https://www.facebook.com/191601767536947/

St. Joseph the Husband Parish, Poblacion Centro, Rizal, Nueva ecija (2026)

04/01/2020

KALABIT DIWA SA EPIFANIA

KAPISTAHAN NG PAGPAPAKITA NG PANGINOON (January 5, 2020) Mateo 2:1-12

Paksa : TULAD NG MGA PANTAS, HANAPIN NATIN ANG
PANGINOON

MGA KAPATID, dakila ang araw na ito sapagkat ipinagdiriwang natin ngayon ang dakilang kapistahan ng EFIPANIA – o ang pagpapakilala at pagpapahayag ng Diyos ng sarili sa mga tao. Mahalaga ito sapagkat kung hindi ito ginawa ng Diyos, wala tayong mauunawaan tungkol sa Maykapal.

May dalawang (2) uri ng PAGPAPAKILALA (pagpapakita) ang ginawa ng Diyos sa mga tao. UNA ay sa mga Judio, noong dalawin ng mga pastol ang bagong silang na si Jesus sa sabsaban. Ang mga pastol na Judio ay kumakatawan sa lahat ng mga Judio.

Ang IKALAWA na pagpapakilala ng Diyos ay noong dalawin siya ng mga PANTAS , na tinatawag nating mga Mago. Ang mga pantas ay hindi Judio, mga hentil ang tawag sa kanila, tulad natin, kasi nga hindi tayo mga Judio. SILA ang kumakatawan sa atin noong dumalaw sila sa Panginoon.

TINGNAN natin ang mga katangian (Pagkakaiba atpagkakatulad) ng mga Pastol at mga Pantas.

Ang mga PASTOL ay maralita, maaaring hindi nakapag-aral at mga simpleng mga kabataan lang na nabubuhay sa pagpapastol ng mga tupa para sa ksnilang ikabubuhay. Samantalang ang mga PANTAS nanan ay marurunong at matatalino, mayaman at matataas ang katayuan sa buhay.

SUBALIT, pareho silang nagsakripisyo at NAGHANAP sa Panginoon. Kapwa sila nagbigay ng oras at panahon para sambahin ang Diyos. BIGYANG diin natin ang mga PANTAS. Alam natin na naglakbay sila nang malayo para lamang madalaw at makita ang Panginoong isinilang. Naglakbay sila na baon ang kanilang malaking tiwala sa Diyos at ang kanilang mga pagsasakripisyo. Dala-dala nila ang kabababaan ng kanilang kalooban na hanapin at sambahin ang bagong silang na sanggol.

Tayong mga tao na nagnanais na magtagumpay o magkaroon ng isang natatanging karanasan, ay kinakailangang “maglakbay” buhat sa ating kinalalagyan tungo sa nais nating marating. Sa paglalakbay na iyon, kailangang mayroon tayong patnubay o gabay na tatanglaw sa ating pagpupunyagi.. Kaya tulad sa buhay natin ngayon , kinakailangan ang GABAY o liwanag at karunungan para harapin ang isang magandang bukas.

Sa ating EBANGHELYO, narinig natin ang sakripisyong dinanas ng mga MAGO para lamang makita nila at sambahin si Jesus. Naglakbay sila buhat sa Silangan - malayo, mapanganib at mahirap. Di nila ito inalintana sapagkat sila’y ginabayan ng TALA. Simbulo ito ng paggabay at patnubay ng LIWANAG ng Diyos.

Ipinakita nila sa atin ang kanilang mga katangian: mayaman, matapang, matalino at makapangyarihan. Subalit sila’y nagpakababa. Iniwan nila ang kanilang bayan, ang kanilang kayamanan at kapangyarihan UPANG makita lamang ang Panginoon.

Nagsisilbing hamon sa ating lahat ang kanilang ginawang ito. Maaari nating tanungin at suriin ang ating mga sarili: “ TAYO BA’Y nagsisikap na magsakripisyo para hanapin at makita ang Panginoon? Handa ba tayong mahirapan upang makausap lamang ang Panginoon sa Simbahan kung saan tayo ay nagdarasal at tumatanggap ng kanyang mga Sakramento? Handa ba tayong magpakumbaba para sa Diyos at sa ating kapwa?”

