https://www.facebook.com/112044706926515/

Cộng Đoàn Dòng Chúa Cứu Thế Plei Ku - Hiăp Hơdip Hlong Lar, Gia Lai (2026)

25/08/2026

===Một Lòng Thanh Sạch
===Sa Pran Jua Agaih
HIĂP ADAI HRƠI TLÂO GUANG TƠJUH TAL XXI AMĂNG THǓN ĐĂO(Mt 23, 27-32)
TƠLƠI MƠAK KLĂ YÊSU KRISTÔ KHUA TUI MATTHÊÔ PÔ MƠYANG.
Aƀaih ƀing gih anai ih, ƀing Nai hăng Bơčơlah ngă mă, ƀing gih kar pơsat arang p*k čur, gah rơngiao lăng hiam, samơ̌ amăng lăm bă kơ tơlang atâo tôm dum mơta brǔ brai; tui anun mơn, gah rơngiao lăng ƀing gih kar tơpă ƀơi anap arang, samơ̌ amăng lăm bă kơ bruă ngă mă hăng ƀrưh mơhiah".
"Aƀaih ƀing gih anai ih, ƀing Nai hăng ƀing Bơčơlah ngă mă, ƀing gih man pơsat kơ ƀing Pô Ba Hiăp Adai, pơrǒ pơhiam kơning pơsat ƀing pô tơpă, hăng lăi: "Plă ta hơdip lơm rơnuk prin tha, sit ta ƀu mǔt tơngia hrom hăng gơñu ôh đah mơ ngă tuh drah ƀing Pô Ba Hiăp Adai!" Tui anun yơh ƀing gih ngă gǒng kơdǒng glăi kơ ƀing gih pô: Ƀing gih ană tơčô biă phung pơdjai laih ƀing Pô Ba Hiăp Adai! Hăng pơbă bě hơhră bruă prin tha ƀing gih!"
ANUN HIĂP KHUA ADAI BIĂ!

24/08/2026

===Để Chúa Dẫn Đường
===Kiang Kơ Khua Ba Jơlan
HIĂP ADAI HRƠI DUA GUANG TƠJUH TAI XXI AMĂNG THǓN ĐĂO (Mt 23, 23-26)
PÔ MƠYANG LOUIS, PÔ MƠYANG YOSEPH KALASANZ, DK.
TƠLƠI MƠAK KLĂ YÊSU KRISTÔ KHUA TUI MATTHÊÔ PÔ MƠYANG
Aƀaih ƀing gih anai ih, ƀing Nai hăng ƀing Bơčơlah ngă mă, ƀing gih nao duh dia ha čran hlăm hơpluh mơng djop mơta ač, agruač, bôh weh hăng lui hǐ dum mơta tơlơi yôm phan hloh amăng Tơlơi Phian kar: pran jua tơpă, khăp pap, hăng đăo gưt. Dum tơlơi anai brơi ngă tui bě, kơplah ƀu lui lơi dum tơlơi anun. Ƀing bum mơta ba jơlan! Ƀing gih djong mă ha drơi kač, samơ̌ lun lǒng hǐ ha drơi aseh!"
Aƀaih ƀing gih anai ih, ƀing Nai hăng ƀing Bơčơlah ngă mă, ƀing gih rao agaih gah rơngiao kơčok, jam, samơ̌ amăng lam bă kơ dop kưp hăng ră kơhu. Ƀing Bơčơlah bum mơta, rao bě amăng lam kơčok, jam, hơnǔn gah rơngiao gơ̌ amra jing agaih mơn."
Anun Hiăp Khua Adai Biă!

