29/07/2026
Mary of Bethany, Pray for us!
IKA-29 NG HULYO: Paggunita kina Santa Marta, San Lazaro at Santa Maria ng Betania.
Salin mula sa Latin ng dalawang tala sa Martyrologium Romanum:
"1. Paggunita kay Santa Marta, na tumanggap sa Panginoong Jesus sa kanyang tahanan sa Betania na kanugnog ng Jerusalem, at nang mamatay ang kapatid niya ay nagpahayag na 'Ikaw ang Kristo, ang Anak ng Diyos na pumarito sa mundo.'
2. Paggunita kay San Lazaro, kapatid ni Santa Marta, na nang mamatay ay tinangisan at muling binuhay ng Panginoon, at kay Santa Maria, kapatid nila, na habang abala si Marta sa gawaing bahay, ay nanatiling nakaupo sa paanan ng Panginoon at nakikinig sa salita Nito."
Pangunahing ginugunita sa araw na ito si Santa Marta. Ngunit sa pagbabago ng tala sa Martyrologium Romanum at sa hangad ng Simbahan na tukuyin ang identidad ni Maria Magdalena (na dati-rati'y sinasabing kapatid ni Santa Marta), ginugunita na rin sa araw na ito ang mga kapatid ni Santa Marta na sina San Lazaro at Santa Maria ng Betania.
Sa Ebanghelyo ni San Lukas (10: 38-42), mababasa natin na noong pumaroon sa Betania si Jesus, naging abala si Marta sa paghahanda para sa kanyang bisita samantalang si Maria ay mas minabuting manatili sa paanan ni Jesus at makinig sa Kanya. Hiniling ni Marta kay Jesus na pagsabihan si Maria na tulungan siya sa paghahanda. Subalit sumagot si Jesus na ang piniling gawin ni Maria ay higit na mainam.
Sa Ebanghelyo naman ni San Juan (11: 20-27) nakatala ang pagbuhay ni Jesus kay Lazaro. Pinarating ng magkapatid na Marta at Maria kay Jesus na naghihingalo na si Lazaro, na ayon sa Bibliya ay lubos Niyang minamahal. Ngunit imbes na pumaroon kaagad sa kanila, naghintay pa ng dalawang araw si Jesus saka pa lamang tumulak pa-Betania. Nang datnan ni Jesus na nakalibing na si Lazaro, tinangisan Niya ito. Sinalubong Siya ni Marta at sinabi sa Kanya na di dapat namatay si Lazaro kung maagang nakarating ang Panginoon. Dito na sinabi ni Jesus na Siya ang Buhay at ang Muling Pagkabuhay. Nang ipahayag ni Marta na sumasampalataya siya kay Jesus, ipinagulong ni Jesus ang batong nakatakip sa libingan, nanalangin sa Ama, at tinawag si Lazaro na lumabas mula sa loob ng libingan.
Lumabas rin si Maria sa apat na Ebanghelyo na nagbuhos ng pabango sa paa ni Jesus at pinunasan ito ng kanyang buhok, ngunit tanging sa Ebanghelyo ni San Juan (12:1-8) lamang siya tahasang pinangalanan. Ayon sa kuwento, nagreklamo si Judas Iscariote sa dahil sa aniya'y pagwawaldas ng pera ni Maria sa pabango na puwede sanang ginastos para makapaglimos sa mga mahihirap. Pero sinabihan siya ni Jesus na hayaan si Maria sa kanyang ginagawa.
Sa tatlong magkakapatid na taga-Betania, pinakamayaman ang representasyon na nakakawing kay Santa Marta. Maaari siyang ilarawan na may tangan na anumang gamit sa kusina tulad ng banga o sisilad ng pagkain. Ipinakikita rin siyang may hawak na krus at may dragon sa paanan. Ito ay hango sa Legenda Aurea na nagsasabing napadpad si Santa Marta sa Provenza sa Francia. Dito’y nakita niyang naghahasik ng lagim ang halimaw na tinatawag na Tarasca, na may ulo ng leon, katawan ng pagong, buntot ng ahas, at anim na binti na parang sa oso. Humingi ng tulong ang taumbayan kay Santa Marta kaya winisikan niya ang Tarasca ng agua bendita, pinaamo gamit ang krus, at tinalian sa leeg nito nang sa gayon ay masilo ng mga tao.
Sa kabilang banda, dahil sa matagal na pagkakahalo nina Maria Magdalena at Maria ng Betania, karaniwang magkapareho sila ng sagisag. Si San Lazaro naman ay maaaring ilarawan na nakabalot ng kayong lino, tulad noong siya ay muling buhayin ni Jesus.
Ang imahen ni Santa Maria ng Betania ay nasa pangangalaga ni Yhanie Montenegro Mariñas at kanyang Pamilya na inilalabas tuwing Semana Santa sa Parokya ni San Roque ng Brgy. Taysan Legazpi City. Ito ay gawa ng mahusay na Iskultor na si Fel Art Works mula pa sa Gua-Gua Pampangga.
Santa Marta, San Lazaro at Santa Maria ng Betania, ipanalangin ninyo kami!🙏🏼