TULARAN NATIN ANG GINAWA NG MGA PANTAS, pagkatapos nilang matagpuan ang Panginoon.

1) LUMAPIT SILA SA SANGGOL NA SI JESUS – madalas ba tayong lumalapit sa Panginoon sa ating mga pagdarasal? Ilan ang lumalapit sa atin sa Komunyon, kumpisal, o sa pansariling pananalangin sa harap ng Tabernakulo?

2) NAGPATIRAPA - simbulo ng kababaang-loob : hindi kaya, puspos ng kayabangan ang ating mga puso kaya’t wala tayong panahon sa Diyos at sa ating kapwa?

3) SINAMBA nila si Jesus – Anong uri ng pagsamba meron tayo? Hindi kaya pakitang-tao lang? Nakakapag-simba pa ba tayo Linggo-linggo? Nagdarasal pa ba tayo?

4) NAGHANDOG NG REGALO – tulad ng mga Pantas, nakakapagbigay ba tayo sa ating Simbahan? Anong pagtulong ang nagagawa natin hindi lang sa Simbahan, kundi maging sa ating kapwa tao? Dapat nating tandaan na ang pagbibigay sa kapwa at sa Simbahan ay isang paraan ng pasasalamat sa kabutihang loob ng Diyos na SIYANG naunang nagbigay sa atin ng mga bagay na meron tayo. Sapagkat kung walang magbibigay, wala tayong tatanggapin; at kapag wala tayong tinanggap, wala rin tayong maibibigay.

MGA KAPATID, naway maisabuhay natin ang mga kaganapan sa buhay ng mga PANTAS. Patuloy nating hanapin at tuklasin si Jesus na ating Panginoon. Pagsikapan nating lagi Siyang matagpuan sa mga Sakramento, sa pananalangin at pagbabasa natin ng mga Salita ng Diyos; gayundin sa mga pag-uusap natin tungkol sa Kanya.

At ang isa sa mga pinakamahalaga sa mga karanasang ito ay ang pagtuklas sa presensiya ng DIYOS sa mga mahihirap. Sana, tulad ng mga Pantas, makuha pa rin natin magbigay at magbahagi sa iba ng mga biyayang ating tinanggap mula sa Diyos; UPANG SA GAYON, ang PASKO at ang DIWA nito ay patuloy na mamayani sa ating puso at sa ating buhay araw araw. AMEN

FR. MENARDO B. NATIVIDAD
San Sebastian Parish
Muboz, Nueva Ecija

22/12/2019

KALABIT-DIWA SA SIMBANG GABI (7)

IKA-PITONG ARAW NG SIMBANG GABI
December 22, 2019 Linggo
Mateo 1: 18-24

PAKSA : Ang Mabuting Katiwala – Tapat na Sumusunod at
nag-Babalik Handog sa Diyos

Pauna
Magandang umaga (gabi) po sa inyong lahat. Tayo po ay nasa ikapitong araw na ng ating apgsisimbang gabi. Excited na lalo tayo ngayon sapagkat palapit na ang palapit ang araw ng Pasko, tatlong tulog na lang Sabi nga ng isang bata, hindi na raw siya matutulog mamaya, para 2 tulog na lang.

Ngayong Linggong ito ay ika-4 na, at huling Linggo na ng Adbiyento. Ibig sabihin, paskong-pasko na talaga. Sinindihan na natin ang pinakahuling kandila, na may TEMA ng PAG-IBIG. Pag-ibig na namamayani sa kalooban ng Diyos, na dapat na amamayani rin sa bawat isa sa atin.

