Disciple Dynamix

Disciple Dynamix Step by step...following Him Disciple! Dynamix is a organization that can assist you in development and growth in all aspects of your life.

It's not just about your "Spiritual Life" but all of your life. We deal with how to build an authentic spiritual foundation in your life, how to understand and appreciate yourself better, how to build life-changing relationships with other, and how to launch a dynamically focused life that makes a difference in your world

21/08/2019

HOE GROOT IS DIE HERE SE BELEGGING IN JOU LEWE?
Aan die einde van Jesus se lewe op aarde, kort voor Sy inhegtenisname, verduidelik Hy aan Sy dissipels die konsep hoe Sy Koninkryk gaan funksioneer. Hy gebruik twee treffende vergelykings, waarvan die tweede onlangs my oog gevang het.
Jesus verduidelik: die Koninkryk van die hemel gaan min of meer as volg funksioneer. ʼn Man wil op reis gaan, en vertrou dan aan drie van sy werksmense elk ʼn bedrag geld toe, elkeen volgens hulle eie vermoëns. Aan die een persoon weeg hy 5 talente af, aan nog ʼn persoon twee, en aan ʼn derde een. Dan gaan hy weg vir ʼn lang, onbepaalde tydperk, en as hy terugkom, vra hy dan rekenskap van elkeen van sy werknemers oor die talente wat hulle ontvang het. Ons ken die res van die verhaal.
In die vergelyking gebruik Jesus die term “talent”. Dis ʼn gewigsmaat, en een talent weeg ongeveer 75 pond, of 34 kg. Uit die konteks kan mens aflei dat die man sy goud afgeweeg en aan sy werkers toevertrou het. Die vertalers het dit in Afrikaans vertaal as “goue munte”.
Het jy enige idee wat die waarde van ʼn talent is? Ek het nie ged**k dis vreeslik belangrik nie, maar toe ek onlangs die verhaal weer lees, was ek nuuskierig oor die waarde van ʼn talent. As mens die storie lees, dan klink “een talent”, “twee talente” en “vyf talente” nie na vreeslik baie nie. Dis nou nie iets waaroor iemand uitermatig opgewonde sal raak nie.
Verkeerd! Die verduideliking wat Jesus gee, kry ʼn heel ander perspektief as jy weet waarvoor die 3 manne in die storie in was. Die een persoon wat die ou kleinste bietjie gekry het, net een ou talentjie, kry ons vinnig jammer, omdat hy mos nou nie vreeslik baie daarmee kon doen nie.
Jesus wou hê dat ons moet besef hoe groot die belegging is wat Hy in ons maak wanneer Hy Sy Koninkryk aan ons toevertrou. Dis enorm! Gemeet teen die huidige goudprys en Rand-Dollar waarde, sou een talent goud ʼn waarde hê van ongeveer R24 000 000. Dis reg, 24 miljoen rand. As jy ʼn salaris kry van R500 000 per jaar, is dit genoeg geld om jou hele loopbaan te befonds! En onthou: dis nou die hoeveelheid wat die ou gekry het wat niks daarmee gedoen het nie, en as verskoning gebruik het die feit dat sy baas ʼn moeilike ou is.
Wat Jesus vir jou uit hierdie verhaal wil leer, is dit: selfs al het jy nie die vermoë om vreeslik baie te doen nie, het Hy genoeg in jou belê om die res van jou lewe aktief besig te wees om in Sy Koninkryk te werk en ʼn verskil te maak op ʼn manier wat presies in jou kraal val.
D**k vir een oomblik wat jy sou doen as iemand nou vir jou R24 miljoen sou gee, en vir jou die opdrag gee om daarmee te gaan werk en dit ten goede aan te wend, en ʼn wins daarmee te maak, totdat hy terugkom? Met so ʼn belegging is jou keuses onbeperk!
Onthou nou: Jesus gee hierdie vergelyking aan Sy dissipels reg aan die einde van Sy opleidingstyd vir hulle. Teen hierdie tyd het hulle presies geleer hoe om “vissers van mense” te wees. Hulle was gereed, al het hulle nog nie mooi presies geweet waar om te begin en wat om te doen nie. Al wat hulle nodig gehad het, is om vir so 10 dae af te sonder, en om die Here se laaste stukkie strategie te ontvang om effektief Sy Koninkryk te bou en te vestig. En dis presies wat gebeur: vir 10 dae wag hulle op die Here in die Bo-vertrek en ontvang die krag en inspirasie van die Heilige Gees, waarna hulle strategies kon begin om die enorme groot belegging wat die Here in hulle belê het, effektief te begin gebruik. Sommer vinnig sien ons die eerste dividende op die belegging.
Die belegging wat Hy alreeds in jou gemaak het, is nie net groot genoeg om vir jouself te gebruik nie, dis groot genoeg om dit in ten minste nog een ander persoon te dupliseer.
Selfs al sou jy slegs ʼn een-talent-kandidaat wees, wat maak jy met die Here se rykdom wat Hy in jou lewe belê het? Watter verskonings gebruik jy om nie die belegging te gebruik om Sy koninkryk in iemand anders se lewe te reproduseer nie? Selfs al sou jy vir die res van jou lewe besig wees met net een persoon, sou jy alreeds die aanvanklike belegging kan dupliseer en ʼn dubbele syfer aan die Here terugbesorg wanneer Hy weer kom.
As jy nie weet hoe nie, kontak my! My lewe bestaan daaruit om mense af te rig om beleggings in God se koninkryk te dupliseer.

