talanoa loi he media he ‘aho ni. Ko e kakai ‘oku nau ‘aku ‘o ‘ohofi e kau Akonga ‘a Sesu kae ‘ikai ke ‘alu hangatonu kia Sesu. Ko e kakai fakailifia mo fakatupu kovi he ‘oku nau nofo pe ‘o fakasiosio ha ki’i tonounou. Ko hono fakatu’utamaki ko e ‘ikai ke ‘alu hangatonu kia Sesu kae toe afe takai he ko e mo’ui peia e kakai ko ‘eni. ‘Oku kei tokolahi pe kau picker ia he Siasi he ‘aho ni pea ko e launga aipe mo laulau he me’a kotoa pe. ‘Oku ave atu leva kiai e fakahinohino ‘a Sesu he ‘aho ni ko ‘enau founga, he na’a nau fakakaukau ke fakatupu kovi ke movete e kau Akonga ‘a Sesu. Ko e ‘uhinga peia ‘enau ‘alu ki he kau ‘Apositolo ke fakamovete’i kinautolu pea ko e me’a peia e ongo’i vaivai ai ‘a Sesu. Ko e me’a peia ‘e movete pe ta’ofi ai e fu’u party ko ‘eni ko e fakamovete’i e kau muimui.

Ko e ha ‘oku mui pehe ai, ko e ha ‘oku mou kehekehe ai mei he kakai koe, ko e ha ‘oku ikai kemou ‘aukai ai? Ko e ngaahi fehu’i kehekehe ke fakalavea ‘aki e kau ‘Apositolo ‘o Sesu. ‘Oku ui fakapalangi e founga ko ‘eni ‘o pehe “Satan can attach your alinement but can not attach your assignment”. ‘Oku faingofua ma’u pe ke motuki ha ngaahi vaa hano feinga ke to’o ha mo’oni kuo nau tui kiai. Ko e founga foki ia ‘oku tau sio ai he ‘aho ni, ko e kee pe ha ongo me’a ha fo’i mo’oni. Kuo tuku e mo’oni mo e poini kae ta’aki mai e famili mo e tonounou kotoa pe. Ko e ngaahi me’a kuo ‘osi fakalelei’i mo fai e ngaue kiai kuo toe ta’aki mai ka ko e founga ia e kakai kovi ni. Ko e founga ia mo e fakatu’utamaki e kakai ko ‘eni pea ko e ‘uhinga ia e na’ina’i ‘a Sesu ki he’ene kau Akonga. Ko e fakahinohino e lao ‘a Mosese ‘oku ui ko e “yom kippur” pe ko e day of atonement pe ko e ‘aho e fakamolemole. Ko e ‘aho peia e taha ‘oku ‘aukai ai e kakai ‘Isileli ka ne toe tanaki ‘e he kau Falesi, ko e lahi ange toutou ‘akukai pea toe ma’oni’oni ange.

Ko Sesu leva mo ‘ene fakahinohino ke ta’ofi pe tuku ‘aupito hano ‘ai ha uaine fo’ou ki ha hona leta motu’a. He ko hono ‘uhinga ‘e maumau e uaine fo’ou ko e ‘uhinga ‘a Sesu ki he’ene fakahinohino. Ko Sesu ‘a e uaine fo’ou pea ‘oku ‘ikai ke kei ‘aonga ke ‘utu ki ha hina uaine motu’a. He ko hono ‘uhinga ‘e maumau ‘ene fakahinohino fo’ou he ‘oku ai hono tapuaki. Ko e tali koia e fakahinohino fo’ou ‘a Sesu ‘a e feohi mo e kakai angahala. Ko e fekau fo’ou ia ka ‘e ‘ikai aonga ia ki he kakai motu’a pe ko ha loto ‘oku pomu. He ko e fakatokanga ‘a Sesu ‘e maumau e ngaahi tapuaki ‘a e muimui ki he’ene fakahinohino. Ko e faka’amu pe ‘a Sesu ke ‘oua te tau hoko ko e kau fai fakamaau hange ko e kau Falesi. Ka tau hoko ko e kau tangata ngaue pe ngaue’i ‘ene ‘ofa mo ‘ene fakahinohino pe lao ‘a Sesu. Koia ai hou’eiki mo e kainga mou fakamama’o pea tukua e Falesi mo e fasi’a he maumau e tapuaki kuo teuteu ma’au ‘e he ‘Otua. Kapau leva kuo ke mateuteu ke tali e uaine fo’ou ‘a Sesu pea ke ‘alu fai e me’a ‘oku ne finangalo atu ma’au!

