NG Muldersdrif

30/05/2026

29/05/2026

Môre is die dag! ✨🎪
Die dag waarvoor ons sintuie nou al vir weke smag…
die geure wat ons kon ruik, die kleure wat ons begin sien het, die lekkernye wat ons monde laat water het, die opgewondenheid wat ons kon voel en die musiek wat al hoe harder begin speel het.

Nou is dit uiteindelik tyd om die Karnaval werklik te beleef! 🎉

Kom een, kom almal en kom geniet die saamkuier, die lag en die lekkerkry. Ontmoet die harlekyn met haar rooi wyn, die seremoniemeesteres, die sterkman, die dames met baarde en die span met hul mal hoede – alles wat die wêreld van karnaval só besonders maak. 🎪✨

Van koffie en pannekoek tot speletjies, stalletjies, musiek en pret vir groot én klein… daar wag iets vir elkeen.

Bring die familie, bring jou glimlag en kom wees deel van ’n dag vol kleur, vreugde en gemeenskap by NG Muldersdrif se Karnaval Markdag.

24/05/2026

Pinkster en Nagmaal Aanlyndiens
24 Mei 2026
Ons word gestuur – met die Gees van lewe in ons!
Johannes 20:19-23
- Ds. Sumari Redelinghuys

Die viering van Pinkster word amper geheel en al beïnvloed deur die bekende verhaal in Handelinge, met beelde van vuur, praat in tale, en die aandag hoofsaaklik op die kerk se profetiese roeping. Die "Johannese Pinkster," soos Johannes 20:19-23 soms genoem word, kry baie minder aandag.

Hier kom die Gees op Paasfees, tydens Jesus se eerste verskyning na die opstanding aan 'n versameling van sy volgelinge. Hy het vroeër in die dag, buite die graf, slegs aan Maria Magdalena verskyn, en toe aan sy dissipels. Jesus verskyn aan sy dissipels met sendingswoorde: “Vrede vir julle”, “Soos die Vader My gestuur het, stuur ek julle ook” en “Ontvang die Heilige Gees”.

In hierdie gedeelte ontmoet ons die Gees met minder van 'n universele toon in vergelyking met Handelinge; die fokus hier is meer spesifiek op die identiteit en sending van 'n gemeenskap. In die Heilige Gees ontvang Jesus se volgelinge niks minder as die volheid van die verheerlikte Seun nie.

Mag ons hierdie Pinkster weer opnuut Sy vrede ervaar. Mag ons weet dat Hy ons as gemeenskap stuur en mag ons besef dat ons gevul is - met die Gees van lewe in ons!

NG MULDERSDRIF

17/05/2026

Sondag 17 Mei 2026
Kan jy sing in die donker?
Handelinge 16:25
- Ds. Pieter van Zyl

Wat doen jy as jy alles reg gedoen het en die lewe steeds in mekaar val?

Paulus en Silas sit in ’n tronk. Nie omdat hulle iets verkeerds gedoen het nie, maar juis omdat hulle iets regs gedoen het. Hulle rûe is oop van slae. Hulle voete sit in die blok. En dit is middernag.

En toe sing hulle.

Hierdie Sondag kyk ons na een van die mees kragtige oomblikke in die Nuwe Testament. ’n Verhaal wat die wetenskap, die teologie en die lewe saamvat in een vraag.

Kom hoor hoe ’n keuse in die donker ’n man se lewe en sy hele huisgesin vir altyd verander het.

NG MULDERSDRIF

14/05/2026

Hemelvaart Aanlyndiens
14 Mei 2025
Van geslote deure na gestuurde mense
Johannes 20:19-22
- Ds. Sumari Redelinghuys

Die dissipels sit agter geslote deure - vasgevang in vrees, onsekerheid en teleurstelling, maar dan gebeur iets ongelooflik: Jesus kom in.

Ons lees “Jesus het toe gekom en tussen hulle gaan staan...”
Nie eers geslote deure kan Hom keer nie, en dis waar Hemelvaart begin sin maak: Die Een wat opgevaar het, is dieselfde Een wat nou nog kom—in ons vrees, in ons twyfel, in ons wagtye.

Ons Koning kom… deur geslote deure.
Ons Koning kom… ook nou, hier by ons.
Ons Koning kom… en bring blywende vrede.
Ons Koning kom… deur sy Gees in ons.
Ons Koning kom… ja, Hy kom weer!
Net soos Hy opgevaar het, sal Hy weer kom.

Kom ons gaan getuig oor Hom!

NG MULDERSDRIF