Kruispad

Crossroads Coaching Services (KruisPad) is led by industry experts with a passion for personal growth, leadership, and transformative experiences.

Our goal is to guide individuals and organizations toward their fullest potential.

08/09/2026

My Daaglikse Brood
Lees Handelinge 2:29-47

Handelinge 2:42 (1983 vertaling) Hulle het hulle heelhartig toegelê op die leer van die apostels en die onderlinge verbondenheid, die gemeenskaplike maaltyd en die gebooie.

- Van die belangrikste kenmerke van die eerste gemeente word hier uitgewys.
- Dit is opvallend dat gemeenskap (“koinonia”), samehorigheid en eensgesindheid vir hulle belangrik was (verse 42, 44 - 47).
- Dit is ook duidelik dat die gemeente in Jerusalem met hulle toewyding aan die Here en hulle onderlinge liefde en ywer aansteeklik in hulle gemeenskap gewerk het.
- Vir die wat nuut tot geloof in Christus kom is kontak met medegelowiges van uiterste belang.
- Die beste getuienis oor Christus is steeds wanneer gelowiges met hulle léwens wys dat Hy 'n daadwerklike verskil bring.

Gebed: Abba Vader, help my om die belangrikheid van kerk-familie te verstaan. Skep in my 'n honger om met mede-gelowiges te wil aanbid en saam U koninkryk te bou, Amen.

07/09/2026

My Daaglikse Brood
Lees Handelinge 2:16-28

Handelinge 2:21 (1983 vertaling) So sal dit dan wees: elkeen wat die Naam van die Here aanroep, sal gered word.

- Die “laaste dae” (Hand 2:17) verwys hier na die tyd tussen Jesus se eerste en sy tweede koms.
- Petrus sê dus eintlik: “Só sal dit van nou af wees ...”.
- Petrus stel dit duidelik dat Jesus se opstanding deel van God se plan was.
- God het deur Jesus se opwekking bevestig dat Hy sy Seun is; die Messias wat nie in die greep van die dood sou bly nie!
- Die geloof in Jesus se opstanding was een van die belangrikste dryfvere vir die vroeë kerk om die evangelie uit te dra en dit is vandag steeds die fondament.
- Paulus skryf in die Bybel dat as Christus nie opgestaan het nie, sou prediking leeg wees en die geloof nutteloos.

Gebed: Here Jesus, ek is so dankbaar en bly dat die dood U nie gevange kon hou nie en dat U lewe! Daarin lê my hoop! Ons kan U aanroep, ons sondes en afhanklikheid van U as ons Redder, in geloof bely, en ons sal gered wees, Amen.

06/09/2026

My Daaglikse Brood
Lees Handelinge 2:12-15

Handelinge 2:14 (1983 vertaling) Toe staan Petrus saam met die elf ander apostels op en onder leiding van die Heilige Gees spreek hy die mense toe.

- Mense se arrogansie by Babel het gelei tot die volke se taalverwarring en verstrooiïng oor die aarde (vgl Gen 1:1-9).
- God het egter vir Abraham uitgekies uit wie Hy vir Homself ‘n nuwe volk sou versamel.
- Deur die gawe van die Gees word die belofte aan Abraham vervul en almal wat die boodskap in hulle eie taal hoor is hier bymekaar.
- Tydens Jesus se bediening was Petrus dikwels voortvarend, maar nie altyd standvastig nie.
- Hier sien ons egter die nuwe Petrus wat deur Jesus herstel is, en in hierdie oomblik van ekstase bring hy die skare op 'n kalm en beheersde wyse tot bedaring.

Gebed: Here Jesus, help my om deur U Gees te verander waar dit nodig is sodat ek ook, soos Petrus, 'n instrument vir U sal wees, Amen.

05/09/2026

My Daaglikse Brood
Lees Handelinge 2:7-11

Handelinge 2:7 & 11 (1983 vertaling) en hulle was almal verbaas en verwonderd en sê vir mekaar: Is almal wat daar spreek, dan nie Galiléërs nie? ... Kretense en Arabiere - ons hoor hulle in ons eie taal oor die groot dade van God spreek.