10/06/2019

Ons het verlede week na God se eienaam gekyk en gesien wat ʼn fenomenale Naam JHWH is. In Eksodus 6 het ons gesien hoe die Here 7 elemente noem wat Sy karakter beskryf, en dat Hy die spesifieke elemente toedraai, asof in ʼn kokon van Sy Naam. Voor Hy daardie sewe dinge bekend maak, en direk daarna, sê Hy vir Sy kinders: “Ek IS JHWH”.
Twee van die sewe elemente gaan oor die feit dat die Here lei. Hy sê: “Ek sal jou uitlei, weglei” en later “Ek sal jou inlei, inbring”. Dus, alreeds in sy Naam sê Hy vir ons dat Hy die een is wat ons sal lei, altyd en oral, en op die pad wat Hy wil hê ons moet wees.
Dawid ontdek God se leierskap in sy lewe op ʼn tasbare wyse. Dit was heel moontlik al laat in sy lewe toe Dawid terug ged**k het aan die tye toe hy nog ʼn skaapwagter was wat elke dag die natuur moes ontbeer om sy skape te versorg. In Psalm 23 verbind hy die Here se naam, JHWH, aan die eienskap van herder-wees. Hy kon uit reflekteer oor wat dit beteken om ʼn herder vir skape te wees, en daaruit kon hy beskryf hoe hy die Here as sy Herder ontdek het.
JAHWE- Rohi: Die HERE is my Herder.
Dis die Here, JHWH, wat jou inlei tot binne in Sy heilige teenwoordigheid. Sien jouself soos ʼn lammertjie wat agter die herder aan hardloop om veiligheid binne in die omheinde kamp te vind. Sien hierdie “kampie” soos die Tent van Ontmoeting – ʼn simbool van verhouding met God. Hy lei jou tot binne waar geen onheil naby jou kan kom nie. Hy lei jou weg van die gevaar, en lei jou tot binne in ʼn veilige plek.
REALITY CHECK
Die Naam Jahwe-Rohi vertel nie net vir ons hoe die Here in die Ou Testament was nie, maar presies hoe Hy vandag nog is. Jahwe wat lei, is nie ʼn God wat van ver af, so van bo af, daar uit die hemel aan ons tekens gee van die rigting waarin ons lewens behoort te gaan nie. Hy is intiem, persoonlik besig om aan ons leiding te gee. Hy is so naby soos ʼn herder, wat graag effektief wil wees, aan sy skape behoort te wees.
PERSONAL APP
Maak dit persoonlik. Die Here is soms doodstil in Sy magtigheid, maar nooit ver of onbetrokke nie. Probeer na jou lewe te kyk “vanaf ʼn afstand”. Kry ʼn bietjie perspektief deur na jouself te kyk vanuit die oë van iemand anders. Sien jouself, sien jou omstandighede raak. Sien jou vrae, jou kommer.
Plaas dit wat jy sien nou teen die agtergrond van die waarheid van wie God is: JAHWE-ROHI, jou HERE wat reg voor jou loop. As jy verdwaal VOEL, skep moed deur die realiteit van God se teenwoordigheid en leierskap.
Om jou hiermee te help: sien ʼn bietjie hoe die volk van die Here in sirkels in die woestyn rondtrek. Dit lyk so asof hulle verdwaal is, geen leiding het nie. Maar sien die wolk kolom en vuur kolom wat Goddelike rigting en leiding gee, al lyk dit op fisiese vlak ʼn verdwaal-verhaal.
Verander vandag jou verdwaal-verhaal deur bloot te erken dat jou HERE se naam JAHWE-ROHI is, wat besig is om jou te lei in SY rigting en op SY manier. Maak jou storie vandag ʼn oorwinningsoptog, aangevoer deur jou leier, JHWH-ROHI.

