IFI PAGSANJAN-Parish of Our Lady of Guadalupe

24/08/2026

AGOSTO 24 | Kapistahan ni San Bartolome Apostol at Martir
Patron ng Barrio Sabang

PANALANGIN KAY APOSTOL SAN BARTOLOME

O maluwalhating San Bartolome, tinawag ka ni Hesus na taong walang pagkukunwari, at nakita mo ang tanda sa mundong ito na Siya ang Anak ng Diyos at Hari ng Israel. Ipagkaloob mo sa amin ang biyaya na sa tuwina ay huwag magbalatkayo at payak na tulad ng kalapati. Gayundin naman, tulungan mo kami na mapasa-amin ang biyaya ng lyong pananampalataya na makita ang mapagpalang kamay ng Diyos sa mga pangyayari sa pang-araw-araw naming buhay.

(Banggitin ang intensyon)

Nawa'y mapagtanto namin ang mga tanda ng panahon na maghahatid sa amin kay Hesus dito sa lupa at humantong nawa sa pakiki-pagkaisa namin sa kanya sa langit magpakailanman Amen.

San Bartolome Apostol, Ipanalangin mo Kami!

22/08/2026

Agosto 22 | Oktaba ng Pag-aakyat sa Langit Mahal na Birhen

PANALANGIN KAY MARIA, REYNA NG LANGIT AT LUPA

O Mahal na Birheng Ina ng Awa, Reyna ng langit at lupa, mapagbiyaya ng tanang kayamanan, isinasamo ko sa iyo, na ipagkamit mo sa amin sa pamamagitan ng iyong Mahal na Anak ang mga grasyang ninanasa ko (tahimik na banggitin ang kahilingan).

Tuloyang biyayaan ng pananampalataya ang mga hindi binyagan; patibayin ang lahat ng mga kristiyano; pakabutihin ang lahat ng mga pari; bigyan ang mga puno ng mahusay na pagpapasunod at ang mga sakop ng isang madaling pagsunod; tubusin ang mga alipin; patapangin ang mga manunubos; pakatibayin ang mga tinutukso; aliwin ang mga namatayan; bigyan ng grasya ang mga banal; panatilihin sa kalinisan ang mga birhen; bigyan ng katahimikan ang mga mag-asawa; pakaingatan sa dilang panganib ang mga balo; pagalingin ang mga maysakit; patapangin ang loob ng mga taong naghihingalo.

Kaming lahat ay iyong tulungan at bendisyunan ngayon at sa oras ng aming kamatayan, nang kami’y maging dapat na sumama sa iyo sa kaluwalhatian sa langit.

V. Ora pro nobis, Sancta Dei Genetrix.
R. Ut digni efficiamur promissionibus Christi.

16/08/2026

AGOSTO 16| KAPISTAHAN NI SAN ROQUE
Patron laban sa Salot, Peste at Sakit na Nakakahawa
(Patron ng Brgy. Cabanbanan, Brgy. Maulawin at Brgy. Magdapio)

PANALANGIN KAY SAN ROQUE

Pinupuri at pinasasalamatan ka namin o butihing San Roque sapagka't Ikaw ang napili at itinalaga ng Diyos bilang tagapag-alaga ng mga taong may kapansanan sa katawan at kaluluwa. Isinasamo namin na lingapin mo ang lahat ng mga dumudulog sa iyo, ipagsanggalang sa lahat ng mga panganib sa katawan at kaluluwa, lalung-lalo na sa mga tukso laban sa kalinisan. Magalang kong iniluluhog sa iyo ang biyayang pagtibayin pa sa araw-araw ang aking pananampalataya at kamtan ko ang liwanag ng Espiritu ng Diyos para sa mga nasasadlak sa kasalanan, tulad ko. Saklolohan mo ako at ituon mo sa akin ang iyong butihing paningin upang mapaglabanan ko ang mga hirap ng katawan, puso at kalooban at nang sa gayon ay maging karapatdapat ako sa mga biyayang nais kong makamtan sa araw na ito.

