https://cafatil.org/, https://whatsapp.com/channel/0029Vb8zGNO8vd1JUQkJ0h38

Catholic Family Altar Timor-Leste, 64 Invermore Street, Brisbane (2026)

07/09/2026

08 SETEMBRU 2026 | Festa, Natividade da Bem-aventurada Virgem
Maria
⬜️ Kór litúrjiku: Mutin
📖 1ª Leitura: Miqueias 5:1-4a
📖 🎵 Salmo Responsoriál: Salmo 12(13),6 (R. Isaiah 61,10)
📖☦️ Evanjellu: Mateus 1:1-16, 18-23

- Aleluia, Aleluia, Aleluia.

✠ 𝐍𝐚’𝐢 𝐉𝐞𝐬𝐮́𝐬 𝐊𝐫𝐢𝐬𝐭𝐮 𝐧𝐢𝐚 𝐄𝐯𝐚𝐧𝐣𝐞𝐥𝐥𝐮† 𝐧𝐮’𝐮𝐝𝐚𝐫 𝐒𝐚𝐮𝐧 Mateus 𝐡𝐚𝐤𝐭𝐮𝐢𝐫:

1 Jesús nia bei’ala sira husi David to o Abraão mak ne’e: 2 Abraão mak Isaac nia aman; Isaac, Jacob nia aman; Jacob, Judá ho nia alin sira-nia aman. 3Judá ho Tamar mak Peres no Zara nia aman-inan; Peres, Hesron nia aman; Hesron, Rame nia aman. 4 Rame, Aminadab nia aman; Aminadab, Naxon nia aman; Naxon, Salmon nia aman; 5 Salmon no Raab, Booz nia aman-inan; Booz no Rute, Obed nia aman-inan; Obed, Jesé nia aman; 6 Jesé, liurai David nia aman. David ho Urias nia feen, Salomão nia aman-inan. 7 Salomão mak Roboão nia aman; Roboão, Abias nia aman; Abias, Asa nia aman. 8 Asa, Josafat nia aman; Josafat, Jorão nia aman; Jorão, Uzias nia aman; 9 Uzias, Jotam nia aman; Jotam, Acaz nia aman; Acaz, Ezequias nia aman; 10 Ezequias, Manasés nia aman; Manasés, Amon nia aman; Amon, Josias nia aman; 11 Josias mak Joconias ho nia maun-alin sira nia aman, iha tempu eziliu iha Babilónia. 12 Liutiha eziliu iha Babilónia, Jeconias sai Salatiel nia aman; Salatiel, Zorobabel nia aman; 13 Zorobabel, Abiud nia aman; Abiud, Eliaquim nia aman; Eliaquim, Azur nia aman; 14 Azur, Sadoc nia aman; Sadoc, Aquim nia aman; Aquim, Eliud nia aman; 15 Eliud, Eleázar nia aman; Matan, Jacob nia aman. 16 Jacob hetan oan naran José, ne’ebé kaben ho Maria. Husi Maria, moris Jesús, ne’ ebé hanaran Kristu. 18Jesús Kristu moris nune’e: nia inan hafolin tiha ona ba José. Molok sira rua moris hamutuk, Maria ko’us ona hodi Espíritu Santu nia kbiit. 19 Nia la’en José, ema di’ak loos be lakohi hamoe nia, hakotu atu husik tiha nia nonook de’it. 20 Nia hanoin hela ne’e, bainhira Na’i nia anju mosu ba nia iha mehi, dehan: “José, David nia oan, keta ta’uk simu Maria nu’udar ó-nia kaben, basá nia ko’us tiha hodi Espíritu Santu nia kbiit. 21 Nia sei tuur-ahi oan-mane ida, be ó sei hanaran Jesús, basá Nia mak sei soi povu husi sira-nia sala sira.” 22 Ne’e hotu mosu atu halo tuir lia ne’ebé Na’i fó sai nanis ona liu-husi profeta: 23 Feto-raan ida sei ko’us no tuur-ahi oan-mane ida ne’ebé sei hanaran ‘Emanuel’, katak ‘Maromak ho ita.’

- 𝐋𝐢𝐚 𝐌𝐚𝐤𝐬𝐨𝐢𝐧.
- 𝐊𝐫𝐢𝐬𝐭𝐮, 𝐚𝐦𝐢 𝐡𝐚𝐡𝐢 𝐢𝐭𝐚.
———————————-

R E F L E S A U N
08 SETEMBRU 2026 | Festa, Natividade da Bem-aventurada Virgem Maria

“Maria nia Natividade: Naroman Esperansa ba Salvasaun”

𝑴𝒂𝒖𝒏-𝒂𝒍𝒊𝒏 𝒅𝒐𝒃𝒆𝒏 𝒔𝒊𝒓𝒂 𝒊𝒉𝒂 𝑲𝒓𝒊𝒔𝒕𝒖!

Ohin, Kreda ho ksolok selebra Natividade Santíssima Virjen Maria nian. Maria nia moris mak hanesan naroman foun ne’ebé mosu molok loron-sa’e, tanba husi nia mak sei moris Jesús Kristu, “Emanuel”, Maromak ne’ebé mai hela ho ita.

Evanjellu ohin nian haktuir Jesús nia bei’ala sira. Naran sira-ne’e hatudu istória naruk ida ne’ebé iha fidelidade no fraqueza, santidade no sala, tempu ksolok no tempu terus. Maski ema nia istória la perfeitu, Maromak kontinua hala’o Nia planu salvasaun nian. Nia bele uza ema simples, família ho kanek no situasaun ne’ebé ita la komprende atu hamosu buat di’ak.

Iha rohan, Evanjellu lori ita ba José no Maria. Maria ko’us Jesús liuhusi Espíritu Santu nia kbiit. José, maski uluk la komprende buat ne’ebé akontese, rona Maromak nia liafuan no simu Maria ho fiar. Sira na’in rua hatudu katak Maromak nia planu presiza ema nia disponibilidade, obediénsia no konfiansa.

Maria nia moris mak prezente ida ba mundu. Maski nia sei labarik ki’ik, Maromak hili ona nia atu sai Salvador nia Inan. Maibé festa ida-ne’e la hapara de’it iha Maria nia moris; nia lori ita atu hateke ba Kristu. Maria nia dignidade hotu mai husi ninia relasaun ho Jesús. Nia mak rai di’ak ne’ebé simu Maromak nia Liafuan no fó Nia ba mundu.

Maria nia Natividade hanorin ita katak Maromak prepara Nia obra boot husi buat ki’ik sira. Labarik-feto ida nia moris parese akontesimentu simples, maibé iha Maromak nia planu, nia sai hahú foun ba salvasaun. Nune’e mós, ita nia asaun ki’ik sira, harohan, perdua, ajuda ema, tau matan ba família no simu ema ho domin, bele sai dalan atu Maromak halo buat boot.

Iha família, dala barak ita lori istória ne’ebé iha kanek, konflitu no sala sira. Evanjellu ohin konvida ita atu la lakon esperansa. Maromak la rejeita ita nia istória; Nia tama iha laran no transforma nia. Hanesan Nia prepara Maria hodi lori Jesús mai, Nia mós bele uza ita nia família atu lori dame, domin no esperansa ba ema seluk.