Ano ang isang Mabuting Katiwala
Isang programa ng pag-ibig na sinimulan nan a sa ating Diocese ay ang BALIK-HANDOG na nag-uugat sa ating apgigigng MABUTING KATIWALA. Noon pa man magpa-hanggang ngayon, marami ng mga tao ang pumipili ng mga tao na kanilang labis na PINAGTITIWALAAN. Ipina-uubaya sa kanilang katiwala ang lahat ng responsibilidad na dapat na kanilang gagawin. Halimbawa, parang sa panahon natin ngayon; may mga may-ari ng lupa na pumipili ng mga KASAMA na siyang mamamahala sa kanilang bukirin. Kaya ang may-ari ay kampante na gagawain ng kasama ang tungkulin na pangalagaan ang pagsasaka at pagpapa-ani. TIWALA nag usapin dito. TIWALA SA BAWAT ISA. Kaya nga. “KA” = kapareho, kasama; Hindi “KA-TIWALI.”

ANG EBANGHELYO
Muli nati ng bibigyan ng pansin ang mga katangian ni San Jose, ang asawa ni Maria, ang tatay-tatayan ni Jesus, ang MABUTING KATWALA NG DIYOS. Ipinakita niya kung gaano siya “katiwa-tiwala” sa pagsunod sa kalooban ng Diyos. KATIWA-TIWALA SIYA:
1) Sa pagiging isang MATUWID na tao (just and fair) = makatarungan!
2) Sa kanyang tunay na pagmamaha kay Maria (=papakasalan niya!)
3) Sa pagiging ‘malapit’ sa Diyos (=nagdarasal, humihingi ng tulong sa kanyang mga problema)
4) Sa kanyang buong pusong PAGTUPAD sa kalooban ng Diyos. Sabi sa huling bahagi ng Ebanghelyo, “….Snunod niya ang utos ng anghel ng Panginoon.”

Maraming handog na biyaya ang Diyos para kay Jose, tulad ng kanyang malinis na pagkatao, mapagmahala na asawa, pagiging tagapag-alaga ni Jesus na Panginoon, at iba pang talent tulad ng pagiging isang magaling na karpentero.

Bilang kanyang PASASALAMAT sa Diyos, ibinalik niya sa Diyos ang mga handog na ito. Siya ay tunay na MABUTING KATIWALA na nagbibigay ng “higit-sa-sapat”na BALIK-HANDOG

PAGNINILAY
Isang pagkakataon ito upang SURIIN ang ating mga sarili, ANONG klaseng PAGTANAW NG UITANG NALOOB sa Diyos ang ating isinasabuhay? Gaano kalaking biyaya ang tinatamasa natin sa atin buhay (tulad ng ating pamilya, trabaho, kalakasan, kaligayahan, talino, posisyon sa lipunan, mga oportunidad, ari-arian, kaalwanan, at marami pang iba). Mga HANDOG ng Diyos sa atin dahil sa kanyang pagmamahal sa atin. ANO ANG IBINABALIK NATIN SA KANYA? Baka naman kahit man lang pagsisimba at pagpupuri sa Kanya ay HINDI man lang natin maibigay sa kanya. Baka naman pati sa paglilingkod ay BARYA-BARYA din ang ating kaya?

PROGRAMA NG BALIK HANDOG
Isang programa na nagangahulugan na PAGBIBIGAYAN na pinatatakbo ng PAGKAKAISA at PAGBIBIGAYAN. Inaasahan na tayo ay magiging BUKAS PALAD sa Diyos sa pamamagitan ng ating TUNAY at SAPAT na pagbibigay ng ating TALINO, PANAHON at KAYAMANAN para sa ating SIMBAHAN (meaning, sa ating Kapwa, sa ating parokya, sa ating komunidad). Isang pagbibigay na walang pag-aalinlangan, walang pasubali, bukal sa loob, walang hinihintay na kapalit tulad bng pagakilala at papuri.

KABANALAN NG MABUTING KATIWALA (Spirituality of Stewardship)
Ito ay ang pagsasabuhay ng KABANALAN at ARAL ng Panginoon – lalo na ang pagtupad natin sa pangangasiwa ng TALINO, LAKAS, YAMAN at KAKAYAHAN na buong puso nating IBINABAHAGI sa ating kapwa. Mahirap pong paghiwalayin ang KABANALAN at PAGBABALIK HANDOG. Hindi maaaring maging banal ang isang tao KUNG siya ay MAKASARILI at walang pansin sa pangangailagan ng kapwa.

