https://www.facebook.com/112044706926515/

Cộng Đoàn Dòng Chúa Cứu Thế Plei Ku - Hiăp Hơdip Hlong Lar, Gia Lai (2026)

24/05/2026

===Đức Maria Mẹ Hội Thánh
===Amǐ Maria Amǐ Khul Jơnum Mơyang
HIĂP ADAI HRƠI SA GUANG TƠJUH HRƠI TAL VIII AMĂNG THǓN ĐĂO (Yn 19, 25-34)
PÔ MƠYUN H'MARIA DRA HƠČIH, AMǏ KHUL JƠNUM MƠYANG. HRƠI HƠDOR.
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG
Dô̌ jě ƀơi kơyâo bơrơkal Yêsu, hmâo Amǐ Ñu, Maria bơnai Klôpa, hăng Maria Magdala. Ƀuh Amǐ Ñu, Yêsu lăi:
- "Ơ Ƀa, anai ană Ih!"
Laih anun Ñu lăi dơng hăng pô juat tui:
- "Anai Amǐ ih!"
Mơng anun, pô juat tui tǔ laih Amǐ Yêsu pơ sang ñu.
Laih anun, Yêsu thâo kran tǔ tă anai giong abih tih laih, kiang kơ pơgiong Hră Hiăp Adai, Ñu lăi: "Kâo mơhao kơ ia!" Hmâo sa get bă kơ ia mơsăm pioh ƀơi anun, arang mă apung dian añrǔ mơsah ia mơsăm, čǔt ƀơi hơjung g*i hyssop, yong đǐ truh pơ mơbah Yêsu. Laih liah ia mơ săm, Yêsu lăi: "Giong abih laih!" Laih anun, kup akǒ, Ñu jao Jua.
Yua kơ djơ̌ Hrơi Pơprăp, ƀu kiang ôh lui drơi ƀing pô djai dô̌ ƀơi kơyâo bơrơkal lơm Hrơi Sabbat - Hrơi Sabbat anun jing sa hrơi yôm biă mă - hơnǔn ƀing Yudaiô rơkâo Pilatô brơi taih pơčah tơlang thung ƀing pô anun hăng mă trun gơñu. Hơnǔn ƀing tơhan nao taih pơčah tơlang thung pô tal sa hơbit hăng pô anun arang pǒng laih ƀơi kơyâo bơrơkal ha wot hrom tôm Yêsu. Truh pơ Yêsu, gơñu ƀuh Ñu djai laih, hơnǔn gơñu ƀu taih pơčah tơlang thung Ñu tah. Samơ̌ sa čô amăng ƀing tơhan mă tơbak tlâ̌o ƀơi djeo Yêsu, drah hăng ia ƀlě mơtam.
Anun Hiăp Khua Adai Biă!

23/05/2026

===Hoa Trái Thần Khí
===Bôh Troh Jua Adai
HIĂP ADAI HRƠI KHUA JUA ADAI TRUN RAI (Yn 20, 19-23)
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG.
Tơ tlam hrơi anun mơn, hrơi tal sa amăng sa wot hrơi tơjuh, amăng krư̌ khǒp ƀơi anih ƀing juat tui dô̌, yua kơ huǐ kơ ƀing Yudaiô; Yêsu rai laih, ding dǒng tong krah gơñu hăng lăi: "Rơnuk rơnua kơ gih!" Laih lăi anun, Ñu brơi kơ gơñu ƀuh tơngan hăng djeo Ñu. Ƀuh Khua, ƀing juat tui tlao hok. Ha wot dơng, Ñu lăi kơ gơñu: "Rơnuk rơnua kơ gih! Kar hăng Ama pơđar laih Kâo, Kâo pơđar gih mơn!" Laih lăi anun, Ñu bluh ƀơi gơñu hăng lăi kơ gơñu: "Čơkă bě Jua Mơyang. Gih lui tơlơi soh sat kơ hlơi, jing lui yơh, gih djă pioh tơlơi soh sat kơ hlơi, jing djă pioh yơh!"
ANUN HIĂP KHUA ADAI BIĂ!