- Die lys van volke wat genoem word, begin met volke wat oos van Palestina gewoon het, gaan dan na die weste en keer oor Afrika na Palestina terug.
- Dit was ‘n manier waarop God reeds die wêreld voorberei het op die verkondiging van die evangelie.
- Verder in Handelinge en die Nuwe Testament word dit telkens duidelik dat die pad vir Paulus en die ander apostels gereed gemaak is deur mense wat op Pinksterdag of kort daarna tot bekering gekom het.

Gebed: Vader God, dankie vir U meesterplan van verlossing, selfs al die verskillende volke bymekaar in Jerusalem met die uitstorting van die Heilige Gees was nie toevallig nie. Ek loof en prys U, Amen.

04/09/2026

My Daaglikse Brood
Lees Handelinge 2:5-6

Handelinge 2:5 (1983 vertaling) Daar het godsdienstige Jode uit al die nasies onder die son in Jerusalem gewoon.

- Op Pinksterdag praat die gelowiges in tale wat die mense uit ander wêrelddele kan verstaan.
- Hoewel daar sekerlik feesgangers uit ander lande in Jerusalem was, verwys Handelinge 2:5 spesifiek na die Jode wat uit die verstrooiïng in Jerusalem kom woon het.
- Hulle was vroom mense wat verwag het dat die Messias op die Olyfberg sal verskyn (vgl Sag 14:4).
- Iemand het eendag geskryf: al kan jy ander tale vlot praat, as jy bid, doen jy dit in jou moedertaal.
- Die evangelie het die meeste impak as dit verkondig word in ‘n taal wat mense nie net verstaan nie, maar wat ook hulle harte raak.

Gebed: Abba Vader, baie dankie vir die voorreg om U te kan aanbid in my moedertaal, die taal van my hart, maak nie saak waar ek in hierdie wêreld woon nie, Amen.

03/09/2026

My Daaglikse Brood
Lees Handelinge 2:1-4

Handelinge 2:2 (1983 vertaling) Skielik was daar 'n geluid uit die hemel soos van 'n geweldige stormwind, en dit het die hele vertrek gevul waar hulle gesit het.

- Pinksterfees is vyftig dae na Paasfees gevier en talle Jode uit ander lande was ook in Jerusalem vir hierdie fees bymekaar.
- Met die uitstorting van die Heilige Gees het die gelowiges in tale gepraat wat dus vir hierdie besoekers bekend was.
- Op dié manier het die evangelie dadelik wêreldwyd begin versprei.
- Wind en vuur word dikwels in die Bybel met ‘n Godsverskyning geassosieer; hier is dit dus sigbare tekens dat God nou op nuwe maniere op die aarde teenwoordig is.
- As gelowiges moet ons waak daarteen om God nét in magtige verskynings te verwag want Hy praat ook deur die "fluistering in die windstilte" (vgl 1 Kon 19:11-12).

Gebed: Here, ek wil so naby in verhouding met U leef dat wanneer U deur U Woord, die fluisterstem in my oor is, ek dit nie sal mis nie, Amen.

02/09/2026

My Daaglikse Brood
Lees Handelinge 1:21-26

Handelinge 1:24 (1983 vertaling) En die gelowiges het gebid: "Here, U wat die harte van almal ken, wys die een aan wat U uit hierdie twee verkies het ...

- Die aanvulling van die vakature wat Judas in die apostelgeledere gelaat het, vind op die tipiese Bybelse manier plaas.
- Twee persone wat gelyk in status is, Josef en Mattias, word as moontlike kandidate aangewys.
- Die apostels kies nou nie self nie, maar laat die keuse in gebed aan God oor, die Meerdere Party, om die mees geskikte persoon deur loting aan te wys.
- So word Mattias uiteindelik aangewys om Judas se leë plek te vul.
- Vandag nog is dit belangrik om tot God te bid en Hom te vertrou wanneer ons belangrike keuses moet maak.
- Hy antwoord dikwels deur sy vrede in ons harte uit te stort.

