14/03/2026
ယေရှုကို ရရင် ကျန်းမာ၊ချမ်းသာပြီလား?
💡ဘုရင်တကာတို့၏ ဘုရင်ဖြစ်တဲ့ ဘုရားသခင်က ဧဒင်ဥယျာဉ်ထဲမှာ လူကို မသေမျိုး အဖြစ် ဖန်ဆင်းခဲ့တယ်။ (၁တိ ၆:၁၅၊ က ၁:၂၆-၂၇)
💡 သို့သော် ဧဒင်ဥယျာဉ်ထဲမှာ ဖန်ဆင်းရှင်သခင်နှင့် ဖန်ဆင်းခံသခင်ဟူ၍ သခင်နှစ်ဦးရှိတယ်။ (က ၂:၉၊ မ ၆:၂၄) လောကသခင် ဖြစ်တဲ့ စာတန်က ကောင်းကင်က နှင်ချခံထားရတာမလို့ ဘုရားသခင်ကို အငြိုးထားပြီးခံပြင်း ဒေါသထွက်လျက်ရှိတယ်။ (ဗျာ ၁၂:၁၂) သို့သော် သူက ဖန်ဆင်းခံဖြစ်လို့ ဖန်ဆင်းရှင်ကို တိုက်ရိုက် အံတု တုံ့ပြန်လို့ မရဘူး။ ဒါကြောင့် ဘုရားသားသမီးဘက် မြားဦးလှည့်ပြီး တိုက်ခိုက်ခဲ့ခြင်း ဖြစ်တယ်။ (၁ပေ ၅:၈၊ က ၃:၁-၅)
💡တကယ်တော့ စာတန်က လူက်ို တိုက်ခိုက်လာမယ်ဆိုတာ အနာဂတံသဥာဏ်တော်ရှင် ထာဝရဘုရားက ကြိုတင်သိပြီးသားပါ။ ဒါကြောင့်လည်း ဒုက္ခရောက်ရင် ငါ့ကိုခေါ်ပါလို့ မိန့်ကြားထားခြင်း ဖြစ်တယ်။ (ယေ ၃၃:၃) သို့သော် တကယ်တမ်းလည်း ပြဿနာတက်ရော လူက ဘုရားကိုမေ့ပြီး ကိုယ့်ဥာဏ်ကို အမှီပြုကာ ကောင်းမကောင်း သိကျွမ်းရာအပင်၏ အသီးကို ယူစားလိုက်ကြတယ်။ (က ၃:၆၊ သု ၃:၅-၇) ထိုသို့ တားမြစ်သီးမျိုချခြင်းနှင့် အတူ ဧဒင် ဥယျာဉ်ထဲက စာတန်က လူ့အထဲသို့ ဝင်ရောက်အုပ်စိုးခွင့်ရသွားခဲ့တယ်။ (၂ကော ၄:၄) သွေးထဲ အပြစ်ဆိုတဲ့ စာတန်ရောက်ရှိသွားချိန်က စပြီး သန့်ရှင်းတဲ့သွေးက မသန့်ရှင်းတဲ့ သွေးအဖြစ်ပြောင်းသွားခဲ့တယ်။ (က ၂:၇၊ ဝတ် ၁၇:၁၁) ဒါကြောင့် အဲဒီ မသန့်ရှင်းတဲ့သွေးကို သွန်းလောင်းဆေးကြောဖို့ ဖြစ်လာခဲ့ရတယ်။ (ဗြဲ ၉:၂၂)
💡အပြစ်ရဲ့နောက်ဆက်တွဲ ဆိုးကျိုးတွေက …
၁။ ဝိညာဉ်သေခြင်း = ဘုရားနှင့် အဆက်ပြတ်သွားတယ်။ (ရော ၆:၂၃)
၂။ ခန္ဓာသေခြင်း = လူဟာသေမျိုး ဖြစ်သွားတယ်။ (ရော ၅:၁၇၊ ၁ကော ၁၅:၅၃)
