15/07/2025
Viva Nuestra!!
Viva Maria, Indu ning Dios!
Viva Indung Virgen del Carmen!
Masaya at Magrasyang aldo ning Ka-Fiestan ning Nuan a Indu ning Monte Carmelo.
Mananu na sanang kayantabe na niting kapagmasusian, maglapo karing kekatamung pusu ing Lugud, Kapayapan at Pacalulu ning Dios. Mipagcalub sana ing sablang kekatamung mayap a kayaduanan ning saup ning panalangin ning Nuan a Indu.
PANALANGIN KING NUAN A BIRHEN DEL CARMEN
O Maria, Indu ning Dios at Reina ning Monte Carmelo,
Pauli ning kekang kapamintuan king Ibpa,
Beit me ing bugtung mung anak, I jesus.
Maging piyalimbawanan mi ya sana ing kekang tangu
king pamanupad mi king kaburian ning Dios.
Tairan mu ke king pamaglakbe mi keti king yatu;
Maging ka sanang sala ban e kami malili king dalan papunta Keya.
Kanita, lubus mi yang akilala ing Guinu, a mitmu king Lugud at Pacalulu.
King regalu mung Santo Escapulario, maging miyang malalam a
debusyun keka a mangakung ninu man ing misusulud kaniti,
e na takman ing api ning impyernu.
Isulud miya sana iti king mitmung Kagalangan at Lugud keka.
Aduan mi ing parati mu keng ipanalangin king Dios at pagkaklub na sana
Ing kekeng kayadwanan para king kekaming Pamilya,
Comunidad at King mabilug a yatu.
Mananu na sanang misan a aldo, ike ngan, Akayabe dakang
Alang patnang Pupuri, Pasaup at Pasalamat
King Dios karin king Keyang Kayarian.
AMEN.
Nuestra Señora del Carmen,
Ipanalangin mu kami.
