Lub nroog Hanoi yaav thaus u lug txug rua naj nub nwg nuav yeej yog teb chaws Nyaablaaj lub tuamceeb nroog. Naj nub nua Hanoi yog lub tuam ceeb nroog hab yog nroog luj nyob nruab nraab cov xeev saab qaum teb huv teb chaws Nyaablaaj. Yog lub nroog luj kws Moob nyam tuaj kawm txuj kawm ci hab ua laag ua luam vim nyob tsi dleb ntawm cov zog Hmoob. Peb cov thawjcoj pawg ntseeg ib txwm tau tuaj kawm
paub Vaajtswv txuj lus nyob huv lub nroog nuav. Nuav yog lub chaw rua Moob sib ntsib, sib cuag hab tshwj xeeb yog lub chaw kawm txhua phab rau Moob Nyaablaaj. Kev kawm txawj ntse txhua yaam muaj nyob huv lub nroog nuav ua rua peb cov tub txhais Moob tau taug kev nqeg saum roob sab tuaj kawm ntawv hab nrhiav num ua huv lub nroog nuav coob zuj zug. Kuv tau siv sijhawm peb lub xyoo tuaj tshuaj xyuas lub nroog nuav, kuv kwv yeeg tau has tas nwg nuav muaj Moob nyob huv lub nroog nuav le ntawm 1,400 leej. Feem coob yog cov hluas uas tuaj kawm ntawv qeb siab. Hos nyob le ntawm cov ntseeg Vajtswv lawd mas muaj qho tug xwb. Moob Nyob Hanoi Kev Cheem Tsum
Muab saib lug rua peb cov Moob tau ob peb lub xyoo nua kuj muaj cov Moob tuaj kawm ntawv qeb sab hab nrhav num ua rua huv nroog Hanoi nuav coob zuj zug tuaj nwg nuav cov tub kawm nyob rua Hanoi kws yog Moob nkaus muaj kwv laam le 1400 tug cov ntseeg hab cov tsi ntseeg huv si. Nwg nua cov ntseeg tseem tsawg heev muaj le 30 tawm leej xwb, yog le ntawd peb teg num kws yuav qha Vaajtswv rua cov tub ntxhais hluas Moob nua yog yaam cheem tsum hab yuav ceev. Nuav yog ib lub sijhawm zoo rau peb kev ua Vaajtswv dlej num moog dleb dlaav tshaaj yaav taag lug. Yog le ntawd peb txha npaaj muaj ib lub chaw lug rua cov tub ntxhais hluas Moob ntseeg tuaj sib koom ua ke pehawm Vaajtswv lug sib paab, tsi taag le ntawd nwg yuav ua lub chaw rua peb cov tub ntxhais hluas Moob kawm ntawv tsi tau ntseeg tuaj koom hab lug ntseeg. Peb lub hom phaj luj yog coj kuas tau puab lug ntseeg Yexus. Peb Lub Zeem Muag
Thaum kuv pum has tas Moob tuaj nyob huv lub nroog nuav coob zuj zug hab tsuag muaj yuav tuaj coob ntxiv xwb, ib qho hab mas yog Moob tsi tau paub Vaajtswv. Vaajtswv tau tshoov lub sab kuas hlub cov Moob kws tuaj nyob huv lub nroog nuav. Kuv txha le xaav tshaajtawm Txuj Moo Zoo hab coj puab lug ntseeg Vaajtswv. Ib hnub tom ntej puab coob lawm ces yuav tsaa kuas tau ua pawg ntseeg. Kuv twb yeej nqeg teg ua lug lawm ntaub lub hli (txij 8hli 14 xyoo 2011 lug). Kuv pum has tas yog ua tag tag moog yeej yuav tsaa tau pawg ntseeg xwb xwb le. Kuv txha le teeb kuv lub zeem muag ca le nrag qaab nuav:
A. (10 xyoo tom ntej yog Hauv Paug Koom Hum Moob Nyaab Laaj Teb) Thaus hu tas Hauv Paug Koom Hum Moob Nyaab Laaj teb yog thaus taab meeg tshwm npe rua num tswv hab lub teb lub chaw txug txhua yaam nua.
- Ntawm npe lug Nyaab Laaj yuav tau luj zuj zus. Xyoo 2011-2012 hu Ban Sinh Viên Tin Lành H’mông – xyoo 2012-2014, Nhóm Sinh Viên Tin Lành H,mông Hà Nội – xyoo 2014-2018, Hội Nhánh Tin Lành H’mông Hà Nội – xyoo 2018-2021 , Hội Thánh Tin Lành H’mông Hà Nội, txij xyoo 2021 moog yog Tổng Hội Thánh Tin Lành H’mông Việtnam. Qhov lub npe yuav hloov zuj zus no vim yuav tau ua raws li txoj kev txoj cai nyob rau lub tebchaws thiab lub koom haum nyab laj. Pawgntseeg tes hauj lwm: Sib Hlub, Sib Koom, Tshwm Ntaub Ntawv, Cob Qha, Tshaaj Tawm hab Tsim Tsaa Pawgntseeg. Lub chaw yuav tsaa pawg ntseeg:
- Nwg nuav yog: số 2 Ngõ Trạm, Hà Nội. (tseem qiv ib lub chaw ntawm pawgntseeg nyaab laaj Hà Nội lug pehawm, tabsis yuav siv tsi tau ntev, vim nqaim heev.)