Ito ang pagmamahal at paglilingkod na ipinakita ni Jose. Higit sa lahat, ito ang GANAP at kumpletong PAGMAMAHAL NA inuukol ni Jesus sa ating lahat. AMEN

18/12/2019

KALABIT-DIWA SA SIMBANG GABI

IKA-APAT NA SIMBANG GABI
December 19, Huwebes, Lucas 1:5-25

PAKSA : LAHAT TAYO AY BINIGYAN NG TUNGKULIN

Maagang gumigising si Mr. Torres – isang manedyer sa isang malaking kumpanya. Kailangan niyang ayusin ang maraming bagay doon, upang maging mas maganda ang takbo ng kumpanya, para sa kapakinabangan ng lahat. Isa siyang ulirang manedyer – masipag, makatao, matapat, at mapapagkatiwalaan.

Maaga ring gumigising si Mang Daniel. Kinakailangan niyang ihanda at itsek ang kanyang dyip na ipinapasada. Sinisigurado niyang malinis hindi lamang ang kanyang sasakyan, bagkus pati na rin ang kanyang buong katawan, at kaisipan. Kailangang may dala siyang kabutihan, sipag at saya sa kanyang pamamasada.

EBANGHELYO:
Tulad nina Mr. Torres at Mang Daniel, TAYONG lahat din ay BINIGYAN ng Diyos ng KATANGIAN, KARUNUNGAN, at KAKAYAHAN. Bakit? Sapagkat PINAGKAKATIWALAAN niya tayo, na KAYA nating GAMPANAN ang mga bagay na iniaatas niya sa atin.

MENSAHE NG ATING EBANGHELYO SA ARAW NA ITO:
Narinig natin ang tungkol sa mag-asawang Elizabet at Zacarias. Tulad natin, sila din ay binigyan ng Diyos ng maraming tungkulin - si Zacarias bilang saserdote na naglilingkod ng tapat sa Templo. SI Elizabet naman ay naging isang mabuting maybahay, mabuting tao, at malapit na malapit sa Diyos dahil sa kanyang angking kabanalan at magandang halimbawa.

Talagang napaka suwerte nating lahat. Bakit? Sapagkat lahat tayo ay PINAGTITIWALAAN ng Diyos. Tulad halimbawa ng mga MAGULANG na naririto ngayon. Napakalaking biyaya sa atin ang katungkulang ipinagkaloob ng Diyos – ang pangalagaan, itaguyod at gawing matagumpay ang ating mga anak. Mga anak na ipinahiram lamang sa atin ng Diyos. Maaaring maraming problema ang kakambal ng pagiging isang magulang. Pero, alam ng Diyos ito; alam niya na kaya natin ang lahat kung GAGAWIN lang nating MAKA-DIYOS ang pagpapalaki natin sa kanila. AT, napaka epektibo din ang pagiging pala-dasal at pala-simba ang mga magulang. Hindi sila mahihirapang turuan ang kanilang mga anak sapagkat nakikita ng mga bata ang kanilang magagandang katangian.

HAMON NG EBANGHELYO:
Sinabi ng anghel kay Zacarias, “Huwag kang matakot; sapagkat dininig ng Diyos ang iyong mga panalangin.” TAYO RIN, Huwag tayong matakot.. huwag matakot gumawa ng mabuti, huwag matakot magsimba, huwag matakot magdasal. PAGBUTIHIN natin ang pagganap sa mga tungkuling ibinigay sa atin ng DIYOS. Huwag nating sayangin ang kanyang malaking pagtitiwala sa atin. Ang mga ito ang nagpapatatag sa atin. MULI, tulad nina Zacarias at Elizabet na binigyan sila ng Diyos ng isang napakagandang regalo - ang pagkakaroon ng isang anak, NANINIWALA tayo na tatanggap din tayo sa KANYA NG MAGAGANDANG regalo. SA ARAW NG PASKO, tatanggap tayo ng BIYAYA - maaaring material o spiritual na bagay.

