12/06/2025
ਉੱਤਰੀ ਕੈਲੇਫੋਰਨੀਆ ਦੇ ਗੁਰਦੁਆਰਿਆਂ ਵੱਲੋਂ ਸ਼੍ਰੀ ਗੁਰੂ ਤੇਗ਼ ਬਹਾਦਰ ਜੀ ਦੀ 350ਵੀਂ ਸ਼ਹੀਦੀ ਸ਼ਤਾਬਦੀ ਫਰੀਮਾਂਟ ਵਿਖੇ ਮਨਾਈ ਗਈ
ਫਰੀਮਾਂਟ, 30 ਨਵੰਬਰ 2025
ਸ਼੍ਰੀ ਗੁਰੂ ਤੇਗ਼ ਬਹਾਦਰ ਜੀ ਦੀ ਸ਼ਹੀਦੀ ਦੇ 350ਵੇਂ ਪਵਿੱਤਰ ਪੁਰਬ ਵੇਲ਼ੇ ਕੈਲੇਫੋਰਨੀਆ ਦੇ ਗੁਰਦੁਆਰਿਆਂ ਵਲੋਂ ਗੁਰਦੁਆਰਾ ਸਾਹਿਬ ਫਰੀਮਾਂਟ ਵਿਖੇ ਇੱਕ ਵਿਸ਼ੇਸ਼ ਸਮਾਗਮ ਕੀਤਾ ਗਿਆ।
ਅਲੱਗ ਅਲੱਗ ਬੁਲਾਰਿਆਂ ਨੇ ਆਪਣੀਆਂ ਤਕਰੀਰਾਂ ਵਿੱਚ ਸ਼੍ਰੀ ਗੁਰੂ ਤੇਗ਼ ਬਹਾਦਰ ਜੀ ਸੰਸਾਰ ਇਤਿਹਾਸ ਦੇ ਪਹਿਲੇ ਧਾਰਮਿਕ ਮਹਾਨ ਗੁਰੂ ਹਨ ਜਿਨ੍ਹਾਂ ਨੇ ਸਰਬ-ਧਾਰਮਿਕ ਆਜ਼ਾਦੀ ਦੀ ਰੱਖਿਆ ਲਈ, ਨਿਰਦੋਸ਼ਾਂ ਦੇ ਹੱਕ ਅਤੇ ਨਿਆਂ ਲਈ, ਆਪਣੀ ਜਾਨ ਨਿਛਾਵਰ ਕਰ ਦੇਣ ਦਾ ਵਰਨਣ ਕੀਤਾ। ਉਨ੍ਹਾਂ ਦੀ ਅਤੁਟ ਕੁਰਬਾਨੀ ਮਨੁੱਖਤਾ ਨੂੰ ਹੌਸਲੇ, ਸੱਚਾਈ ਅਤੇ ਵਿਸ਼ਵ ਮਨੁੱਖੀ ਅਧਿਕਾਰਾਂ ਵੱਲ ਮਾਰਗਦਰਸ਼ਨ ਕਰਦੀ ਰਹਿੰਦੀ ਹੈ।
ਸਮਾਗਮ ਤੋਂ ਬਾਅਦ ਗੁਰਦੁਆਰਾ ਪ੍ਰਬੰਧਕ ਕਮੇਟੀਆਂ ਦੇ ਨੁਮਾਇੰਦਿਆਂ ਨੇ ਅਮਰੀਕਾ ਵਿੱਚ ਚਲ ਰਹੀਆਂ ਵੱਖ-ਵੱਖ ਚੁਣੌਤੀਆਂ ਅਤੇ ਮੁੱਦਿਆਂ ਬਾਰੇ ਮੀਟਿੰਗ ਕਰਕੇ ਹੇਠ ਲਿਖੇ ਪ੍ਰਸਤਾਵ ਪਾਸ ਕੀਤੇ:
ਗੁਰਦੁਆਰਾ ਸਾਹਿਬਾਨ ਸਿੱਖ ਕੌਮ ਦੀ ਨੁਮਾਇੰਦਗੀ ਕਰਨ ਵਾਲੀਆਂ ਧਰਾਤਲ ਨਾਲ ਜੁੜੀਆਂ ਸੰਸਥਾਵਾਂ ਹਨ ਅਤੇ ਅਸੀਂ ਹਰ ਕਿਸਮ ਦੀ ਗੈਂਗਸਟਰਵਾਦੀ ਗਤੀਵਿਧੀਆਂ — ਜਿਵੇਂ ਹਿੰਸਾ, ਧਮਕੀਆਂ, ਜਬਰ-ਵਸੂਲੀ, ਅਗਵਾ, ਨਸ਼ਾ ਤਸਕਰੀ ਜਾਂ ਫਰਾਰ ਅਪਰਾਧ ਦੀ ਸਖ਼ਤੀ ਨਾਲ ਨਿੰਦਾ ਕਰਦੇ ਹਾਂ, ਭਾਵੇਂ ਉਹ ਸਿੱਖ ਕੌਮ ਦੇ ਕਿਸੇ ਵਿਅਕਤੀ ਵੱਲੋਂ ਹੋਣ ਜਾਂ ਕਿਸੇ ਹੋਰ ਭਾਈਚਾਰੇ ਵੱਲੋਂ ਇਹ ਨਿੰਦਣਯੋਗ ਹਨ।
ਅਜੇਹੀਆਂ ਕਾਰਵਾਈਆਂ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਸਿਧਾਂਤਾਂ ਦੇ ਬਿਲਕੁਲ ਵਿਰੁੱਧ ਹਨ, ਜਿੱਥੇ ਸਚ, ਦਇਆ, ਨਿਮਰਤਾ ਅਤੇ ਸ਼ਾਂਤੀ ਨਾਲ ਜੀਵਨ ਜੀਊਣ ਦੀ ਪ੍ਰੇਰਣਾ ਦਿੱਤੀ ਗਈ ਹੈ। ਸਿੱਖ ਧਰਮ ਕਿਸੇ ਵੀ ਕਿਸਮ ਦੀ ਨਫਰਤ, ਅਨਿਆਂ ਜਾਂ ਦੂਜੇ ਨੂੰ ਨੁਕਸਾਨ ਪਹੁੰਚਾਉਣ ਨੂੰ ਕਦੇ ਵੀ ਬਰਦਾਸ਼ਤ ਨਹੀਂ ਕਰਦਾ। ਇਸਲਈ ਗਲਤ ਅਨਸਰਾਂ ਦੀ ਮਦਦ ਕਰਣ ਵਾਲੇ ਲੋਕਾਂ ਨੂੰ ਵੀ ਇਸ ਤੋਂ ਕਿਨਾਰਾ ਕਰਣ ਦੀ ਬੇਨਤੀ ਕੀਤੀ ਗਈ ਕਿਉਂ ਕਿ ਇਹ ਸੱਭ ਕੁੱਝ ਵਿਦੇਸ਼ਾਂ ਵਿੱਚ ਸਿੱਖਾਂ ਨੂੰ ਬਦਨਾਮ ਕਰਣ ਦੀ ਇੱਕ ਸੋਚੀ-ਸਮਝੀ ਚਾਲ ਹੈ ਜਿਸ ਵਿੱਚ ਭਾਰਤ ਸਰਕਾਰ ਸਿੱਧੇ ਰੂਪ ਵਿੱਚ ਸ਼ਾਮਿਲ ਹੈ।