22/05/2026

===Sống Chứng Nhân
===Hơdip Ngă Gǒng
HIĂP ADAI HRƠI NĂM GUANG TƠJUH VII PASKHA (Yn 21, 20-25)
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG
Pêtrô wir glăi ƀuh pô juat tui Yêsu khăp, glak tui tlon, pô ah ƀơi tơda Yêsu lơm ƀong huă tlam hăng lăi: "Ơ Khua, hlơi amra jao ba Ih". Hơnǔn Pêtrô ƀuh pô anun, tơña Yêsu: "Ơ Khua, hyưm pô anai?" Yêsu lăi kơ ñu: "Plă Kâo kiang kơ ñu dô̌ truh pơ hrơi Kâo rai, hơgơt djơ̌ kơ ih! Kan kơ ih, tui Kâo bě!" Hơnǔn hmâo tơlơi pơhmư̌ hing amăng ƀing adơi ayong: pô juat tui anun ƀu djai ôh. Samơ̌ Yêsu ƀu lăi ôh hăng Pêtrô: pô juat tui anun ƀu djai ôh, samơ̌: "Plă Kâo kiang kơ ñu dô̌ tơl truh pơ hrơi Kâo rai, hơgơt djơ̌ kơ ih"! Pô juat tui anun ngă gǒng kơ dum tơlơi anun, hăng čih laih, hăng ƀing gơmơi thâo kran sit biă tơlơi ñu ngă gǒng. Dô̌ lu tơlơi pơkon dơng, Yêsu ngă laih, tơdah čih glăi rim tơlơi, kâo mǐn lǒn tơnah ƀu djop ôh anih pioh dum hơdrôm hră čih anun.
ANUN HIĂP KHUA ADAI BIĂ!

21/05/2026

===Yêu Thương Chăm Sóc
===Kiang Khăp Wai Dlăng
HIĂP ADAI HRƠI RƠMA AMĂNG GUANG TƠJUH TAL VII PASKHA (Yn 21, 15-19)
PÔ MƠYANG RITA CACIA, DRA PƠKÔM.
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG
Laih gơñu ƀong huă, Yêsu lăi kơ Simon Pơtâo: "Simon, ană Yohan, ih khăp kơ Kâo hloh kơ ƀing anai mơ̆?" Ñu lăi glăi kơ Yêsu: "Ơ̆, ơ Khua, Ih thâo kâo khăp kơ Ih". Yêsu lăi kơ ñu: "Čem bĕ ană triu Kâo!" Tal dua Yêsu lăi kơ ñu: "Simon, ană Yohan, ih kiang mơ̆ kơ Kâo?" Ñu lăi kơ Yêsu: "Ơ̆, ơ Khua, Ih thâo kâo khăp kơ Ih". Yêsu lăi kơ ñu: "Kiă wai bĕ triu Kâo!" Tal tlâo, Yêsu lăi kơ ñu: "Simon, ană Yohan, ih kiang mơ̆ kơ Kâo?" Simon Pơtâo bơngot, yua kơ Yêsu lăi laih truh pơ tal tlâo: Ih khăp mơ̆ kơ Kâo; hơnŭn ñu lăi kơ Yêsu: "Ơ Khua, Ih thâo abih, Ih kran kâo khăp kơ Ih!" Yêsu lăi kơ ñu: "Čem bĕ khul ană triu Kâo!"
Sit biă, sit biă, Kâo lăi kơ ih: Lơm ih dô̆ čơđai, ih hrăng hơdrang ih pô hăng nao pơpă ih kiang: Samơ̆ tơ ih jing tha, ih amra dăng tơngan, hăng pô pơkon amra hrăng hơdrăng brơi kơ ih, hăng ba pơ anih ih ƀu kiang ôh".
Yêsu pơhiăp anun kiang lăi hyưm Pêtrô amra djai đah mơ pơư pơang kơ Khua Yang Adai. Laih lăi anun, Yêsu lăi kơ ñu: "Tui Kâo bĕ!"
ANUN HIĂP KHUA ADAI BIĂ!

