NG Welbekend

29/08/2026

Sondag by NG Welbekend 🌿

Ons sluit af met ons reeks oor gewone vrou, buitengewone God. Hierdie week fokus ons op Maria, Jesus se ma.

👧👦 Kinderbediening
Na die erediens is daar Kinderbediening in die klassies.

Tienerbediening
Tieners, bly agter in die kerk na die erediens.
As jou tieners wil inskakel stuur asb vir Tinarie 'n boodskap (0827799608).

Sien uit om saam te aanbid, te leer en lekker te kuier in die Kommuna ☕️

Tinarié Brown

26/08/2026

Gryskrag het vanoggend weer saam gekuier en geleer hoe ons ons plotte vir ons kan laat werk. 🌱🐔

Aan die hand van Genesis 2:15 het ons gesels oor hoe God ons aanstel om te bewerk en te versorg wat Hy aan ons toevertrou:

“Die Here God het die mens in die Tuin van Eden aangestel om dit te bewerk en te versorg.” ~ Genesis 2:15

Ons het praktiese idees gedeel oor groentetuine, komposmaak, die aanhou van hoenders en nog baie meer. Dit was ’n waardevolle oggend van leer, deel en mekaar bemoedig.

Wil jy meer weet oor Gryskrag of graag aansluit? Kontak gerus vir Ds. Abrie by 082 377 9473.

16/08/2026

🌿 ’n Oomblik uit Sondag se erediens 🌿

Ons het saam met Rut ontdek hoe God deur gewone mense buitengewone dinge doen, en hoe liefde, genade en getrouheid ’n verskil kan maak in iemand anders se lewe.

Rut se woorde bly by ons:
“Jou God is my God.”

Mag ons hierdie week die liefde wat ons van God ontvang het, ook aan ander uitleef — daar waar Hy ons stuur.

14/08/2026

🌿 Kom kuier Sondag saam met ons by NG Welbekend! 🌿

Hierdie Sondag, 16 Augustus, is jy welkom om saam met ons te kom aanbid, luister en deel te wees van ons gemeente.

Ons gaan verder met ons reeks – Gewone vroue, buitengewone God. Hierdie week ontdek ons saam die verhaal van Rut – ’n verhaal van lojaliteit, hoop en ’n God wat in die gewone werk. 🌾✨

👧 Vir ons kinders
Na die erediens is daar kinderbediening in die klassies – ’n lekker, kreatiewe en spesiale tyd waar hulle op hul eie manier van God kan leer en groei. 🌈

🧑‍🤝‍🧑 Vir ons tieners
Tieners is baie welkom om ná die erediens in die kerk te bly vir tienerbediening. Kom leer, vra vrae, gesels en groei saam! 🙌

Wil jou tiener graag inskakel? Stuur vir Tinarie (0827799609) ’n boodskap, dan voeg ons hom/haar by ons tienergroep. 📱

En natuurlik… daarna kuier ons lekker saam in die Kommuna met koffie en tee. ☕️🌿

Jy is welkom. Jou gesin is welkom. Kom wees sommer net saam met ons. 💛

Sien Sondag! 🌾

09/08/2026

Daar is dae wat 'n vrou voel sy doen nooit genoeg nie. Sy probeer oral wees, alles onthou en almal help. Tog wonder sy soms stilweg: Is ek genoeg? Die Here antwoord nie daardie vraag met 'n lys van dinge wat jy nog moet doen nie. Hy antwoord met liefde.

Jy is kosbaar omdat Hy jou gemaak het.
Jy is waardevol omdat Christus jou liefhet.
Jy is geroep omdat Hy 'n doel met jou lewe het.

Kyk na Ester. Sy was nie net 'n koningin nie; sy was 'n gewone jong vrou wat in 'n buitengewone tyd op God vertrou het. Haar moed het nie uit haar eie gekom nie, maar uit die wete dat God reeds voor haar uit gegaan het.

Miskien vra die Here vandag nie vir jou groot dinge nie. Miskien vra Hy net dat jy Hom vertrou waar jy is – in jou huis, by jou werk, in jou gesin, tussen jou vriende en in jou gemeente.

Moenie jou waarde meet aan wat jy regkry of wat ander van jou d**k nie. Meet dit aan die kruis. Dáár het God reeds gesê hoeveel jy vir Hom werd is.
Mag jy hierdie Vrouedag weer onthou:
Jy hoef nie iemand anders te wees nie.
Jy hoef nie perfek te wees nie.
Jy hoef net aan Hom te behoort.

"Mooiheid bedrieg, skoonheid vergaan, maar ’n vrou wat die Here liefhet, moet jy vir altyd koester." - Spreuke 31:30 (Boodskap)

Gebed
Mag die Here jou herinner dat jy kosbaar, geliefd en geroep is. Mag Hy jou elke dag met wysheid, moed en vrede vul, sodat jy Sy liefde oral waar jy gaan kan uitleef. Mag jy met vreugde leef in die wete dat God altyd met jou is. Amen

Geseënde Vrouedag!

02/08/2026

Vandag het Oom Abri ons herinner aan ’n waarheid wat elkeen van ons raak.

Eva is die moeder van ons almal. Haar verhaal is ons verhaal. Haar gebrokenheid is ook ons gebrokenheid.

So dikwels, wanneer ons sonde ons met skaamte vul, doen ons presies wat Adam en Eva gedoen het: ons kruip weg. Weg agter ons eie “bome”, weg in ons eie “tuine”, asof ons vir God kan wegkruip.

Maar ons kry niks reg met wegkruip of skaamte nie. Sonde is ’n werklikheid.

En tog… God se verhaal eindig nie daar nie.

Gewone vrou. Buitengewone God.

God maak ’n plan. Uit Eva se nageslag kom die tweede Adam – Jesus Christus. Waar Adam geval het, bring Jesus herstel. Waar die slang misleiding gebring het, bring Jesus oorwinning.

Aan die kruis op Golgota is die slang se kop finaal vermorsel. Jesus het sonde, skuld en die dood oorwin.

Daarom hoef ons nie langer weg te kruip nie. Ons mag met vrymoedigheid na God toe kom, want in Christus is daar vergifnis, herstel en nuwe lewe.

31/07/2026

🌿 Sondag by NG Welbekend🌿

Hierdie Sondag begin ons ’n nuwe reeks: Gewone vroue, buitengewone God. Ons skop af met Eva en ontdek hoe God selfs deur gebroke verhale hoop bring.

Bring die hele gesin saam. Ná die erediens is daar ook Kinder- en Tienerbediening, waar ons jongmense op ’n relevante manier saam kan leer en groei.

Sien jou Sondag 9:00💙

24/07/2026