10/05/2025
MAGDANGOG KITA SA MARHAY NA PASTOR
Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Mayo 11-17, 2025. Basahon an Evangelio gikan sa Juán 10,27-30 (Ikaapát na Domingo kan Pasko kan Pagkabuhay-Liwát - C).
…
Sa Evangelio nagpapamidbid an satóng Kagurangnan Jesu Cristo bilang Marhay na Pastor, asín an tandâ na kitá sadiri Niyá iyó an satóng pagdangóg sa Saiyang tingog. Sa panahón nin eleksyon, anó an sinasabi satô kan tingog kan Marhay na Pastor?
Sa Jeremías 3,15, may panugâ an Diós sa Saiyang banwaan: “Tatàwan ko kamó nin mga pastores susog sa Sakóng pusò, na papamayohán kamó na may kadonongan asín pakasabot.” Kayâ pilíon ta an mga may pusong siring sa Marhay na Pastor. Sa mga boót mamayó sa satóng banwaan, siísay sainda an mga marhay asín siísay man an mga maraot?
An marhay na pastor dinádará sa karahayan asín katanosan an banwaan.
Siring siyá sa Kagurangnan sa Psalmo 23,2, na dinádará an karnero “sa mga berdeng sabsaban, sa mga tubig na malinaw.” An maraot na pastor dinádará sa karâtan asín kasâlan an banwaan. Kaidtong termino ni Presidente Duterte nahiling ta kun pâno ginibong normál an kadustaán, an kaputikan, asín an panggagadán. Ngonian namán ginibo nang normál an pagkurakot nin pondo kan gobyerno, ginigibong makilimos an kasaradayán sa mga programang ayuda, asín pigraraót an eleksyon sa bilyones na pigbubôbô para mambakál nin boto.
An marhay na pastor may pagmangno sa saiyang nasasakopan, lalò na sa mga nasa laylayan nin sociedad.
Sa Juán 10,10, sinabi ni Jesús: “An parahâbon minaabot, daíng ibáng tuyo kundî makahâbon, makágadán asín makáraót; Akó nagdigdi tanganing magkaigwa sinda nin búhay asín magsûpay.” Kayâ maglikáy sa mga boót mamayó sa banwaan na nagsásagín-sagin na marhay asín maboot peró karâtan palán an katuyohán.
May pigpapamatè man na pagmangno sa banwaan an mga maraot na pamayó—alagad an tabang na tinátaó ninda, tinapyasán na nin dakulà para sa saindang sadiri. Dangan pag-abót kan eleksyon, ginigibong pambakál nin boto. Asín an mga botanteng pinatoód sa barakalan nin boto, hinahaboán na patí an mga kandidatong matanos asín may kakayahán, ta nawâran na nin paglaom sa tunay na pagbabâgo, kayâ pipilion na saná su pinakahalangkaw magtaó.
An marhay na pastor sinúsuróg an saiyang kawan na inaataman.
Alagad an pastor na kwarta saná an habol, susog sa Juán 10,12, “pag natatànaw an lobo na nag-áabót, binabayaan an mga karnero, asín minádulág.” An mga maraot na pamayó paminsan madadangog ta man na nangangapodan nin pagkásararô, peró embes na tarabangán para sa karahayan nin banwaan, tarabagán palán an tuyo sa pondo kan gobyerno. May patanid para satô sa Proverbio 29,2: “Kun an matanos iyó an nagkákapót nin kapangyarihan, nag-oogma an banwaan; alagad kun an maraot iyó an namámayó, nag-aagrangay an katawohan.”
Daí man ki perpektong kandidato alagad dakúl man an mga matanos asín totoo. Pilíon ta an mga pamayó na nagtútubód sa kapangyarihan nin pagkamoot, bakô sa pagkamoot sa kapangyarihan; an mga nagdudusay kan saindang sadiri, bakô an mga nagpapayaman sa sadiri. Magdangóg kitá sa Marhay na Baretà (Good News) kan satóng Marhay na Pastor, bakô sa pekeng baretà (fake news) kan mga utikón asín parahâbon.
…
GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin mga tentación asín biyayà sa pagsunód niatò sa tingog kan Marhay na Pastor sa panahón nin eleksyon.
PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song