Gebed: Vader God, dankie dat ek U kan vertrou vir leiding wanneer ek besluite moet neem. Help my om deur U Gees U vrede te beleef, Amen.

01/09/2026

My Daaglikse Brood
Lees Handelinge 1:15-20

Handelinge 1:20 (1983 vertaling) "In die boek van die Psalms staan daar: Laat sy woonplek leeg word; laat niemand daarin woon nie, en: laat 'n ander sy amp oorneem."

- Die groep gelowiges het gegroei tot honderd en twintig mense en hierdie gedeelte weerspieël die eerste "kerkvergadering".
- Die twaalftal moes volledig wees, soos Israel uit die twaalf stamvaders ontstaan het, so verteenwoordig die twaalf apostels nou die kerk van Christus as die “nuwe Israel”.
- Die aanhalings in Handelinge 1:20 verklaar waarom daar ‘n “vakature” in die apostelkring ontstaan het en wat daaromtrent gedoen moet word.
- Die Nuwe Testamentiese vervullings van die Ou Testamentiese profesieë bevestig die Bybel as 'n Goddelike geheel.

Gebed: Vader God, ek dank U vir U Woord wat deur die Heilige Gees geïnspireer en bymekaar gesit is sodat dit as 'n geheel vandag nog van toepassing is. Help my Here, om daarvolgens te lewe, Amen.

31/08/2026

My Daaglikse Brood.
Lees Handelinge 1:12-14

Handelinge 1:14 (1983 vertaling) Hulle het almal eensgesind volhard in die gebed saam met 'n aantal vroue, onder wie ook Maria die moeder van Jesus. Sy broers was ook by.

- Al die apostels (buiten Judas) was deel van hierdie wagtende groep gelowiges.
- Hulle het waarskynlik tempeldienste bygewoon en verder biddend in die bovertrek gewag op die vervulling van Jesus se belofte (vgl Hand 1:8).
- Gebed is die enigste aktiwiteit wat hier pertinent genoem word en dit beklemtoon die belangrikheid daarvan!
- Lukas beskryf ook hóé hulle gebid het.
- Gebed, volharding en eensgesindheid is vir ons as moderne kerk vandag nog net so belangrik as wat dit in die begin was.

Gebed: Here Jesus, help my om te onthou hoe belangrik dit is om te volhard in gebed, veral in tye van "wag", nie net op my eie nie maar ook saam met my kerk-familie, Amen.

30/08/2026

My Daaglikse Brood
Lees Handelinge 1:9-11

Handelinge 1:11 (1983 vertaling) Dié sê toe vir hulle: "Galileërs, waarom staan julle so na die hemel en kyk? Hierdie Jesus wat van julle af na die hemel toe opgeneem is, sal net so terugkom soos julle Hom na die hemel toe sien opgaan het."

- ‘n Wolk is in die Bybelse tyd dikwels met Goddelike verskynings in verband gebring.
- In hierdie gedeelte word Jesus se Godheid dus bevestig.
- Jesus se hemelvaart het twee belangrike gevolge:
God se teenwoordigheid op aarde is nou nie meer beperk tot een menslike liggaam nie; van nou af woon Hy binne-in elke gelowige.
En deur Jesus se ereposisie het elkeen wat in Hom as Verlosser glo nou direkte toegang tot die Vader.

Gebed: Here Jesus, as kind het ek gesing "as Hy weer kom, as Hy weer kom ... ", dankie Heer vir die belofte van U weer-kom. Heilige Gees help my om te getuig sodat ander ook kan deel in die hoop en seën van Jesus se weer-kom, Amen.

Address

The Agenda, Abdulla Omram Taryam Street
Dubai

Opening Hours

09:00 - 10:30

Website

https://crossroadscoachingservices.com/

Alerts

Be the first to know and let us send you an email when Kruispad posts news and promotions. Your email address will not be used for any other purpose, and you can unsubscribe at any time.

Want your place of worship to be the top-listed Place Of Worship in Dubai?