03/06/2019

Ons gaan hierdie week verder met ʼn paar verduidelikings van God se Naam en beskrywende name en titels wat in die Bybel voorkom. Hierdie week, die laaste paar dae voor die Fees van die Weke (Pinkster) komende Sondag, gaan ons kyk na beskrywings van die Here se eienaam, Jahwe, en hoe dit op verskillende maniere gebruik word.
Net weer vir agtergrond, kom ons kyk wat beteken hierdie asemrowende Naam waarmee die Here Homself aan ons voorstel.
יהוה
Dis hoe die naam in Hebreeus lyk. Die uitspraak daarvan is nie heeltemal duidelik nie, maar dit klink amper soos ʼn fluistering van die wind, soos iemand wat na sy asem snak. (As jy vinnig asem uitblaas en lug intrek, is dit amper soos wat sy Naam klink). Die verkorte weergawe daarvan, wat in digterlike gedeeltes soos Psalms gebruik word, klink amper nog meer na ʼn uitroep van verstomming: “JAH!!” Amper soos ons vandag sou uitroep: WOW!
Dis presies die reaksie as ons besef wat ons Here se naam beteken. Die Naam wat God Drie-Enig aan die begin van Eksodus aan Sy volk bekend gemaak het, JAHWE, was reeds in gebruik in Genesis, maar die ware betekenis daarvan was nog nie bekend nie. Dis eers in Eksodus 6 dat Elohim dit so aan Moses verduidelik:
1 VERDER het God Elohim met Moses gespreek en vir hom gesê: Ek is die HERE JHWJ.
2 En Ek het aan Abraham, aan Isak en aan Jakob verskyn as God, die Almagtige, El Shaddai, maar met my Naam HERE JHWJ het Ek My nie aan hulle bekend gemaak nie.
Ook het Ek my verbond met hulle opgerig om hulle die land Kanaän te gee, die land van hulle vreemdelingskap waarin hulle vertoef het;
en Ék het ook gehoor die gekerm van die kinders van Israel wat deur die Egiptenaars in slawerny gehou word, en Ek het aan my verbond ged**k.
Daarom, sê aan die kinders van Israel: Ek is die HERE JHWJ, en Ek sal julle onder die harde arbeid van die Egiptenaars uitlei en julle red uit hulle slawerny, en Ek sal julle verlos deur ’n uitgestrekte arm en deur groot strafgerigte;
en Ek sal julle as my volk aanneem en vir julle ’n God wees. En julle sal erken dat Ek die HERE JHWJ julle God is wat julle uitlei onder die harde arbeid van die Egiptenaars uit.
En Ek sal julle bring in die land waaromtrent Ek my hand opgehef het, om dit aan Abraham, aan Isak en aan Jakob te gee; en Ek sal dit aan julle as ’n besitting gee, Ek, die HERE JHWH.

JAHWE beteken:
• die Onafhanklike Een
• Die God wat niks of niemand nodig het om te bestaan nie
• die Een met die Onuitspreeklike Naam
• Die Asemrowende Een
• die Een wat kies om met die mens in ‘n verhouding te staan.
As JAHWE Sy Naam oor Sy mense uitroep, dan sê Hy:
• “Ek sal jou uitlei”, amper soos verlei, weglei. Soos ʼn verliefde man wat sy vrou wil verras en haar weglok om alleen saam met Hom te wees. Dis vandaar dat die Jode eerder die naam “Adonai” uitspreek wanneer die naam “Jahwe” in die Skrif voorkom. En Adonai beteken spesifiek: besitter, meester, “The Lover of my Soul”
• “Ek sal julle red”
• “Ek sal julle verlos”
• “EK sal julle aanneem as my eie volk”
• “Ek sal vir julle (waarlik, ʼn ware) GOD wees”
• “Ek sal julle inbring”, bring tot by die plek waar die Here wil hê ons moet wees.
• “Ek sal gee”. Dit wat die Here belowe, sal Hy gee.
God, wat niemand nodig het om te bestaan nie, buig Homself af na jou toe om met jou te identifiseer, en met jou ‘n verhouding te hê. Die Naam JAHWE sê vir ons dat God Drie-enig aktief betrokke is by jou hele menswees: Dis volledige God wat besig is met jou as volledige mens. Hy hou niks van Homself terug nie, en Hy ignoreer oor niks in jou lewe nie. Hy wat nie nodig gehad het om iets met ons te doen te hê nie, kies om aktief by ons te wees.
REALITY CHECK
Die waarheid wat ons vandag ontdek, is dat die Here nie net betrokke is by sommige aspekte van jou lewe nie. Hy is betrokke by ELKE aspek van jou lewe, hy is bewus van ELKE ding wat in jou lewe gebeur. En wanneer Hy na ELKE aspek van jou lewe kyk, is Hy as VOLLEDIG GOD betrokke: as Vader, ʼn Pappa wat sorg en beskerm, as Vriend wat gesels en kuier en raadgee, as Gees wat lei en troos en inspireer.
PERSONAL APP
Dis ses dae voor Pinkster, die fees wat ons ken as die uitstorting van die Heilige Gees. Dis die fees waarop God Drie-enig homself finaal as volledige God aan ons kom verbind het, nie net as Vader of Skepper, soos in die Ou Testament nie, ook nie net as Verlosser toe Jesus gesterf het nie, maar as Vader en Seun wat deur Sy Gees in en by jou is, elke oomblik van jou lewe. Maak dit ʼn realiteit deur bewustelik VADER, JESUS en HEILIGE GEES deel te maak van jou daaglikse kuier saam met ons JAHWE