Maun-alin sira, iha Maria nia loron-moris, ita aprende atu agradece Maromak ba prezente moris nian. Ita mós husu atu Maria ajuda ita simu Maromak nia vontade ho fuan nakloke, nafatin fiar bainhira ita seidauk komprende, no lori Kristu ba ema sira ne’ebé ita hasoru.

Santíssima Virjen Maria nia moris mak anúnsiu katak naroman salvasaun besik ona. Ho Maria, esperansa foun tama iha mundu; no husi Maria, Emanuel, Maromak ho ita, mai atu soi ita.

“Maromak bele uza ita nia istória, maski iha kanek no frakeza, atu kumpre Nia planu domin nian. Hanesan Maria, ita bolu atu simu Nia Liafuan no lori Jesús ba mundu.”

Orasaun:
Santíssima Virjen Maria,
iha ita-nia Natividade, esperansa foun mosu ba mundu.
Hanorin ami atu fiar ba Maromak nia planu,
simu Nia vontade ho humildade no lori ita-nia Oan Jesús ba ami-nia família no komunidade.
Proteje ami-nia inan-aman, oan sira no família hotu.
Halo ami sai instrumentu dame, domin no esperansa nian.

Maria Santíssima, harohan mai ami. Amen.

✨Maromak haraik bensaun ba ita hotu.

✠
—————————— -
𝐅𝐨𝐧𝐭𝐞𝐬: ✠ 𝐁𝐈́𝐁𝐋𝐈𝐀 𝐒𝐀𝐆𝐑𝐀𝐃𝐀 | 𝐌𝐚𝐫𝐨𝐦𝐚𝐤 𝐊𝐨'𝐚𝐥𝐢𝐚 | 𝐀𝐝 𝐄𝐱𝐩𝐞𝐫𝐢𝐦𝐞𝐧𝐭𝐮𝐦 | 𝐁í𝐛𝐥𝐢𝐚 𝐊𝐚𝐭𝐨́𝐥𝐢𝐤𝐚 | GOD’S WORD 𝙳𝙰𝙸𝙻𝚈 𝚁𝙴𝙵𝙻𝙴𝙲𝚃𝙸𝙾𝙽 | 𝖱𝖾𝖿𝗅𝖾𝗌𝖺𝗎𝗇 𝗅𝗈𝗋𝗈𝗅𝗈𝗋𝗈𝗇 𝗇𝗂𝖺𝗇 𝗁𝗎𝗌𝗂 𝖢𝖺𝗍𝗁𝗈𝗅𝗂𝖼 𝖥𝖺𝗆𝗂𝗅𝗒 𝖠𝗅𝗍𝖺𝗋 𝖳𝗂𝗆𝗈𝗋-𝗅𝖾𝗌𝗍𝖾 @𝚌𝚘𝚙𝚢𝚛𝚒𝚐𝚑𝚝 ²⁰²⁶

07/09/2026

Sua Eminência Dom Virgílio Cardeal do Carmo da Silva, SDB, Arcebispo de Dili e Presidente da CET convida sarani sira hotu atu participa iha Missa Solene ba ita nia Prelados; Dom Jaime Garcia Goulart, Dom José Joaquim Ribeiro, Monsenhor Martinho da Costa Lopes no Dom Alberto Ricardo da Silva molok lori ba haloot iha SE Catedral Dili.

Missa Solene ne'e sei realiza iha loron:
Quinta-feira lorokraik,
dia 10 de setembro de 2026, tuku 5:00 otl
Fatin: Esplanada Tasi-Tolu, Dili

07/09/2026

Watch LIVE on Shalom World: Pope Leo XIV celebrates Holy Mass at the Shrine of Our Lady of Good Counsel in Genazzano on Monday, September 7, 2026, on the eve of the Feast of the Nativity of the Blessed Virgin Mary.

Returning to a Marian shrine close to his heart, the Holy Father will lead the faithful in prayer and celebrate the Eucharist as the Church prepares to honor the birth of the Blessed Virgin Mary. Join Catholics around the world for this special moment of faith, prayer, and devotion to Our Lady.

06/09/2026

07 SETEMBRU 2026 | Semana XXIII Tempu Ordináriu
🟩 Kór litúrjiku: Verde
📖 1ª Leitura: 1 Korinto 5:1-8
📖 🎵 Salmo Responsoriál: Salmo 5:5-6, 7, 12 (R. 9a)
📖☦️ Evanjellu: Lucas 6:6-11

- Aleluia, Aleluia, Aleluia.

✠ 𝐍𝐚’𝐢 𝐉𝐞𝐬𝐮́𝐬 𝐊𝐫𝐢𝐬𝐭𝐮 𝐧𝐢𝐚 𝐄𝐯𝐚𝐧𝐣𝐞𝐥𝐥𝐮† 𝐧𝐮’𝐮𝐝𝐚𝐫 𝐒𝐚𝐮𝐧 Lucas 𝐡𝐚𝐤𝐭𝐮𝐢𝐫:

Iha tempu ne'ebá, 6 Iha loron sábadu seluk, Jesús tama iha sinagoga no hahú hanorin. Iha ne'ebá iha ema ida ho liman loos maten. 7 Eskriba no farizeu sira hamatan Nia, atu haree Nia sei kura ema iha loron sábadu ka lae, nune'e sira bele hetan motivu hodi du’un Nia. 8 Hodi hatene sira-nia hanoin, Jesús dehan ba ema ho liman maten: "Hamriik iha klaran ne'ebá." Nia hamriik tiha. 9 Tuirmai, Jesús husu ba sira: "Iha loron sábadu, saida mak di'ak liu, halo di'ak ka halo aat, soi ema nia moris ka halakon nia?" 10 Hafoin, hodi hateke ba sira hotu ne'ebé hale’u Nia, Nia dehan ba ema moras ne'e: "Lolo ó liman bá!" Nia halolo, no liman sai di'ak fali. 11 Sira sai laran-nakali no ko’alia ba malu kona-ba saida mak sira bele halo hasoru Jesús.

- 𝐋𝐢𝐚 𝐌𝐚𝐤𝐬𝐨𝐢𝐧.
- 𝐊𝐫𝐢𝐬𝐭𝐮, 𝐚𝐦𝐢 𝐡𝐚𝐡𝐢 𝐢𝐭𝐚.
———————————-

R E F L E S A U N
07 SETEMBRU 2026 | Semana XXIII Tempu Ordináriu

“Miserikórdia no domin mak Lei Maromak nian.”

𝑴𝒂𝒖𝒏-𝒂𝒍𝒊𝒏 𝒅𝒐𝒃𝒆𝒏 𝒔𝒊𝒓𝒂 𝒊𝒉𝒂 𝑲𝒓𝒊𝒔𝒕𝒖!

Iha Evanjellu ohin nian, Jesús tama sinagoga iha loron Sábadu. Iha ne’ebá, Nia hasoru ema ida ne’ebé nia liman-loos mate. Farizeu no mestre Lei sira la haree ema ne’e nia terus; sira observa de’it atu buka razaun hodi akuza Jesús. Sira hatene katak Jesús iha kbiit atu kura, maibé sira nia fuan taka ba misericórdia.

