Eritrean Orthodox Tewahedo Church - Diocese of Scandinavia & Finland

27/01/2026

ብደሓን ምጹ!

25/11/2025

ዜና ቅድስቲ ቤተ ክርስቲያን
ኣብ ሃገረ ሽወደን ኣብ ከተማ ሱንድስቫል ዓመታዊ ክብረ በዓል ደብረ ሰላም ቅዱስ ሚካኤል ትማሊ ቀዳም ዕለት 22 ሕዳር 2025 ብክብ ዝበለ ድምቀት ተኸቢሩ።
ወደየ ልብኻ ሃበኒ፡ ኣዕይንትኻ ድማ ብመንገደይ ባህ ይበለን ምሳ 23፡26 ብዝብል መሪሕ ቴማ ዓርቢ ዕለት 21 ሕዳር ብዋይዜማ ዝጀመረ ኣገልግሎት ከም ወትሩ ብዙሕ መንፈሳዊ መደባት ብምቕራብ ንነጋድያንን ንህዝቢ ከተማ ሱንድስቫልን መንፈሳዊ ስንቂ ኣስኒቁ።
ብጥዑምን ውሁድን ዋይዜማ ሊቃውንቲ ዝጀመረ መደብ ፡ ቀጺሉ እውን ብትምህርቲ ሰንበት ዝቐረበ ነቲ መንፈሳዊ በዓል ድምቀት ዝውስኽ መደባት ኣስተኣናጊዱ። ገለ ካብቲ መደባት ድማ ነዚ ዝስዕብ ይመስል፦ መንፈሳዊ ትምህርቲ፡ ዝተፈላለዩ ስነ ጽሑፋትን መዛሙርን ብመዘምራን፡ ናይ ምስጋና መደብ ንዝተመረቑ ሓደስቲ መራጊትን ኣቦታትን፡ መመረቕታ ቤተ ልሄም እተሰምየት ብሃገረ ስብከት ዝተዳለወት መጽሓፍ ህጻናት፡ መመረቕታን ሓበሬታን ሓድሽ ዲጂታላዊ መዝገብ ኣባላት ከምኡ እውን መመረቕታ እታ ዛጊት ክሳብ ሕጂ ልዕሊ 50 መጻሕፍቲ ቤተ ክርስትያን ሒዛ ናብ ኣገልግሎት ዝቐረበት Zetewahdo ዝተሰምየስ ኣፕሊኬሽንን ካልእ መደባትን ኣምስዮም። ሊቃውንቲ ኣቦታት ድማ ካብ ፍርቂ ለይቲ ክሳብ ሰዓት ሽዱሽተ ወጋሕታ፡ ብትግሃት ኣዕጽምቲ ዘጥልል ናይ ማህሌት ኣገልግሎት ኣቕሪቦም።
ብተወሳኺ ነቲ ክብረ በዓል ፍሉይ ድምቀት ዝሃበ ድማ ብጹእ ኣቡነ ኤፍሬም ናይ ትግራይ ኦርቶዶክስ ተዋህዶ ቤተክርስቲያን ጳጳስ ኣብ ሃገራት ኤውሮጳ ኣብቲ በዓል ሎሚ ንኻልኣይ ግዜ ምርካቦም እዩ።
ብጹእ ኣቡነ ኤፍሬም ኣብቲ ዕለት ንዓሰርተው ሓሙሽተ ደቂ ቤተ ክርስትያን መዓርገ ዲቁና ቀቢኦም። ብተወሳኺ ውን ንኽልተ ዲያቆናት መዓርገ ክህነት ሂቦም። ብጹእ ኣቡነ ኤፍሬም ቀጺሎም ቅዳሴ መሪሖም ስጋኡን ደሙን ንህዝቢ ድሕሪ ምቑራብ ነቲ ዕለት ዝምልከት ሰፊሕ ትምህርትን ኣባታዊ ማዕዳን ሂቦም።
ኣብዚ ትማሊ ዝተኸብረ ድሙቕ በዓል ተሳትፎ ህጻናት፡ መንእሰያት፡ ኣቦታት፡ ኣዴታት፡ ጎሊሑ ዝተራእየሉ ብምኳኑ ነዚ ኣመልኪቶም ድማ ነጋድያን ንኹሉ ግዜ ክቕጽልን ብትኹረት ክስረሓሉን ተላብዮም።
ኣምላኽና ከምዚ ንዓመታ ብሰላምን ብፍቕርን ከብጽሓና ቅዱስ ፍቓዱ ይኩነልና።