23/08/2026

===Thấy Vinh Quang Chúa
===Ƀuh Tơlơi Ư Ang Khua
HIĂP ADAI HRƠI SA GUANG TƠJUH TAL XXI AMĂNG THǓN ĐĂO (Yn 1, 43-51)
ƠI MƠYANG BARTHÔLÊMY, PÔ PƠĐAR NAO. HRƠI PƠPǓ.
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG
Philip bưp Nathanael hăng lăi: "Pô Môsê tôm ƀing Pô Ba Hiăp Adai čih laih amăng hră Tơlơi Phian, gơmơi ƀuh laih Ñu: Yêsu ană Yoseph, plơi Nazareth". Nathanael lăi glăi: "Hơgơt hmâo anô̆ hiam dui tơbiă rai mơng Nazareth?" Philip lăi: "Rai lăng wŏ!" Yêsu ƀuh Nathanael rai pơ Ñu, Ñu lăi bôh tơhơnal kơ Nathanael: "Anai sa čô ană Israel biă, ƀu hmâo mơnač lač dar ôh amăng ñu". Nathanael lăi kơ Yêsu: "Mơng Ih thâo kâo?" Yêsu lăi glăi kơ ñu: "Hlâo kơ Philip iâo ih, Kâo ƀuh laih ih dô̆ ƀơi phun hra!" Nathanael lăi glăi kơ Yêsu: "Ơ Rabbi, Ih Ană Khua Yang Adai, Ih Pơtao Israel!" Yêsu lăi glăi dơng kơ Nathanael: "Yua kơ Kâo lăi: Kâo ƀuh laih ih dô̆ ƀơi phun hra, hơnŭn ih tui gưt! Ih amra ƀuh dum bruă prong hloh kơ anun dơng!" Hăng Yêsu lăi kơ Nathanael: "Sit biă, sit biă, Kâo laih kơ gih: Gih amra ƀuh adai pok blang hăng ƀing yang hiam mơng Khua Yang Adai đĭ trun ƀơi Pô Ană Mơnuih".

22/08/2026

===Theo Bạn, Đức Kitô Là Ai?!
===Tui Ih, Hlơi Yêsu Khua Lě?!
HIĂP ADAI HRƠI KHUA TAL XXI AMĂNG THǓN ĐĂO (Mt 16, 13-20)
TƠLƠI MƠAK KLĂ YÊSU KRISTÔ KHUA TUI MATTHÊÔ PÔ MƠYANG
Lơm Yêsu truh pơ tring Kaisaria ơi Philip wai, Ñu tơña ƀing juat tui: "Tui arang lăi, hlơi Pô Ană Mơnuih?" Gơñu lăi glăi: "Đa lăi Ih Yohan pô pơñǔ; đa lăi: Êlia; ƀing pô pơkon lăi: Yêrêmia ƀôdah sa čô Pô Ba Hiăp Adai". Yêsu lăi kơ gơñu: "Samơ̌ ƀing gih, ƀing gih lăi Kâo hlơi?" Simon Pêtrô lăi glăi: "Ih Pô Kristô, Ană Khua Yang Adai Pô hơnong hơdip". Yêsu lăi glăi kơ ñu: "Mơyun mơak kơ ih: Simon Bar Yônas! Ƀu djơ̌ ôh čơđeh asar hăng drah kơtak mơnuih pơrơđah tơlơi anun kơ ih, samơ̌ Ama Kâo, Pô dô̌ ƀơi adai! Hăng Kâo lăi kơ ih: Ih Pơtâo, ƀơi pơtâo anai, Kâo amra pơdǒng Khul Jơnum Kâo, pran kơdrưh dêh atâo ƀu dui kơ ñu ôh. Kâo amra jao brơi kơ ih bôh khuă Dêh Čar Pơtao Adai, hơnǔn dum tơlơi ih kôl ƀơi lǒn, amra kôl mơn ƀơi adai, dum tơlơi ih tơleh ƀơi lǒn, amra tơleh mơn ƀơi adai". Laih anun Yêsu khă ƀu brơi ƀing juat tui lăi kơ hlơi ôh: Ñu yơh Pô Kristô.
ANUN HIĂP KHUA ADAI BIĂ!

20/08/2026

===Yêu Ai Hết Lòng?
===Khăp Kơ Hlơi Abih Pran Jua?
HIĂP ADAI HRƠI RƠMA GUANG TƠJUH TAL XX AMĂNG THǓN ĐĂO (Mt 22, 34-40)
PÔ MƠYANG PIÔ X, AKǑ DING PHUN. HRƠI HƠDOR.
TƠLƠI MƠAK KLĂ YÊSU KRISTÔ KHUA TUI MATTHÊÔ PÔ MƠYANG
Hmư̆ hing Yêsu pơkơđip mơbah khul ƀing Sadok, ƀing Bơčơlah bơjơnum hrom. Hơnŭn sa čô Nai pơtô tơlơi phian amăng ƀing gơñu tơña lông Yêsu: “Ơ Nai, hơgơt tơlơi prong hloh amăng tơlơi phian?" Yêsu lăi ko pô anun: “Ih amra khăp kơ Khua, Khua Yang Adai ih, abih hơtai bôh ih, hăng abih bơngat jua ih, hăng abih tơngia ih! Anun yơh tơlơi pơtan prong hloh, hăng tơlơi potan tal sa. Tơlơi pơtan tal dua kar kăi mơn: Ih amra khăp kơ gop ih kar ih pô. Abih Tơlơi Phian tôm abih ƀing Pô Ba Hiăp Adai tơbiă mơng dua mơta tơlơi pơtan anun".
ANUN HIĂP KHUA ADAI BIĂ!