Jesús bolu ema moras ne’e atu hamriik iha ema hotu nia oin. Ho asaun ida-ne’e, Jesús hatudu katak ema nia dignidade no moris importante liu fali regra ne’ebé ema interpreta ho fuan toos. Nia husu: “Iha loron Sábadu, bele halo di’ak ka halo aat, soi ema nia moris ka halakon nia?” Pergunta ida-ne’e obriga sira atu haree Lei nia sentidu loloos. Lei Maromak nian la mai atu hanehan ema, maibé atu lori ema ba moris, liberdade no salvasaun.

Jesús dehan ba ema ne’e: “Lolo ó liman bá!” Ema ne’e halo tuir, no nia liman sai di’ak fali. Nia obediénsia sai dalan ba kura. Liman ne’ebé uluk mate, agora bele servisu, simu no fó; bele abraça, tulun no harii fali nia moris. Nune’e mós, Jesús hakarak kura buat ne’ebé “mate” iha ita: ita nia fiar ne’ebé malirin, domin ne’ebé menus, esperansa ne’ebé lakon, ka fuan ne’ebé lakohi perdua.

Dala barak, ita mós bele hanesan Farizeu sira. Ita haree ema nia sala, maibé la haree nia kanek; ita defende regra, maibé haluha domin; ita lalais atu julga, maibé tarde atu tulun. Fiar ne’ebé loos la bele haketak hosi misericórdia. Katekismu Kreda Katólika hanorin katak loron sagradu tenke sai tempu atu adora Maromak, halo asaun misericórdia no fó tempu ba família, moras no ema ne’ebé presiza tulun. Tanba ne’e, halo di’ak la kontra Lei Maromak nian; halo di’ak mak kumpre Lei nia objetivu kle’an liu.

Iha ita nia família no komunidade, bele iha ema balu ne’ebé nia “liman mate”: ema ne’ebé lakon korajen, la sente simu iha nia familia, hetan kanek hosi liafuan, ka hela mesak iha problema laran. Jesús konvida ita atu la sai observadór de’it. Maibe ita tenke sai liman ne’ebé foti ema monu, hamoos matan-been, fó hahán ba ema nebe hamlaha, no lori dame ba família.

Maun-alin doben sira, Evanjellu ohin nian husu ita atu hili: ita hakarak uza fiar atu julga ka atu kura? Ita hakarak buka ema nia sala ka buka dalan atu salva nia? Jesús hatudu resposta ho Nia rasik nia asaun: iha tempu no situasaun hotu, domin no misericórdia tenke manán.

Mai ita lolo ita nia liman ba Kristu, liman ne’ebé fraku, kanek ka moras, atu Nia kura. Hafoin, mai ita uza liman ne’ebé Nia kura ona atu halo di’ak, serve no lori Nia domin ba ema seluk.

Orasaun:
Na’i Jesús, kura ami nia fuan ne’ebé toos no ami nia liman ne’ebé tarde atu halo di’ak. Hanorin ami atu haree ema nia terus, la’ós nia sala de’it. Halo ami sai Ita-Boot nia liman misericórdia nian iha ami nia família no komunidade.

Amen.

✨Maromak haraik bensaun ba ita hotu.

✠
—————————— -
𝐅𝐨𝐧𝐭𝐞𝐬: ✠ 𝐁𝐈́𝐁𝐋𝐈𝐀 𝐒𝐀𝐆𝐑𝐀𝐃𝐀 | 𝐌𝐚𝐫𝐨𝐦𝐚𝐤 𝐊𝐨'𝐚𝐥𝐢𝐚 | 𝐀𝐝 𝐄𝐱𝐩𝐞𝐫𝐢𝐦𝐞𝐧𝐭𝐮𝐦 | 𝐁í𝐛𝐥𝐢𝐚 𝐊𝐚𝐭𝐨́𝐥𝐢𝐤𝐚 | GOD’S WORD 𝙳𝙰𝙸𝙻𝚈 𝚁𝙴𝙵𝙻𝙴𝙲𝚃𝙸𝙾𝙽 | 𝖱𝖾𝖿𝗅𝖾𝗌𝖺𝗎𝗇 𝗅𝗈𝗋𝗈𝗅𝗈𝗋𝗈𝗇 𝗇𝗂𝖺𝗇 𝗁𝗎𝗌𝗂 𝖢𝖺𝗍𝗁𝗈𝗅𝗂𝖼 𝖥𝖺𝗆𝗂𝗅𝗒 𝖠𝗅𝗍𝖺𝗋 𝖳𝗂𝗆𝗈𝗋-𝗅𝖾𝗌𝗍𝖾 @𝚌𝚘𝚙𝚢𝚛𝚒𝚐𝚑𝚝 ²⁰²⁶

05/09/2026

06 SETEMBRU 2026 | Domingu XXIII Tempu Ordináriu
🟩 Kór litúrjiku: Verde
📖 1ª Leitura: Ezequiel 33:7-9
📖 🎵 Salmo Responsoriál: Salmo 94(95),1-2.6-7.8-9
📖 2ª Leitura: Roma 13:8-10
📖☦️ Evanjellu: Mateus 18:15-20

- Aleluia, Aleluia, Aleluia.

✠ 𝐍𝐚’𝐢 𝐉𝐞𝐬𝐮́𝐬 𝐊𝐫𝐢𝐬𝐭𝐮 𝐧𝐢𝐚 𝐄𝐯𝐚𝐧𝐣𝐞𝐥𝐥𝐮† 𝐧𝐮’𝐮𝐝𝐚𝐫 𝐒𝐚𝐮𝐧 Mateus 𝐡𝐚𝐤𝐭𝐮𝐢𝐫:

Iha tempu ne’ebá, Jesús lia tún ba nia eskolante sira dehan:
15 “O nia maun eh alin sala karik hasoru o, ba ko’alia ho nia mesa-mesak hodi hatudu nia sala. Nia rona karik o, o manan ona o nia maun eh alin ne’e. 16 Nia la rona karik o, ba lori tan ema ida ka rua atu lia hotu sai los hodi sasin na’in rua ka tolu nia liafuan. 17 Nia lakohi rona karik ema sira ne’e, ba fo hatene ba Kreda. Maibe nia lakohi rona Kreda karik, hare ona nia nudar ema jentiu no ema publikanu ida. 18 Tebes, ha’u dehan ba imi: Buat hotu nebe imi futu iha rai sei futu metin iha lalehan; buat hotu nebe imi kore iha rai sei kore mos iha lalehan.” 19 “Ha’u dehan tan ba imi: “Imi na’in rua iha rai ne’e lia tuir malu karik atu husu buat ida, ha’u Aman iha lalehan sei fo duni ba imi. 20 Basa iha fatin nebe ema na’in rua ka tolu halibur hamutuk hodi ha’u nia naran, ha’u mos iha sira nia leet.”

- 𝐋𝐢𝐚 𝐌𝐚𝐤𝐬𝐨𝐢𝐧.
- 𝐊𝐫𝐢𝐬𝐭𝐮, 𝐚𝐦𝐢 𝐡𝐚𝐡𝐢 𝐢𝐭𝐚.
———————————-

R E F L E S A U N
06 SETEMBRU 2026 | Domingu XXIII Tempu Ordináriu
†Santo do Dia:

“Korrije ho domin, perdua ho laran, no harii unidade iha Kristu.”