၃။ ဧဒင်နန်းတော်မှ နှင်ထုတ်ခံရ = မင်းစည်းစိမ် ဆုံးရှုံး (က ၃:၁၉၊ ၂၃-၂၄)
ထိုသို့ အလုံးစုံ ပျက်သုဉ်းသွားခြင်းမှ ပြန်လည်ရွေးနှုတ်ကယ်တင်ရန် ယေရှုကားတိုင်တက်ခဲ့ရခြင်းဖြစ်တယ်။ (ယော ၁:၂၉၊ ၁ကော ၁၅:၃-၄၊ ဗြဲ ၁၀:၁၀) ထိုကားတိုင်အားဖြင့် စာတန်လုယူသွားတဲ့ အရာခပ်သိမ်းကို ယေရှုအသေခံ၊ ထမြောက်ခြင်းဖြင့် ပြန်လည်သိမ်းပိုက်ရယူပေးခဲ့တယ်။ (ကောလော ၂:၁၅)ဤအမှုအရာကို နားလည်သဘောပေါက်ပြီး ယုံကြည်ဝန်ခံသူတိုင်း ယခုဘဝ၊ နောင်ဘဝနှင့်ဆိုင်သော ကောင်းကြီးမင်္ဂလာများကို ပြန်လည်ခံစားကြရမှာ ဖြစ်တယ်။ (ယော ၅:၂၄၊ ၁တိ ၄:၈)
💡ယေရှုပြုခဲ့တဲ့ အမှုကို ယုံကြည်ဝန်ခံသူက …
၁။ ဝိညာဉ် = ထာဝရအသက် (သို့) ကယ်တင်ခြင်းတန်းရ။ (ဧ ၂:၈၊ ၁ယော ၅:၁၂) သေရင် ဘယ်သွားမလဲဆိုတဲ့ အဖြေရရှိထားပြီးဖြစ်လို့ စိတ်ပူစရာ မလိုတော့ပါဘူး။ (လု ၂၁:၃၃)
၂။ ခန္ဓာ = သေခြင်းမှရှင်ခြင်းသို့ ကူးမြောက် (ယော ၅:၂၄)
❌ယေရှုကို ယုံတာနှင့် ဒီခန္ဓာကိုယ်ကြီးက ချက်ချင်းကြီး ပရဒိသုဘုံကို တန်းရောက်သွားတာ မဟုတ်ဘူး။
သေမျိုးကနေ မသေမျိုးအဖြစ်ကူးမြောက်ပြီး အသက်စာစောင်စာရင်းထဲ ဝင်ရောက်သွားခြင်းသာ ဖြစ်တယ်။ တစ်နည်းအားဖြင့် ကယ်တင်ခြင်း စိတ်ချမှုရရှိထားခြင်းသာဖြစ်တယ်။( ၁ကော ၁၅:၄၄၊၅၃၊ ဗျာ ၃:၅)
လောလောဆယ် ဒီခန္ဓာက မသေခင်အထိ အို၊နာ၊သေခြင်းရှိတဲ့ ဒီလောကမှာပဲ ဆက်လက် အသက်ရှင်ရအုံးမှာ ဖြစ်တယ်။ ဒါကြောင့် ကျန်းမာရေးအတွက် နေ၊ထိုင်၊စားသောက်ခြင်းများကို ဆင်ခြင်ကြရအုံးမှာ ဖြစ်တယ်။ ယုံကြည်သူဖြစ်ပြီ ဆိုပြီး ပရမ်းပတာ နေထိုင်စားသောက်ရင် အသက်တိုမှာ ဖြစ်တယ်။ (ဟေရှာ ၅၅:၂၊ သု ၂၅:၁၆)