19/08/2026

===Chúa Mời Dự Tiệc
===Khua Jak Pơhuă
HIĂP ADAI HRƠI PĂ GUANG TƠJUH XX AMĂNG THǓN ĐĂO (Mt 22, 1-14)
PÔ MƠYANG BÊRNAĐÔ, PÔ PƠJING SANG PƠKÔM, NRKJM. HRƠI HƠDOR.
TƠLƠI MƠAK KLĂ YÊSU KRISTÔ KHUA TUI MATTHÊÔ PÔ MƠYANG
Yêsu yua dơng tơlơi pơhơmutu đah mơ lăi kơ ƀing gơñu tui anai: "Dêh Čar Pơtao Adai jing kar sa čô Ơi Pơtao anun pơprăp pơhuă pơdô̆ ană Ñu. Ñu pơđar ƀing ding kơna Ñu nao iâo ƀing pô Ñu jak laih, rai ƀong huă, samơ̆ gơñu ƀu gưt rai ôh. Ơi Pơtao pơđar ƀing ding kơna pơkon dơng, hăng lăi: "Gih lăi bĕ kơ ƀing pô Kâo jak laih: anai, asơi añam kâo pơprăp laih, rơmô tơnô, hlô rơmuă koh laih, djop mơta prê laih! Rai ƀong huă bĕ!" Samơ̆ gơñu ƀu lăng ôh, pha pô pha tui jơlan gơñu đa nao pơ hmua, đa nao mơdrô. Hmâo ƀing pơkon dơng mă ƀing ding kơna ơi Pơtao, kơpĭ hăng pơdjai hĭ. Ơi Pơtao rơañ, pơđar ƀing tơhan pơram ƀing pơdjai mơnuih anun, čuh plơi gơñu. Laih anun, ơi Pơtao lăi kơ ƀing ding kơna: "Asơi añam prăp laih, samơ̆ ƀing pô Kâo jak laih ƀu gôp ôh. Hơnŭn ƀing gih tơbiă nao bĕ pơ djop jơlan klah, hơdum čô ƀing gih dui ƀuh, jak bĕ gơñu rai ƀong huă". Ƀing ding kơna tơbiă nao pơdjop jơlan prong, pơƀut abih ƀing gơñu bưp, tôm hiam tôm sat. Hơnŭn sang ƀong huă bă kơ toai laih.
Ơi Pơtao mŭt lăng ƀing ƀong huă, ñu ƀuh ƀơi anun hmâo sa čô ƀu pơhrup ôh ao pơdô̆ ung mô̆, hơnŭn ơi Pơtao lăi ko pô anun. "Ơ jiang, hyưm drơi thâo mŭt amăng anai hăng ƀu hmâo ao pơdô̆ ung mô̆ lĕ?" Pô anun dô̆ lơleh. Hơnŭn ơi Pơtao lăi kơ ƀing ding kơna: "Čăo bĕ tơkai tơnan ñu, hăng dlom hĭ ñu pơgah rơngiao, amăng kơnam mŏt, ƀơi anun amra čok hia, kĕ tơgơi".
Kơyuadah iâo lu, samơ̆ ruah mă hui pô đuč.
ANUN HIĂP KHUA ADAI BIĂ!

