Kruispad

Directions Website

Crossroads Coaching Services (KruisPad) is led by industry experts with a passion for personal growth, leadership, and transformative experiences.

Our goal is to guide individuals and organizations toward their fullest potential.

24/10/2026

My Daaglikse Brood
Jona 4:1-4

Jona 4:2b (1983 vertaling) Ek het geweet U is ‘n genadige en barmhartige God, lankmoedig en vol liefde. U sien maklik af van die straf wat U aangekondig het.

- “Oor my dooie liggaam!” is spreekwoordelik Jona se reaksie op God se genade.
- Hoe vinnig het hy nie vergeet nie, in Jona 2:1-10 besing Jona God se genade omdat hy self gered is, maar wanneer ander ook genade ontvang, wil Jona eerder doodgaan as om dit te aanskou.
- Hy was gelukkig toe hy self gered is, maar kwaad toe Nineve gered word.
- Die grense van God se genade val toe ongelukkig vir Jona nie saam met die grense van sy eie volk nie.
- Meer nog, God se genade sluit selfs Jona se vyande in.
- Jona erken dat hy juis hieroor vir God kwaad is, dit is asof hy verbitterd is omdat al sy dogmas oor God nou aan skerwe lê.
- Hy het geweet God is genadig maar hy het dit nie geglo soos wat God dit bedoel het nie.
- En God antwoord hom met ‘n vraag wat hom behoort te stop in sy spore, “Het jy rede om kwaad te word?”

Gebed: Here God, U is genadig en barmhartig, lankmoedig en vol liefde! Help my om nooit te vergeet dat U my Skepper is en ek net die skepsel, U weet alles en U weet die beste, Amen.

23/10/2026

My Daaglikse Brood
Jona 3:5-10

Jona 3:10 (1983 vertaling) Toe God sien wat hulle doen, en hoe hulle hulle bekeer van hulle verkeerde dade, het Hy afgesien van die ramp wat Hy gesê het Hy oor hulle sal bring. Hy het nie die ramp gestuur nie.

- Nineve, die groot stad en simbool van geweld, verdrukking en onreg, is in sak en as oor die een-sin preek van ‘n onwillige profeet!
- Was daar al ooit ‘n meer suksesvolle profeet as Jona?!
- Dit is egter duidelik dat die klem veel meer op God se genade as op Jona se treffende preek behoort te val.
- Geen mens is immers so sleg of sondig dat hy of sy nie deur God aangeraak kan word nie.
- Al wat God gesoek het, was ‘n gehoorsame profeet wat sy woord moes gaan verkondig, die oortuigingswerk sou God self doen.
- God se vergifnis en genade sluit ook die “slegte” Nineviete in.
- Jesus Christus het immers gesterf en die dood oorwin sodat élkeen wat in Hom glo gered sal word.

Gebed: Here Jesus, dankie dat U, U self vir ons as offer gegee het om ons van sonde te reinig! Heilige Gees, raak die harte aan van hulle wat nog nie tot geloof gekom het nie, soos U die mense van Nineve oortuig het, Amen.

22/10/2026

My Daaglikse Brood
Jona 3:1-4

Jona 3:4 (1983 vertaling) Jona het die stad ingegaan en ‘n dag lank daar rondgestap en toe roep hy: “Nog net veertig dae en Nineve word verwoes!”

- Jona kry ‘n tweede keer die opdrag om na Nineve te gaan en teen die stad te preek.
- Daar is ‘n klein wysiging in die opdrag: Jona moet nou die boodskap wat die Here hom sal gee, gaan verkondig.
- Jona is hierdie keer gehoorsaam en gaan na Nineve toe, maar die vraag is of Jona sy roeping verstaan het soos wat God dit bedoel het?
- Nadat hy vir slegs ‘n dag lank in die groot stad rondgestap het, lewer hy een van die korste preke ooit wat hom waarskynlik pas, want God se oordeel gaan Jona se vyande oor 40 dae tref en die stad gaan verwoes word.
- Is dit egter wat God met die opdrag bedoel het?
- Wanneer ons na soortgelyke uitsprake kyk wat die Here deur ander profete oor ander plekke uitgespreek het, weet ons daar is meer agter hierdie kort preek.
- Deur die profeet Jeremia het God gesê, “Een oomblik kondig Ek aan dat Ek ‘n nasie sal afbreek, sal uitroei, sal vernietig. Maar wanneer dié nasie hom bekeer sien Ek af van die straf wat Ek oor hom wou bring” (vgl Jer 18:7-8).