✅ ယေရှုက ဖန်ဆင်းရှင် ဘုရား ဖြစ်လို့ ဘာရောဂါမှ မရှိပေမဲ့ လူကသွေးထဲမှာ စာတန်ရှိနေတဲ့ ဖန်ဆင်းခံ အပြစ်သား အာဒံမျိုးဆက်တွေဖြစ်တယ်။ ဒါကြောင့် အားလုံးက အပုပ်ကောင်ရုပ်ဆောင်တွေဖြစ်လို့ တစ်ယောက်မျှ အနာရောဂါနှင့် မကင်းပါဘူး။ ဒါကြောင့် လိုအပ်ရင် ဆေးရုံ၊ဆေးခန်းပြဖို့ လိုအပ်ပါတယ်။ (မ ၉:၁၂)
✅ သို့သော် တချို့အနာရောဂါများကိုတော့ ဘုရားက သူ့ဘုန်းအတွက် သက်သေထူချင်တဲ့အခါမျိုးမှာ ဘာဆေးမှမလိုဘဲ တန်ခိုးတော် အားဖြင့် အံ့ဖွယ် အနာငြိမ်းပေးတာတွေရှိပါတယ်။ (လု ၁၈:၄၁-၄၃၊ မ ၉:၂၀-၂၂)
၃။ ဘုရင့်သားဖြစ်ခြင်း = မင်းမျိုးမင်းနွယ် (ယော ၁:၁၂)
အပြစ်ကြောင့် ဆုံးရှုံးခဲ့ရတဲ့ မင်းမျိုးမင်းနွယ် ဖြစ်ခြင်းနှင့် စည်းစိမ်ကို ယေရှုခရစ်တော် အားဖြင့် ပြန်လည်ပေးအပ်ခဲ့ပါတယ်။ (၁ပေ ၂:၉) ဒီနေရာမှာ ပစ္စုပ္ပန်စည်းစိမ်နှင့် တမလွန်စည်းစိမ်ဆိုပြီးတွေ့ရမှာ ဖြစ်တယ်။ ဧဒင် ဥယျာဉ်ကဲ့သို့ မပင်ပမ်းပဲ နေထိုင်စားသောက်ရတဲ့ စည်းစိမ်မျိုးကျတော့ ကောင်းကင်ရောက်မှ ခံစားရမှာ ဖြစ်တယ်။ (ဗျာ ၂၂:၁-၂၊ ၂ကော ၅:၁-၂)
🔆 ပစ္စုပ္ပန်စည်းစိမ်
အာဗြဟံ၊ ဣဇက်၊ ယာကုပ်တို့ကဲ့သို့သော လောကီကြွယ်ဝမှုမျိုး ဖြစ်တယ်။ ဒီနေရာမှာ ယုံကြည်သူဖြစ်တာချင်းတူတယ်။ မင်းမျိုးဖြစ်တာချင်းတူတယ်။ သို့သော် ဘာကြောင့် ငွေကြေးဖူလုံသူနှင့် ချို့တဲ့သူဆိုပြီး အရမ်းကြီး ကွာဟသွားရသလဲ။ ဒီလိုဖြစ်ရခြင်းရဲ့ အဓိကသော့ချက်မှာ ဖြစ်ချင်တဲ့ ဆန္ဒပြင်းပြမှု မတူညီကြလို့ပဲဖြစ်ပါတယ်။ ဘာလို့လဲဆိုတော့ ဘုရားက အကုန်တတ်စွမ်းနိုင်တယ်ဆိုပေမယ့် ဆန္ဒမရှိတဲ့လူကို ဘာမှလုပ်ပေးလို့ မရဘူး။ ကယ်တင်ခြင်းလည်း ရချင်တဲ့ ဆန္ဒရှိမှ ရတာ။ ငွေကြေးမှာလည်း ယေရှုအားဖြင့် အာဗြဟံကဲ့သို့ ဖြစ်မယ်လို့ ပြောထားပြီးသား။ (ဂလာ ၃:၉) သို့သော် ဘိုးဘေးများလိုဖြစ်ချင်ရင် သူတို့ရဲ့ ယုံကြည်ဝန်ခံ၊ နာခံလိုက်လျှောက်ခြင်းတို့ကို