31/05/2019

Abraham het ʼn unieke pad saam met die Here gestap. Hoe dan anders?! Hy is nie verniet die “Vader van geloof” nie.
Abram leer eerstens die Here ken as Jahwe, die Here wat verhouding bou, wat hom roep en met hom ʼn ooreenkoms aangaan en Homself op so ʼn manier aan Abram en sy nageslag verbind. (Die ware betekenis van die naam “Jahwe” ken hy egter nooit – die eers aan Moses wat die Here dit oopsluit.)
Abram moes leer dat die Here die Skepper en Onderhouer van alles is – Elohim. En dis juis deurdat hy God op hierdie manier leer ken dat dinge vir hom moeilik raak. Jy sien, as jy verstaan dat die Here die Skepper is, dan verstaan jy dat Hy dinge geskep het om op ʼn sekere manier te funksioneer. Daar is seisoene wat vasgestel is, wat maak dat ons nie vrugte gaan soek as die seisoen daarvoor nie reg is nie. Die liggaam van ʼn vrou is ook so geskep dat sy kinders kan verwek tot op veertig, selfs dalk vyftig jarige ouderdom. Toe die Here vir Abram die belofte gee van ʼn nageslag, was hy in die moeilikheid, want hy het geweet sy vrou is reeds verby die ouderdom om kinders in die wêreld te bring.
Sara het dit ook goed geweet. Eerstens beraam sy ʼn plan om die Here “te help” om Sy belofte na te kom deur haar slavin, wat nog vrugbaar was, vir Abram te gee om ʼn kind te kan kry. Later, as sy hoor dat sy self ʼn kind gaan hê, lag sy; sy weet mos dis onmoontlik, want ELOHIM het ʼn vrou mos so geskep dat sy nie meer op 90 jarige ouderdom kinders in die wêreld kan bring nie.
Dis net hier waar die Here Homself aan Abraham (in die tussentyd het die Here ʼn verbond met Abraham gesluit en sy naam verander) openbaar as die God wat so magtig is dat Hy die vasgestelde orde wat Hy met die skepping ingestel het, kan deurbreek en omswaai, sodat Hy Sy beloftes aan Sy kinders kan waarmaak.
El-Shaddai: Hierdie is een van die kosbaarste (en dalk mooiste?) name vir God, beslis een van die sterkste name. In Genesis 17:1 wys die Here vir Abraham dat Hy die Sterk Een is (El) wat Al-magtig (Shaddai) is. Daar is niks of niemand wat God se mag en krag kan inperk nie, nie eens Sy eie skepping nie. Die woord “almagtig” laat die klem op “mag” val, maar dit beteken veel meer as net mag. Dit beteken dat God altyd kragtig is in Sy liefde en omgee, nimmereindigend potent in Sy genade. In Engels: “Omnipotent”. Ons Almagtige God het die krag om Sara se liggaam op 90 in staat te stel om kinders te hê, teen alle natuurlike beperkings in. Hy is so groot en magtig in Sy liefde en genade dat Hy aan Abraham doen wat Hy belowe het.
REALITY CHECK
As ek maar d**k aan my eie lewe, dan is daar soveel situasies waar daar geen hoop meer is nie, amper soos Abraham, wat geen hoop meer gehad het nie. Lees wat word daaroor in Romeine 4 geskryf:
“ 18 Toe daar geen hoop meer was nie, het Abraham nog gehoop en geglo, en so die vader van baie nasies geword volgens die belofte: “So sal jou nageslag wees. 19 Al was hy sowat honderd jaar en al het hy dus goed besef dat sy liggaam reeds gedaan was en dat Sara te oud was om kinders te hê, het sy geloof nie verswak nie. 20 Hy het nie in ongeloof begin twyfel aan die belofte van God nie, maar hy is in sy geloof versterk en het aan God die eer gegee. 21 Hy was ook ten volle daarvan oortuig dat God mag het om te doen wat Hy beloof het.”
Abraham is in sy geloof versterk in die wete dat EL-SHADDAI, die God wat kragtig is en omgee, aan hom verskyn het en Sy beloftes aan hom kom gee het.
Kyk vandag met ander oë na jou omstandighede, na jou realiteit, en sien die dinge raak wat alleen kan verander as El-Shaddai ingryp.
PERSONAL APP
Abraham het ʼn nuwe manier van lewe begin, en dit is ʼn lewe van geloof. Jy is ingesluit by die groot familie van God se kinders op grond van geloof. Neem nou daardie selfde geloof en pas dit toe deur te verstaan dat El-Shaddai vandag wil opdaag in jou lewe met KRAG en OMGEE. Die eerste ding wat Hy in my lewe kom verander het, was nie om in te gryp in my omstandighede nie, maar in my ingesteldheid en my manier van d**k. Vra die Here vandag om jou geloof te versterk, dat jy Hom kan raaksien as die een met mag om in te gryp, al beteken dit dat hy eers op nommer 99 gaan ingryp. Laat Hom toe om vandag in te gryp in jou denke, jou emosie, en jou ingesteldheid.