SUBALIT higit na mahalagang matanggap natin ang ESPIRITUWAL na handog: PAGMAMAHAL NG DIYOS, KAPAYAPAAN sa ating mga PUSO, pakikipagkasundo sa ating mga kaaway, PAGBABAGO NG UGALI… Mahirap ito, pero kakayanin… .PAANO? Ang ating palagian pagsisimba, hindi lamang tuwing Simbang Gabi; at ang ating pagtanggap ng BANAL NA EUKARISTIYA. Sa ating pagtupad sa atng mga TUNGKULIN, Nawa’y mamunga ang Banal na Ekaristiya sa atin, tulad ng pamumunga sa buhay ni Zacarias at Elizabet.

fr. men natividad
san Sebastian parish, munoz, nueva ecija

17/12/2019

KALABIT-DIWA SA SIMBANG GABI

IKATLONG ARAW NG SIMBANG GABI
DECEMBER 18, 2019. Miyerkoles
Mateo 1:18-24

PAKSA: JOSE - Huwaran ng isang Amang nagtitiwala sa Diyos

ANG TATAY
Sa makabagong panahon natin, para bang “napakadali” na maging tatay. Ilan na ba ang mga kakilala nating mga tatay o itay, o papa o daddy, o erpat. Gaano ba kalaki ang paghahanda para maging isang “totoo at responsableng” tatay? Paano ba maging karapat- dapat na tatay ng isang tahanan?

SI JOSE, ANG ASAWA NI MARIA
Walang masyadong pagpapakilala ang ipinahayag ng Ebanghelyo kundi, “isang taong matuwid itong si Jose...” Ang ating alam na alam ay “nakatakda na siyang pakasal kay Maria.” Ngunit nalaman niya na si Maria ay nagdadalantao na. Ano ang ginawa ni Jose na nagpakita ng kanyang kabanalan, katarungan at kagandahan ng kalooban. Ano ang naging pasya niyang gawin?

ANO TAYO BILANG AMA.; BILANG ASAWA;. BILANG HALIGI
SA mga Tatay.... at Nanay.... o sinumang tagapangalaga o P.AANO natin “hinaharap” ang ating responsibilidad.... o ang mga PROBLEMA natin at ng ating pamilya? Paano tayo naapektuhan ng mga challenges o Hamon ng pagiging tao at pagiging magulang?

ANG HALIMBAWA NI JOSE
Ang pagiging “MATUWID” (just) ay may MALAWAK na kahulugan sa kutura ng mga Judio. Kapag matuwid ang isang tao, nasasakop na nito ang BUO at kumpletong KATANGIAN ng isang tao:

1. Banal - may malalim na pananampalataya sa Diyos
2. Mabuting Tao - handang maglingkod at magmahal ng kapwa
3. Tapat na Asawa - mahal na mahal niya si Maria kaya ayaw niya itong maparusahan ng Batas
4. Mapagmahal na tatay - inalagaan niyang mabuti si Jesus na hindi ito mapahamak kahit hindi niya tunay na anak (dinala sila sa Egipto)
5. Huwarang ama - tinuruan niyang maging banal at masipag ang batang si Jesus (tinuruan sa pagkakarpentero!)
6. Masunurin sa Batas - hindi niya sinusuway ang batas kahit na siya ay mahirapan.

PAGNINILAY
BILANG MGA TATAY o NANAY, o bilang isang tagapamuno at tagapangalaga,napakarami ng responsibilidad na INIATANG sa atin ng DIYOS. HALIMBAWA, ang pagiging tatay ay nangangahulugan ng PAGBIBIGAY ng buong sarili para TUPARIN ang ating sinumpaan sa Diyos MAGBUO NG ISANG PAMILYA. Hindi lang BAHAY (house) kundi higit sa LAHAT, ang pagbubuo ng BUHAY-PAMILYA (family).

Tulad ng mga katangian ni Jose, natuturuan ba at naaakay ba natin ang ating pamilya sa:
1. PAGSISIMBA at PAGDARASAL (Faith and prayer life)
2. PAGMAMALASAKIT PARA SA IBA ( concern)
3. DISIPLINA AT RESPONSIBILIDAD (discipline and responsibility)
4. KATAPATAN SA KAPWA AT SA BATAS (honesty and integrity)
5. KAWANGGAWA AT PAGIGING MAPAGBIGAY (generosity)
6. FAMILY BONDING (quality time with family)

PAGSASABUHAY
Binanggit ng. Ebanghelyo, “Nang magising si Jose, SINUNOD niya ang UTOS ng DIYOS.” (Mateo 1:24). Talagang ang tunay katiwasayan at kabanalan ng isang tao at ng buong pamilya ay nasa PAGSUNOD sa utos ng Diyos.