Gebed: Here God, maak my geestelike ore oop vir U stem en help my om helder te verstaan wat dit is wat U van my verwag. Gee my die moed om gehoorsaam te wees aan dit wat U vir my wys, selfs wanneer dit moeilik is, Amen.

21/10/2026

My Daaglikse Brood
Jona 1:17-2:10

Jona 2:7 (1983 vertaling) Toe ek wou vergaan, het ek aan die Here gedink, en my gebed het by U gekom, in u heilige tempel.

- Vir Jona was verdrinking die manier om sy opdrag te ontduik maar vir God was Jona se enigste keuse ... Nineve.
- Die grootste wonderwerk hier is dat Jona tog nou begin (uiteindelik!) bid.
- Niks in dié gebed is egter Jona se eie woorde nie; dit bestaan hoofsaaklik uit frases uit die Psalms.
- ‘n Mens wonder ook waarom Jona nou skielik bid en dankbaar is om te lewe terwyl hy kort tevore nog verkies het om te sterf.
- Kan dit wees dat hy banger is vir die dood as vir dit waarvoor hy vlug?
- Maar God hoor sy gebed en red hom.
- Jona hoef nie meer weg te vlug van God af nie en hy beleef die vis as die manier waarop God hom red.
- Die vraag is steeds of Jona verstaan dat die vis bedoel is as vervoermiddel terug na sy opdrag toe?

Gebed: Here God, dankie vir die troos dat ek weet, U hoor my gebede! Mag ek nie wag soos Jona tot my nood my verstrengel soos die seegras wat om Jona se kop gedraai was nie. Wees U in daaglikse stilte en gebed deel van my lewe, Amen.

20/10/2026

My Daaglikse Brood
Jona 1:4-16

Jona 1:14 (1983 vertaling) “Ag, Here moet ons tog nie laat vergaan oor hierdie man nie. Moenie dat ons iemand onskuldig doodmaak nie. U is die Here, U doen wat U wil.”

- Dit is nie maklik en trouens ook nie moontlik om van God af weg te vlug nie.
- En omdat Jona nie wil hoor nie, gebruik God die storm op see om met hom te praat.
- Dit is egter net die matrose wat die storm as God se stem ervaar, Jona lê vas aan die slaap en ontduik so steeds sy roeping.
- Na die uitslag van die lootjies word die profeet wat nie wou gaan preek nie só onder kruisverhoor geneem dat hy ‘n belydenis móét doen.
- Wat hy hulle vertel is egter vir hulle onverstaanbaar: hoe kan hy probeer om van so ‘n almagtige God weg te vlug!
- Maar Jona weier steeds om aan sy roeping gehoorsaam te wees; hy sal eerder sterf in die stormagtige see.
- Voordat hulle Jona in die see gooi, bid die heidense matrose ‘n treffende gebed.

Gebed: Here God, U is die Here, U doen wat U wil. Selfs hulle wat nie glo nie kon sien en wéét dat U die Een God is. Ek loof U as die Almagtige, die enigste ware, lewende God, Amen.

19/10/2026

My Daaglikse Brood.
Jona 1:1-3

Jona 1:2 (1983 vertaling) “Maak klaar, gaan na die groot stad van Nineve toe en spreek hom aan, want Ek weet hoe sleg hy is.”

- Jona, die profeet, word geroep om te gaan preek in Nineve, ‘n stad waar mense ly, waar daar nood is weens onreg en geweld.
- Hy sien egter nie daarvoor kans nie, Nineve is die hoofstad van sy volk se vyand en hy wil niks met hulle te doen hê nie.
- Jona weet dat God Hom in sy liefde, oor Nineve en sy mense sal ontferm en hy kan homself nie so ver kry om vir hulle om te gee nie.
- Jona het geweet dat sou Nineve na God toe draai, hulle gered sou word en hy het waarskynlik gereken hulle verdien dit nie.
- Daarom vlug hy eerder weg van sy profetetaak af, en daarmee saam ook weg van God en sy genade af!
- Hierdie vlug van Jona word treffend uitgebeeld deur kontraste te gebruik … die woord van die Here kom tot Jona, maar hy gaan weg van die Here af; die Here stuur Jona oos, maar Jona vlug wes …

Gebed: Here Jesus, U het gesê: soos die Vader My gestuur het, stuur Ek julle ook. En dít om die Goeie Nuus van Verlossing uit te dra. Mag ons nooit soos Jona wegdraai nie maar eerder gehoorsaam van U liefde getuig, Amen.

18/10/2026

My Daaglikse Brood
Lees Handelinge 28:16-31

Handelinge 28:31 (1983 vertaling) Hy het die koninkryk van God verkondig en die mense alles oor die Here Jesus Christus geleer. Dit het hy gedoen met die grootste vrymoedigheid en sonder enige verhindering.

