22/02/2023
Tyd van Vrijzee Gemeente se Sondag oggend eredienste
Die Here beantwoord ons gebede vir die behoud van Vrijzee Gemeente. Ons het nou 2 huurders wat onderskeidelik ons kerkgebou en saal wil gebruik om Sondae hul eie erediens te hou. Die wonder daarvan is: Dit keer ons hele begroting om van ‘n groot tekort na ‘n begroting wat klop!
Die een kerk wil ons kerkgebou huur vir hul dienste op Sondag-oggende. Hulle tyd was altyd 10:00. Hulle sal hul tyd ‘n halfuur aanskuif na 10:30. As ons dan ons tyd ‘n halfuur vroeër maak, kan ons 2 kerke se eredienste op ‘n Sondag-oggend in ons kerkgebou inpas. Hierdie nuwe tye begin dan 12 Maart 2023.
Die Gemeenteraad besef dat hierdie besluit met gemengde gevoelens ontvang kan word: Sommige mense gaan bly wees oor die halfuur vroeër diens – veral in die somer. Ander kan weer voel dit raak te vroeg – dalk in die winter. Maar, net ‘n klein skuif kan soveel vir Vrijzee Gemeente verander.
‘n Tweede kerk begin dan in die saal met hul oggenddienste. Dit het dus geen invloed op die tyd van ons eie erediens nie.
Hierdie besluit is ná ‘n paar weke se gesprek - met gebed-en-danksegging - goedgekeur by ons GR-vergadering van 16 Februarie 2023.
Die Gemeenteraad van Vrijzee gemeente sien dan uit om almal te verwelkom by ons erediense van Sondae: Soggens om 9:00. Dit begin 12 Maart 2023.