Ipagdasal natin ang lahat ng mga AMA, na nawa’y matularan nila ang pagkatao ni Jose, lalo na ang kanyang malaking PAGTITIWALA sa kabutihan at karunungan ng Diyos.

THE END

GOD BLESS US ALL

17/12/2019

HOMILYA 2 PARA SA SIMBANG GABI 2019 (December 17, MARTES) MATEO 1:1-17

PAKSA : SA EUKARISTIYA, TAYO AY IISANG PAMILYA

PAUNA: Sa mga dumalo kahapon sa ating Pagdiriwang, narinig natin ang katotohanan ng PAG-IBIG ng Diyos sa atin kaya nagkaroon ng PASKO – ang pagiging Tao ng Panginoon. Bilang ang LIWANAG ng ating buhay, nagsisikap tayong maging mga TAGAPAGPATOTOO ng Panginoon sa pamamagitan ng pagkakaroon natin ng isang MABUTING PAMILYA.Alam naman natin na si Jesus ay nasa Eukaristiya – tuwing ating tinatanggap, tayo ay naliliwanagan. Umaayos ang ating pagkatao at pag-uugali. Kaya nga nagiging masaya tayo. Kapag ang mga tao ay palaging sumisimba t tumatanggap ng Komunyon, nagiging mas panatag ang kanilang buhay.

NOONG UNANG PASKO, nakita natin ang pagmamahalan ng isang PAMILYA – ang pamilya nina Jesus, Maria at Jose. Binigyang-pansin dito ang KAHALAGAHAN ng PAMILYA sa BUHAY ng isang TAO. Bagamat sila ay mahirap, nangingibabaw sa kanila ang pagkakaisa. Bakit? Sapagkat sumasakanila ang Diyos.

MAHALAGA ANG ATING MGA PAMILYA. Kayo po, kumusta na ang inyong pamilya? Maganda ba ang inyong mga UGNAYAN? SA UNANG PAGBASA, binabanggit ang PAGTAWAG ni Jacob sa kanyang mga anak. Narinig natin na AGAD sumunod si Juda sa utos ng kanyang ama. Napakaganda, sapagkat may pagsusunuran. Ganito ba tayo sa ating pamilya?

ANG PANGANGAILANGAN NG PAMILYA sa mga panahon ito ay HINDI lamang salapi o luho. Higit na kailangan ng mga Pamilya ay ang GABAY ng Diyos. Ilan bang mga pamilya sa ngayon ang WALA NG PANSIN SA PAGSISIMBA? Ilang mga MAGULANG ang hindi man lang makuhang maging mgandang halimbawa sa kanilang mga anak? Tunay na ang mga magulang ay may espesyal na RESPONSIBILIDAD sa kanilang pamilya. Iyan ang dahilan kung kaya sila ay ikinakasal at binabasbasan ng Diyos. INAASAHAN sila ng Panginoon na MAGBUBUO din ng isang maganda at banal na mag-anak.

ANG SIMBAHAN ay katulong ng mga magulang sa kanilang PAGBUBUO ng isang matatag at BANAL na tahanan. Kaya nga ang SImabhan ay may mga programa para HUBUGIN ang mga kabataan, tulad ng First Communion, Kumpil, pagtuturong Katesismo, pagpapakumpisal sa mga bata, mga Sakristan, mga choir, at ang ating mga Youth. SUBALIT, walang magagawa ang Simbahan, kung mismo ang mga magulang ay hindi MAGANDANG HALIMBAWA sa kanila.