𝑴𝒂𝒖𝒏-𝒂𝒍𝒊𝒏 𝒅𝒐𝒃𝒆𝒏 𝒔𝒊𝒓𝒂 𝒊𝒉𝒂 𝑲𝒓𝒊𝒔𝒕𝒖!

Ohin, Maromak konvida ita atu haree fali oinsá ita moris nu’udar maun-alin iha família, komunidade no Kreda. Fiar la’ós de’it relasaun pesoál entre “ha’u no Maromak”; fiar mós husu ita atu tau matan ba malu, ajuda malu no lori malu fila fali ba dalan loos.

Iha Evanjellu, Jesús dehan: “O nia maun eh alin sala karik hasoru o, ba ko’alia ho nia mesa-mesak hodi hatudu nia sala.” Liafuan ida-ne’e hatudu katak koreksaun kristaun tenke hahú hosi domin. Bainhira ema ida sala, Jesús la hanorin ita atu ko’alia nia sala ba ema hotu, atu hamosu moe, atu espalha lia bobar ka atu julga nia. Jesús haruka ita atu bá hasoru nia diretamente, ho respeitu no ho hakarak atu “manán” fali ita-nia maun ka alin.

Ne’e mak diferensa boot entre koreksaun no kondena. Kondena buka atu hatún ema; koreksaun fraterna buka atu hasa’e ema. Kondena dehan: “Ó ema aat.” Maibé domin dehan: “Buat ne’ebé ó halo ne’e sala; mai ita buka dalan atu hadi’a.” Kristaun ida la bele kontente bainhira nia maun ka alin monu; nia tenke hakarak atu ajuda nia hamriik fali.

Leitura dahuluk hosi profeta Ezequiel mós fó responsabilidade boot ida ba ita. Maromak tau profeta nu’udar guarda ba povu. Guarda ida la bele haree perigu no nonook de’it. Nune’e mós, ita la bele dehan: “Nia moris, nia problema.” Bainhira ita haree ema ne’ebé ita hadomi la’o ba dalan ne’ebé bele estraga nia moris, domin loos husu ita atu ko’alia. Maibé ita tenke ko’alia ho prudénsia, umildade no misericórdia.

São Paulo, iha leitura daruak, fó xave atu komprende buat hotu ne’e: “Keta deve buat ida ba ema seluk, hadomi malu de’it.” Domin mak lei nia kumprimentu. Tanba ne’e, koreksaun kristaun ne’ebé la iha domin bele sai arma atu hakanek ema. Maibé domin ne’ebé loos mós la’ós domin ne’ebé nonook bainhira buat sala akontese. Domin loos buka verdade, maibé verdade ne’e ko’alia ho karidade.

Iha ita-nia família, ida-ne’e importante tebes. Dala barak problema ki’ik sai boot tanba ita la ko’alia diretamente. Feen ko’alia kona ba la’en ba ema seluk, la’en ko’alia kona ba feen ba nia belun; inan-aman ko’alia kona ba oan nia sala ba ema seluk, maibé la tuur hamutuk ho oan atu rona no ko’alia ho nia.

Jesús hatudu dalan diferente: ba hasoru nia, ko’alia ho nia, rona nia, no buka atu manán fali relasaun.

Ida-ne’e la fasil. Atu korrije ema ho domin, uluknanain ita presiza korrije ita-nia fuan rasik. Ita tenke husu: Ha’u ko’alia tanba ha’u hadomi nia, ka tanba ha’u hirus? Ha’u hakarak salva relasaun, ka hakarak prova katak ha’u mak loos? Ha’u hakarak nia muda, ka hakarak nia moe?

Se ita-nia objetivu mak domin, ita-nia maneira atu ko’alia mós sei muda.

Evanjellu ohin la remata ho sala no koreksaun. Nia remata ho komunidade no orasaun. Jesús dehan: “Iha fatin ne’ebé ema na’in rua ka tolu halibur hamutuk hodi Ha’u nia naran, Ha’u mós iha sira nia leet.”

Ne’e mak promesa furak ida ba família kristaun. Bainhira família halibur hamutuk atu harohan, Kristu iha sira nia leet. Bainhira feen-la’en harohan hamutuk, Kristu iha sira nia leet. Bainhira inan-aman no oan sira halibur iha altar família nian, lee Maromak nia futar Lifuan no harohan hamutuk, Kristu rasik mak sai sentru ba uma ne’e.

Maibé “halibur hodi Ha’u nia naran” la’ós de’it halibur fizikamente. Signifika halibur iha Kristu nia espírito: iha domin, perdaun, verdade, unidade no dame. Ita bele hela iha uma ida de’it, maibé ita-nia fuan dook malu. Ita bele tuur iha meza ida de’it, maibé la ko’alia malu. Ita bele bá Missa hamutuk, maibé rai hela hirus no vingansa iha fuan. Tamba nee ohin Jesús bolu ita atu hakat liu hosi divizaun ba rekonsiliasaun.

Maun-alin doben sira, Kreda mak família ida. Iha família ida, dala ruma ita sei hakanek malu, sala ba malu no la komprende malu. Maibé Kristu la hakarak katak sala sai razaun atu ita lakon malu. Nia hakarak katak domin sai dalan atu ita hetan malu fila fali.

Tanba ne’e, bainhira ema ida sala, keta lalais soe nia; buka nia.
Bainhira ema ida hakanek ita, keta lalais espalha nia sala; ko’alia ho nia.
Bainhira relasaun nakfera, keta kontente ho distánsia; buka rekonsiliasaun.
No bainhira ita rasik mak sala, iha umildade atu simu koreksaun no husu perdaun.

Tamba ne’e, Maromak husu ita atu sai guarda ba malu, la’ós juiz ba malu. Ita-nia misaun la’ós atu buka ema nia sala, maibé atu ajuda malu la’o ba santidade.

Mai ita husu grasa atu iha matan ne’ebé haree maun-alin ho misericórdia, ibun ne’ebé ko’alia verdade ho domin, no fuan ne’ebé prontu atu perdua.

No liuliu, mai ita halo ita-nia família sai fatin ne’ebé Jesús nia promesa bele sai realidade: “Iha fatin ne’ebé ema na’in rua ka tolu halibur hamutuk hodi Ha’u nia naran, Ha’u mós iha sira nia leet.”

Orasaun:
Na’i Jesús, hanorin ami atu hadomi malu ho domin loos. Fó ba ami umildade atu simu koreksaun bainhira ami sala, no fó ba ami matenek atu korrije ami-nia maun-alin ho respeitu no misericórdia. Kura kanek iha ami-nia família no komunidade, hasai hirus no vingansa hosi ami-nia fuan, no halo ami sai instrumento ba dame no rekonsiliasaun. Hela nafatin iha ami-nia família nia klaran, atu ami bele moris iha unidade, domin no perdaun. Amen.

✨Maromak haraik bensaun ba ita hotu.

