26/08/2026
တစ်ယောက်အားမှ အများအားသို့
*******************************
တစ်ယောက်တည်း အားမဖြစ်၊
စုပေါင်းမှ အားဖြစ်၏။
တစ်ယောက်အားနဲ့ ကူမနိုင်၊
အများအားဖြင့် ကူသော်နိုင်။
တစ်ယောက်တစ်လက် ဝိုင်းကာကူ၊
တစ်ယောက်တစ်အား ပေါင်းကာပြု။
အားငယ်ငယ်တွေ စုမိသောအခါ၊
အားကြီးတစ်ခု ဖြစ်လာပါ။
တစ်ယောက်က ဆန်၊ တစ်ယောက်က ရေ၊
တစ်ယောက်က လုပ်အား ကူညီပေး။
တစ်ယောက်က လှေ၊ တစ်ယောက်က လက်၊
ဒုက္ခရောက်ရာ အတူတက်။
ငွေနည်းလို့ အားမငယ်နဲ့၊
ပစ္စည်းနည်းလို့ နောက်မဆုတ်နဲ့။
ပေးနိုင်သမျှ တစ်ခုစီ၊
ပေါင်းလိုက်သောအခါ များလာပြီ။
ရေတစ်ဘူးလည်း အားတစ်ခု၊
ဆန်တစ်ပြည်လည်း အားတစ်ခု။
လုပ်အားတစ်လက်လည်း အားတစ်ခု၊
မေတ္တာတစ်စက်လည်း အားတစ်ခု။
မုန်တိုင်းကြီးလည်း တို့မကြောက်၊
ရေဘေးကြီးလည်း တို့ရင်ဆိုင်။
တစ်ယောက်တည်းဆို မနိုင်ပေမယ့်၊
လက်ချင်းဆက်ရင် ကျော်လွှားနိုင်။
တစ်ဖက်က ရေတွေ တက်လာလျှင်၊
တစ်ဖက်က မေတ္တာ တက်လာစေ။
ရေတွေ ဘယ်လောက် မြင့်မြင့်တက်၊
တို့မေတ္တာလက် ပိုမြင့်ဆက်။
တစ်အိမ်ဒုက္ခ တစ်ရွာကူ၊
တစ်ရွာဒုက္ခ တစ်မြို့ကူ။
တစ်မြို့ဒုက္ခ ပြည်သူကူ၊
ပြည်သူ့ဒုက္ခ — ဒို့ဒုက္ခဟူ။
လူတိုင်း သူဌေး ဖြစ်ဖို့မလို၊
လူတိုင်း ငွေများ ရှိဖို့မလို။
ရှိတာလေးထဲ ဖဲ့ကာပေး၊
တတ်တာလေးနဲ့ ဝိုင်းကာကယ်။
သူက ရှေ့က လမ်းဖောက်မယ်၊
ကိုယ်က နောက်က အားဖြည့်မယ်။
သူပင်ပန်းရင် ကိုယ်ဝင်ထမ်း၊
ကိုယ်မနိုင်ရင် သူဝင်ထမ်း။
လက်တစ်ဖက်နဲ့ မတင်နိုင်၊
လက်များစုပေါင်း တင်လို့နိုင်။
ခြေတစ်လှမ်းနဲ့ မရောက်နိုင်၊
ခြေလှမ်းများရင် ခရီးတိုင်။
“ငါတစ်ယောက်နဲ့ ဘာဖြစ်မှာလဲ”
လို့တော့ ဘယ်ခါ မတွေးနဲ့။
တစ်စက်တစ်စက် စုသောအခါ၊
မြစ်ကြီးပင်လယ် ဖြစ်လာတာ။
တစ်ယောက်ပေးတဲ့ မေတ္တာလက်၊
နောက်တစ်ယောက်က ဆက်ကာဆက်။
လက်မှလက်သို့ အားတွေကူး၊
ဒုက္ခရောက်သူ မျက်ရည်သုတ်။
ရေကြီးလို့ အိမ်တွေမြုပ်၊
မိုးသည်းလို့ လမ်းတွေပျောက်။
လမ်းပျောက်လည်း မေတ္တာမပျောက်၊
လှေမရောက်လည်း လက်ကရောက်။
တစ်ယောက်တည်းနဲ့ မကယ်နိုင်၊
အများစုပေါင်း ကယ်လို့နိုင်။
တစ်ယောက်တည်းနဲ့ မထမ်းနိုင်၊
အများလက်နဲ့ ထမ်းလို့နိုင်။
အင်အားဆိုတာ ငွေမဟုတ်၊
အင်အားဆိုတာ လူမဟုတ်။
တစ်စိတ်တည်းနဲ့ လက်ချင်းဆက်၊
အဲဒါ အကြီးဆုံး အင်အားစစ်။
ရေဘေးရှိရာ တို့သွားမယ်၊
လိုအပ်ရာကို တို့ဖြည့်မယ်။
နိုင်သလောက်နဲ့ ဝိုင်းကာကူ၊
မေတ္တာအားနဲ့ အတူပြု။
တစ်ယောက်တည်း အားမဖြစ်၊
စုပေါင်းမှ အားဖြစ်၏။
တစ်ယောက်အားနဲ့ ကူမနိုင်၊
အများအားဖြင့် ကူသော်နိုင်။
တစ်ယောက်တစ်လက်၊ တစ်ယောက်တစ်အား၊
စုပေါင်းလိုက်တော့ အင်အားများ။
ရေဘေးဘယ်လောက် ကြီးပါစေ—
မေတ္တာအားနဲ့ ကျော်ကြမလေ။ 🙏🌊
ဘုန်းသီ (၂၆.၈.၂၀၂၆)
