Esther Duréus

10/07/2026

Lè ou pran Bondye oserye, ou kòmanse konprann jan Li menm Li pran pawòl ou oserye.

Pèsonèlman, mwen toujou di moun ki pwòch mwen: pa pale anpil, oswa renmen plenyen, paske gen yon moman kote zòrèy mwen ka vin abitye ak bri a, epi lè ou gen yon bagay serye pou w di, zòrèy mwen gentan fèmen. Mwen vin pa pran anyen w ap di oserye.

Bondye pa tankou nou. Li pa fatige tande pitit Li yo, e Bib la menm ankouraje nou pou nou pèsevere nan lapriyè, men gen yon prensip mwen aprann nan pwòp relasyon mwen avèk Bondye; plis entimite mwen avèk Li ap grandi, se plis mwen aprann bay pawòl mwen pwa nan prezans Li.

Mwen pa oblije pote chak emosyon devan Li kòm yon demann pou Li egzekite. Gen bagay mwen depoze. Gen bagay mwen mande. E gen lòt bagay mwen aprann soumèt anba volonte Li.

Paske lè relasyon an ap vin pi fon, lapriyè pa sèlman vin yon lis bagay ou vle Bondye fè. Lapriyè vin tounen yon konvèsasyon ki fèt nan entimite.

E se nan entimite sa a ou kòmanse dekouvri pafwa se pa menm yon gwo priyè ou bezwen fè. Pafwa se yon fraz. Yon ti pawòl. Yon dezi ou eksprime dousman nan prezans Li.

Sa gen anviwon de mwa, pandan mwen t ap pale, mwen te mansyone yon bagay mwen ta renmen wè rive nan mwa Oktòb la. Mwen pa t konnen kijan sa t ap fèt. Mwen pa t konnen ki chemen Bondye t ap itilize. Mwen te senpleman eksprime sa ki te nan kè mwen.

E jodi a, mwen te kapab finalize bagay mwen te jis di devan Bondye a.

Premye reyaksyon mwen se pa sèlman selebre sa mwen resevwa a. Se reverans, paske mwen sonje pawòl la. Mwen sonje moman an. Mwen sonje sa mwen te di a. E jodi a, mwen kanpe devan reyalite a.

Gen eksperyans avèk Bondye ki pa sèlman fè w kontan; yo fè w koube devan Èt Siprèm sa a. Yo raple w ke ou pa poukont ou. Yo fè w vin pi konsyan de prezans Bondye nan detay lavi w.

Eksperyans sa yo anseye m yon lòt bagay tou, se pa paske mwen mande yon bagay Bondye oblije fè li. Entimite avèk Bondye pa vle di mwen kontwole volonte Li. Okontrè, plis mwen konnen Li, se plis mwen vle sa mwen mande yo antre nan liy ak sa Li vle pou mwen.

Jezi te di: “Si nou rete nan mwen, epi pawòl mwen yo rete nan nou, mande sa nou vle, y ap fè l pou nou.” — Jan 15:7

Se la diferans lan ye: rete nan Li.

Lè ou rete nan Li, dezi w kòmanse chanje. Lapriyè w kòmanse chanje. Sa ou mande kòmanse pase anba limyè volonte Li. Ou pa sèlman ap chèche men Bondye; ou ap chèche kè Bondye.

10/06/2026

DEVOSYON: Lè Bondye Pa Chanje Reyalite Ki Antoure W La

Pafwa, paske nou pa ka wè Bondye ak je nou, nou gen difikilte pou nou kwè toutbon nan sa Li kapab fè. Nou konnen Li egziste. Nou konnen Li gen pouvwa. Nou konnen Li kapab, men lè lavi vin difisil, nou gen tandans kòmanse doute sou sa pouvwa Li vle di pou nou pèsonèlman. Nou kwè Li kapab delivre, men lè sitiyasyon an pa chanje, nou kòmanse mande, Bondye, kote Ou ye?

Prezans Bondye pa mezire selon vitès sikonstans nou chanje.

Pafwa Li pa chanje; Li ogmante. Li pa chanje reyalite ki antoure nou an touswit; olye de sa, Li ogmante gras nou bezwen pou nou kontinye kanpe ladan l. Pòl te aprann sa lè Bondye te di li, “Gras mwen sifi pou ou, paske se nan feblès pouvwa mwen manifeste nèt.” (2 Korent 12:9). Gras pa vle di nou nye difikilte a. Gras se fòs Bondye mete disponib pou nou nan mitan difikilte a.