✠
—————————— -
𝐅𝐨𝐧𝐭𝐞𝐬: ✠ 𝐁𝐈́𝐁𝐋𝐈𝐀 𝐒𝐀𝐆𝐑𝐀𝐃𝐀 | 𝐌𝐚𝐫𝐨𝐦𝐚𝐤 𝐊𝐨'𝐚𝐥𝐢𝐚 | 𝐀𝐝 𝐄𝐱𝐩𝐞𝐫𝐢𝐦𝐞𝐧𝐭𝐮𝐦 | 𝐁í𝐛𝐥𝐢𝐚 𝐊𝐚𝐭𝐨́𝐥𝐢𝐤𝐚 | GOD’S WORD 𝙳𝙰𝙸𝙻𝚈 𝚁𝙴𝙵𝙻𝙴𝙲𝚃𝙸𝙾𝙽 | 𝖱𝖾𝖿𝗅𝖾𝗌𝖺𝗎𝗇 𝗅𝗈𝗋𝗈𝗅𝗈𝗋𝗈𝗇 𝗇𝗂𝖺𝗇 𝗁𝗎𝗌𝗂 𝖢𝖺𝗍𝗁𝗈𝗅𝗂𝖼 𝖥𝖺𝗆𝗂𝗅𝗒 𝖠𝗅𝗍𝖺𝗋 𝖳𝗂𝗆𝗈𝗋-𝗅𝖾𝗌𝗍𝖾 @𝚌𝚘𝚙𝚢𝚛𝚒𝚐𝚑𝚝 ²⁰²⁶

04/09/2026

05 SETEMBRU 2026 | Semana XXII Tempu Ordináriu
†Santo do Dia: Santa Teresa de Calcutá, fundadora, misionária no inan ba ema kiak sira
🟩 Kór litúrjiku: Verde
📖 1ª Leitura: 1 Korinto 4:6b-15
📖 🎵 Salmo Responsoriál: Salmo 144(145),17-18.19-20.21 (R. 18a)
📖☦️ Evanjellu: Lucas 6:1-5

- Aleluia, Aleluia, Aleluia.

✠ 𝐍𝐚’𝐢 𝐉𝐞𝐬𝐮́𝐬 𝐊𝐫𝐢𝐬𝐭𝐮 𝐧𝐢𝐚 𝐄𝐯𝐚𝐧𝐣𝐞𝐥𝐥𝐮† 𝐧𝐮’𝐮𝐝𝐚𝐫 𝐒𝐚𝐮𝐧 Lucas 𝐡𝐚𝐤𝐭𝐮𝐢𝐫:

Iha tempu ne'ebá, 1 Iha loron Sabadu ida, bainhira Jesús la’o hosi to’os batar nian, nia eskolante sira hahu silu no dulas trigo iha sira nia liman hodi han. 2 Fariseu sira dehan: “Tan sa imi halo buat nebe bandu iha loron Sabadu?” 3 Jesús hatan ba sira: “Imi la le buat nebe David halo bainhira nia ho nia maluk sira hamlaha, 4 katak nia tama iha Maromak nia Uma, hola paun sakrifisiu nian hodi han no fahe ba sira, paun nebe amlulik sira deit mak bele han?” 5 Nia dehan tan ba sira: “Oan Mane mak Sabadu nia Na’i”

- 𝐋𝐢𝐚 𝐌𝐚𝐤𝐬𝐨𝐢𝐧.
- 𝐊𝐫𝐢𝐬𝐭𝐮, 𝐚𝐦𝐢 𝐡𝐚𝐡𝐢 𝐢𝐭𝐚.
———————————-

R E F L E S A U N
05 SETEMBRU 2026 | Semana XXII Tempu Ordináriu
†Santo do Dia: Santa Teresa de Calcutá, fundadora, misionária no inan ba ema kiak sira

“ITA-NIA FUAN HAMLAHA BA MAROMAK”
- Dalaruma, ita-nia hakaran ba deskansu, komprensaun, perdaun no dame mak sinál katak ita-nia fuan hamlaha ba Maromak.

𝑴𝒂𝒖𝒏-𝒂𝒍𝒊𝒏 𝒅𝒐𝒃𝒆𝒏 𝒔𝒊𝒓𝒂 𝒊𝒉𝒂 𝑲𝒓𝒊𝒔𝒕𝒖!

Iha Evanjellu ohin nian, Farizeu sira kritika Jesús nia eskolante sira tanba sira silu no dulas trigu hodi han iha loron Sábadu.
Farizeu sira hare de’it ba regra, maibé Jesús hare uluk ema nia nesesidade. Nia hatudu katak ukun-fuan Maromak nian tenke lori ita ba domin, misericórdia no moris; la’ós atu halo ema terus liután.

Jesús la rejeita lei Sábadu nian; Nia hatudu lei ne’e nia sentidu kle’an. Maromak fó loron Sábadu atu ema deskansa, adora Nia no simu fali forsa ba moris. Tanba ne’e, lei sagrada hotu nia objetivu mak atu lori ita ba domin no salvasaun. Lei ne’ebé la lori ba misericórdia bele sai regra mamuk de’it.

Jesús remata ho liafuan boot ida:

“Oan-Mane mak Na’in ba Sábadu.” - Lucas 6,5

Liafuan ida-ne’e revela katak Jesús iha autoridade divina. Nia mak Na’in ba lei, tanba lei hotu hetan nia realizasaun tomak iha Nia domin no misericórdia.

Ita mós dala barak sente hamlaha iha fuan-laran. Hamlaha ne’e bele mosu nu’udar hakaran atu deskansa, hetan ema ne’ebé komprende ita, simu perdaun, hetan dame, signifikadu ba moris ka sente katak ita pertense ba família no komunidade ida. Iha hakaran sira ne’e nia laran, ita-nia fuan buka Maromak, maski dala ruma ita la hatene.

Osan, susesu, divertimentu ka teknolojia bele fó ksolok ba tempu badak; maibé sira la bele hakonu ita nia fuan tomak. Jesús de’it mak bele fó hahán ne’ebé hamosu dame kle’an iha ita-nia laran. Tanba ne’e, bainhira ita sente laran mamuk (espiritual), labele halai dook hosi Maromak. Mai besik liután ba Nia liuhosi orasaun, Maromak nia Liafuan no Eukaristia.

Santa Teresa de Calcutá, ne’ebé ita selebra ohin, moris tuir Evanjellu ida-ne’e. Nia la husu ema nia nasaun, relijia ka pozisaun molok tulun sira. Nia haree Kristu nia oin iha ema kiak, hamlaha, moras, mesak no abandonadu, liuliu iha sira ne’ebé mundu ignora no lakohi haree.

Santa Teresa hatudu mai ita katak santidade la hahú de’it husi obra boot sira. Santidade hahú bainhira ita halo asaun ki’ik ho domin boot: fó bee ba ema hamrook, rona ema ne’ebé triste, visita ema moras, hamnasa ba ema mesak, perdua membru família ida ka fó tempu ba labarik sira.

Dalaruma ita buka Kristu iha fatin dook, maibé Nia hela besik kedas: iha ita-nia kaben ne’ebé kolen, iha inan-aman ne’ebé presiza atensaun, iha oan ne’ebé hakarak ita rona nia, no iha viziñu ne’ebé moris mesak. Miserikórdia tenke hahú uluk iha ita-nia uma laran.

Iha loron ida-ne’e, ita husu ba Na’i atu fó mai ita fuan hanesan Santa Teresa nian: fuan ne’ebé la taka an iha regra de’it, maibé prontu atu haree, rona, hadomi no serví. Bainhira ita halo buat ki’ik ho domin boot, ita sai naroman Kristu nian ba família no ba mundu.