လေ့လာသင်ယူဖို့ လိုအပ်ပါတယ်။ (ယောရှု ၁:၈၊ ဟောရှေ ၄:၆) များသောအားဖြင့် ငွေကြေးအားနည်းသူတွေမှာ တွေ့ရတတ်တာက စိတ်နှလုံး မမှန်ကန်ခြင်းနှင့် ငွေကို အဆိုးဘက်ကချည်း ကြည့်မြင်ပြီး ပါးစပ်သရမ်းကြခြင်း တို့ကြောင့် ဖြစ်တယ်။ (၃ယော ၁:၂)
ဘုရားပေးထားပြီးသား ကောင်းကြီးကို မိမိနှုတ်ခမ်းက ဝန်ခံထွက်ဆိုတဲ့ အတိုင်း ရိတ်သိမ်းရမှာဖြစ်တယ်။ (ဟောရှေ ၈:၇၊ သု ၂၂:၈၊ သု ၁၂:၁၄) ဒါကြောင့် လျှာအရိုးမရှိတိုင်း လျှောက်မပြောဖို့ အရမ်းအရေးကြီးပါတယ်။ လျှာကြောင့် ဆင်းရဲ၊ ချမ်းသာ ဘဝခြားသွားနိုင်တယ်။ ဘုရားပေးပြီးသားကို နှုတ်က အမြဲတမ်း အနှုတ်လက္ခဏာပဲပြောနေရင် ကောင်းကြီးလမ်းကြောင်းကို မိမိဖာသာ ကန့်သတ်လိုက်သလို ဖြစ်သွားပါလိမ့်မယ်။ (သု ၁၈:၂၀-၂၁၊ မာ ၁၁:၂၃)
🧐 ကျမ်းစာထဲမှာ ငွေရှာတာနှင့် ငွေမက်တာ မတူဘူး။ ဒါကို ပိုင်းခြားတတ်ဖို့ လိုတယ်။
✅ ငွေရှာတာကို ဘုရားနှစ်သက်တယ်။ (သု ၂:၄)
❌ငွေမက်တယ်ဆိုတာက မတရားစီးပွါးကိုပြောတာ။ ဒါကြောင့် ဘုရားမနှစ်သက်ဘူး။ ဥပမာ - ကျားဖြန့်လိုနေရာမျိုးမှာ ငွေဘယ်လောက်ရရ လုံးဝမလုပ်သင့်ဘူး။ ဘာလို့လဲဆိုတော့ ငွေဝင်ပေမဲ့ အထက်လှန်အောက်လျှောဖြစ်ပြီး အကြီးအကျယ် ဒုက္ခရောက်နိုင်လို့ ဖြစ်တယ်။ (ယော ၂၀:၁၅၊ သု ၁၇:၂၀၊ သု ၂၈:၂၀)
❤️ ဘုရားပေးတဲ့ ကောင်းကြီးလို့ ပြောတဲ့အခါမှာ ခန္ဓာ၊ စိတ်၊ ဝိညာဉ် အကုန်လုံး ပါဝင်ပါတယ်။ ငွေကြေးသည်လည်း ဘုရားပေးကောင်းကြီး ဖြစ်ကြောင်း အတိအကျဖော်ပြထားပါတယ်။ (က ၂၄:၃၅)
