12/06/2021
Trinity Sunday/ Peace with Justice Sunday, First Sunday after Pentecost
Readings: Psalms 29, Romans 8:12-17
UCCP Iloilo City, Dungon-B, Jaro, Iloilo City, May 30, 2021
KABAKUD KAG IKASARANG HALIN SA BALAAN NGA ESPIRITU
Bulan sg Mayo, una nga Domingo pagkatapos sg Pentecost sa kalendaryo sg Iglesia. Tion sg pagsaulog sg paghatag kabakod sg Dios Balaan nga Espiritu sa onse ka mga disipulo ni Hesukristo paagi sa mga dila sg kalayo nga naghatag kagamhanan kag ikasarang sa kada isa. Ang Trinidad nga Dios-- isa ka Dlos nga may tatlo ka laragway--bilang Amay, bilang Anak, kag bilang Balaan nga Espiritu ang ginasaulog man naton subong.
Binilin ang Balaan nga Espiritu sa aton tunga pagkatapos nga magkayab—magsaka sa langit-- si Hesus. Ang Balaan nga Espiritu ang nagapasilabo kag nagahatag pagtuytuy sa aton agud kita magin mga saksi kag mga alagad sg Dios sa iya misyon sa kalibutan nga iya ginahigugma. Kaupod sini ang pagsaulog naton sa Paghidaet nga may Hustisya
Subong nga semana nagasaulog man kita sg ika-75 nga anibersaryo sg pagtukod sg UCCP sg mayo 25, 1948. Pero ang Presbyterian Mission nag-abot diri sa Panay sg 1900 kag natindog ang aton kongregasyon sa Delgado Street 121 years na ang nagligad. Suno sa mga masaligan nga mga punuan, ang ministeryo naton nga mga taong simbahan ang magsuporta sa simbahan agud na ini magin matutum sa misyon sg Dios para sa kabuhi sg kalibutan. Kon ang taong simbahan, ukon mga lideres nila, mapaslawan sa ila ministeryo paagi sa paglisa kag pagliwan sg katuyuan sg simbahan pakadto sa lain nga padulungan, isa ini ka pagtalang kag pagpabuangbuang kag pagsablag sa simbahan nga magin-matutum sa misyon sg aton Dios.
Sg una nga mga panahon, the early church, ang simbahan nakilala sa pag-antus sg presohan, pagka-pigos, persekusyon, kag kapigadohon. Subong, nano man nga ang simbahan nagin biktima sg pagsulay sg kabuganahan, prosperidad, personalidad, kag popularidad—pagkabantugan?
Sa pagtuman naton sa aton ministeryo bilang sumulunod sg Dios sa iya misyon sa kalibutan nga iya pinalangga, ginahatagan naton sg tum-ok ang paghidaet nga kaupod ang hustisya. Ang kalinong, bisan wala sg kinagamu ukon inaway, wala pulos kon wala sg hustisya, bangud indi ini matuod-tuod nga paghidaet sa paghangup naton sg shalom.
Ang ikasarang kag pagka-tinugyanan nga aton nabaton halin sa Balaan nga Espiritu naghilway sa aton halin sa mga kuku kag hugakumon sg kasal-anan, kag may pahanugot na kita na magin mga anak sg Dios. Bilang mga anak, manunubl, kag iredero pareho ni Hesukristo, may pribelihiyo kita nga magtawag sa Dios nga “Amay, amon Amay.” Ini nga kahilwayan kag kusog nga aton pinanubli dapat nga magganyat sa aton sa pagpaninguha para sa kalinong nga may hustisya kag kamatuoran.
Ang encarnacion sg Ginoo nagapakita sg pagpatunga sg Dios sa kahimtangan sg tao. Nagadampig ini sa maluya kag pigos, sa sinikway kag ginpatumbayaan. Ang iya sentro bisan diin, ang iya lindero indi mapaktan, indi makita. Ang misyon may kaugalingon nga dynamismo. Ang Espiritu sg Dios pareho sg isa ka ginhawa nga nagakalayo kag nagadabadaba, indi naton ini masulod sa kahon ukon bulsa sg aton de largo. Maghuyop ini kon diin man niya luyag. Pareho sg mga dila sg kalayo sg Pentecost, ang Espiritu sg Dios nagadala sg kalayo nga makahatag sg gahum sa aton kag magpukaw sa nagapatulog-tulog, kon indi papatay-patay naton nga mga lawas, kag gina-sindihan kita agud maglumpat sa kakugmat, kag aligmat. Ini ang mensahe sg Pentecost.