30/05/2019

Ons lees in Genesis van ʼn persoon wat eintlik glad nie belangrik is nie, wat nie eens deel was van die volk Israel nie. Maar die God van Israel, El-Elohe-Israel (Die sterk Een, die Skepper en onderhouer van Israel), gee selfs vir haar ook om en sien haar ook raak.
El-Roí: God wat sien, God wat raaksien.
Hagar was ʼn bejammerenswaardige figuur, swanger deur haar eienares se man, Abram, en op vlug iewers in die woestyn, weg van Sara wat haar mishandel het. Sy was deel van Abram se huishouding. Die bietjie goedheid wat sy beleef het, was bloot genade, want sy het geen regte gehad nie, en selfs maar bitter min voorregte. Die een voorreg wat Sara haar gegun het, was om swanger te word (eintlik namens haar) om vir haar man, Abram, ʼn kind te kan gee. Maar toe dit gebeur, word Sara jaloers, en ontneem haar van alle menswaardigheid wat sy nog oorgehad het.
In ʼn diep g*t van depressie gaan sit Hagar in die woestyn, waar niemand haar kan sien, van haar weet, of iets vir haar kan doen nie. Sy gaan sit daar om dood te gaan. Dan daag die Here self op en verras haar.
“Waar kom jy vandaan, Hagar? En waarheen is jy op pad?” Dis hoe die Here haar konfronteer binne haar omstandighede. Dis asof die Here vir haar wil vra: weet jy wat Ek weet, Hagar? Kan jy die detail van jou lewe raaksien, soos Ek doen?
Eers probeer sy om te verduidelik vanuit haar eie perspektief op haar omstandighede, so asof die Here dit nie reeds weet nie. Die manier waarop sy verduidelik, wys eintlik daarop dat sy te kenne wou gee dat sy verstaan dat die Here nie sou weet wat in haar lewe aangaan nie; sy is mos immers nie eers deel van Sy volk nie, dus nie belangrik genoeg dat die Here enigsins aan haar sou aandag gee, of iets van haar sou weet nie.
Maar die Here laat haar gou besef dat Hy baie meer oor haar weet, en baie meer vir haar omgee as wat sy ged**k het. Hagar gee aan die Here eer en lof, daar in die woestyn, binne haar omstandighede, as sy besef dat sy die Here wat haar raaksien ontmoet het. Genesis 16:13-14. Dis nogal interessant om te weet dat sy dan haar seun Ismael noem, wat beteken: God wat hoor. “God wat my raaksien, het my pyn gesien en my geroep gehoor.”
REALITY CHECK
In my eie lewe voel ek dikwels of die Here baie ver is, asof Hy van my vergeet het. En jy? D**k jy die Here sien jou nog raak?
Besef vanoggend dat die Here, die Sterke God, EL, sy oë oop het en kan sien. Nie net dit nie, maar Hy sien RAAK. Hy wat sien, sien jou raak, Hy weet van jou, Hy hoor jou! Maak hierdie stukkie realiteit in jou hart en gedagtes vas.
PERSONAL APP
Ons gedagtes word soms besoedel met vals inhoude, en die bose spesialiseer daarin om die vertrekpunt van ons geloof te skuif na onsekerheid en leuens. “Is die Here regtig in staat om aandag te gee aan jou? Hy moet die wêreld in stand hou, daar is mos nie tyd vir onbenullige dingetjies soos jou behoeftes, of klein, eenvoudige mensies soos jy nie?” Dis ʼn tipiese gedagte waarmee hy jou wil onderkry en laat twyfel. Verdryf vandag leuens met die waarhede wat die Here vir ons in die Skrif gee:
Psalm 34:16 “Die oë van die HERE is op die regverdiges, en sy ore tot hulle hulpgeroep.”
Spreuke 15:3 “Die Here sien oral; Hy hou slegte en goeie mense dop.”

29/05/2019

Ons vind heelwat beskrywende name vir God waar die naam El verbind word aan ʼn selfstandige naamwoord wat iets van God se karakter beskryf. Vanoggend kyk ons na ʼn mooi voorbeeld van so ʼn beskrywende Godsnaam:
El-Elyon: El, die Sterk Een, is God wat bo alles is, God die Allerhoogste (the most High God). Hy is die hoogste gesag, Hom kom toe die hoogste eer, en alle mag behoort aan Hom. Hierdie benaming kom 4 keer in Genesis 14:18-22 voor. Dis God die Allerhoogste wat in ons lewens die hoogste eer en aansien verdien. Niks in die lewe is hoër en meer verhewe as Hy nie.
Bileam skryf oor die openbaring wat hy van die Here gehad het (Numeri 24:15-16), en dan noem hy dat dit die Allerhoogste God, El-Elyon was, wat aan hom die wysheid gegee het, en wat in Sy grootheid en mag as die Allerhoogste sy oë oopgemaak het om die waarheid te kan sien. Dis voor die Allerhoogste God wat hy homself dan laag maak, voor Hom neerval en Hom aanbid. Die Allerhoogste weet alles en sien alles, en maak die oë van Sy mense oop om die waarheid raak te sien.
REALITY CHECK
Sien weer in jou geestesoë vir Jesus aan die Kruis. Sien hoe die Jode Hom hoog gehang het en dat Hy op so 'n manier jou Allerhoogste kon word deur jou te vergewe en jou nuwe lewe te gee. Sien Hom op Sy troon sit waar Hy nou as Allerhoogste in Sy koninkryk gekroon is en heers.
D**k na oor alles wat vir jou in die lewe belangrik is. Hoe belangrik is die Here vir jou in elkeen van daardie aspekte van jou lewe? In watter van daardie aspekte is die Here alles? In watter aspekte behoort Hy meer prominent te wees, dus, moet Hy meer word?
PERSONAL APP
D**k na oor wat Johannes die Doper gesê het in Johannes 3:30 “Hy moet meer word en ek minder”. Vra die Here om jou te wys wat in jou lewe moet minder word, sodat Hy 'n groter prominensie in jou lewe kan kry.
Gee die Allerhoogste vandag weer die eer wat Hom toekom en onderwerp alles in jou lewe aan Hom.

