13/04/2022
Dagsê almal,
Hiermee ‘n oordenking met die oog op Goeie Vrydag 2022.
AFSKUWELIKE LYDING, MAAR DIE HOOP IS DAAR
Ons is pad na Paassondag, maar om daar te kom moet ons by Goeie Vrydag verby. Goeie Vrydag is ‘n dag wanneer mense nie graag hulle klein kindertjies kerk toe wil bring nie, want dan fokus ons op afstootlike menslike gedrag:
Mense wat juig wanneer iemand brutaal aan ‘n houtkruis vasgespyker word en die houtkruis dan in die grond geplant word met die vasgespykerde mens wat hoog in die lug hang. Dit is sodat niemand die persoon kan bykom en bevry nie en ook as vertoon vir almal wat daar verbyloop. Die spykers skeur in die polse in en die persoon se asemhaling is bitter moeilik as gevolg van die ongewone posisie van die liggaam.
En ons weet Jesus was onskuldig in daardie posisie – Pilatus het hom onskuldig verklaar na ‘n verhoor en lang ondervraging. Wat ‘n vernedering vir enige mens om so daar in die openbaar sonder klere te hang en te meer nog wanneer die persoon onskuldig is.
Dit is wat amper 2000 jaar gelede gebeur het.
Verskriklik!
Gelukkig was daar ontwikkeling in beskawing en vernuwing en nuwe wette. Ons is darem nie meer barbare nie.
Ja-Reg!?
Ons hoor van mense wat ons vereer is met medaljes vir dapperheid, maar wat later ontmasker word as monsters en oorlogsmisdadigers.
Ons hoor en sien op TV die oorlogsmoorde op onskuldige burgerlikes in Oekraïne. Ons hoor die stemme van die offisiere wat vloek en skel op soldate om hulle sover te kry om burgerlikes af te maai ten spyte van die besware van die soldate.
Is ons vandag in 2022 beter af?
Ons kan alleen maar net vra: Watter sin en betekenis het die lewens en die dood van die vermoordes gehad? Is daar enige troos vir die wat die skrikwekkende oordeel oorleef het?
Job sê vir sy vriende “Luister goed na my woorde; so sal julle my die beste troos.” (Job 21:2). Ons kan met aandag luister na wat die mense van Oekraïne sê sodat hulle kan weet dat alles nie tevergeefs is nie.
Ons leef in veiligheid en gelukkig met die wete dat die dood van Jesus aan die kruis nie tevergeefs was nie. Hy het vir ons sonde aan die kruis betaal. Ons leef met die wete dat Paassondag aangebreek het. Die dood is oorwin en ons is oorwinnaars saam met Jesus, selfs al moet ons self deur diep waters of deur vuur gaan. God is ons sterkte. Jesus is ons hoop.
2 Korintiërs 1:3-7:
Aan God, die Vader van ons Here Jesus Christus, kom al die lof toe! Hy is die Vader wat Hom ontferm en die God wat in elke omstandigheid moed gee. 4In elke moeilikheid bemoedig Hy ons. Daarom kan ons ook ander bemoedig wat in allerlei moeilikhede verkeer. Ons kan hulle bemoedig met dieselfde bemoediging waarmee God ons bemoedig, 5want net soos daar vir ons 'n oorvloed van lyding is ter wille van Christus, is daar ook vir ons 'n oorvloed van bemoediging deur Christus. 6As ons dus in beproewing kom, is dit dat julle bemoedig en gered kan word. As ons bemoedig word, is dit om julle te bemoedig en te versterk, sodat julle met geduld dieselfde lyding kan verduur wat ons ook verduur. 7En wat julle betref, het ons 'n vaste verwagting: ons weet dat net soos julle saam met ons deel het aan die lyding, julle ook aan die bemoediging deel het.
Mag die Here jou lei om vertroosting en bemoediging te gee daar waar jy ook al gaan en waar Hy jou lei.
Vrydag se tema: WAARHEID TRIOMFEER – Johannes 18 & 19.
Hoop om julle Vrydag te sien (08:30vm, by Trinity UCIC, 72 St Georges Terrace).
Vriendelike groete,
Ds Zak Cronjé
