14/12/2025
Pista ni Santa Lucia, Masayang Ipinagdiwang sa Veinte Reales, Valenzuela!
Masayang ipinagdiwang ng Sta. Lucia Village I, Brgy. Veinte Reales, Lungsod ng Valenzuela, ang kapistahan ng kanilang pintakasing si Sta. Lucia, dalaga at martir.
Ang pagdiriwang ay kinatampukan ng Misa Triduo na nagsimula noong ika- 10 ng Disyembre, samantalang ang Misa sa araw ng kapistahan ay ipinagdiwang ng Lub. Kgg. Dennis C. Villarojo, D.D., Ph.D., ang Obispo ng Diyosesis ng Malolos, kasama ang isang panauhing pari at ang kura paroko ng Parokya ng San Bartolome, Apostol (Tugatog Meycauayan), na siyang nasasakupan nito.
Matapos ang Banal na Misa ay idinaos ang maringal na prusisyon tampok ang imahen ni Sta. Lucia at ng Mahal na Birheng Maria. Mula sa pagkakatatag ng subdivision at kapilya noong 1979, ay pinipintuho na ng komunidad si Sta. Lucia bilang kanilang pintakasi. Sa kadahilanang siya ay tinanggalan ng mga mata dahil sa paniniwala kay Kristo, kinikilala siyang pintakasi ng mga bulag, manggagamot at mga may sakit sa mata.