SA ATING REGULAR PAGDALO SA MISA natatanim sa isipan ng ating mga anak ang maraming bagay.
UNA, ang kahalagahan ng pagdarasal sa Diyos; nakikilala nila ang Diyos; nagiging mas handa silang harapin ang mag hamon ng buhay;
IKALAWA, nagkakaroon sila ng GABAY SA KAISIPAN, kung kayat mas nagiging tama ang kanilang mga desisyon sa buhay; hindi sila naliligaw ng landas.
IKATLO, mas lumalalim ang kanilang paghanga at pagmamahal sa kanilang mga magulang, dahil sa kanilang mataimtim na pagsamba sa DIYOS.
IKAAPAT, tumitibay ang pagkakaisa at pagtutulungan ng bawat miyembro ng pamilya; sila ay nagiging isang ideal family.

ANG EUKARISTIYA ay ang pinakasukdulan ng matatag na pananampalataya. Kapag ang isang pamilya ay nabuklod dito, lalo silang tumatatag at lalo silang pagpapalain ng Diyos. Nakikita natin sa sandali ng Komunyon, kung paanong ang mga tao ay isa-isang lumalapit sa DIYOS na nasa anyong tinapay. Buong paggalang at pagmamahal nila itong tinatanggap. At alam ng bawat pamilya, na sa tuwing tatanggap sila nito, mas nagiging maayos ang kanilang tahanan, ang kanilang pagsasama, at ang kanilang pagtitinginan.
SA ATING pagdiriwang ng Simbang gabi, hilingin natin ang paggabay ng Mahal na Birheng Maria, upang ang ating mga PAMILYA ay tunay na maging isang munting Simbahan, kung saan ang pagmamahalan at kabanalan ay palaging mangibabaw at maisabuhay.

______________________

fr. men natividad
diocese of san jose nueva ecija
(pwedeng i-share ang pangalawang sharing na ito)

07/11/2019

Si Zakeo..... at TAYO.. Ano ang pinagkaiba? Saan tayo nagkaka pareho?

08/07/2019

MISYONERO KA BA?

PUSH CO FO !!!
(Diyos ko po!)

Hinugot sa Lucas 10:1-9...
P - rayers (Dumalangin sa May-ari ng bukirin)

U - nity (sinugong dala-dalawa)

S - implicity (kainin anuman ang ihain sa inyo)

H - umility (huwag magdala ng supot, lukbutan o sapin aa paa)

Co - urage (parang kordero sa gitna ng mga asong gubat)

Fo - cus (Huwag tumigil at makipagbatian)

TAGLAY BA NATIN ANG MGA ITO? Kung gayon mga MISYONERO NA TAYO!!!

28/05/2016

HUGOT - isang makabagong salita o vocabulary na patok na patok sa mga Kabataan. Isang magandang dulot nito ay ang pagpayaman sa imahinasyon ng mga taong gumagawa nito. Nabibigyan nila ng mga paghahalintulad (comparison & juxtaposition)) ang mga pangyayari at ang kanilang mga karanasan at EMOSYON. Ang problema nga lang ay maaaring lalo silang nagiging MAHINA AT DUWAG SA PAGHARAP sa mga conflict or mga seemingly problematic situations sa kanilang buhay.
ISA PA, sa paglalathala (pagpopost) sa SOCIAL MEDIA ng kanilang mga HINAING (negative emotions) HINDI Sila nagiging OBJECTIVE at bagkus ay nasisiwalat pa sa netizens ang kanilang nga negativity, vulnerability, at kahinaan, self-defeating stance o kawalan ng fortitude. NAWA'y IWASAN na ng marami ang pagSISIWALAT sa facebook ng mga personal weaknesses tulad ng GALIT, TAMPO, SELOS, INGGIT PAGHIHIGANTI, PANANANAKOT o kaya ay mga simpleng childishness at mala-telenovelang mga HUGOT. Sana sa ating pagHUGOT, MAIUGNAY nawa natin ang ating emosyon sa pagninilay natin sa mga Salita ni Lord. Kaganda tiyak ng mundo natin. God bless us all. God bless our texting, chatting and posting.
(Fr. Men B. Natividad)

St. Joseph the Husband Parish

04/01/2020

22/12/2019

18/12/2019

17/12/2019

17/12/2019

07/11/2019

08/07/2019

28/05/2016

Address

Website

Alerts

Shortcuts

Share

Category