18/08/2026

===Công Bằng Hay Xót Thương
===Dum Kơnar Ƀôdah Khăp Pap
HIĂP ADAI HRƠI TLÂO GUANG TƠJUH XX AMĂNG THǓN ĐĂO (Mt 20, 1-16)
PÔ MƠYANG YOHAN ÊUĐÊ, DK.
TƠLƠI MƠAK KLĂ YÊSU KRISTÔ KHUA TUI MATTHÊÔ PÔ MƠYANG
Kơyuadah Dêh Čar Pơtao Adai jing hrup hăng sa čô pô sang anun, mơng sing bring, tơbiă apah mơnuih mă bruă amăng đang bôh kơƀâo ñu. Laih ư brơi kơ ƀing pô mă bruă sa prăk ha hrơi, ñu pơđar gơñu nao mă bruă amăng đang ñu. Dơ̌ tlâo mông ñu tơbiă hăng ƀuh ƀing arang dô̌ soh ƀơi anih juat jưh. Hơnǔn ñu lăi kơ gơñu: "Tôm ƀing gih mơn, nao bě pơ đang kâo! Kâo amra tla djơ̌ brơi kơ ƀing gih". Ƀing anun nao yơh. Dơ̌ năm mông, laih anun dơ̌ duarơpăn mông, pô sang tơbiă dơng hăng ñu ngă tui anun mơn. Dơ̌ pluh sa mông, ñu tơbiă dơng, ñu ƀuh dơng hmâo ƀing arang ăt dô̌ ƀơi anun mơn, ñu lăi kơ gơñu: "Yua hơgơt gih dô̌ soh ƀơi anai mơng mơguah truh pơ tlam tui anun?" Ƀing anun lăi glăi: "Yua kơ ƀu hmâo hlơi apah gơmơi ôh". Ñu lăi kơ gơñu: "Tôm gih dơng mơn, nao bě pơ đang kâo". Lơm tlam laih, pô đang pơtan kơ pô wai bruă: "Iâo bě ƀing mă bruă, tla prăk kơ djop pô, mơng pô rai tơdơi truh pơ pô mǔt mơng phun". Ƀing pô mǔt mă bruă dơ̌ pluh sa mông, gơñu rai hăng mă rim pô sa prăk. Lơm truh pơ ƀing pô mǔt mơng phun, gơñu mǐn: Sit gơñu amra ƀong lu hloh. Samơ̌ gơñu ăt mă rim čô sa prăk mơn. Laih mă prăk, gơñu hiăp brôk kơ pô sang, lăi: "Ƀing pô mǔt tuč rơnuč anun, gơñu mă bruă kơnong kơ sa mông đuč, ih lăng gơñu dum kơnar hăng ƀing gơmơi, ƀing pô añ laih sa hrơi dleh dlan amăng pơiă". Pô sang lăi glăi kơ sa čô amăng ƀing anun: "Ơ jiang, kâo ƀu hmâo pơsoh ih ôh, djơ̌ mơ̌ ih ư ang laih kâo apah ih sa prăk? Ih mă bě prăk ih hăng nao bě. Kâo kiang brơi kơ pô tuč rơnuč anai dum kơnar hăng ih. Kâo ƀu dui yua gơnam kâo tui kâo kiang ôh hă? Huǐdah mơta ih lăng sat yua kơ kâo hiam thơ?" Tui anun yơh, ƀing pô rơnuč amra jing hlâo, hăng ƀing pô hlâo amra jing rơnuč".
ANUN HIĂP KHUA ADAI BIĂ!

17/08/2026

===Theo Chúa Được Gì?!
===Tui Khua Hmâo Hơgơt Lě?!
HIĂP ADAI HRƠI DUA GUANG TƠJUH TAL XX AMĂNG THǓN ĐĂO (Mt 19, 23-30)
TƠLƠI MƠAK KLĂ YÊSU KRISTÔ KHUA TUI MATTHÊÔ PÔ MƠYANG
Yêsu lăi kơ ƀing juat tui Ñu: "Sit Kâo lăi biă kơ ƀing gih: sa čô pơdrong amra tơnap mǔt amăng Dêh Čar Pơtao Adai. Kâo lăi dơng kơ ƀing gih: aseh kamêlô mǔt amăng amăng jrum amuñ hloh kơ pô pơdrong mǔt amăng Dêh Čar Pơtao Adai". Hmư̌ anun, ƀing juat tui suek kơ tơngia hăng lăi: "Hơnǔn hlơi mơ dui tlaih?" Yêsu lăng pơñen gơñu hăng lăi: "Hăng mơnuih tơlơi anun ƀu dui, samơ̌ hăng Khua Yang Adai djop tơlơi dui abih". Laih anun Pêtrô lăi kơ Yêsu: "Anai ƀing gơmơi lui abih hăng tui Ih, hơnǔn hơgơt ƀing gơmơi amra hmâo?" Yêsu lăi kơ gơñu: "Sit Kâo lăi biă kơ ƀing gih: ƀing gih, ƀing pô tui laih Kâo, tơ hrơi pơjing brâo, lơm Ană Mơnuih dô̌ ƀơi grê kơdrưh kơang Ñu, ƀing gih amra dô̌ mơn ƀơi pluh dua bôh grê đah mơ phat kơđi kơ pluh dua kơnung djuai Israel. Hlơi pô lui hǐ sang ñu, adơi ayong amai, amǐ ama, ană bă, ƀôdah đang hmua, yua kơ Anan Kâo, pô anun amra čơkă hă rơtuh wot lu hloh hăng hmâo tơlơi hơdip hlong lar kar kông ngan. Samơ̌ hmâo lu pô hlâo amra jing rơnuč, hăng ƀing pô rơnuč amra jing hlâo".
ANUN HIĂP KHUA ADAI BIĂ!