20/05/2026

===Hiệp Thông Nên Một
===Mǔt Hrom Jing Ha Sa
HIĂP ADAI HRƠI PĂ GUANG TƠJUH TAL VII BƠYAN PASKHA (Yn 17, 20-26)
PÔ MƠYANG CHRISTÔPHÔRÔ MAGALLANES, DK, HĂNG GOP DJAI NGĂ GǑNG KƠ ĐĂO.
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG.
Kâo ƀu iâo lăi kơnong kơ gơñu đuč ôh, samơ̌ kơ ƀing pô amra đăo gưt kơ Kâo yua mơng hiăp gơñu dơng, kiang kơ abih gơñu jing ha sa, kar hăng, ơ Ama, Ih dô̌ amăng Kâo, hăng Kâo dô̌ amăng Ih, kiang kơ gơñu dô̌ amăng Ƀing Ta, hăng lǒn tơnah đăo gưt Ih pơđar laih Kâo. Kâo brơi laih kơ gơñu tơlơi ư ang Ih brơi laih kơ Kâo kiang kơ gơñu jing ha sa kar hăng Ƀing Ta jing ha sa: Kâo amăng gơñu hăng Ih amăng Kâo, kiang kơ gơñu jing ha sa biă mă, đah mơ lǒn tơnah thâo kran Ih pơđar laih Kâo, Ih khăp laih kơ gơñu, kar hăng Ih khăp laih kơ Kâo. Ơ Ama, Kâo kiang kơ ƀing pô Ih brơi laih kơ Kâo, pơpă Kâo dô̌, gơñu dô̌ ƀơi anun mơn tôm Kâo kiang kơ gơñu dui lăng tơlơi ư ang Kâo, tơlơi ư ang Ih brơi laih kơ Kâo, yuadah Ih khăp laih kơ Kâo hlâo kơ hrưh pơjing rơngit lǒn. Ơ Ama tơpă, lǒn tơnah ƀu thâo Ih ôh, samơ̌ Kâo thâo Ih, hăng ƀing anai thâo laih mơn Ih pơđar laih Kâo. Hăng Kâo pơthâo laih Anan Ih kơ gơñu, hăng amra pơthâo dơng, kiang kơ pran Ih khăp kơ Kâo, dô̌ amăng gơñu, hăng Kâo dô̌ amăng gơñu!"
Anun Hiăp Khua Adai Biă!

19/05/2026

===Lời Cầu Hiệp Nhất
===Iâo Lăi Mǔt Hrom
HIĂP ADAI HRƠI TLÂO GUANG TƠJUH VII PASKHA (Yn 17, 11b-19)
PÔ MƠYANG BERNARĐINÔ SIÊNA, DK.
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG
Ơ Ama mơyang, wai lăng bě gơñu amăng Anan Ih brơi laih kơ Kâo, kiang kơ gơñu jing ha sa kar hăng Ƀing Ta. Lơm Kâo dô̌ tôm gơñu, Kâo wai lăng laih gơñu amăng Anan Ih brơi laih kơ Kâo. Kâo wai lăng laih gơñu, hăng ƀu hmâo hlơi ôh amăng ƀing gơñu rơngiă hǐ, kơnong kơ sa čô ană ram, đah mơ pơgiong Hră Hiăp Adai. Samơ̌ ră anai Kâo nao pơ Ih, hăng Kâo lăi anun ƀơi lǒn tơnah, kiang kơ tơlơi mơak Kâo jing giong amăng gơñu. Kâo brơi laih hiăp Ih kơ gơñu, yua anun lǒn tơnah areh laih kơ gơñu, yua kơ gơñu ƀu djơ̌ mơng lǒn tơnah ôh kar hăng Kâo ƀu djơ̌ mơng lǒn tơnah lơi. Kâo ƀu rơkâo ôh Ih mă hǐ gơñu mơng lǒn tơnah, samơ̌ rơkâo Ih pơgang gơñu mơng Pô Sat. Gơñu ƀu djơ̌ mơng lǒn tơnah ôh, kar hăng Kâo ƀu djơ̌ mơng lǒn tơnah lơi. Rơkâo Ih pơmơyang gơñu amăng tơlơi sit: hiăp Ih jing tơlơi sit. Kar hăng Ih pơđar laih Kâo pơ lǒn tơnah, Kâo pơđar gơñu pơ lǒn tơnah mơn. Hăng yua kơ gơñu, Kâo pơmơyang Kâo Pô, kiang kơ gơñu jing mơyang amăng tơlơi sit.
ANUN HIĂP KHUA ADAI BIĂ!