Dakilang San Roque, inihahandog ko sa iyo ang buong buhay ko, kasama ang aking kaisipan, damdamin at gawain, nagpapasalamat din ako sa iyo sa lahat ng biyayang nakamtan ko sa Diyos sa iyong pamamagitan at nawa'y ang lahat ng ito ay makatulong sa akin upang makarating ako sa buhay na walang hanggan. Nawa'y ang banal na buhay mo ay maging uliran sa akin at kung sakaling ang paggawa ng mabuti ay maging mahirap para sa akin, ipagkamit mo na ako'y magkaroon ng biyaya at lakas ng loob na sumunod sa iyong mga yapak, ikaw na nagpakita ng mabuting halimbawa sa isang pamumuhay sa piling ng Diyos.

Dumating nawa ang sandali na sa iyong pamamagitan ay maging karapat-dapat ako sa mga pagpapala ng Maykapal upang sa langit ay makapiling ko rin ang Diyos na kasama mo. Siya nawa.

O San Roque, ipanalangin mo kami ngayon at sa oras ng aming kamatayan. Amen.

16/08/2026

AGOSTO 15 | 𝐊𝐀𝐏𝐈𝐒𝐓𝐀𝐇𝐀𝐍 𝐍𝐆 𝐏𝐀𝐆-𝐀𝐀𝐊𝐘𝐀𝐓 𝐒𝐀 𝐋𝐀𝐍𝐆𝐈𝐓 𝐒𝐀 𝐌𝐀𝐇𝐀𝐋 𝐍𝐀 𝐁𝐈𝐑𝐇𝐄𝐍

PANALANGIN
O Mahal na Nuestra Señora de la Asunción,
Ina ng Diyos at aming mapagmahal na Ina,
lumalapit kami sa iyo nang may buong pagtitiwala. Turuan mo kaming mamuhay sa pananampalataya, sumunod sa kalooban ng Diyos, at maglingkod nang may kababaang-loob at pag-ibig.

Ipanalangin mo kami sa iyong Anak na si Hesukristo, upang kami ay pagkalooban ng lakas sa gitna ng aming mga pagsubok, kapayapaan sa aming puso, kalusugan sa aming katawan, at pag-asa sa bawat araw. Ingatan mo ang aming pamilya, ang aming bayan, at ang lahat ng nangangailangan ng awa at habag ng Diyos. Nawa'y sa iyong makapangyarihang pamamagitan, manatili kaming tapat sa aming pananampalataya hanggang sa makapiling namin ang Diyos sa Kanyang walang hanggang kaharian. Amen.

Mahal na Birhen ng Asuncion,
Ipanalangin mo kami

29/07/2026

HULYO 29 | Kapistahan nina Sta. Maria, Sta. Marta at San Lazaro ng Betania
(Mga kaibigan ng ating Panginoong Jesus)

Panalangin sa Magkakapatid na BETANIA

O katotong tunay ng Panginoon, San Lazaro
kapatid ni Marta at Maria ng Betania, Ikaw na Patron ng mga may sakit at nahihirapan. Tulungan mo po nawa'y kami ay pagalingin sa aming dinaramdam at iiwas sa mga bagay na magbibigay sakit sa amin. Naway maging inspirasyon namin ang mabuting pagkakaibigan mo sa ating Panginoon at pagmamahal mo sa iyong pamilya at sa aming mga kapamilya, kaibigan at lalo na sa Panginoon na walang sawa na nagmamahal sa amin. Amen.

O mapalad na Santa Marta ang iyong pananampalataya ang nag udyok upang ipahayag ni Hesus, " Ako ang muling Pagkabuhay " at pananampalataya rin ang umakay sa iyo upang kilalanin si Hesus hindi bilang isang tao nang iyong ipahayag na " Kayo po ang Anak ng Diyos, and Mesias ". Taglay mo ang dalisay na pag-ibig kay Hesus at tinanggap mo siya sa iyong tahanan. Ipanalangin mo kami upang kami ay lumago sa pananampalataya, pag-asa at pag-ibig upang si Hesus na dumulog sa iyong hapag ay makinig sa amin at magkaloob ng isang lugar para sa piging ng buhay na walang hanggan. Amen.

O tala ng kapakumbabaan, liwanang ng mga nadidiliman. Pinagpalang Santa Maria ng Betania, ikaw na lumaki sa piling ng iyong mga kapatod a sina Lazaro at Marta. Matalik na kaibigan ng Panginoong Hesus. Natatanging alagad na may pusong busilak sa kabutihan, Turuan mo po kaming huwag lumimot sa mga biyayang ipinagkakaloob sa amin ng Diyos. Hulugan mo po kami O dakilang Santa ng mga biyaya ng kasipagan at paggawang kabanalan. Huwag mo po kaming hayaang tamarin at magsawa. Gisingin mo po sa aming mga puso ang grasya ng kasipagang ito upang tulad mo ay makapagpuri kami sa Diyos at sa aming kapwa. Amen.