27/09/2025

ወግዓዊ መግለጺ
ኦርቶዶክስ ተዋህዶ ቤተክርስቲያን ኤርትራ ኣብ ስካንዲናቭያን ካልኦት ሃገራት ኖርድን

ክቡራት ኣቦታት ካህናት ኣሕዋት ዲያቆናት፣ ክቡራትን ክቡራንን ኣባላት ኮሚቴ ሃገረስብከትን ኣባላት ሰበኻ ጉባኤን፣ ዝተፈተኹም ኣብዚ ሃገረስብከትና እትምእከሉ ምእመናንን ምእመናትን ብሓፈሻ ኣብ ኩሉ ዓለም እትርከቡ ኣመንትን ተኸተልትን ኦርቶዶክስ ተዋህዶ ቤተክርስቲያን ኩሉኹምን። ኣቐዲምና ኣብዚ ናይ ፈተና እዋን ብሰላም ሓልዩ መምርሕን በረኸትን እናሃበ ክሳብ ሕጂ ብሰላም ዘጽንሓና ኩሉ ዝኽእል ልዑል ኣምላኽና ነመስግኖ።

ብምቕጻል ሃገረስብከትና ካብ ዝምስረት ኣትሒዙ ንሓያሎ ዓመታት ኣብ ትሕቲ መንፈሳዊ ጉስነት ብጹእ ኣቡነ ኣባኪር: ጳጳስ ናይ ኮፕቲክ ኦርቶዶክስ ቤተ-ክርስቲያን ኣብ ሃገራት ስካንዲናቭያ ከም ዝጸንሐ ዝፍለጥ እዩ። ብጹእ ኣቡነ ኣባኪር ኣብዚ ኩሉ ዓመታት ዝገበሩልና መንፈሳዊ ጉስነትን በረኸትን፣ ምስጋናና ብምግላጽ ምስኦም ዝነበረና መንፈሳዊ ጉስነት ተመሳጊና ብጽሑፍን ብሰነድን መዕለቢ ጌርናሉ ኣሎና ።

ምስዚ ተተሓሒዙ ኣብ ዝተፈላለየ ግዜን ቦታን ውሉደክህነትን ወከልቲ ህዝብን እናተራኸብና ምኽርን ጸሎትን ክንገብር ድሕሪ ምጽናሕ፣ ካብዚ ሒዝናዮ ዘለና ወርሒ መስከረም ጀሚርና ኣብ ትሕቲ መንፈሳዊ ጉስነት ብጹእ ኣቡነ ኤፍሬም ሊቀ ጳጳስ ኦርቶዶክሳዊት ቤተ-ክርስቲያን ትግራይ ኣብ ኤውሮጳ ኮይና መንፈሳዊ ተልእኾና ክንቅጽል ከም ዝወሰና ብሓጎስ ነበስረኩም። እዚ ውሳኔ እዚ እምነትናን ሓድነትናን ሓሊና ክነብርን ካብኡ ሓሊፉ ውን ከም ኦርቶዶክሳውያን መጠን እናተሓጋገዝና ክንዓብን መጻኢና ከነውሕስን ዝሕግዝ ኣገዳስን እዋኑ ዝጠልቦን ውሳኔ እዩ። ብጹእ ኣቦና ኤፍሬም ውን ኣብ ርእሲ እቲ ዘለዎም ሰፊሕ መንፈሳዊ ኣገልግሎት፣ ጸገምና ተረዲኦም ንዝሃቡና እወንታዊ መልሲ ብስም ሃገረስብከትና ልዑል ምስጋና ነቕርበሎም።

እዚ ብስራት እዚ ምስ ምእታው ሓድሽ ዓመትን ዮሃነሰ መስቀለን ዝመጽእ ዘሎ ብስራት እዩ እሞ ንህዝብና ዝጠቅምን ስም ኣምላኽ ዘኽብርን ክገብረልና ከም ወትሩ ጸሎትኩምን ደገፍኩምን ኣይፈለየና ንብል።

ብሩኽ ቅንያት ዮሃንስን ርሑስ በዓል መስቀልን ይግበረልና

ቤት ጽሕፈት ሃገረስብከት

ዕለት: 25-09-2025

06/07/2025

03/06/2025

ዓቢ ብስራት

ኣብ ሽወደን ከተማ ስቶክሆልም ኣብ ዝርከብ መንፈሳዊ ቤት ትምህርቲ ቅዱስ እግናጥዮስ ንልዕሊ ኣርባዕተ ዓመታት ኣቋቋም ክመሃሩ ዝጸንሑ ተማሃሮ ትምህርቶም ዛዚሞም ንምምራቕ በቒዖም ከምዘለዉ ብሓጎስ ነበስር። በዚ መሰረት ንቀዳም ዕለት 07/06/2025 ኣብ ሶደርተልየ ናይ መመረቕታ ፕሮግራም ተዳልዩ ስለ ዘሎ እቶም ዝጠዓመኩም ምሳና ክትውዕሉ ብኽብሪ ንዕድም።

መኣስ: ቀዳም ዕለት 07/06/2025

ሰዓት: 12:00-17:00

ቦታ: Mälaregatan 4 , 151 71 södertälje

ንተወሳኺ ሓበሬታ በዚ ደዊልኩም ተወከሱ

073 7683791, 0736891082, 0709675760, 0760745785, 072 0348762