Reflesaun ba Família:

Iha família, dala ruma ita fó hahán ba isin, maibé haluha fó tempu, atensaun, domin no perdaun ba malu. Labarik sira bele iha sasán barak, maibé sira-nia fuan hamlaha ba inan-aman nia prezensa. Kaben-na’in sira bele hela iha uma ida, maibé sira-nia fuan hamlaha ba diálogu no komprensaun.

Ohin, família bele halibur hamutuk durante minutu lima, tau telemóvel iha sorin, no husu malu: “Saida mak ó-nia fuan presiza liu agora?” Rona malu ho domin no remata ho orasaun badak. Maromak bele hahú kura família liuhosi jestu simples ida-ne’e.

ORASAUN BADAK:
Na’i Jesus, Ita hatene ami-nia nesesidade no hamlaha kle’an iha ami-nia fuan. Bainhira ami sente mamuk, lori ami atu buka Ita, la’ós ksolok mundu nian de’it. Hanorin ami-nia família atu rona malu, komprende malu, perdua malu no fó tempu ba malu.

Nakonu ami-nia uma ho Ita-nia prezensa, domin no dame. Halo ami hatene katak Ita de’it mak Pão Moris ne’ebé bele habosu ami-nia fuan para nafatin. Amén.

Santa Teresa de Calcutá, harohan mai ami.

✨Maromak haraik bensaun ba ita hotu.

✠
—————————— -
𝐅𝐨𝐧𝐭𝐞𝐬: ✠ 𝐁𝐈́𝐁𝐋𝐈𝐀 𝐒𝐀𝐆𝐑𝐀𝐃𝐀 | 𝐌𝐚𝐫𝐨𝐦𝐚𝐤 𝐊𝐨'𝐚𝐥𝐢𝐚 | 𝐀𝐝 𝐄𝐱𝐩𝐞𝐫𝐢𝐦𝐞𝐧𝐭𝐮𝐦 | 𝐁í𝐛𝐥𝐢𝐚 𝐊𝐚𝐭𝐨́𝐥𝐢𝐤𝐚 | GOD’S WORD 𝙳𝙰𝙸𝙻𝚈 𝚁𝙴𝙵𝙻𝙴𝙲𝚃𝙸𝙾𝙽 | 𝖱𝖾𝖿𝗅𝖾𝗌𝖺𝗎𝗇 𝗅𝗈𝗋𝗈𝗅𝗈𝗋𝗈𝗇 𝗇𝗂𝖺𝗇 𝗁𝗎𝗌𝗂 𝖢𝖺𝗍𝗁𝗈𝗅𝗂𝖼 𝖥𝖺𝗆𝗂𝗅𝗒 𝖠𝗅𝗍𝖺𝗋 𝖳𝗂𝗆𝗈𝗋-𝗅𝖾𝗌𝗍𝖾 @𝚌𝚘𝚙𝚢𝚛𝚒𝚐𝚑𝚝 ²⁰²⁶

03/09/2026

The mortal remains of three former Church leaders return to Dili, joining those of a fourth bishop as Timor-Leste honours pastors who accompanied the ...

03/09/2026

04 SETEMBRU 2026 | Semana XXII Tempu Ordináriu
†Santo do Dia:
🟩 Kór litúrjiku: Verde
📖 1ª Leitura: 1 Korinto 4,1-5
📖 🎵 Salmo Responsoriál:Salmo36(37),3-4.5-6.27-28.39-40 (R. 39a)
📖☦️ Evanjellu: Lucas 5:33-39

- Aleluia, Aleluia, Aleluia.

✠ 𝐍𝐚’𝐢 𝐉𝐞𝐬𝐮́𝐬 𝐊𝐫𝐢𝐬𝐭𝐮 𝐧𝐢𝐚 𝐄𝐯𝐚𝐧𝐣𝐞𝐥𝐥𝐮† 𝐧𝐮’𝐮𝐝𝐚𝐫 𝐒𝐚𝐮𝐧 Lucas 𝐡𝐚𝐤𝐭𝐮𝐢𝐫:

Iha tempu ne'ebá, 33 Sira dehan ba Nia: "João nia eskolante sira hadera-an beibeik hodi halo orasaun; nune'e mós farizeu sira nian. Maibé ita-nian han no hemu!" 34 Jesús hatán ba sira: "Imi bele halo noivu nia maluk sira hadera-an, bainhira noivu hamutuk hela ho sira? 35 Otas sei to’o mai, bainhira ema sei hasai noivu husi sira; iha loron hirak-ne’ebá mak sira sei hadera-an. “ 36 Nia hato’o tan ba sira aiknanoik ida ne’e: “Ema ida la tesi hatais foun ida atu taka hatais tuan nia kuak; selae, hatais foun sei lees ida tuan, tan hena husi roupa tuan la hanesan hena husi ida foun. 37 No mós, ema ida la fui tua foun iha tua kulit tuan sira; selae, tua foun sei halo kulit nakfera no tua nakfakar, hodi halakon tua no kulit sira. 38 Ne’e duni, tua foun sei tau iha kulit foun sira. 39 No la iha ema be, hemu tiha tua tuan, hakarak hemu tua foun, basá nia dehan: “Tua tuan mak di’ ak!”

- 𝐋𝐢𝐚 𝐌𝐚𝐤𝐬𝐨𝐢𝐧.
- 𝐊𝐫𝐢𝐬𝐭𝐮, 𝐚𝐦𝐢 𝐡𝐚𝐡𝐢 𝐢𝐭𝐚.
———————————-

R E F L E S A U N
04 SETEMBRU 2026 | Semana XXII Tempu Ordináriu

“Fuan Foun Atu Simu Moris Foun Hosi Kristu”

𝑴𝒂𝒖𝒏-𝒂𝒍𝒊𝒏 𝒅𝒐𝒃𝒆𝒏 𝒔𝒊𝒓𝒂 𝒊𝒉𝒂 𝑲𝒓𝒊𝒔𝒕𝒖!

Iha Evanjellu ohin, ema balun kompara Jesús nia eskolante sira ho João Batista no farizeu sira nia eskolante sira. Sira husu tanbasá Jesús nia eskolante sira la jejún hanesan grupu seluk. Jesús hatán liuhosi imajen noivu nian: bainhira noivu sei hamutuk ho nia belun sira, tempu ne’e mak tempu haksolok nian. Noivu ne’e mak Jesús rasik. Nia prezensa lori ksolok, salvasaun no moris foun.

Jesús la rejeita jejún. Nia rasik dehan katak tempu sei to’o bainhira noivu sei hasai husi sira; iha tempu ne’ebá mak eskolante sira sei jejún. Ne’e katak jejún no peniténsia importante, maibé tenke halo ho motivasaun loos: la’ós atu ema seluk haree ita nia santidade, maibé atu hametin relasaun ho Maromak, hamoos fuan no aumenta domin ba ema seluk.