02/09/2026

Tu’apulelulu uike 22 Taimi Angamaheni
1 Kolinito 3: 18-23
Luke 5: 1-11

Ho’eiki mo e kainga ko e taha ia e fakakaukau ‘a Luke ko hono ngaue’aki e vaka ‘o Pita, ‘a ia na’a ne fili ke hoko ko ‘ene tu’unga malanga. Ko e taha ia e ‘imisi faka’ofo’ofa keke fakakaukau kiai pea na’a ne fekau leva ‘e Sesu ke ki’i teke’i e vaka ke ki’i mama’o atu. Ko e ha e ‘uhinga na’a ne fili ai e vaka ‘o Pita ko e me’a ia koia, ke mahino ko e ui ‘a e ‘Otua ‘oku ‘ikai pe ketau ‘ilo kiai. He te tau toki ‘ilo pe ‘a e ‘uhinga na’a ne fili ai he’ene muimui mo ‘ene to’onga ‘o Pita. Ko e hili pe malanga na’a ne fekau ke tahataha atu ki he loloto pea ‘a’au hifo ko e kupenga kae ma’u ha’a mou ika. ‘Oku tau fanongo ki he tali ‘a Pita ‘oku hange ia ‘oku ngali ma’ama’a pe to’o ngofua. Ka ko hono natula mo’oni na’e pehe ni ko e tali ‘a Pita kia Sesu ko e ta’u lahi ‘emau fai e me’a ni. Ko e talu ‘emau tupu mo e toutai ‘oku ‘ikai ke ai ha me’a ia e puli he potu tahi ko ‘eni. Ko e talu ‘emau ‘i heni ‘i Australia he ta’u lahi ko ‘emau me’a ‘eni ‘oku fai kuo mau anga kiai. Kae pehe atu ‘e Sesu Pita tahataha atu ho’o vaka ki he loloto he ‘oku ke kei toutai fakamamani pe. He ‘oku ‘ikai ‘uhinga ‘a Sesu ia ki he ika ‘oku ‘amanaki ke ma’u ka ko e misiona ‘oku ‘amanaki ke hilifaki ange kiate ia. Tuku e fiepoto mo e matolu e ta’emahino he ‘oku tekeutua mai pe ‘i ho’omou la’e. He ko ‘etau tali peia ‘oku fai ki he ‘Otua ‘oku ‘ikai keke ‘ilo ‘e koe ha me’a e taha heni. Ko kimautolu na’a mau ‘i heni ko mautolu ‘oku lahi ‘emau ausia koia ai ki’i taitaimi atu Sesu. He ko e lea e tangata tufunga ki he tangata Toutai pea ke pehe ‘e faingofua ke tui kiai?

Ne ‘ikai ke fiema’u ika ‘a Sesu he ko Pita ia mo ‘ene kau toutai na’e fiema’u ika ko e ‘uhi ke ma’u ai ‘enau mo’ui. Ka ko e me’a ne makehe na’e toe liliu pe fakakaukau ‘a Pita he na’e fanongo pe kia Sesu. Ko e ‘uhi ko ho’o Folofola mai sai ‘e tuku ‘eku poto teu ‘ai leva ho’o finangalo. ‘Oku te’eki pe ke mahino foki pe na’e ‘uhinga ‘a Pita ke a’u e poto ‘a Sesu pe ko ‘ene tesi’i pe ‘a Sesu. Ke pehe ka lea atu ‘a Pita ki he ‘ene kau akonga ko e ha ‘enau tali? Huanoa ha’anau lau’i ‘a Sesu pe ko e toki ha’u pea ko e fu’u tufunga ke lea mai ki he kau toutai. He ‘oku ne ‘ilo ha me’a ki he toutai he na’a tau sio ai kuo ‘osi ‘alu ki tahi. Ko e ‘uhi ‘eku ave atu e ngaahi fakakaukau moe lea ko ‘eni keke mahino ‘a e taimi te nau sio ai ki he ika. ‘Oku ‘ikai ko e mana ‘a e lahi e ika ka ‘oku mo’oni ai e lau e tama Ha’apai Weko “puho e lupi”. Ko e fekau mahu’inga e kosipeli ko ‘eni ‘oku fekau’aki ia mo e mo’ui. Ko ho’o nofo ki ho’o poto faka-e-tangata mo ho’o taukei pe ausia teke pakupaku ai. Ko e iku’anga ho’o mo’ui ko hala’ata ko e tali ia ne fai e Pita ko e talu ‘emau toutai ‘anepo mo e hala. Kainga ‘ofa mai tokanga ki he fo’i lea koia “hala” ko e koto nge’esi he kuo mou falala ki he poto fakamamani. Te mou pakupaku ai ka ‘oku ‘uhinga e ha’ele mai ‘a Sesu ke ma’u e mo’ui fakalaumalie.