18/05/2026

===Giờ Chúa Được Tôn Vinh
===Mông Khua Tǔ Tơlơi Pơư Pơang
HIĂP ADAI HRƠI DUA GUANG TƠJUH VII PASKHA (Yn 17, 1-11a)
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG
Laih lăi anun, Yêsu angak mơta pơ adai hăng lăi: "Ơ Ama, truh mông laih! Pơư pơang bě kơ Ană Ih, đah mơ Ană pơư pơang kơ Ih mơn! Kar hăng Ama brơi laih kơ Ană kơdrưh ƀơi djop mơnuih mơnam, kiang kơ Ană brơi tơlơi hơdip hlong lar kơ djop ƀing pô Ama brơi laih kơ Ană. Tơlơi hơdip hlong lar či lăi: gơñu thâo kran Ih: Khua Yang Adai sit biă kơnong ha čô, hăng Yêsu Kristô Pô Ih pơđar laih. Kâo pơư pơang laih kơ Ih ƀơi lǒn, pơgiong laih bruă Ih jao brơi kơ Kâo ngă. Hăng tǔ tă anai, rơkâo Ih pơư pơang bě kơ Kâo tôm Ih, hăng tơlơi kơdrưh kơang Kâo hmâo laih tôm Ih hlâo kơ jing rơngit lǒn. Kâo pơrơđah laih Anan Ih kơ ƀing mơnuih Ih brơi laih kơ Kâo mơng lǒn tơnah. Gơñu jing kơ Ih yơh, Ih brơi laih gơñu kơ Kâo, hăng gơñu djă laih hiăp Ih. Tǔ tă anai gơñu thâo kran laih: djop tơlơi Ih brơi laih kơ Kâo, rai mơng Ih abih; yua kơ dum hiăp Ih brơi laih kơ Kâo, Kâo brơi laih kơ gơñu, gơñu čơkă laih, hăng gơñu thâo sit Kâo tơbiă mơng Ih, gơñu đăo gưt laih mơn Ih pơđar laih Kâo. Kâo iâo lăi brơi kơ gơñu, Kâo ƀu iâo lăi brơi kơ lǒn tơnah ôh, samơ̌ kơ ƀing pô Ih brơi laih kơ Kâo, yua kơ gơñu jing kơ Ih yơh. Djop tơlơi Kâo jing tơlơi Ih, hăng tơlơi Ih jing tơlơi Kâo, hăng ư ang laih kơ Kâo ƀơi gơñu. Kâo ƀu dô̌ tah ƀơi lǒn tơnah, samơ̌ gơñu dô̌ ƀơi lǒn tơnah. Hăng Kâo, Kâo nao pơ Ih.
ANUN HIĂP KHUA ADAI BIĂ!

17/05/2026

===Cậy Trông Nơi Chúa
===Hơin Ƀơi Khua Adai
HIĂP ADAI HRƠI SA GUANG TƠJUH VII PASKHA (Yn 16, 29-33)
PÔ MƠYANG YOHAN I, AKP, DJAI NGĂ GǑNG KƠ ĐĂO.
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG
Ƀing juat tui Yêsu lăi: "Čơ̌! Ră anai Ih pơhiăp rơđah mơtam, ƀu pơhiăp tang puang wang dlai dơng tah! Ră anai ƀing gơmơi thâo: Ih thâo kran djop mơta, hăng Ih ahuăi kiang kơ arang tơña Ih ôh. Yua anun, gơmơi đăo gưt: Ih tơbiă mơng Khua Yang Adai". Yêsu lăi glăi kơ gơñu: "Ră anai gih đăo gưt hă? Anai amra truh mông - hăng gơ̌ truh laih - gih amra bơčơlah bru bra, pha pô pha nao, lui hǐ Kâo dô̌ ha jan. Samơ̌ Kâo ƀu dô̌ ha jan ôh, yua kơ hmâo Ama dô̌ tôm Kâo. Dum tơlơi anun, Kâo lăi laih kơ gih, kiang kơ gih dô̌ rơnuk rơnua amăng Kâo. Ƀơi lǒn tơnah, gih amra añ kơ tơnap. Samơ̌ hơin bě! Dui Kâo laih kơ lǒn tơnah!"
ANUN HIĂP KHUA ADAI BIĂ!

