Saint Cajetan Parish - Tulay na Lupa

27/08/2026

𝐏𝐀𝐆𝐆𝐔𝐍𝐈𝐓𝐀 𝐊𝐀𝐘 𝐒𝐀𝐍𝐓𝐀 𝐌𝐎𝐍𝐈𝐂𝐀
𝐀𝐠𝐨𝐬𝐭𝐨 𝟐𝟕, 𝟐𝟎𝟐𝟔

UNANG PAGBASA
1 Corinto 1, 1-9

Ang simula ng unang sulat ni Apostol San Pablo sa mga taga-Corinto

Mula kay Pablo na tinawag ng Diyos upang maging apostol ni Kristo Hesus, at mula sa ating kapatid na Sostenes –

Sa simbahang nasa Corinto – sa mga hinirang ng Diyos upang maging kanya sa pamamagitan ng pakikipag-isa kay Kristo Hesus kasama ng mga hinirang sa lahat ng dako, na tumatawag sa pangalan ng Panginoong Hesukristo, ang Panginoon nating lahat:

Sumainyo nawa ang pagpapala at kapayapaan mula sa Diyos na ating Ama at sa Panginoong Hesukristo.

Lagi akong nagpapasalamat sa Diyos dahil sa mga pagpapala niya sa inyo sa pamamagitan ni Kristo Hesus. Sapagkat sa inyong pakikipag-isa sa kanya, kayo’y umunlad sa lahat ng paraan, maging sa pananalita at kaalaman. Ang katotohanang ipinangaral namin tungkol kay Kristo ay malinaw na nakikita sa inyo anupat hindi kayo nagkulang sa anumang kaloob na espirituwal, habang hinihintay ninyong mahayag ang ating Panginoong Hesukristo. Kayo’y aalalayan niya hanggang sa wakas upang matagpuan kayong walang kapintasan sa Araw ng ating Panginoong Hesukristo. Tapat ang Diyos na tumawag sa inyo upang kayo’y makipag-isa sa kanyang Anak na si Hesukristong ating Panginoon.

Ang Salita ng Diyos.

SALMONG TUGUNAN
Salmo 144, 2-3. 4-5. 6-7

Pupurihin ko ang ngalan
ng P**n magpakailanman.

Pupurihin ko’t pasasalamatan ang Diyos araw-araw,
di ako titigil ng pasasalamat magpakailanman.
Dakila ang P**n, at karapat-dapat na siya’y purihin;
ang kadakilaan niya ay mahirap nating unawain.

Pupurihin ko ang ngalan
ng P**n magpakailanman.

Sa alinmang lahi, ang iyong ginawa ay papupurihan,
ihahayag nila ang mga gawa mong makapangyarihan.
Ang karangalan mo at pagkadakila’y ipamamalita,
at isasaysay ko ang mga gawa mo na kahanga-hanga.

Pupurihin ko ang ngalan
ng P**n magpakailanman.

Ang mga gawa mong makapangyariha’y ipamamalita;
sa lahat ng tao’y aking sasabihing ikaw ay dakila.
Ihahayag nila ang lahat ng iyong mga kabutihan,
aawitin nila ang kabutihan mo’t iyong kabaitan.

Pupurihin ko ang ngalan
ng P**n magpakailanman.

ALELUYA
Mateo 24, 42a. 44

Aleluya! Aleluya!
Lagi tayong magtanod
sapagkat di natin talos
ang pagbabalik ni Hesus.
Aleluya! Aleluya!

MABUTING BALITA
Mateo 24, 42-51

Ang Mabuting Balita ng Panginoon ayon kay San Mateo

Noong panahong iyon, sinabi ni Hesus sa kanyang mga alagad, “Kaya magbantay kayo, sapagkat hindi ninyo alam kung anong araw paririto ang inyong Panginoon. Tandaan ninyo ito: kung alam lamang ng puno ng sambahayan kung anong oras ng gabi darating ang magnanakaw, siya’y magbabantay at hindi niya pababayaang pasukin ang kanyang bahay. Kaya maging handa kayong lagi, sapagkat darating ang Anak ng Tao sa oras na di ninyo inaasahan.