Pafwa Li pa retire; Li renouvle. Nou ka ap mande Bondye pou Li fini ak yon sezon, pandan Bondye ap ban nou nouvo fòs pou nou kontinye travèse l. Ezayi 40:31 di moun ki mete espwa yo nan SENYÈ a ap renouvle fòs yo. Gade mo renouvle a byen. Bondye konnen fòs yè a ka pa sifi pou chay jodi a, se poutèt sa Li bay fòs ankò. Sezon an ka poko chanje, men ou pa p travèse l poukont ou, ni san fòs Bondye.

E pafwa Li pa montre ; Li pwoteje. Nou remèsye Bondye pou danje nou te wè epi nou te chape anba yo, men konbyen fwa nou remèsye Li pou danje nou pa t janm konnen ki te la? Gen bagay ki pa janm rive jwenn nou, plan ki pa janm reyisi kont nou, chemen nou pa janm pran, ak sitiyasyon Bondye te prezève nou ladan yo an silans.

Danyèl 3 montre nou Bondye pa t anpeche twa jèn Ebre yo antre nan founèz la. Men lè wa a gade nan dife a, li wè yon lòt prezans k ap mache avèk yo (Danyèl 3:24–25). Dife a te toujou la, men Bondye te la tou.

Petèt se pawòl sa a yon moun bezwen jodi a: pa mezire prezans Bondye sèlman ak sa Li retire nan lavi w.

Gade tou sa Li ogmante.
Gade sa Li renouvle.
Gade sa Li prezève an silans.

Pafwa mirak la se pa paske Bondye chanje tout sa ki antoure w. Pafwa mirak la se paske tout sa ki antoure w te kapab detwi w, men gras Bondye fè ou toujou kanpe.

10/05/2026

Gen ekspresyon doulè ki pap janm rive nan bouch nou. Yo rete antere nan kè nou, nanm nou trete yo an silans, oswa nou pote yo byen fon anndan nou, men, sa nanm nan ap pote yo toujou jwenn yon fason pou yo pale; nan reyaksyon nou, nan distans nou pran, nan dlo nan je nou, nan desizyon nou, e pafwa menm nan fòs nou.

Se poutèt sa nou dwe fè anpil atansyon pou nou pa pran silans yon moun pou gerizon. Nou tout pa trete doulè menm jan. Gen moun ki kriye devan moun; gen lòt ki kriye an kachèt. Gen moun ki pale; gen lòt ki fèmen sou tèt yo. Gen moun ki kontinye sèvi, souri, travay, epi pran swen tout moun pandan y ap senyen anndan yo an silans.

David te konnen kalite doulè sa yo. Li te di, “Mwen bouke ap plenn; tout nwit mwen wouze kabann mwen ak dlo nan je mwen.” (Sòm 6:6). David te yon vanyan sòlda, yon wa, men Bib la pa kache blesi emosyonèl li yo. Li te kriye. Li te poze kesyon. Li te plenn. Sa ki pi enpòtan an, li te pote doulè li devan Bondye.

Jòb te pote yon doulè ki te tèlman fon, li te rive di,“Nanm mwen bouke ak lavi mwen.” (Jòb 10:1). Ana, li menm, te pote lapenn li tèlman an silans ke pandan li t ap priye, bouch li t ap bouje, men okenn son pa t soti. Eli te mal entèprete li, paske li fasil pou moun mal entèprete yon doulè an silans lè yo pa ka wè sa k ap pase nan kè a (1 Samyèl 1:10–16).

Menm Jezi, nan Jetsemani, pa t kache gwo lapenn Li. Li te di, “Nanm mwen tris anpil.” (Matye 26:38). Bib la pa janm prezante fòs tankou absans doulè. Pafwa, fòs se kouraj pou rekonèt blesi a epi pote l devan Bondye kanmenm.

Gerizon, donk, se pa fè kòmsi sa ki te fè nou mal la pa gen enpòtans ankò. Gerizon se kite Bondye antre nan kote doulè a ap viv an silans.