Ko e ‘uhinga e lahi e ika ko e mo’ui ‘ia Kilisito ko ‘ene fiema’u kenau mo’ui fakalaumalie kae tuku e mo’ui fakamamani. Ko e fekau ko ‘eni ‘oku taataai taha pe ho’o fanongo kiai ka ko ‘ene Folofola mai pe pea ‘ofa mai ‘o tokanga kiai. He ko e fakahinohino ‘a Sesu ke fakamu’omu’a ma’u pe ‘a Sesu, fanongo lelei kia Sesu ke ‘aonga ‘etau lotu ‘oku fai. Ko e ‘uhinga leva e lahi ‘o e ika ko e ‘uhinga fakateolosia ia ki he tapuaki e ‘Eiki te ne ‘oatu. Ko e ‘amanaki koia ke ne ui kinautolu ‘oku ai e tapuaki ‘o hange ko e hakeuta e ika. ‘Oku ke fakatokanga’i he talanoa ko ‘eni e fakahinohino ‘a Sesu ki he’ene misiona. Ko e ‘uluaki lesoni ia ne ako’i ‘aki ‘ene kau Akonga pea ko e lesoni tatau peia. ‘Oku kei feinga mai pe ‘a Sesu ke mahino a ki he’etau ngaue ‘i he ‘aho ni. ‘Oku ‘osi mahino’i nai he kakai e me’a ‘oku feinga mai kiai e ‘Otua pe ‘ikai? Na’a ne foaki mai ‘a Sesu ki mamani ke fakamahino e me’a koia. Ko Sesu te tau kau ai pe ha’i kihe ‘Otua hange ko e lau ‘a Sione 15:5 ko Sesu e fu’u vaine ko kitautolu ko e ngaahi va’ava’a.

Si’i kainga keke fakahoa leva e lau a Pita ki he kamata mo e hili e ma’u e ika. Na’a ne talanga ko e talu ‘emau toutai ‘anepo ‘oku ke sio ki he mafasia mo e talanoa ngaue? Ko e ivi fakaetangata te ke hela’ia pea fo’i pea ‘ita pea launga ka ko e fanongo kia Sesu. Ko e piki ia kia Sesu ‘e ikai keke hela’ia ka te ke toki hela’ia he ohu e ika mo tou e ika. He ko e taimi ‘oku tau fiefia ai ‘oku puli ‘etau hela’ia ka ‘oku finangalo ‘a Sesu ketau ngaue malohi fakalaumalie pe. Ko e ngaue ia ‘a Sesu ‘oku ma’ama’a pe he na’e ‘ikai ke tekau atu ke ‘a’alo ki he loloto. Ko e kole mai pe ‘e Sesu ke tau ki’i fanongo pea tataha atu ki he loloto pea ‘a’au e kupenga. Ke tau fanongo mo muimui pea fakahoko ‘o fakatatau ki he fakahinohino ‘a Sesu. ‘Oku aipe tapuaki e fanongo pea muimui ‘o fakahoko pe finangalo e ‘Eiki. Ko ‘emau lotu ia ‘e ‘Eiki ke ke toe Folofola mai pe pea kamau toe tahataha atu ki he loloto. ‘Oku mau kole ‘eni ‘i he tui!!!!

Address

9 Ropes Creek Road Mt Druitt
Sydney, NSW
2770

Opening Hours

Monday 9am - 5pm
Tuesday 9am - 5pm
Wednesday 9am - 5pm
Thursday 9am - 5pm
Friday 9am - 5pm

Website

Alerts

Be the first to know and let us send you an email when Tongan Catholic Chaplaincy Diocese of Parramatta posts news and promotions. Your email address will not be used for any other purpose, and you can unsubscribe at any time.

Shortcuts

Share

Category