- Thaaj chaw yuav ndlav tsev tshab yuav nyob rua: 123 Cầu giấy, Hà Nội. C. Vim le caag ho tsaa pawgntseeg Ha Noi?
1. Lug ntawm Tswv Yexus lu lug saam fwm tseg thaus nws yuav rov moog sau ntuj ntawm Mathais 28:19-20.
2. Lug ntawm qhov yog Vaajtswv tus mivnyuas hab lub sab kws ib txwm yog tug coj cov ntseeg lug tau 10 lub xyoo, kuv nov has tas huv kuv lub sab muaj ib lub suab los yog ib qhov kev xaav ntsoov hab txuj kev npau suav kuas peb muaj ib pawgntseeg Moob nyob nrug luas rau huv nroog luj, ntawm kuv tug kheej kuv xaav tas nuav yog Vaajtswv lub suab hu.
3. Lug ntawm txuj kev npau suav xaav ntsoov hab ntshaw kuas muaj lub koom hum Moob ntseeg Yexus nyob Nyaab Laaj teb. Ntshaw kuas Moob Nyaab Laaj muaj lub chaw zis, kuas Moob tsis raug kev haub ntxag ntxiv lawm, kuas Moob paub Vaajtswv zoo dlua hab nyob ze Vaajtswv tshaaj nuav. Ntshaw kuas peb cov ntseeg tsis txhob muaj kev faib ua paab ua pawg tshwj xeeb yog cov pawg ntseeg Moob Nyaaj Laaj. Ntshaw kuas peb cov ntseeg Moob Nyaab Laaj ua tau ntau yam pub rau Vaajtswv ib yaam le ntau lub pawgntseeg txhua qhov hab.
4. Lug ntawm qhov kws cov tub kawm Moob coob le 1000 tawm leej nuav tsi tau paub txug Vaajtswv hab tsi tau txais txuj kev cawm dlim. Nuav yog ua le Tswv Yexus lu lug saam fwm tseg. Cov kws kuv has lug sau nuav ua rua kuv pum has tas cheem tsum muaj pawgntseeg nyob Hanoi yuav tsum tshwm sim muaj. D. Lub homphaj rua pawgntseeg.
1. Kuas cov tub kawm kws ntseeg Vaajtswv tuaj nyob huv nroog nua muaj lub chaw pehawm txha tsi tso Vaajtswv tseg.
2. Kuas cov tub kawm kws tsi tau ntseeg, tsi tau paub txug Vaajtswv tau txais txuj kev cawm dlim.
3. Kuas peb Moob Nyaab Laaj ntseeg Yexus muaj lub chaw lug sib zig ua ke, sib paab, sib txhawb zug, sib kawm, sib raug zoo hab lug koom ua ke lug ua Vaajtswv dlejnum.
4. Kuas peb cov ntseeg Moob Nyab Laaj lug koom ua ib pawg ntawm peb lub npe Moob txawm koj yuav nyob paab twg pawg twg, koom yaam tsi txhum kev txhum cai. E. Txheej txheem tsim tsa pawgntseeg.
1. Coj cov tub kawm ntawv kws nyob huv Hanoi nua lug ua ib ke pehawm Vaajtswv. Cob qha rau txhua tug kuas yog ib tug tub tshaaj tawm. Muab faib tsheej pawg moog tshaaj tawm. Thaus cob qha tau zoo lawd, maam tso cov nua moog.
2. Ib hlis peb npaaj ua ib lub koom txoos, nuav yog thaaj chaw rua peb ua phoojywg nrug cov tsi tau paub Vaajtswv los yog tsi tau ntseeg, peb yuav caw luas tuaj koom peb qhov nuav ua ntej, thaus dhau qhov nuav es yog phoojywg lawm peb maam le moog ntsib hab ua tim khawv rua kuas lug ntseeg. Lub koom txoos nua qha tas yog cov ntseeg caw, taabsis tsi yog thaam txug kev ntseeg, nuav yog thaam txug kev khwv noj khwv haus huv tsev neeg Moob, kev kws yog ib tug Moob yuav coj li cas, Moob lub neej yuav tsum tau hloov li caag, nuav yog tug choj peb tuam kuas coj tau puab lug ntseeg. Thaus tuaj peb maam rau puab tej npe ca hab tug xuv tooj ca es txha yuav ntsib tau puab yooj yim.