Jodia, si w ap pote yon doulè ou pa janm rive esplike, yon doulè ou pa gen mo pou dekri, sonje sa, Bondye tande menm sa bouch ou pa ka di. Li wè dlo nan je ki pa janm koule, Li konnen blesi ou aprann kache, epi Li konprann batay w ap mennen an silans. Pa kite doulè a fè w kwè istwa w fini la. Sa ki blese w la pa defini w. Bondye kapab antre nan kote ki pi fon nan nanm ou, touche sa pèsonn pa ka wè, epi fè gerizon kòmanse kote mo pa ka rive. Kontinye mache. Kontinye kwè. Kontinye espere. Ou ka toujou ap geri pandan w ap avanse. E menm si jodi a doulè a toujou la, sa pa vle di demen w pap pote yon lòt temwayaj.

Gen blesi ki pa fè bri, men pa gen blesi ki twò fon pou gras Bondye rive ladan l.

— Esther Duréus

10/03/2026

10/02/2026

Men jan yon bon grenn kapab plante nan yon move anviwònman epi li gen difikilte pou l pwodwi, yon moun kapab nan yon trè bon anviwònman epi li pa yon bon grenn, lè sa pwoblèm nan se pa tè a, men grenn nan.

Souvan, nou blame anviwònman an nou pou tout bagay. Pafwa, se vre, anviwònman an ka pa bon. Move relasyon, move lidèchip, move kilti, oswa mank opòtinite kapab anpeche yon moun grandi. Wi, menm yon bon grenn bezwen bon tè, dlo, limyè ak swen pou l devlope.

Men nou dwe gen ase konsyans tou pou nou poze kesyon sa a, E si fwa sa a, se pa anviwònman an ki pwoblèm nan? E si se yon bagay nan mwen ki bezwen chanje?

Ou kapab mete yon moun nan mitan opòtinite, men li refize aprann.

Ou kapab mete resous nan men yon moun, men li pa ka byen jere yo.

Ou kapab antoure yon moun ak moun ki gen sajès, men li refize resevwa konsèy.

Ou kapab louvri yon pòt pou yon moun, men li antre ladan l ak menm mantalite destriktif ki te kenbe l mare nan ansyen anviwònman an.

Yon pi bon anviwònman pa otomatikman korije yon move mantalite.

Parabòl Jezi sou moun k ap simen an fè nou sonje tou ke pou gen fwi, kondisyon kote grenn nan tonbe a enpòtan (Matye 13:1–23). Se pa sèlman prezans nan yon bon kote ki garanti pwodiksyon.

Pafwa nou priye:

“Bondye, chanje peyi a.” Men Bondye ap di, “Anvan m chanje peyi a, Mwen vle transfòme mantalite yo.”

Si kondisyon anndan nou pa chanje, nou kapab antre nan yon nouvo anviwònman epi, apre yon tan, nou repwodui menm modèl nou te kite dèyè yo.

Se pa tè a ki bezwen chanje, men moun k ap viv sou li yo.

10/01/2026

Jodi a Bondye ban mwen yon lòt temwayaj ankò.

Youn nan bagay m ap aprann nan Bondye, se ke pafwa Li mande w fè yon bagay san w pa konnen poukisa. Mwen jis obeyi, epi yon fason oswa yon lòt, Bondye toujou gen yon fason pou L di, “Mèsi.”

Jodi a, mwen fin ekri sou elevasyon ak pwomosyon. Bondye mete de pos mwen ekri jodia sou kè mwen depi Madi pou m poste. Yè mwen pa t fè sa. Jodia, mwen poste sa Bondye te vle m ekri a, epi apremidi a, mwen resevwa yon apèl mwen pa t atann. Se yon òf. Youn nan kesyon konpayi sa poze m se senpleman, “Nou wè kalifikasyon w, konbyen ou vle nou peye w?” Mwen bay yo kondisyon ki bon pou mwen an. M’ap jis di Bondye Mèsi!

Mwen toujou di sa, mwen se yon Jonas, men ki yon fanm. Bondye voye m Niniv, men!!!.

Menm pandan semèn sa a, plizyè fwa mwen te prèske fèmen paj sa a. Men chak fwa mwen rive nan pwen sa a, gen yon bagay ki toujou pale pi fò nan lespri m: “al ekri sa.”