28/05/2019

Ek gaan in die week wat voorlê elke dag iets deurgee oor God se Karakter soos ons dit leer ken uit die Name wat Hy gebruik om Homself aan ons bekend te maak. Dit pas in by die Dissipel LAB waarmee ons tans besig is, en ook by die fees van Pinkster wat in hierdie week begin.
Daar is ʼn geweldige hoeveelheid name en titels wat vir God gebruik word, en elkeen van hulle het ʼn eie en dinamiese betekenis. Dit is regtig hartseer dat baie van die verskillende name en titels in Afrikaans met God, HERE, en Here vertaal is, maar die betekenisse daarvan kom nie so sterk deur nie. Hierdie aantekeninge oor die Name van God is opgestel sodat jy iets oor die grootheid en unieke karaktertrekke van God kan leer ken. Dis hoegenaamd nie ʼn omvattende beskrywing van al die name en titels nie. Dis slegs ʼn seleksie van die belangrike en betekenisvolle name wat meer algemeen in die Bybel voorkom.
Ontmoet die Sterk Een – El
Dinsdag
Die eerste naam vir God waarna ons gaan kyk is El. Hierdie naam is eintlik die oudste, of mees primitiewe naam in die Semitiese tale wat mense gebruik het om na hulle god te verwys, en dit beteken “die Sterk Een”. Dit verwys dikwels na die groot krag van God. Elohim is ʼn verbuiging van, of uitbreiding op die naam El.
In die Bybel lees ons ook die naam El ʼn paar keer raak, waarvan dit in ongeveer 250 gevalle in Afrikaans as “God” vertaal is. Die skrywers van die Ou Testament het dus dikwels na God verwys deur die naam El te gebruik. El kom loshande die meeste in Job en Psalms voor, wat beide poëtiese geskrifte is. Dit lyk dus asof die skrywers, wanneer hulle oor God op poëtiese wyse praat, dan die woord El verkies. Waar die word ook al voorkom, dit word gebruik om God te beskryf as die Een met krag en sterkte. Dit kan ook die betekenis dra dat God sterk is in Sy karakter, dus die Een met die uitnemende sterk karakter, Een wat kragte het groter as die aardse kragte wat ons ken, maar ook die Een wat karater het beter as wat ons in hierdie wêreld beleef.
In Psalm 22 word die Naam El gebruik. Psalm 22:2 begin met: ”Eloi Eloi...”, ‘n verbuiging van El wat beteken “My God, my God” of “my Sterk Een, my Sterk Een”. Dit is dan baie treffend as Markus opteken hoe Jesus aan die kruis uitroep: “Eloi, Eloi!”, vandaar dat die Psalm die titel “Golgota-psalm” gekry het.
REALITY CHECK
Soms gebeur dit in die lewe dat 'n mens tye beleef waar jy besonders dinamies funksioneer, asof jy van krag tot krag gaan. Ander tye weer, beleef jy totale kragteloosheid. Ek vind dit baie in my lewe dat ek in tye van krag vergeet dat die Here die Een is wat my krag gee, en wanneer ek kragteloos voel, wonder ek baie waar die Here nou eintlik is. Die Naam El herinner my dat God die God van krag is, die sterk Een. Hy gee my krag om dinamies te lewe. En wanneer dit lyk of my krag verdwyn het, herinner Paulus my in 2 Korintiërs 12:9-10 dat Hy sterk is juis wanneer ek swak is.
PERSONAL APP
Skryf 'n bietjie neer waar jy al die Here in jou lewe beleef het as El, die Sterk Een. D**k aan beide kragtelose tye as kragtige tye in jou lewe.
Hou jou oë vandag oop om te probeer raaksien waar die Here Homself vir jou gewys het as die Sterk Een.
Waar kon jy Jesus wees vir iemand deur sterk te wees vir die persoon in sy of haar swak oomblik? Hoe kan jy in jou vriende se lewens God se sterkte gaan aangee? Vra die Sterk een om jou sterk te maak om namens Hom Sy sterkte aan iemand te wys.

19/04/2019

"Moenie toelaat dat die waardes wat in hierdie wêreld heers, en die praktyke wat aanvaarbaar is binne julle kultuur, julle gedrag en optrede vorm en kenmerk nie, maar laat toe dat ‘n metamorfose in julle plaasvind as jou denksisteem verander word om meer en meer volwasse te wees" Romeine 12:2
Fokus op: Wat is dit wat jy NIE in jou lewe moet toelaat nie? Wat moet jy WEL toelaat? Vra die Here dat Hy jou moet wys wat die NUWE dinge is wat Hy in jou gedagtes wil inplant.