Aiknanoik kona ba hatais foun no tua foun hatudu katak Jesús la mai atu “taka kuak” de’it iha ita nia moris tuan. Nia mai atu hafoun ita nia moris tomak. Dala barak ita hakarak simu Jesús nia liafuan, maibé ita lakohi husik hahalok tuan: ódiu, laran-moras, orgullu, julgamentu, lia-bosok no egoízmu. Ita hakarak simu “tua foun” hosi Evanjellu, maibé nafatin rai “kulit tuan” iha ita nia laran. Nune’e, Maromak nia grasa susar atu servisu iha ita nia moris.

Tua foun reprezenta ksolok, grasa no moris foun ne’ebé Kristu oferese. Kulit foun reprezenta fuan ne’ebé nakloke, umilde no prontu atu muda. Atu simu Jesús, la sufisiente de’it hatene orasaun, bá Missa ka kumpre obrigasaun relijioza. Ita presiza husik Espíritu Santu troka ita nia maneira hanoin, ko’alia no trata ema seluk.

Iha família, ita bele halo atividade relijioza barak, maibé se la iha deskulpa, pasiénsia, diálogu no domin, ita sei hanesan kulit tuan ne’ebé la bele rai tua foun. Evanjellu ohin husu ba inan aman sira atu hafoun sira nia domin; husu ba oan sira atu aprende rona no respeita; no husu ba família tomak atu husik Kristu sai sentru husi uma-laran.

Leitura dahuluk mós hanorin ita atu sai Kristu nia atan fiél no la lalais julga ema seluk, tanba Na’i de’it mak hatene buat ne’ebé subar iha ema nia fuan. Fuan foun la buka sala ema seluk nian, maibé buka uluk konversaun iha nia an rasik.

Tanba ne’e, ohin Jesús konvida ita atu husik hahalok tuan ne’ebé taka dalan ba Jesús nia grasa. Kristu lori buat foun mai, maibé ita tenke fó espasu ba Nia. Bainhira ita entrega ita nia fuan ba Nia, Nia bele transforma ita sai ema foun, ema ne’ebé moris ho fiar, esperansa, domin no ksolok.

ORASAUN BADAK:
Na’i Jesús, fó mai ami fuan foun ne’ebé nakloke atu simu Ita-Boot nia Liafuan. Hamoos ami hosi hahalok tuan ne’ebé haketak ami hosi Ita-Boot no hosi maluk sira. Halo ami sai atan fiél no testemuña ba moris foun ne’ebé mai hosi Evanjellu. Amen.

✨Maromak haraik bensaun ba ita hotu.

✠
—————————— -
𝐅𝐨𝐧𝐭𝐞𝐬: ✠ 𝐁𝐈́𝐁𝐋𝐈𝐀 𝐒𝐀𝐆𝐑𝐀𝐃𝐀 | 𝐌𝐚𝐫𝐨𝐦𝐚𝐤 𝐊𝐨'𝐚𝐥𝐢𝐚 | 𝐀𝐝 𝐄𝐱𝐩𝐞𝐫𝐢𝐦𝐞𝐧𝐭𝐮𝐦 | 𝐁í𝐛𝐥𝐢𝐚 𝐊𝐚𝐭𝐨́𝐥𝐢𝐤𝐚 | GOD’S WORD 𝙳𝙰𝙸𝙻𝚈 𝚁𝙴𝙵𝙻𝙴𝙲𝚃𝙸𝙾𝙽 | 𝖱𝖾𝖿𝗅𝖾𝗌𝖺𝗎𝗇 𝗅𝗈𝗋𝗈𝗅𝗈𝗋𝗈𝗇 𝗇𝗂𝖺𝗇 𝗁𝗎𝗌𝗂 𝖢𝖺𝗍𝗁𝗈𝗅𝗂𝖼 𝖥𝖺𝗆𝗂𝗅𝗒 𝖠𝗅𝗍𝖺𝗋 𝖳𝗂𝗆𝗈𝗋-𝗅𝖾𝗌𝗍𝖾 @𝚌𝚘𝚙𝚢𝚛𝚒𝚐𝚑𝚝 ²⁰²⁶

02/09/2026

03 SETEMBRU 2026 | Semana XXII Tempu Ordináriu
†Santo do Dia: Memoriál Saun Gregório Magno, Amu-Papa no Doutór Igreja nian
⬜️ Kór litúrjiku: Mutin
📖 1ª Leitura: 1 Korinto 3,18-23
📖 🎵 Salmo Responsoriál: Salmo 23(24),1-2.3-4ab.5-6 (R. 1)
📖☦️ Evanjellu: Lucas 5:1-11

- Aleluia, Aleluia, Aleluia.

✠ 𝐍𝐚’𝐢 𝐉𝐞𝐬𝐮́𝐬 𝐊𝐫𝐢𝐬𝐭𝐮 𝐧𝐢𝐚 𝐄𝐯𝐚𝐧𝐣𝐞𝐥𝐥𝐮† 𝐧𝐮’𝐮𝐝𝐚𝐫 𝐒𝐚𝐮𝐧 Lucas 𝐡𝐚𝐤𝐭𝐮𝐢𝐫:

Iha tempu ne’ebá: 1 Iha loron ida ema lubun boot ida hale’u Jesús atu rona Maromak nia liafuan. Nia hamriik iha tasi Jenesare nia ibun. 2 Nia hare ro rua kesi hela iha tasi ibun. Husik tiha ro, peskador sira fase hela dai. 3 Sa’e tiha ba Simão nia ro, Jesús husu ba nia atu hadook ro uitoan hosi tasi ibun. Hafoin, nia tur tiha iha ro laran, hodi hanorin ema sira. 4 Ko’alia hotu tiha, nia dehan ba Simao: “Tama liu ba tasi laran no soe dai ba!” 5 Simão hatan, “Mestre, ami serbisu tiha kalan tomak, la kaer buat ida. Maibe, tan ita mak dehan, ha’u sei soe duni dai.” 6 Bainhira sira halo nune’e, sira kaer ikan barak teb-tebes, dai besik atu nakles. 7 Sira leok liman hodi bolu maluk sira iha ro seluk atu mai tulun sira. Sira mai duni, hodi halo ro rua nakonu di-di’ak besik atu mout. 8 Hare tiha ne’e, Simão Pedro monu ain ba Jesús, hodi dehan: “Na’i, hadook an hosi ha’u, tan ha’u ema maksalak ida!” 9 ‘ Tebes duni, nia ho nia maluk sira seluk hakfodak tanba ikan barak nebe sira kaer. 10 Simão nia maluk sira, katak João no Tiago, Zebedeu nia oan sira, sira mos hakfodak. Jesús dehan Simão: “Keta ta’uk; hori ohin ba oin o sei kaer ema.” 11 Dada tiha ro ba tasi ibun, sira husik buat hotu hodi la’o tuir Jesús.

- 𝐋𝐢𝐚 𝐌𝐚𝐤𝐬𝐨𝐢𝐧.
- 𝐊𝐫𝐢𝐬𝐭𝐮, 𝐚𝐦𝐢 𝐡𝐚𝐡𝐢 𝐢𝐭𝐚.
———————————-

R E F L E S A U N
03 SETEMBRU 2026 | Semana XXII Tempu Ordináriu
†Santo do Dia: Memoriál Saun Gregório Magno, Amu-Papa no Doutór Igreja nian

“Tan Ita Mak Dehan, Ha’u Sei Soe Dai”

𝑴𝒂𝒖𝒏-𝒂𝒍𝒊𝒏 𝒅𝒐𝒃𝒆𝒏 𝒔𝒊𝒓𝒂 𝒊𝒉𝒂 𝑲𝒓𝒊𝒔𝒕𝒖!