ခြွင်းချက်ကတော့ … ဘုရားသခင်ရဲ့ခေါ်သံကြားပြီးနောက်တော်သို့လိုက်သူများသည် လောကစည်းစိမ်ဥစ္စာများကို သိပ်ပြီး မက်မောလေ့မရှိကြတော့ပါဘူး။ ဥပမာ-တမန်တော်များ။ ရှိသမျှစွန့်၍ နောက်တော်သ်ို့ လိုက်ခဲ့ကြတယ်။ (မ ၁၉:၂၇) တကယ်တော့ ပေတရုက ကုန်သည်စီးပွါးရေးသမားပါ။ သူနေခဲ့တဲ့ အိမ်အခြေအနေ၊ ဒီကနေ့အထိ သွားရောက်လေ့လာလို့ရပါတယ်။ သို့သော် တစ်နေ့ ယေရှုနှင့်တွေ့တဲ့ အခါသူရှာနေတဲ့ ငါး (ငွေ) ဆိုတာ ယေရှုရဲ့ လက်ထဲမှာရှိတယ်ဆိုတာသိတာနှင့် ချက်ချင်းပဲ ပိုက်ကွန် (လုပ်ငန်း) ကိုထားခဲ့ပြီး ယေရှုနောက်ကောက်ကောက်ပါအောင် လိုက်သွားခဲ့တယ်။ သက်ဆုံးတိုင်ပဲ။ ယနေ့ခေတ်မှာလည်း ကမ္ဘာနှင့် အဝှမ်းမှာ ပေတရုကဲ့သို့ ရှိသမျှစွန့်ပြီး ကိုယ့်ကားတိုင် (ဘုရားထားတဲ့နေရာ) ကိုယ်ထမ်းပြီး အမှုတော်အတွက် ဆက်ကပ်နေသူတွေ မြောက်များစွာရှိပါတယ်။ သို့သော် သူများကို အားကျပြီး ခေါ်သံမကြားဘဲ မိတ္တူကူးဖို့တော့ မစဉ်းစားလိုက်နှင့်။ လျှံမထွက်ဘဲ၊ လျှာထွက် သွားလိမ့်မယ်။ ခြုံပြောရရင် ယေရှုကိုယုံရင်လည်း နေ၊ထိုင်၊စားသောက် ဆင်ခြင်ရပါမယ်။ ပြီးတော့ ချမ်းသာချင်သူများ ဘုရားရဲ့ အလေ့အလာကို ဦးစွာသင်ယူပါလို့ ပြောပါရစေ။ (မ ၆:၃၃)
❌ နယ်ပယ်တိုင်းမှာ လုံ့လဝိရိယ မပါဘဲ ထိုင်ပြီး လေကန်တတ်ရုံ သက်သက်နဲတော့ ထိပ်တန်း အဆင့်ဖြစ်မလာပါဘူး။ (သု ၁၃:၄၊ ၁၄:၂၃) ဘဝရဲ့ ရှေ့နောက် ဘာအရေးမှ ထည့်မတွက်ဘဲ ပရမ်းပတာ အသက်ရှင်ပြီး ယုံကြည်သူပါလို့ပြောပြီး အိမ်ကို ဒုက္ခပေး၊ အသင်းတော်ကို ဒုက္ခပေး။ အဲ့လိုဆင်းရဲသားကလည်း သီးသန့်ကိုရှိတာ။ (ယော ၁၂:၈)
👌 ဒါကြောင့် ယေရှုကို ယုံရင် ကျန်းမာ၊ချမ်းသာပြီလားဆိုတော့ ကာယကံရှင်၌သာ အဓိကပါ။ လူအမျိုးမျိုး၊ စိတ်အဖုံဖုံ။ ဒါ ပစ္စုပ္ပန်။ စိုက်တဲ့ အတိုင်းရိတ်ရမယ်။ ပရဒိသုဘုံ မဟုတ်။
#ဘုရားသခင်သင့်ကိုသိပ်ချစ်တယ်နော်
#ဘုရားသခင်ကအသက်ရှင်ပြီးခေါ်ရင်ထူးတဲ့ဘုရားဖြစ်လို့လိုအပ်ရင်_ကူရာမဲ့ချိန်ခေါ်ကြည့်လိုက်ပါနော်
✍️ S Moe Han အမှတ်စဉ်(၃၃) 15 March 2026
📲 SLN