ਗੁਰਦੁਆਰਾ ਸਾਹਿਬ ਨੌਜਵਾਨਾਂ ਅਤੇ ਸਾਰੀ ਸੰਗਤ ਨੂੰ ਪ੍ਰੇਰਿਤ ਕਰਦੇ ਹਨ ਕਿ ਉਹ ਸਾਡੇ ਗੁਰੂਆਂ ਦੀ ਸਿੱਖਿਆ ਅਨੁਸਾਰ ਨੇਕੀ, ਸਿੱਖਿਆ ਅਤੇ ਇਮਾਨਦਾਰ ਜੀਵਨ (ਕਿਰਤ ਕਰਨੀ) ਦੇ ਰਸਤੇ ‘ਤੇ ਚੱਲਣ। ਅਸੀਂ ਪਰਿਵਾਰਾਂ, ਬਜ਼ੁਰਗਾਂ ਅਤੇ ਭਾਈਚਾਰੇ ਦੀਆਂ ਸੰਸਥਾਵਾਂ ਨੂੰ ਬੇਨਤੀ ਕਰਦੇ ਹਾਂ ਕਿ ਉਹ ਨੌਜਵਾਨਾਂ ਨੂੰ ਨਾਸ਼ਨੁਮਾਈ ਪ੍ਰਭਾਵਾਂ ਤੋਂ ਬਚਾ ਕੇ, ਚੰਗੇ, ਆਧਿਆਤਮਿਕ ਅਤੇ ਰਚਨਾਤਮਕ ਜੀਵਨ ਵੱਲ ਪ੍ਰੇਰਿਤ ਕਰਨ।
ਮੀਟਿੰਗ ਵਿੱਚ ਪੱਛਮੀ ਤੱਟ (ਵੈਸਟ ਕੋਸਟ) ਦੇ ਗੁਰਦੁਆਰਿਆਂ ਨੂੰ ਬੇਨਤੀ ਕੀਤੀ ਗਈ ਕਿ ਸਾਰੇ ਰਲ ਕੇ ਵੈਸਟ ਕੋਸਟ ਕਮੇਟੀ ਨੂੰ ਸੰਗਠਿਤ ਕਰਣ ਦਾ ਉਪਰਾਲਾ ਕਰਣ ਤਾਂ ਜੋ ਪੰਥ ਨੂੰ ਦਰਪੇਸ਼ ਮੁਸ਼ਕਲਾਂ ਅਤੇ ਨੌਜਵਾਨਾਂ ਨੂੰ ਗਲਤ ਰਾਹਾਂ ਤੇ ਭਟਕਣ ਤੋਂ ਬਚਾਇਆ ਜਾ ਸਕੇ।
ਸਮਾਗਮ ਨੂੰ ਸੰਜੀਦਾ ਢੰਗ ਨਾਲ ਨੇਪਰੇ ਚਾੜਣ ਲਈ ਭਾਈ ਜਸਵਿੰਦਰ ਸਿੰਘ ਜੰਡੀ ਨੇ ਭਾਈ ਤਰਸੇਮ ਸਿੰਘ ਟਲੇਰੀ, ਹਰਨੇਕ ਸਿੰਘ ਅਟਵਾਲ ਸਟਾਕਟਨ, ਚਰਨਜੀਤ ਸਿੰਘ ਸਮਰਾ ਐਲ ਸੋਬਰਾਂਟੇ, ਭਾਈ ਜਸਵੰਤ ਸਿੰਘ ਹੋਠੀ ਏਜੀਪੀਸੀ, ਭਾਈ ਮਨਜੀਤ ਸਿੰਘ ਸਿੱਖ ਫੈਡਰੇਸ਼ਨ ਅਤੇ ਡਾਕਟਰ ਪ੍ਰਿਤਪਾਲ ਸਿੰਘ ਦਾ ਧੰਨਵਾਦ ਕੀਤਾ। ਪੰਜਾਬੀ ਰੇਡੀਓ ਯੂ ਐਸ ਏ ਵਲੋਂ ਪੰਥਕ ਸੇਵਾ ਦੀ ਵੀ ਪੁਰਜੋਰ ਸ਼ਲਾਆ ਕੀਤੀ ਗਈ, ਉਹਨਾਂ ਵਲੋਂ ਨਿਘੜਕ ਹੋ ਕੇ ਸਿੱਖ ਮੁੱਦਿਆਂ ਤੇ ਪਹਿਰਾ ਦੇਣ ਲਈ ਧੰਨਵਾਦ ਵੀ ਕੀਤਾ ਗਿਆ