Gindalhan kita sg dumuluong sg krus, pero may dala man sila nga espada. Nagdala sila sg bibliya, pero may kaupod man nga riple. Nagsunod ang mga agalon, nga kalabanan mga mestizo, ukon tumandok nga tag-iya sg duta, nga nagpahalin sa mga pumoluyo, dala man ang wasay kag posporo. Ginpapili ang pumoluyo: krus ukon espada, bibliya ukon riple, demolisyon ukon arson! Ay kinabuhi! Wala mahimo ang timawa kag ang imol sa syudad-- kondi ang maghalin—ukon magpaninguha kag magpanimbang.
Suno ni Fr. Jose P. Dizon sg simbahan Romano Catolico:
“. . .sa pag-agi sg mgadekada, ang mga Pilipino masami kag masunson nga nakapatuhaw sg ila kolektibo nga kusog sa pamatok sa mga poderoso kag abusador, bisan daku ang resgo sg pagkulong, presohan, kag pagkadula sg ila kabuhi. Ginatinguhaan nila ang pagtimakas sa pagpanglupig, dala ang bug-os nga pagkilala nga ang krus ni Hesus simbolo sg mahilwayong grasya kag kadalag-an, indi simbolo sg kalutosan. Pumuloyo kita sg pagkabanhaw, indi sg lulubngan.”
Ang kahilwayan kag kusog nga aton pinanubli dapat nga magtulod sa aton padulong sa pag-ubra para sa hustisya kag kamatuoran.
Ang iban nga mga taong simbahan—upod man ang pila sa aton—kadali lang magkondenar sa mga biktima kag matontohan sg mga kalainan sa sociedad,. Ginabasol naton sila bangud sg ila kaimulon, kag ginasilotan naton sila bangud sg, abi naton, nga manubo nga moralidad nila, apang nagahinay-hinay kita sa pag-pangusisa sa mga pwersa kag proseso sa sociedad nga kabangdanan sg ila pagkapigado kag kaimulon.
Kinahanglan naton mangayo pasaylo sini nga kapaslawan, kag isugpon kag tabiron ang kaangtanan kag kalabtanan sa pumoluyo. Dapat lang na kita mabuhi sg simple kag responsable, balikan naton ang aton pagkabalaanon kag dihonon kag balayon ang paghiniusa nga nagakilala sg balor kag importansiya sg pumoluyo.
Bisan mga kasimbahanan kag taong simbahan man nagakinahanglan nga masugata nila ang ebanghelyo, kag ibutang sa ila tagipuso-on ang pagbag-o kag magpanadlong, agud nga mabalik ukon magpabilin ang mabakod kag matutum nga kabuhing esprituhanon nila.
Tanan nga oportunidad sa pagtuon sa pulong sg Ginoo--sa Sunday School ukon Bible Study man—sa sulod sg simbahan ukon sa dalanon, panimalay, ukon sa ulumhan—dapat lang nga magin pamaagi nga ang pumoluyo maka atubang kag magtampad sa poder sg kalainan sa sociedad, kag paagi sa sulat ukon petisyon sg ila kabalaka, mapamatian ang mga isyu sg ila kabalaka nga nagadala kabudlayan.
Suno ni Fr. Ben Alforque sg Iglesia Filipina Independiente (IFI),
“. . .makita naton ang misyon kon ipaanggid naton ang laragway sg kalibutan sa subong kag ang laragway sg kalibutan nga luyag sg Ginoo. Kon diin indi nagakasantu ang duha ka laragway, dira ang misyon sg Ginoo nahamutang.”
Dira sa duog nga wala pagsinantu naton madiskubrihan ang mahigugmaon, pero, kon kis-a, mabudlay kag maawot nga pag-baylo, bilang pamaagi sg aton Ginoo sa pagbawi sg iya mga tinuga, kag pagpauli sa ila sa iya kilid kag dughan. Siling pa sg United Church Men (UCM) lider sg Cawilihan UCCP sa Leon, Iloilo: “Isanto Ninyo” ang mensahe sg “Santo Nino”.
Ang mga kasimbahanan sa Pilipinas nagsugod na sa iya pagpanglakaton kaupod ang pumuluyo, pero kinhanglan nila maghulag sg mas madasig—maglupad pakadto sa kilid sng nag-pakatawo nga Dios—sa padayon nga pangpangita, pagbulong, pagpaumpaw kag pagbawi sg pumoluyo pakadto sa pag-inupdanay nga kaupod ang Dios Amay, Dios Anak, kag Dios Balaan nga Espiritu. Kabay pa. #
Nicanor Jr. G. Primavera