“Ang tapat at matalinong alipin ang siyang pinapamahala ng kanyang panginoon sa ibang mga alapin, upang bigyan sila ng kanilang pagkain sa karampatang panahon. Mapalad ang aliping iyon, kapag dinatnan siyang gumagawa ng gayun sa pagbabalik ng kanyang panginoon! Sinasabi ko sa inyo: pamamahalain siya ng kanyang panginoon sa lahat ng kanyang ari-arian. Ngunit kung masama ang aliping iyon, sasabihin niya sa sarili, ‘Matatagalan pa bago magbalik ang aking panginoon,’ at sisimulang bugbugin ang kanyang mga kapwa alipin, at makipagkainan at makipag-inuman sa mga lasenggo. Babalik ang panginoon ng aliping iyon sa araw na hindi niya inaasahan at sa oras na hindi niya alam. Buong higpit na parurusahan siya ng Panginoon, at isasama sa mga mapagpaimbabaw. Doo’y tatangis siya at magngangalit ang kanyang ngipin.”

Ang Mabuting Balita ng Panginoon.

26/08/2026

𝐌𝐈𝐘𝐄𝐑𝐊𝐔𝐋𝐄𝐒 𝐍𝐆 𝐈𝐊𝐀-𝟐𝟏 𝐋𝐈𝐍𝐆𝐆𝐎 𝐒𝐀 𝐊𝐀𝐑𝐀𝐍𝐈𝐖𝐀𝐍𝐆 𝐏𝐀𝐍𝐀𝐇𝐎𝐍
𝐀𝐠𝐨𝐬𝐭𝐨 𝟐𝟔, 𝟐𝟎𝟐𝟔

UNANG PAGBASA
2 Tesalonica 3, 6-10. 16-18

Pagbasa mula sa ikalawang sulat ni Apostol San Pablo sa mga taga-Tesalonica

Mga kapatid, iniuutos namin sa inyo sa pangalan ng Panginoong Hesukristo, na layuan ang mga tamad at ayaw mamuhay ayon sa mga tagubilin namin sa inyo. Alam naman ninyo na dapat ninyong tularan ang aming ginawa. Hindi kami nahiyang magtrabaho nang kami’y nariyan pa. Hindi kami tumanggap ng anumang bagay kaninuman nang hindi namin binabayaran. Nagpagal kami araw-gabi upang hindi maging pasanin ng sinuman sa inyo. Ginawa namin ito hindi dahil sa wala kaming karapatang maghintay ng inyong tulong kundi upang kayo’y bigyan ng halimbawang dapat sundan. Nang kasama pa namin kayo, ito ang tagubiling ibinigay namin sa inyo: “Huwag ninyong pakanin ang sinumang ayaw gumawa.”

Ang Panginoon na bukal ng kapayapaan ang siya nawang magkaloob sa inyo ng kapayapaan sa lahat ng pagkakataon. Nawa’y sumainyong lahat ang Panginoon.

Akong si Pablo ang sumulat ng pagbating ito: Binabati ko kayo. Ito ang aking lagda sa lahat ng sulat ko. Ganito ako sumulat.

Nawa’y sumainyong lahat ang pagpapala ng ating Panginoong Hesukristo.

Ang Salita ng Diyos.

SALMONG TUGUNAN
Salmo 127, 1-2. 4-5

Mapalad ang sumusunod
na taong may takot sa D’yos.

Mapalad ang bawat tao na sa Diyos ay may takot,
ang maalab na adhika’y sumunod sa kanyang utos.
Hindi siya magkukulang sa anumang kailangan,
ang buhay ay maligaya’t uunlad ang kanyang buhay.

Mapalad ang sumusunod
na taong may takot sa D’yos.

Ang sinuman kung ang Diyos buong pusong susundin,
buhay niya ay uunlad at laging pagpapalain.
Mula sa Sion, pagpapala nawa ng Diyos ay tanggapin,
at makita habang buhay, pag-unlad ng Jerusalem.

Mapalad ang sumusunod
na taong may takot sa D’yos.

ALELUYA
1 Juan 2, 5

Aleluya! Aleluya!
Lubos na magtatamasa
ng pag-ibig ng D’yos Ama
ang sumunod sa Anak n’ya.
Aleluya! Aleluya!

MABUTING BALITA
Mateo 23, 27-32

Ang Mabuting Balita ng Panginoon ayon kay San Mateo

Noong panahong iyon, sinabi ni Hesus, “Sa aba ninyo, mga eskriba at mga Pariseo! Mga mapagpaimbabaw! Ang katulad ninyo’y mga libingang pinaputi, magaganda sa labas, ngunit sa loob ay puno ng kabulukan at buto ng mga patay. Ganyang-ganyan kayo! Sa paningin ng tao’y mabubuti kayo, ngunit ang totoo, punung-puno kayo ng pagpapaimbabaw at kasamaan.