San Lazaro, Santa Marta at Santa Maria ng Betania kami ay inyong ilapit sa inyong katoto na si Jesus!!!

San Lazaro de Betania, Ipanalangin mo po kami
Santa Maria de Betania, Ipanalangin mo po kami
Santa Marta de Betania, Ipanalangin mo po kami

Tampok ang imahen ni Sta. Marta ng Betania ng IFI Pagsanjan na nasa pangangalaga ni Jonjon Oliveros at Pamilya. Imahen nina Sta. Maria at San Lazaro ng Betania na nasa pangangalaga ni Jomari Carias at Pamilya

26/07/2026

HULYO 26 | Kapistahan nina Santa Ana at San Joaquin
(Mga Magulang ng Mahal na Birheng Maria)

Maluwalhating San Joaquin at Santa Ana, puspos ng habag sa mga tumatawag sa inyo at ng pag-ibig sa lahat ng mga nagdurusa, ngayong ako'y nabibigatan sa mga ligalig sa aking buhay, naninik-luhod ako sa inyo at nagmamakaawa na tanggapin niyo sa ilalim ng inyong natatanging pangangalaga ang kasalukuyan kalagayan ko. Itulot niyong ihabilin ito sa inyong anak, ang Pinagpalang Birheng Maria, at idulog ito sa harap ng trono ni Hesus, upang pagkalooban ito ng masayang wakas. Huwag sana kayong titigil ng pamamagitan para sa akin hanggang hindi naipagkakaloob ang aking kahilingan.

(Banggitin ang biyayang nais mong makamit.)

Higit sa lahat, kamtin niyo para sa akin ang biyayang makaharap ko ang aking Diyos isang araw, at kasama niyo at ni Maria at lahat ng mga santo, ay purihin at luwalhatiin siya magpakailanman. Amen.

Butihing San Joaquin at Santa Ana, ama at ina ni Maria na siya naming buhay, ginigiliw at pag-asa, ipanalangin mo kami kay Hesukristo at kamtin ang aming kahilingan.

Santa Ana, Ipanalangin mo po kami
San Joaquin, Ipanalangin mo po kami

25/07/2026

25/07/2026

HULYO 25 | Kapistahan ni San Santiago Apostol
Unang Martir na Apostol at Kapatid ni San Juan Apostol

Panalangin kay San Santiago

O Dakilang Santiago Apostol, malapit na kamag-anak ng ating Panginoon, at higit pang malapit sa kanya sa espiritwal na paraan! Nang ika'y makabilang sa mga una niyang tinawag at sa higit na malalapit sa kanya, tumugon ka nang sukdulan, iniwan mo ang lahat upang siya'y sundan sa una niyang tawag. Mapalad ka rin sa pagiging una sa mga alagad na mamatay para sa kanya, at nilagdaan mo ang iyong pangangaral sa pamamagitan ng iyong dugo.

"Marubdob" sa iyong kasigasigan sa lupa mula sa langit, ipinakita mong ika'y tagapagtanggol ng kanyang Simbahan sa tuwina, at naroon ka sa pakikipaglaban ng mga Kristiano upang matalo at maghiwa-hiwalay ang mga kaaway ng Krus, at dalhin ang mga mananampalatayang nawawalan nang pag-asa tungo sa tagumpay. Lakas ng mga Kristiano, tiyak na takbuhan ng mga tumatawag sa iyo nang may tiwala, lingapin mo kami ngayon laban sa mga panganib na pumapaligid sa amin.

Nawa sa iyong pamamagitan ay ipagkaloob ng ating Panginoon ang kanyang banal na pag-ibig, takot sa Diyos, katarungan, kapayapaan, at pagwawagi sa aming mga kaaway na nakikita at di-nakikita, at higit sa lahat nawa isang araw ay ipagkaloob niya sa amin ang kagalakan na siya'y makita at kami'y makasama niya sa langit, kasama mo at ng mga anghel at mga banal magpasawalang-hanggan. Amen.

San Santiago Apostol, ipanalangin mo kami.

Tampok ang Imahen ni San Santiago Apostol ng IFI PAETE

23/07/2026