22/07/2026
امریکی وزیر خارجہ مارکو روبیو کا کہنا ہے کہ ہم ایران کے ساتھ مذاکرات کیلئے تیار ہیں، جہاز رانی کی آزادی کا دفاع جاری رکھیں گے، ایران خطے میں بدامنی کو فروغ دے رہا ہے۔
منیلا میں امریکی وزیر خارجہ مارکو روبیو نے میڈیا سے گفتگو کرتے ہوئے کہا کہ ہم ایران کے ساتھ مذاکرات کیلئے تیار ہیں، کوشش کررہے ہیں ایران سمندری آمد و رفت کو خطرے میں نہ ڈالے، جہاز رانی کی آزادی کا دفاع جاری رکھیں گے۔
ان کا کہنا ہے کہ ایران اس وقت شدید مشکلات سے دوچار ہے، ایران خطے میں بدامنی کو فروغ دے رہا ہے، ایران آبنائے ہرمز میں بحری جہازوں کو نشانہ بنارہا ہے، امریکا آبنائے ہرمز میں جہازوں کا دفاع کررہا ہے۔
مارکو روبیو نے کہا کہ چینی وزیر خارجہ کے ساتھ بات چیت تعمیری رہی، اختلافات کے باوجود چین کے ساتھ بات چیت جاری رکھنا اہم ہے، ایران امریکا کے ساتھ بات چیت کیلئے سنجیدہ نہیں، امریکا ایران تنازع کا سفارتی حل چاہتا ہے۔
امریکی وزیر خارجہ کا کہنا ہے کہ ایران سنجیدگی دکھائے گا تو امریکا بھی آگے بڑھے گا، ایران کو آبنائے ہرمز پر کنٹرول کی اجازت نہیں دیں گے۔