“Sa aba ninyo, mga eskriba at mga Pariseo! Mga mapagpaimbabaw! Ipinagtatayo ninyo ng mga libingan ang mga propeta at ginagayakan ang mga puntod ng mga taong namuhay nang matuwid. At sinasabi ninyo, ‘Kung kami sana’y nabuhay sa kapanahunan ng aming mga ninuno, hindi namin ipapapatay ang mga propeta.’ Sa sinabi ninyong iyan, inaamin ninyong kayo’y mga anak ng mga nagpapatay sa mga propeta! Sige! Tapusin ninyo ang pinasimulan ng inyong mga ninuno!”

Ang Mabuting Balita ng Panginoon.

25/08/2026

Agosto 25, 2026 Martes sa Ika 21 Linggo sa Karaniwang Panahon (Mt. 23:23-26) - Reb. Padre Boyet I. Asesor, MF

Unang Pagninilay:
Tayong mga Pilipino ay may kawikaaan na “nakikita ang butas ng karayom hindi ang butas ng palakol”. Ang mga Palestina ay may kahalintulad din naman na kawikaan “sinasala ninyo ang niknik sa inyong inumin, ngunit nilulunok ninyo ang kamelyo” (Mt. 23:24). Noong panahon iyon ay nakagawian ng mga Israelita na salain ang kanilang inumin sa pamamagitan ng tela. Ngunit itinuturing nilang marumi ang karne ng kamelyo; kaya’t ipinagbabawal nila ang pagkain nito.

Sa pagbanggit ng kawikaan ito; nais ipamukha ng Panginoon na ang pagsunod sa batas ng mga eskriba at pariseo ay sang-ayon lamang sa nais nilang sundin at kung ano ang madali para sa kanila na sundin. Ang ibig sabihin nito ay, ang mga malalaking kautusan ay kanilang pinagwawalang bahala.

Sa batas moral ng lipunan ay walang kinikilingan, manapa ay matapat na isinasa-katuparan. Hindi tayo pumipili ng batas, na nais lamang natin sundin o kaya ay dahil maalwan o madali sa atin.

Kamusta na ang pagsunod natin ng panlipunang alituntunin? Paano po ba natin ito isinasabuhay sa ating Munting Sambayanang Kristiyano (MSK) o Basic Ecclesial Communities (BEC)? Magbahaginan po tayo ng karanasan at ng pang-unawa sa paksang ito!

Ikalawang Pagninilay:
Ano kaya ang maaaring mangyari kapag ang pagsunod natin sa ating mga namamahala ay bulag na pagsunod (blind obedience)? Marahil pati ang sentido komon (common sense) ay nawawala rin. Ano po sa inyong palagay sa sarsuela ng ating Lipunan sa kasalukuyan?

Send a message to learn more

25/08/2026

𝗠𝗔𝗥𝗧𝗘𝗦 𝗡𝗚 𝗣𝗔𝗚𝗗𝗘𝗗𝗘𝗕𝗢𝗦𝗬𝗢𝗡 𝗣𝗔𝗥𝗔 𝗦𝗔 𝗞𝗔𝗥𝗔𝗡𝗚𝗔𝗟𝗔𝗡 𝗡𝗜 𝗦𝗔𝗡 𝗖𝗔𝗬𝗘𝗧𝗔𝗡𝗢
Agosto 25, 2026

𝙋𝙖𝙣𝙖𝙡𝙖𝙣𝙜𝙞𝙣 𝙠𝙖𝙮 𝙎𝙖𝙣 𝘾𝙖𝙮𝙚𝙩𝙖𝙣𝙤

O mapagmahal na Ama, sinasamba, pinupuri, at pinasasalamatan ka namin. Taos puso ang aming pasasalamat sa napakaraming biyaya na ibinigay mo sa amin. Sa pamamagitan ni San Cayetano, nagsusumamo at pakumbabang inilalapit namin nang may buong pananalig ang aming mga panalangin.