3. Thaus muaj cov lug ntseeg tshab, peb yuav tau cob qha kuas puab muaj peev xwm tshaaj tawm, kuas puab yog ib tug tub tshaaj tawm hab tsim tsaa pawgntseeg ua ntej puab yuav tawm tsev kawm rov moog tsev, thaus puab moog txug tsev puab yuav moog tsim pawg ntseeg rua puab lub zog, peb maam txhawb paub.
4. Npaaj kev cob qha rua peb cov thawj coj kws tsi tau txais kev kawm hlo le hab caw puab tuaj kawm kuas txawj rov moog coj pawgntseeg. Cob qha cov ntseeg tshab hab cov tub tshaaj tawm Txujmoo Zoo, tsawg kawg yog ib hlis ib zag.
5. Caw cov thawj coj kws ib txwm ua dlej num lawd tuaj koom kev saab laaj hab nqua hu txhua tug lug koom teg.
6. Peb yuav npaaj kev cob qha txhua phaab, kws zoo rua tsev neeg Moob, tshwj xeeb yog kev ntseeg hab kev ua Vaajtswv dlej num.
7. Npaaj txhais tej ntaub ntawv kws cov ntseeg tsi muaj siv, hab muab xaa rau cov pawgntseeg (puab yuav tau them tus nqi luam). F. Yaam kws peb yuav raug npaaj.
1. Muaj ib chaav tsev txaus le 20 -30 tug tuaj koom ua ke. Ib lub tsev hab muaj le 3 chaav, ib chaav rau ntaub ntawv hab lwm yaam yuav siv, chaw ua num, ib chaav ua chaw pehawm hab ib chaav rua tug sawv cev ua lub chaw nyob, le nuav yog xaub mas yuav raug nyaj le 500 USD ib hlis. (Nwg nuav tsis tau muaj neeg coob thiab tsis muaj neeg pab peb qiv chaw ua los tau hab peb tub taab tom qev lawm).
2. Muaj ob lub computer hab ib lub luam ntawv yog yaam tsawg. Ib lub tso huv chaav ua num, hab ib lub nqaa taug kev thaus ua num saab nrau.
3. Muaj tug thawjcoj, muaj cov lug paab khov khov. Peb tub muaj 6 tug lug coj lawm. (cov nua kawm tav Vaajlugkub MA; MSc yog 1 tug, BA muaj 2 tug nrug rua cov tub kawm ntawv qeb sab hab cov uas ua num ntau xyoo lug lawm).
4. Thov kev tso cai ntawm num tswv. (Kev thov num tswv peb muaj tug ua num huv koom hum xaa Txuj Moo Zoo Nyaablaaj qaum teb, hab nwg yuav yog tug nreg ntawm koom hum sawv cev lug has). Koom hum tub leeg rau peb hab pub peb muaj sijhawm lug nyob ua ke lawm, hab peb tub pehawm tau ntau lub Athiv lawm. Tamsim no peb cov ntseeg muaj 29 tug tuaj koom ua ke lawm. G. Thawj coj lub luag num txhua nub/ txhua lub limtam:
1. Pehawm Vajtwv ib athiv ib zag: Peb muaj kev pehawm Vaajtswv, kev kawm Vaajlukub, kev hu nkauj, hab ua tej yaam rua nub ib. Muaj kev sib thaam, sib paab rau nub nua.
2. Muaj kev sib thaam ib athiv ib zag: Kev sib thaam nua, yog kev sib cog tswv yim, kev nug hab pab dlaws tej teeb meem kev xaav. Sib tham txug kev yuav tsim tsa peb pawg nua moog le caag? Hab muaj yaam dlaab tsi kws peb yuav raug khu dlua tshab, muaj leej twg kws cheem tsum kev paab, peb cov tuab neeg kev nyob noj le caag?
3. Moog ncig saib yug cov tuab neeg; Peb yuav muaj ib paab yog paab saib xyuas, paab nua yuav tau moog ncig saib cov kws tseg lub puav thiv tsis pum tuaj koom, tuaj pehawm hu xuv tooj los yog email nug puab xuv.
4. Paab cov tub kawm txom nyem: Yog muaj cov tub kawm txom nyem puab paab tsi cuag ncua peb yuav tau nrhav kev paab cuam puab.
5. Paab saib thaus puab muaj mob: Peb yuav tau saib lag, yog muaj tug raug mob raug nkeeg ces peb yuav tau paab puab le peb paab tau, vim cov tub kawm nua nyob dleb vaaj dleb tsev puab cheem tsum kev paab.
6. Taw qha lub neej tom ntej: Peb sib thaam qha rua peb cov tuab neeg txug kev kws peb moob yuav hloov lub neej, yuav ua lub neej le caag kuas lawv le lub teb lub chaw.