19/04/2019

Die nuwe seisoen van Dissipelskool het pas begin. Die nuwe seisoen staan bekend as die Dissipel LAB (Dissipel Leefstyl-Aktivering Begeleiding). Die volgende kontaksessie is op Woensdag 24 April, 18:30, by Annico straat 18, Ninapark. Kontak my indien jy nog belangstel om in te skakel.
Die Disciple Dynamix blad is spesifiek begin om die D-LAB se daaglikse dagstukke met mekaar te deel. Geniet die stukkies saam met die D-LAB

08/02/2019

Ons het via die Sentrum vir Dissipelskap Ontwikkeling begin met n projek waarin ons mense wat alles verloor het, weer her lanseer in die samelewing. Ons is tans besig met n gesin, n ma met 3 kinders, vir wie ons dringend verblyf soek, al is dit net vir n paar dae. Indien jy dalk weet van n plek, laat weet ons asseblief!

30/10/2018

EK het vanoggend wakker geword met ʼn beklemming in my gemoed, en vrees het sommer in sweetdruppels op my kop begin uitslaan. Omstandighede lyk benard en dit lyk net asof dinge nie gaan verbeter nie.
Soos elke oggend sien ek Mariette af by haar motor as sy werk toe ry, en dan gaan ek kamer toe om stil te raak en by die Here te kuier. Dis my lewensaar, die bron van krag vir elke dag, en vandag het ek dit meer as ooit nodig, want my kop hang laag.
Die eerste stukkie wat ek elke oggend lees, is sommer op my selfoon. Die “vers van die dag” het my al soveel keer verras, en ek moes al ʼn paar keer beleef dat die Here ʼn baie spesifieke plan met hierdie app. het, want dis Random versies wat aan al 100 miljoen mense gestuur word wat die app. al afgelaai het. Vanoggend praat Romeine 12:21 sommer weer reguit met my hart:
“Do not be overcome by evil, but overcome evil with good.”
Ek beleef hoe die Here wil hê ek moet bly fokus op dit waarvoor ek gemaak is: om goed te doen. Die boosheid van finansiële druk en die invloed van ons benarde situasie op my gemoed en gesondheid is aanvallig sommer vroeg in die oggend. Maar op grond van die Woord wat die Here vanoggend vir my bring, kies ek om vandag goed te doen.
Die volgende studieplan wat ek deurwerk gee vir my riglyne om nie net hierdie dag nie, maar elke dag te met oorgawe te leef. Thess. 5:17-18
“Rejoice always. Pray always. Give Thanks in everything!”
RAPAGE – Rejoice Always, Pray Always, Give Thanks in Everything
En dan die laaste stukkie van hierdie gedeelte, wat betrekking het op al drie voorskrifte: “want dit is God se wil vir julle in Christus Jesus!”
Wees altyd vol blydskap, want dit is God se wil vir jou. Maak jouself bly en opgewonde wanneer die omstandighede van jou tydelike realiteit die feite van jou ewige realiteit verbloem. Herinner jouself aan die sorg en beloftes van die Here. Kyk met Sy oë na jou lewe. Sien raak wat die geheime is wat Hy wil hê jy moet raaksien. En skep moed!
Bid sonder ophou, want dit is God se wil vir jou. Bly altyddeur in direkte verbinding met die Vader, want dan is jy op die perfekte plek, en is jy binne God se wil, maak nie saak wat jou omstandighede vir jou probeer wysmaak nie.
Sê vir die Here dankie in alle omstandighede, want dit is God se wil vir jou. Sê dankie vir alles wat in jou lewe gebeur. Alles! Dis is God se wil vir jou dat jy dankbaar is vir alles, al is dit sleg, al is dit nie eens van Hom af nie. Maar wanneer ons dankbaar is vir ALLES, bewys ons eintlik dat ons regtig glo dat alles ten goede meewerk vir die een wat Hom liefhet. Om dankie te sê vir sleg en swaar, lig jou uit daardie omstandighede, en plaas jou binne in God se wil, sodat Hy alles kan laat uitwerk vir die beste.
Die derde stuk wat ek lees, kom uit Psalm 37. Dit help my om vreugde te vind in niks anders as net die Here nie. As ons moet dankie sê vir die swaar en sleg in ons lewens, is dit maklik om ons vreugde juis daarin te probeer vind. Dit klink masogisties, maar soveel mense doen dit. Hulle vind hulle identiteit in hulle swaarkry en seer. Die Here vra vanoggend van my om net dankie te sê vir die swaarkry, maar dan na Hom toe te draai om my vreugde in Hom te vind.
“Vind jou vreugde in die Here, en Hy sal jou gee wat jou hart begeer.”
Maak jouself bly in die Here. Soek vreugde by Hom, in Sy teenwoordigheid. Soek Hom totdat jy Hom vind, en hou dan jou fokus op Sy teenwoordigheid in elke situasie in jou lewe.
ʼn Eenvoudige tydjie van kuier saam met die Here het my gemoed gedraai en my in staat gestel om ʼn dag vol stres op ʼn totale ander manier, met oorvloedige lewe en vreugde te beleef.
Dankie Here dat U ons gemoed vernuwe, en dat U ons gedagtes nuut maak en in lyn bring met U gedagtes oor ons.

