03/02/2026
Dardaaran ku Socda Dhalinyarada Soomaaliyeed.
Dhalinyarooy, inaku waxaynu nahay laf-dhabarta maanta iyo rajada berrito.
Ummad aan dhalinyaro wacyi leh lahayn, ma leh mustaqbal la hubo.
Sidaas awgeed, waxaan idiin jeedinayaa dardaaran ka soo burqanaya qalbi daacad ah, kana tarjumaya masuuliyadda ina saaran.
Marka h**e, ilaaliya diinteenna.
Diintu waa iftiinka hagaya nolosha qofka iyo tan bulshada.
Waa tiirka sharafka, akhlaaqda, iyo cadaaladda.
Ku dheganaada cibaadada, barashada diinta, iyo ku dhaqankeeda.
Ka fogaada xagjirnimo iyo dayac labadaba, waayo diintu waa naxariis, iyo xikmad.
Marka labaad, aynu ilaalinno dalkeenna.
Dalkeenu waa hoygeena waa dhulkii aynu ku barbaarnay, kuna leenahay taariikh iyo dhaqan.
Difaaca dalku ma aha oo keliya hub qaadasho, ee waa ilaalinta midnimada, nabadda, sharciga, iyo ka shaqaynta horumarkiisa.
Ha noqonina kuwo burburiya, balse noqda kuwo dhisa, wax ku dara, oo u taagan horumar waara.
Marka saddexaad, ilaaliya dadka.
Dadku waa hantida ugu qaalisan ee ummad leedahay.
U naxariista waayeelka, u hiiliya ka tamarta yar, una noqda tusaale wanaagsan jiilasha soo socda.
Ka fogaada dulmi, qabyaalad, iyo nacayb.
Ku dadaala wada noolaansho, is-ixtiraam, iyo walaaltinimo.
Dhalinyarooy, ogaada in ficilkiinna maanta uu sawirayo mustaqbalka berri.
Ha yareysanina doorkiinna.
Haddii aad saxdaan, ummaddu way toosi doontaa; haddii aad dayacdaan, cawaaqib xumo ayaa iman doonta.
Ugu dambayn, noqda dhalinyaro diintooda ku faanta, dalkooda jecel, dadkoodana u adeegta.
Taasi waa sharaf, taasi waa guul, taasi waa badbaado.
Ilaahay ha ina waafajiyo waddada toosan, hana inaga dhigo kuwo dalkooda, diintooda, iyo dadkooda anfaca.
Eng Hanuuniye
