21/08/2026
Church's constitution
အသင်းတော် ဖွဲ့စည်းပုံအခြေခံ
PREFACE
သခင်ဘုရား၏ အသင်းတော်ကို၊ သခင်ဘုရား၏ တရားတော်အတိုင်း ဖွဲ့စည်း တည်ဆောက်ထားသည်။ တမန်တော် အခန်းကြီး (၂) ပင်တေကုတ္တေနေ့ မှစ၍ သန့်ရှင်းသော ဝိညာဉ်တော်အားဖြင့် မွေးဖွား ပေါ်ပေါက်လာသော အသင်းတော်၏ အခြေခံ စည်းမျဉ်း ဥပဒေသသည် ဝိညာဉ်တော်တရား ဖြစ်သည်။ အသက်ရှင်စေတတ်သော ဝိညာဉ်တော်တရား၊ သမ္မာတရား ဖြစ်သည်။
ယနေ့ ဂိုဏ်းဂဏ ဒေသန္တရအသင်းတော် အသီးသီးတို့သည် မိမိတို့ အသင်းတော်အတွက် စည်းမျဉ်းဥပဒေများကို ချမှတ်ထားကြပြီး ဖြစ်သည်။ ရိုမန်ကတ်သလစ် အသင်းတော်၌ သူ၏ အခြေခံဥပဒေ၊ နှစ်ခြင်း အသင်းတော်၌ သူ၏ နှစ်ခြင်းဂိုဏ်းဂဏနှင့် ဆိုင်သောအခြေခံဥပဒေ၊ ဧ၀ံဂေလိ အသင်းတော် (အေဂျီ) အတွက် အေဂျီနှင့် ဆိုင်သော အသင်းတော် အခြေခံဥပဒေ စသည်ဖြင့်၊ အသီးသီး ရှိထားကြသည်။ ဤအရာများသည် မိမိ၏ အသင်းတော်အတွက် ကောင်းကျိုးဖြစ်ထွန်း၊ ရှင်သန်စေရန်၊ လိုက်နာရမည့် အခြေခံဥပဒေအနေဖြင့် ရေးဆွဲပြဋ္ဌာန်းထားကြသည် ဖြစ်သည်။
ဓမ္မဟောင်း၌ ဗိမာန်တော်နှင့် သက်ဆိုင်၍ မောရှေအားဖြင့် မှာထားတော်မူသော ပညတ်ချက်များ၊ ထာဝရဘုရား ကိန်းဝပ်တော်မူရာ နှင့် သက်ဆိုင်၍၊ ဒါဝိဒ်မင်းကြီး၏ စီရင်ထုံးဖွဲ့ချက်များ စသည်ဖြင့် ဗိမာန်တော်နှင့် စပ်ဆိုင်၍ လိုက်နာ စောင့်ထိန်းရမည့် ပညတ်တရားများကို တွေ့ရသည်။
ထို့နည်းတူ ပဋိညာဉ်တရားသစ်ကာလ၌ ရှင်ပေါလု အားဖြင့် အသင်းတော် နှင့် စပ်ဆိုင်သော၊ အသင်းတော်အတွက် ဝိညာဉ်တော် သမ္မာတရားကိုလည်း ရှင်းလင်းစွာ တွေ့ရပါသည်။ ရှင်ပေါလုသည် တမန်တော်အရာ အားဖြင့် ယုဒပြည်၊ ရှမာရိပြည်၊ ရှုရိပြည်၊ မာကေဒေါနိပြည်၊ ရောမမြို့ထိ သာသနာပြုလျှက်၊ အသင်းတော် မြောက်မြားစွာ တည်ထောင်ခဲ့ပြီး၊ ထိုအသင်းတော်များကို သမ္မာတရား အားဖြင့် မြဲမြံခိုင်ခံ့ ရှင်သန်စေခဲ့သည်။
အသင်းတော်များသို့ ပေးပို့သော ဩဝါဒစာများတွင်လည်း ယုံကြည်ခြင်းအားဖြင့် ခိုင်ခံ့မြဲမြံစေရန် သွန်သင်ထားသည်။ အထူးသဖြင့် တမန်တော် ၁၆:၄-၅ ၌ ယေရုရှလင်မြို့၌ နေသော တမန်တော်တို့နှင့် သင်းအုပ်တို့သည် စီရင်သော ပညတ်တို့ကို အသင်းတော်များ ကျင့်ဆောင်ဖို့ရာ အပ်ပေးကြ၏။ ထိုသို့ အသင်းတော် တို့သည် ယုံကြည်ခြင်း၌ တည်ကြည်မြဲမြံသည်ဖြစ်၍၊ အရေအတွက်အားဖြင့် တစ်နေ့ထက်တစ်နေ့ တိုးပွားများပြားကြ၏။
Pastor Kyaw Min
Berea Discipleship School