16/08/2026

===Ơn Biết Từ Bỏ
===Bưng Thâo Lui Hǐ
HIĂP ADAI HRƠI SA GUANG TƠJUH XX AMĂNG THǓN ĐĂO(Mt 19, 16-22)
TƠLƠI MƠAK KLĂ YÊSU KRISTÔ KHUA TUI MATTHÊÔ PÔ MƠYANG
Hăng anai hmâo sa čô rai bưp Yêsu hăng lăi: "Ơ Nai, hơgơt bruă hiam kâo ngă kiang kơ hmâo tơlơi hơdip hlong lar?" Samơ̌ Yêsu lăi kơ pô anun: "Yua hơgơt ih tơña Kâo bôh tơhơnal kơ tơlơi hiam? Pô Hiam hmâo kơnong kơ sa čô đuč. Tơdah ih kiang kơ mǔt amăng tơlơi hơdip, djă bě dum mơta tơlơi phian pơtă bruă pơtan. Pô anun lăi kơ Yêsu: "Tơlơi hơgơt anun lě?" Yêsu lăi: "Anăm pơdjai mơnuih, anăm hơgao akǒ, anăm klě dop, anăm ngă gǒng ƀlor. Pơpǔ bě kơ amǐ ama ih, hăng khăp bě kơ gop ih kar ih pô". Tơdăm anun lăi dơng kơ Yêsu: "Dum tơlơi anun kâo djă laih, hơgơt kâo kơƀah dơng? Yêsu lăi kơ pô anun: "Tơdah ih kiang jing hiam klă djop djel, nao hăng sǐ bě dum gơnam ih hmâo, pơpha bě kơ ƀing rin, hăng ih amra hmâo kông ngan yôm amăng Dêh Čar Pơtao Adai, laih anun rai tui Kâo bě. Laih hmư̌ dum tơlơi anun, pô anun đuăi, bơngot, yua kơ ñu hmâo lu kông ngan.
ANUN HIĂP KHUA ADAI BIĂ!

15/08/2026

===Có Đức Tin Mạnh
===Hmâo Pran Đăo Gưt Kơtang
HIĂP ADAI HRƠI KHUA TAL XX AMĂNG THǓN ĐĂO (Mt 15, 21-28)
TƠLƠI MƠAK KLĂ YÊSU KRISTÔ KHUA TUI MATTHÊÔ PÔ MƠYANG
Tơbiă mơng anun, Yêsu nao pơ kual Tyr hăng Sidon. Anai hmâo sa čô đah kơmơi čar Kanaan tơbiă mơng kual anun, ur kơtang hăng lăi kơ Yêsu: "Ơ Khua, ană Đawit, pap mơñai kơ kâo đa! Yang ngă tơnap đơi kơ ană dra kâo!" Samơ Yêsu ƀu lăi glăi ha bôh ôh. Ƀing juat tui rai jĕ hăng kơwưh Ñu: "Ih brơi ñu nao bĕ yua kơ ñu ur nanao tui tlon ƀing ta". Yêsu lăi glăi: "Kâo tǔ pơđar nao kơnong kơ ƀing triu rơngiă amăng sang Israel đuč". Bơnai anun rai kơkuh kơ Yêsu hăng lăi: "Ơ Khua, gum brơi kâo đa!" Yêsu lăi glăi: "Ƀu hiam ôh mă ƀañ ƀing mơmuai, dlom brơi kơ asâo". Ƀơyă anun lăi dơng: "Djơ̆, ơ Khua, samơ̆ asâo dui ƀong aru djah lĕ mơng grê pô sang". Hơnŭn Yêsu lăi glăi kơ bơnai anun: "Ơ mô̆, prong biă pran jua ih đăo gưt! jing bĕ tui ih kiang!" Mơng mông anun ană dra ñu suaih laih.
ANUN HIĂP KHUA ADAI BIĂ!

Cộng Đoàn Dòng Chúa Cứu Thế Plei Ku - Hiăp Hơdip Hlong Lar

25/08/2026

24/08/2026

23/08/2026

22/08/2026

20/08/2026

19/08/2026

18/08/2026

17/08/2026

16/08/2026

15/08/2026

Address

Website

Alerts

Shortcuts

Share

Category

Listing takedown request