15/05/2026

===Một Lòng Tin Yêu
===Sa Pran Jua Đăo Gưt Kiang Khăp
HIĂP ADAI HRƠI NĂM GUANG TƠJUH TAL VI PASKHA (Yn 16, 23a-28)
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG.
Lơm hrơi anun, gih ƀu tơña hơgơt hơgơt kơ Kâo dơng tah.
Sit biă, sit biă, Kâo lăi kơ gih: Hơgơt hơgơt gih amra rơkâo Ama amăng Anan Kâo, Ñu amra brơi. Truh pơ ka ne, gih ƀu rơkâo hơgơt hơgơt ôh amăng Anan Kâo. Rơkâo bě, gih amra čơkă, kiang kơ tơlơi mơak gih jing giong. Dum tơlơi anun, Kâo pơhiăp tang puang wang dlai kơ gih, amra truh mông, Kâo ƀu pơhiăp tang puang wang dlai kơ gih dơng tah, samơ̌ Kâo amra ruai rơđah kơ gih bôh tơhơnal kơ Ama. Lơm hrơi anun, gih amra rơkâo amăng Anan Kâo, hăng Kâo ƀu lăi ôh kơ gih: Kâo Pô amra kơwưh Ama brơi kơ gih; yuadah Ama khăp kơ gih, yua kơ gih khăp laih kơ Kâo, hăng đăo gưt laih: Kâo tơbiă mơng Khua Yang Adai. Kâo tơbiă laih mơng Ama hăng rai laih ƀơi lǒn tơnah; ră anai Kâo lui lǒn tơnah đah mơ nao pơ Ama".
ANUN HIĂP KHUA ADAI BIĂ!

08/05/2026

===Thế Gian và Môn Đệ
===Lǒn Tơnah hăng Ƀing Juat Tui
HIĂP ADAI HRƠI NĂM GUANG TƠJUH TAL V PASKHA (Yn 15, 18-21)
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG.
"Tơdah lǒn tơnah areh kơ gih, gih kran bě: ñu ereh laih kơ Kâo hlâo kơ gih. Tơdah gih mơng lǒn tơnah, lǒn tơnah khăp laih anô̌ ñu pô, ƀiădah yua kơ gih ƀu djơ̌ mơng lǒn tơnah ôh, samơ̌ yua kơ Kâo ruah mă laih gih mơng lǒn tơnah, yua anun lǒn tơnah areh kơ gih. Hơdor bě kơ hiăp Kâo lăi laih hăng gih: Hlun ƀu prong hlôh ôh kơ khua ñu! Tơdah gơñu kơpǐ kơpet Kâo laih, gơñu amra kơpǐ kơpet gih mơn; Tơdah gơñu djă hiăp Kâo laih, gơñu amra djă hiăp gih mơn. Samơ̌ dum tơlơi anun, arang amra ngă kơ gih yua kơ Anan Kâo, kơyuadah gơñu ƀu thâo ôh Pô pơđar laih Kâo.
ANUN HIĂP KHUA ADAI BIĂ!

06/05/2026

===Hiệp Thông Nên Một
===Mǔt Hrom Jing Ha Sa
HIĂP ADAI HRƠI PĂ GUANG TƠJUH V PASKHA (Yn 15, 9-11)
TƠLƠI MƠAK KLĂ YÊSU KRISTÔ KHUA TUI YOHAN PÔ MƠYANG.
"Kar hăng Ama khăp laih kơ Kâo, Kâo khăp laih kơ ƀing gih. Gih dô̌ bě amăng pran khăp Kâo. Plă gih djă dum tơlơi Kâo pơtan, gih amra dô̌ amăng pran khăp Kâo, kar hăng Kâo djă laih mơn dum tơlơi Ama Kâo pơtan, hăng Kâo dô̌ amăng pran khăp Ñu. Dum tơlơi anun, Kâo lăi laih kơ gih, kiang kơ tơlơi mơak Kâo dô̌ ƀơi gih, hăng kiang kơ tơlơi mơak gih jing bă blai.
ANUN HIĂP KHUA ADAI BIĂ!

Cộng Đoàn Dòng Chúa Cứu Thế Plei Ku - Hiăp Hơdip Hlong Lar

24/05/2026

23/05/2026

22/05/2026

21/05/2026

20/05/2026

19/05/2026

18/05/2026

17/05/2026

15/05/2026

08/05/2026

06/05/2026

Address

Website

Alerts

Shortcuts

Share

Category