13/04/2022
INSPIRING VERSES –APRIL 14, 2022 (Holy Thursday)
(2nd Reading – Holy Thursday)
ANG PANIHAPON SA GINOO- 1 CORINTO (I Cor. 11:23-26)
Mga igsoon: Kay nadawat ko gikan sa Ginoo ang pagtulon-an nga akong gitudlo kaninyo: nga ang Ginoong Jesus, sa gabii nga siya gibudhian, mikuha sa pan. (I Cor. 11:23)
Unya nagpasalamat siya sa Dios, ug gipikaspikas niya ang pan ug miingon, “Mao kini ang akong lawas nga gitugyan alang kaninyo. Buhata kini aron paghandum kanako.” (I Cor. 11:24)
Human sa panihapon gikuha niya ang kopa ug miingon, “Mao kini ang kopa sa bag-ong kasabutan nga gitiman-an sa akong dugo. Matag inom ninyo niini, buhata sa paghandum kanako.” (I Cor. 11:25)
Kay sa matag kaon ninyo niining pan ug sa matag inom ninyo niining kopa, gisangyaw ninyo ang iyang kamatayon hangtud sa pagbalik niya. (I Cor. 11:26)
REFLECTIONS - 1 CORINTO (I Cor. 11:23-26)
* 17. Sa kalit lang mihisgot si Pablo sa labing importanting kalihokan sa kristohanong katigoman, ang Eyukaristiya. Kining mga linyaha maoy labing karaang saksi kabahin sa Panihapon sa Ginoo, nga gisulat sa tuig 55 A.D., pipila ka tuig una sa mga Ebanghelyo.
Ang katilingban nag-alirong sa lamesa. Human sa panihapon, nga gipasiunhag awit sa mga Salmo, ang pangulo sa katilingban nag-ampo sa pasalamat, gihandom ang kataposang panihapon ni Jesus, ug gisubli ang mga pulong sa paghalad ug pagkonsagrar sa lawas ug dugo ni Cristo. Unya, ang tanan nangalawat sa mao rang pan ug mao rang kopa.
Gihinomdoman ni Pablo ang duha ka butang mahitungod sa Panihapon sa Ginoo:
- pagkalawat sa lawas ug dugo sa Ginoo;
- pagmatuod sa kahiusa sa gugma alang sa tanan: mahimo ta nga usa ka lawas.
Dinhi gipanghimaraot ni Pablo ang taga Corinto tungod sa duha ka sala: Ang matag usa nagkaon sa kaugalingong pagkaon, aron dili makapanghatag sa labing kabos ug diyotay rag nadala nga balon, o aron paglikay sa pagpakig-uban sa mga sakop sa laing grupo (10:16).
… o naghubog… (b. 21), busa wala sa hustong kondisyon sa pagdawat sa lawas ni Cristo.
… wala siya moila… (b. 29). Nagpunting ni sa samang higayon ining mosunod:
- kadtong nakaila sa kalainan tali sa gikonsagrahan ug sa ordinaryong pan, ug gidawat ni nga kulang sa pagtahod, isip lawas ni Cristo;
- kadtong wala manumbaling sa iyang mga igsoon sa pagsaulog sa Eyukaristiya. Wala siya moila sa Lawas ni Cristo nga naa sa tanang kristiyanos.
Ang Eyukaristiya dugokan sa kinabuhi sa Simbahan, busa, una sa tanan, naay panag-uban. Ang Simbahan dili lang instrument sa pagsangyaw sa Maayong Balita kondili, ang kahugpongan nga makapasinati sa katawhan sa kahiusa nila ug ni Cristo.
Nagsangayaw mo… (b. 26). Ang Eyukaristiya nga gisaulog sa tibuok kalibotan sa matag adlaw ug sa matag minuto nagpahinumdom nato nga ang kamatayon ni Cristo mihulip sa iyang pag-abot.
Ang kasaysayan dili mopundo ni ang buhilaman, sama sa nahitabo sa unang siglo. Dili lang kay ang kauswagan tekniko ang moaghat nato pag-uswag, apan ang panginahanglan pod sa hustisya. Ang sangpotanan sa kamatayon sa inosenteng biktima (dinhi ang Diyos), mogun-ob sa naandang mga sukaranan. Ang kamatayon ni Cristo dili makahatag ug pahulay ug kalinaw sa kalibotan. Nagpahinumdom nato ang Simbahan sa kamatayon ni Jesus dili aron paghandom sa nangagi kondili, aron pagkuha gikan ining talagsaong hitabo ug bag-ong kusog o gahom alang sa pagpasig-uli ug pagsilot.