O Panginoong Jesukristo, bugtong na anak ng Diyos na nagturo kay San Cayetano sa pag-aalay ng buhay, hinihiling namin na itanim sa amin ang diwa ng pagsasakripisyo upang matutunan naming mahalin ang Diyos nang marubdob at higit sa lahat ng bagay katulad ng ginawa Mo.

Sa tulong ng liwanag at inspirasyon ng Espiritu Santo, matutunan nawa naming mag-ayuno at magpenitensya para sa aming mga kasalanan katulad ng ginawa ni San Cayetano.

Nawa'y ang mga biyayang hinihiling namin sa tulong ng aming mahal na Patron ay lalong maging daan sa pagbubuo ng Iyong Kaharian at ng pagpapalaganap ng Iyong kabanalan. Ikaw na nabubuhay at naghahari magpasawalang hanggan.
Amen.

San Cayetano, ipanalangin mo kami.

25/08/2026

𝐌𝐀𝐑𝐓𝐄𝐒 𝐍𝐆 𝐈𝐊𝐀-𝟐𝟏 𝐋𝐈𝐍𝐆𝐆𝐎 𝐒𝐀 𝐊𝐀𝐑𝐀𝐍𝐈𝐖𝐀𝐍𝐆 𝐏𝐀𝐍𝐀𝐇𝐎𝐍
𝐀𝐠𝐨𝐬𝐭𝐨 𝟐𝟓, 𝟐𝟎𝟐𝟔

UNANG PAGBASA
2 Tesalonica 2, 1-3a. 14-17

Pagbasa mula sa ikalawang sulat ni Apostol San Pablo sa mga taga-Tesalonica

Tungkol naman sa pagparito ng ating Panginoong Hesukristo at sa pagtitipon niya sa atin, ipinamamanhik namin sa inyo, mga kapatid, na huwag kayong magugulat agad o mababahala sa balitang dumating na ang Araw ng Panginoon. Huwag kayong maniniwala kahit sabihin nilang ito’y hula o pahayag, o kaya’y sulat na galing sa amin o sa anumang paraan, huwag kayong padadaya kaninuman.

Tinawag kayo ng Diyos sa pamamagitan ng Mabuting Balitang ipinahayag namin sa inyo upang makasama sa kaluwalhatian ng ating Panginoong Hesukristo. Kaya nga, mga kapatid, manatili kayong matatag sa mga katotohanang itinuro namin sa inyo, maging sa salita o sa sulat.

Aliwin nawa kayo ng ating Panginoong Hesukristo at ng ating Diyos at Ama na umibig sa atin at sa kanyang habag ay nagbigay sa atin ng walang pagbabagong lakas ng loob at matibay na pag-asa. Bigyan nawa kayo ng matatag na kalooban upang inyong maipahayag at maisagawa ang lahat ng mabuti.

Ang Salita ng Diyos.

SALMONG TUGUNAN
Salmo 95, 10. 11-12a. 12b-13

Panginoo’y paririto
upang hatulan n’ya tayo.

“Panginoo’y siyang hari,” sa daigdig ay sabihin,
“sanlibuta’y matatag na, kahit ito ay ugain;
sa paghatol sa nilikha, lahat ay pantay sa paningin.”

Panginoo’y paririto
upang hatulan n’ya tayo.

Lupa’t langit ay magsaya, umugong ang kalaliman,
lahat kayo na nilikhang nasa tubig ay magdiwang.
Ang bukirin at ang lahat ng naroon ay sumisigaw.

Panginoo’y paririto
upang hatulan n’ya tayo.

Pati mga punongkahoy sa galak ay mag-awitan.
Ang P**n ay pupurihin, pagkat siya ay daratal,
paririto sa daigdig, upang lahat ay hatulan.
Tapat siya kung humatol at lahat ay pantay-pantay.

Panginoo’y paririto
upang hatulan n’ya tayo.

ALELUYA
Hebreo 4, 12

Aleluya! Aleluya!
Buhay ang salita ng D’yos,
ganap nitong natatalos
tanang ating niloloob.
Aleluya! Aleluya!

MABUTING BALITA
Mateo 23, 23-26

Ang Mabuting Balita ng Panginoon ayon kay San Mateo

Noong panahong iyon, sinabi ni Hesus, “Sa aba ninyo, mga eskriba at mga Pariseo! Mga mapagpaimbabaw! Ibinibigay ninyo ang ikapu ng gulaying walang halaga ngunit kinaliligtaan ninyong isagawa ang lalong mahahalagang aral sa Kautusan: ang katarungan, ang pagkahabag, at ang katapatan. Tamang gawin ninyo ang mga ito, ngunit huwag naman ninyo kaliligtaang gawin ang iba. Mga bulag na taga-akay! Sinasala ninyo ang niknik sa inyong inumin, ngunit nilulunok ninyo ang kamelyo!