24/10/2018

Maak gereed
Die afgelope tyd ontmoet ek meer en meer mense wat sê dat die Here besig is met hulle oor nuwe dinge in hulle lewens. Ek glo dit ook. Maar is ons gereed om die nuwe dinge van die Here te kan hanteer? Ek leer ʼn paar beginsels in Deuteronomium wat die Here ook in ons lewens wil vestig om ons gereed te maak vir Sy planne.
Die verhaal van die intog in die beloofde land is ʼn analogie wat ek glo steeds vir ons van waarde is. Op dieselfde manier waarop die Here Sy volk gereed gemaak het om Kanaän te beërf, wil Hy ons ook gereed maak vir Sy nuwe planne, Sy droom vir jou lewe, Sy Koninkryk wat op ʼn vars, nuwe manier vanuit jou lewe hier tussen ons gaan deurbreek.
As ek Josua lees, dan sien ek wat alles gebeur tydens die intog in die beloofde land. Deuteronomium gee vir ons meer die antwoord op die vraag HOE die beloofde land ingeneem moet word, en dan spesifiek, hoe moet jou hart lyk wanneer jy besit neem van die land. Dit gaan oor beginsels en waardes wat deel van hulle lewens moet wees. Die Here wil dieselfde waardes en beginsels in ons lewens vestig om ons gereed te maak om op Sy manier Sy koninkryk tussen ons te vestig.
Destyds het die Here vir Moses gesê dat hulle al die wette moet gehoorsaam, en stiptelik navolg. ʼn mens kan maklik vra: watter wette? Daar is die 10 gebooie, reinigingswette, kulturele wette, ens. As die Here 40 jaar later dit weer herhaal en weer vir Moses aansê om dit nog ʼn slag vir die volk voor te hou, dan is dit asof die Here die essensie van al die wette opsom in Deuteronomium 6:
4 Hoor Israel, die HERE jou God is EEN [een is wese, maar ook enig in Sy soort, daar is geen ander behalwe Hom nie].
5 En jy moet die HERE jou God liefhê [Hom hoog ag, eerste stel, bewonder, respekteer, Hom dien, Hom bemin]
Met jou hele hart [in die totaliteit van jou innerlike wese, dit moet die kern van jou lewe wees]
En met jou hele siel [met al jou passie, in al jou begeertes, in al jou emosies, in alles wat jy d**k]
en met al jou krag [met al jou oorvloed, met al jou mag en invloed, al jou sterkte, met alles wat buite jouself lê]
Hierdie gesindheid moet heeltyd deel wees van hulle lewens. Hy gee ʼn klompie opdragte om hulle te help om dit heeltyd deel van hulle lewens te maak. Dis ʼn eenvoudige strategie wat gevolg moet word:
6 Hierdie woorde wat Ek jou vandag beveel, moet in jou hart wees [dit moet deel wees van die kern van jou bestaan, van die bron waaruit jy lewe]
7 Jy moet dit by jou kinders inskerp [jou kinders moet by jou hoor en sien hoe om in verhouding met God te lewe, jy moet aktief besig wees om jou kinders te dissipel]
En jy moet daaroor praat as jy by jou huis sit en as jy op pad is en as jy gaan lê en as jy opstaan [dit moet op jou lippe wees die hele dag]
8 Jy moet dit as ʼn teken aan jou hand vasbind [jou hande moet getuig van jou liefde vir die Here, alles wat jy doen moet ʼn teken wees van jou liefde]
En dit sal wees soos ʼn band tussen jou oë [dit moet heeltyd onwrikbaar vas staan voor jou oë, jy moet nie jou oë daarvan afhaal nie]
9 Skryf dit op jou deurkosyne en op jou poorte [laat dit die opskrif wees van jou hele woonplek en huishouding, ook op jou hekke sodat mense wat verbygaan, kan sien wat jy glo]
Hierdie opdragte is net so toepaslik op ons eie lewens. Wat die Here wil hê is die volgende:
Die Here wil hê dat ons moet groei in ons verhouding met Hom, deur Hom lief te hê bo alles.
Hy wil hê dat ons dissipels moet maak, deur dieselfde beginsels aan ons kinders (geestelike kinders) te leer.
Ons moet ons verhouding met Hom deel maak van ons daaglikse lewe, deur altyddeur daaroor te praat, en daaroor na te d**k.
Alles wat ons doen en aanpak, moet ʼn getuienis en bevestiging wees van ons verhouding en ons geloof. Ons moet Hom heeltyd voor oë hou.
Mense wat met ons te doen het, moet weet waar ons staan, sodat hulle kan sien hoe lyk iemand wat die Here lief het, en hoe lyk dit as die Here ʼn gewone mens liefhet.
Ek bid dat ons as volgelinge van Jesus onsself op dieselfde wyse moet gereed moet maak vir wat voorlê. Die beginsels in hierdie gedeelte is presies dieselfde beginsels wat in Dissipelskap geld. Dis eenvoudig:
• Dinamiese, lewende verhouding met die Here
• Groei en ontwikkeling om jou tot volwassenheid te bring
• Begelei jou geestelike kinders op dieselfde roete as wat die Here jou lei
• Demonstreer jou geloof deur alles wat jy doen
• Wees ʼn voorbeeld in die manier hoe jy praat, en hoe jy die Here deel maak van jou hele lewe

Address

Annico Street 18
Akasia
0182

Telephone

+27 82 4974704

Website

Alerts

Be the first to know and let us send you an email when Disciple Dynamix posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Disciple Dynamix:

Shortcuts

Share

Category