05/09/2026
#ဝတ်ပြုခြင်းအစီအစဉ်ဟာ ဘယ်လိုရှိသင့်သလဲ။
- ဒီကနေ့ အသင်းတော်များစွာမှာ ဝတ်ပြုခြင်းအစီအစဉ်ကို ပေါ့ပေါ့တန်တန် ဖြစ်သလိုလုပ်ဆောင်လာကြတယ်။
- အချို့အသင်းတော်တွေရဲ့ ဝတ်ပြုခြင်းအစီအစဉ်က အစဉ်အလာတစ်ခု ပုံစံအဖြစ်ပဲ လုပ်ဆောင်နေသလို၊ အချို့ကျတော့ လူတွေရဲ့ အိုင်ဒီယာတွေပေါ်မှာ အခြေခံပြီး လူ့အကြိုက်ပုံစံတွေနဲ့ အစီအစဉ်တကျမရှိဘဲ လုပ်ဆောင်လာကြတယ်။
- ထင်ရာမြင်ရာလျှောက်လုပ်တဲ့ ဝတ်ပြုတာတွေလည်း ဒီကနေ့ လိုင်းပေါ်မှာ များစွာတွေ့ရသလို၊ ဝတ်ပြုအစီအစဉ်တွေလည်းပဲ ရောက်တတ်ရာရာ ဖြစ်နေတာတွေ့ရပါတယ်။
- ဥပမာ - ဘုရားကို ဗဟိုမပြုဘဲ အခြားအရာတွေကိုပဲ အာရုံရောက်စေတဲ့ Music တွေ၊ ဖရိုဖရဲကခုန်တာတွေ၊ မှောက်လျက်လဲကျတာတွေ၊ အခြားသောဘာသာစကားပြောတာတွေ၊ ဝိညာဉ်တော်နဲ့မူးနေတာတွေ၊ ပရောဖက်ပြုတာတွေ … အစရှိသဖြင့် မျိုးစုံပါပဲ။
- ဝတ်ပြုတာဟာ ရိုးရိုးရှင်းရှင်းနဲ့ လွတ်လပ်စွာကိုးကွယ်ခွင့်ရှိတယ်ဆိုပေမယ့်၊ အစီအစဉ်တကျမရှိဘဲ ဖရိုဖရဲ ထင်ရာမြင်ရာ လျှောက်လုပ်လို့တော့ မရပါဘူး။
- ဒီနေရာမှာ အချို့အနေနဲ့ မေးခွန်းမေးစရာရှိနိုင်ပါတယ်။ “ဘုရားသခင်က တနင်္ဂနွေနေ့မှာ ပြုလုပ်ရမယ့် ဝတ်ပြုခြင်းအစီအစဉ်ကို အတိအကျ သတ်မှတ်ထားလို့လား” ဆိုပြီးတော့ပါ။
- “သတ်မှတ်ထားတာမရှိလို့ မိမိကြိုက်သလို ကိုးကွယ်မယ်၊ အဓိကလိုအပ်တာက စိတ်နှလုံးမှန်ကန်ဖို့ပဲ” ဆိုပြီး ပြောသူတွေလည်း ရှိကြမှာပါ။
- ဟုတ်ပါတယ်။ ဝတ်ပြုခြင်းအစီအစဉ်နဲ့ပတ်သက်ပြီး အတိအကျ သတ်မှတ်ထားတာတော့မရှိပါဘူး။ ဒါပေမယ့် “မိမိစိတ်ကြိုက် စီစဉ်ပြီး ကိုးကွယ်လို့ရတယ်” လို့လည်း မပြောထားပါဘူး။
- ဘာကြောင့်လဲဆိုတော့ “ဘုရားသခင်က သူ့ကိုကိုးကွယ်တဲ့အရာကို ဘယ်လိုရှိသင့်လဲဆိုတာ” သွန်သင်ထားလို့ပဲ ဖြစ်ပါတယ်။
- ဘုရားသခင်ကို ကိုးကွယ်တဲ့အခါ၊ “သန့်ရှင်းသောတန်ဆာကို ဆင်၍” (ဆာလံ ၂၉း၂)၊ “တင့်တယ်လျောက်ပတ်စွာ အစဉ်အတိုင်း စီရင်ကြလော့” (၁ကော ၁၄း၄၀) လို့ မိန့်ကြားထားပါတယ်။
- ဒီကျမ်းပိုဒ် ၂ ပိုဒ်မှာ သွန်သင်တာက “ဝတ်ပြုကိုးကွယ်ခြင်းဟာ သန့်ရှင်းခြင်းနှင့် တင့်တယ်လျောက်ပတ်စွာ အစဉ်အတိုင်း ဖြစ်ဖို့” သွန်သင်နေပါတယ်။
- ဘုရားသခင်က “ရုန်းရင်းခတ်သောအမှုကို ပြုစုတော်မမူ” တဲ့ (၁ကော ၁၄း၃၃)။ တနည်းအားဖြင့် ဘုရားသခင်ဟာ ရှုပ်ထွေးခြင်း၊ ဖရိုဖရဲဖြစ်စေတဲ့အရာကို စတင်တဲ့သူမဟုတ်ဘူး ဆိုလိုနေတာပါ။
- ဒါကြောင့် ဝတ်ပြုခြင်းအစီအစဉ်မှာ ပါဝင်တဲ့အရာတစ်ခုချင်းစီတိုင်းဟာ ဘုရားသခင်တစ်ပါးတည်းကိုသာ ဗဟိုပြုပြီး၊ ရိုသေခြင်းရှိစေဖို့အတွက် သမ္မာကျမ်းစာနှင့်အညီ ဂရုတစိုက် အစီအစဉ်တကျပြုလုပ်ဖို့ရန် လိုအပ်ပါတယ်။
- ဝတ်ပြုခြင်းအစီအစဉ်ဟာ လူတွေရဲ့ ဖန်တီးတီထွင်တဲ့ အိုင်ဒီယာကို အခြေခံပြီး၊ မိမိစိတ်ကြိုက် (သို့) လူ့အကြိုက်လုပ်ဆောင်ဖို့ လုံးဝမဟုတ်ဘူးဆိုတာကို ရေးသားဖော်ပြလိုက်ပါတယ်။
- ဒါဆိုရင် ဝတ်ပြုခြင်းကို ဘယ်လို အစီအစဉ်တကျပြင်ဆင်ကြမလဲ။
- To be continued:
In Christ,
Htin Htut