- Lukas eindig sy verhaal met die aankoms en verblyf van Paulus in Rome.
- Daar word nie van sy verhoor melding gemaak nie.
- Daar word deur sommige verklaarders gespekuleer dat Paulus hierna moontlik ‘n vierde sendingreis onderneem het.
- Hoe dit ookal sy, die boek eindig met die kragtige verspreiding van die evangelie van Jesus Christus en die gedagte dat God se goeie nuus vir die hele wêreld bedoel is!

Gebed: Abba Vader, dankie vir Paulus. Dankie dat U hom opgerig het as 'n kragtige instrument vir die verspreiding van die Goeie Nuus van Verlossing deur geloof in Jesus Christus wat die Alfa en die Omega is, die Een wat nog altyd was, die Een wat nou is en die Een wat weer sal kom! Amen.

17/10/2026

My Daaglikse Brood
Lees Handelinge 28:11-15

Handelinge 28:15 (1983 vertaling) Die gelowiges daar het van ons gehoor, en party van hulle het ons by die Appiusmark kom ontmoet en party by die Drie Herberge. Toe Paulus hulle sien, het hy God gedank en moed geskep.

- Paulus se koms na Rome was groot nuus vir die Christene daar en die ontmoeting tussen hulle en Paulus stem hom tot groot dankbaarheid.
- Natuurlik sou dit vir Paulus baie beteken; dit was immers sy ideaal om die Romeinse Christene, aan wie hy jare tevore die Romeinebrief geskryf het, te ontmoet.
- Met Paulus se reise, vanaf Jerusalem en al verder en verder tot in Rome, voltooi hy die opdrag waarvan Lukas reeds in Handelinge 1:8 vir ons geskryf het.

Gebed: Here, net soos Paulus vir baie lank uitgesien het en gewag het totdat sy ontmoeting met die Romeine plaasgevind het, moet ek ook soms moed skep en wag. Dankie dat U by my is, dat U my hoop en my beskutting is terwyl ek wag, Amen.

16/10/2026

My Daaglikse Brood
Lees Handelinge 28:1-10

Handelinge 28:10 (1983 vertaling) Hulle het ons met baie geskenke vereer, en toe ons vertrek, het hulle ons van alles voorsien wat ons nodig gehad het.

- Op die eiland Malta gebeur daar ‘n paar betekenisvolle dinge.
- Eers reken die mense dat Paulus ‘n moordenaar is, maar na ‘n tyd verander hulle opinie tot so ‘n mate dat hulle hom nou as ‘n god beskryf.
- Daarna begin Paulus om verskeie siekes op die eiland gesond te bid.
- Die mense wat saam met Paulus op die skip was sowel as die inwoners van Malta het die geleentheid gekry om die evangelie in aksie te sien en God se krag en beskerming te ervaar.

Gebed: Here, ons word ook oorlaai met geskenke van U omdat ons U kinders is. Dankie Vader, vir elke geestelike seëning wat daar in die hemel is wat U vir my kom gee het deur U Seun, Jesus Christus, Amen.

15/10/2026

My Daaglikse Brood
Lees Handelinge 27:39-44

Handelinge 27:43 (1983 vertaling) Maar die Romeinse offisier wou Paulus red en het hulle verhinder om dit te doen. Hy het die mense wat kon swem, beveel om eerste oorboord te spring en land toe te swem.

- In hierdie gedeelte word beskryf hoe die skip waarop Paulus en 275 ander passasiers reis, skipbreuk ly naby die eiland Malta, 96 kilometer vanaf Sisilië af.
- Omdat die soldate die doodstraf sou kry as een van die gevangenes ontsnap, wou hulle liewers almal doodmaak.
- Die Romeinse offisier het egter baie agting vir Paulus gehad en wou sy lewe spaar.
- Op hierdie manier gebruik God Paulus se teenwoordigheid op die skip om al die ander se lewens te spaar.

Gebed: Here, U werk ook deur ons, U ambassadeurs. Daarom wil ek in verhouding deur U Woord en U Gees ná aan U leef. Ek wil beskikbaar wees vir U goeie werk, in my lewe en ook in ander se lewens om my, Amen.

Address

The Agenda, Abdulla Omram Taryam Street
Dubai

Opening Hours

09:00 - 10:30

Website

https://crossroadscoachingservices.com/

Alerts

Be the first to know and let us send you an email when Kruispad posts news and promotions. Your email address will not be used for any other purpose, and you can unsubscribe at any time.

Want your place of worship to be the top-listed place of worship in Dubai?