07/09/2026
𝘾𝙖 - 70 𝘽𝘼𝙉𝙐𝘼𝙉𝙂 𝘼𝙉𝙄𝙑𝙀𝙍𝙎𝘼𝙍𝙄𝙊 𝙉𝙄𝙉𝙂 𝘾𝙊𝙍𝙊𝙉𝘼𝘾𝙄𝙊𝙉 𝘾𝘼𝙉𝙊𝙉𝙄𝘾𝘼 𝙉𝙄𝙉𝙂 𝙑𝙄𝙍𝙂𝙀𝙉 𝘿𝙀 𝙇𝙊𝙎 𝙍𝙀𝙈𝙀𝘿𝙄𝙊𝙎 𝙇𝘼 𝙋𝘼𝙏𝙍𝙊𝙉𝘼 𝘿𝙀 𝙋𝘼𝙈𝙋𝘼𝙉𝙂𝘼
PANALANGIN NING PAMAGTAGULALING QNG
VIRGEN DELOS REMEDIOS
O Kalinis-linisan a Indu ning Dios at Indu mi naman.
Reina ning banua ampon yatu,
kapagmulalan a Virgen delos Remedios,
antimong malugud a anak,a makapadurut king trono mu at
makasiklaud arap ning dangalan a maging Indu na ka ning Dios,
kaniting aldo tutung maligaya para keka
at para kekami maragul namang tula,
tatagulaling mi keka ing pangatau mi,
ing pibalebale mi,ing sablang meging kekami,
alang-alang king dakal nang pakalulu ning Dios,
ing balen mi ampon ing mabilug a provincia mi,
ba mung ampunan iting sabla at lingapan
layun pakibilang mu sanang bandi mung tune.
Manibat king banuang pakasautan mu,
nung nu ka meging Reina,siping ning Anak mu i Jesus,
itangad mu la kekami ring mata mung maka-indu
ampon maka-reina.
Ika na sana ing talapaglingap
king keyalan dang malit ding anak mi,
king kahinhinan ampon kapamintuan ding kayanakan mi
king ikasaplala ra ding balen mi,
king katahimikan ning provincia mi,a kebaitan mi
alang-alang king kaburian ning Dios.
Miputungan kang korona,
antimong Reina ampon Indu ning provincia mi,
ngening gugulisak da kang patulunan ning Capampangan,
uyab ning kapasalamatan
karing dakal a kalam mu a pigkalub mu kekami,
daraun mi ing pangatau mi
ampon ing sablang apakiabutan mi
a pigkalub ning Dios para king ikanono mi
kabang maglakad kami keti king karinan ning lua.
Img matibe ming kapanaligan yapin
ing nung miras na ing tauling aldo paglako mi keti yatu,
antimong kayablasan ning tapat ming devocion
ampon kasuyuan keka,
tanggapan mu na kami man sana,
king banuang pakasautan mu.
O Kapagmulalan a Virgen de los Remedios,
Indu ning Capaldanan,Tula ning Capampangan,
bendisiunan mu kami at emu sana kakalinguan
king ika ing Indu ampon Patulunan ning Provincia mi.
Amen.
Virgen de los Remedios,Indu ning Kapaldanan
king nanumang kasakitan,
IPANALANGIN MU KAMI..