Evanjellu ohin nian hatudu mai ita kona ba momentu ida ne’ebé simples, maibé nakonu ho ensinamentu nebe kle’an. Jesús hetan Simão Pedro no nia maluk sira depois de sira peska kalan tomak. Sira kole, triste no deskorajadu, maski sira mak peskador esperiente, sira la kaer ikan ida. Dai sira nian mos fase ona, hanesan ema ne’ebé prontu atu simu katak loron ne’e la fó rezultadu.

Iha momentu ne’ebé Simão Pedro hanoin katak nia esforsu hotu la fó buat ida, Jesús tama ba nia moris. Jesús la husu uluk atu Pedro sai ema perfeitu. Nia de’it dehan:

“Tama liu ba tasi laran no soe dai ba.”

Liafuan ida-ne’e mak konvite ba fiar. Pedro bele hatán: “Ha’u mak peskador, Ita la hatene peska.” Maibé nia dehan:

“Mestre, ami serbisu tiha kalan tomak, la kaer buat ida. Maibé, tan Ita mak dehan, ha’u sei soe duni dai.”

Iha ne’e mak fuan Evanjellu nian. Pedro la soe dai tanba nia sente katak sei hetan ikan. Nia soe dai tanba nia fiar ba Jesús nia liafuan.

Ita nia moris mos dala barak hanesan Pedro. Ita serbisu maka’as ba ita nia família no ba ita nia oan sira. Dala ruma ita halo esforsu barak, maibé rezultadu la tuir ita nia hakarak. Ita bele sente kole, frustradu no triste.

Iha momentu hanesan ne’e, Jesús mos dehan ba ita: “Tama liu ba tasi laran.” Signifika: keta para iha bee ki’ik. Keta moris de’it tuir ita nia forsa rasik. Loke an ba Maromak nia dalan, maski ita seidauk hare rezultadu.

Bainhira Pedro obedece, milagri akontese. Ikan barak tebes tama iha dai. Maibé milagri boot liu la’ós ikan barak. Milagri boot liu mak Pedro nia fuan muda. Nia hare nia fraqueza no dehan:

“Na’i, hadook an hosi ha’u, tan ha’u ema maksalak ida.”

Bainhira ema hasoru Kristu, nia komesa hare nia an ho loloos. La’ós atu deskoraja, maibé atu simu Maromak nia laran-di’ak. Jesús la rejeita Pedro tanba nia sala. Nia dehan:

“Keta ta’uk; hori ohin ba oin o sei peskador ema nian”

Kristu bolu ema imperfeitu atu sai nia dixípulu. Pedro seidauk santu bainhira Jesús bolu nia. Nia sei iha fraqueza no sala. Maibé Jesús hare la’ós de’it nia passado, maibé mos nia futuru iha Maromak nia liman.

Ne’e mos hanorin ita katak Maromak bele uza ita, maski ita la perfeitu. Ita nia fraqueza la impede Maromak nia obra, se ita hatán ho fiar no umildade.

Loron ohin Kreda mos celebra Saun Gregório Magno. Nia sai Amu-Papa no Doutór Igreja nian, maibé nia sempre konsidera an hanesan “atan ba atan sira hotu.” Nia hatudu katak lideransa iha Kreda la’ós atu buka poder, maibé atu serve. Hanesan Pedro, nia mos responde ba bolu Kristu nian ho fidelidade no servisu.

Ita bele husu ba ita nia an iha loron ohin:

* Iha área saida iha ha’u nia moris ne’ebé ha’u sente hanesan Pedro, kole no la hetan rezultadu?
* Ha’u bele fiar ba Jesús nia liafuan, maski ha’u la hatene saida mak sei akontese?
* Ha’u prontu atu “soe fali dai” tanba Kristu dehan, ka ha’u para ona tanba deskorajamentu?

Evanjellu ohin konvida ita atu la depende de’it ba ita nia matenek no forsa rasik. Hanesan São Paulo dehan iha leitura dahuluk, sabedoria loos mak sabedoria Maromak nian. Bainhira ita tau fiar ba Kristu, ita aprende katak rezultadu la’ós sempre tuir ita nia planu, maibé Maromak bele halo buat boot liu hosi ita nia obediénsia ki’ik sira.

No ikusmai, Pedro no nia maluk sira “husik buat hotu hodi la’o tuir Jesús.” Ida-ne’e la signifika katak ema hotu tenke husik nia servisu, maibé katak Kristu tenke sai prioridade dahuluk iha ita nia moris. Bainhira Jesús bolu, ita nia resposta tenke sai resposta ho fuan tomak.

Maun-alin sira, bainhira ita sente katak ita nia “dai” mamuk, keta perde esperansa. Karik mak momentu ne’ebé Jesús hakbesik liu ba ita. Rona nia liafuan, fiar ba Nia, no ho Pedro dehan:

“Na’i, maski ha’u kole no la hare dalan, tan Ita mak dehan, ha’u sei soe fali dai.”

Hosi fiar simples hanesan ne’e, Maromak bele halo milagri iha ita nia moris no uza ita atu lori ema seluk ba Nia.
Amen.

✨Maromak haraik bensaun ba ita hotu.

✠
—————————— -
𝐅𝐨𝐧𝐭𝐞𝐬: ✠ 𝐁𝐈́𝐁𝐋𝐈𝐀 𝐒𝐀𝐆𝐑𝐀𝐃𝐀 | 𝐌𝐚𝐫𝐨𝐦𝐚𝐤 𝐊𝐨'𝐚𝐥𝐢𝐚 | 𝐀𝐝 𝐄𝐱𝐩𝐞𝐫𝐢𝐦𝐞𝐧𝐭𝐮𝐦 | 𝐁í𝐛𝐥𝐢𝐚 𝐊𝐚𝐭𝐨́𝐥𝐢𝐤𝐚 | GOD’S WORD 𝙳𝙰𝙸𝙻𝚈 𝚁𝙴𝙵𝙻𝙴𝙲𝚃𝙸𝙾𝙽 | 𝖱𝖾𝖿𝗅𝖾𝗌𝖺𝗎𝗇 𝗅𝗈𝗋𝗈𝗅𝗈𝗋𝗈𝗇 𝗇𝗂𝖺𝗇 𝗁𝗎𝗌𝗂 𝖢𝖺𝗍𝗁𝗈𝗅𝗂𝖼 𝖥𝖺𝗆𝗂𝗅𝗒 𝖠𝗅𝗍𝖺𝗋 𝖳𝗂𝗆𝗈𝗋-𝗅𝖾𝗌𝗍𝖾 @𝚌𝚘𝚙𝚢𝚛𝚒𝚐𝚑𝚝 ²⁰²⁶

Catholic Family Altar Timor-Leste

07/09/2026

07/09/2026

07/09/2026

06/09/2026

05/09/2026

04/09/2026

03/09/2026

03/09/2026

02/09/2026

Address

Telephone

Website

Alerts

Contact The Place Of Worship

Shortcuts

Featured

Share

Category

Listing takedown request