“Sa aba ninyo, mga eskriba at mga Pariseo! Mga mapagpaimbabaw! Nililinis ninyo ang labas ng tasa at ng pinggan ngunit ang loob nito’y puno ng mga nahuthot ninyo dahil sa kasakiman at pagsasamantala. Bulag na Pariseo! Linisin mo muna ang mga nasa loob ng tasa at ng pinggan, at magiging malinis din ang labas nito!”

Ang Mabuting Balita ng Panginoon.

24/08/2026

Muling ipagpapatuloy sa Oktubre, 2026 ang paggawa ng pathway sa St. Cajetan Catholic Cemetery. Malugod at aming pong pinasasalamatan ang inyong tulong!

24/08/2026

𝐊𝐀𝐏𝐈𝐒𝐓𝐀𝐇𝐀𝐍 𝐍𝐈 𝐀𝐏𝐎𝐒𝐓𝐎𝐋 𝐒𝐀𝐍 𝐁𝐀𝐑𝐓𝐎𝐋𝐎𝐌𝐄
𝐀𝐠𝐨𝐬𝐭𝐨 𝟐𝟒, 𝟐𝟎𝟐𝟔

UNANG PAGBASA
Pahayag 21, 9b-14

Pagbasa mula sa aklat ng Pahayag

Wika ng anghel sa akin, “Halika, at ipakikita ko sa iyo ang Babaing makakaisang-dibdib ng Kordero.” Nilukuban ako ng Espiritu, at inihatid ako ng anghel sa ibabaw ng isang napakataas na bundok. Ipinakita niya sa akin ang Jerusalem, ang Banal ng Lungsod, na bumababa mula sa langit buhat sa Diyos. Nagliliwanag ito dahil sa kaningningan ng Diyos; kumikislap na gaya ng hiyas na haspeng sinlinaw ng kristal. Ang pader nito’y makapal at mataas at may labindalawang pinto, bawat isa’y may bantay na anghel. Nakasulat sa mga pinto ang pangalan ng labindalawang lipi ng Israel. Tatlo ang pinto ng bawat panig: tatlo sa silangan, tatlo sa timog, tatlo sa hilaga, at tatlo sa kanluran. Ang pader ng lungsod ay may labindalawang saligang-bato at nakasulat dito ang pangalan ng labindalawang apostol ng Kordero.

Ang Salita ng Diyos.

SALMONG TUGUNAN
Salmo 144, 10-11. 12-13ab. 17-18

Talastas ng mga tao
dakilang paghahari mo.

Magpupuring lahat sa iyo, O Panginoon, ang iyong nilalang;
lahat mong nilikha ay pupurihin ka’t pasasalamatan.
Babanggitin nilang tunay na dakila ang ‘yong kaharian,
at ibababalitang tunay kang dakila’t makapangyarihan.

Talastas ng mga tao
dakilang paghahari mo.

Dakila mong gawa’y upang matalastas ng lahat ng tao,
mababatid nila ang kadikalaan ng paghahari mo.
Ang paghahari mo’y sadyang walang hanggan, hindi magbabago.

Talastas ng mga tao
dakilang paghahari mo.

Matuwid ang Diyos sa lahat ng bagay niyang ginagawa;
kahit anong gawin ay kalakip doon ang habag at awa.
Siya’y nakikinig at handang tumulong sa lahat ng tao
sa sinumang taong pagtawag sa kanya’y tapat at totoo.

Talastas ng mga tao
dakilang paghahari mo.

ALELUYA
Juan 1, 49b

Aleluya! Aleluya!
G**o, Anak na Butihin
ng Diyos Amang masintahin,
ika’y hari ng Israel.
Aleluya! Aleluya!

MABUTING BALITA
Juan 1, 45-51

Ang Mabuting Balita ng Panginoon ayon kay San Juan

Noong panahong iyon, hinanap ni Felipe si Natanael, at sinabi rito, “Natagpuan namin si Hesus na taga-Nazaret, ang anak ni Jose. Siya ang tinutukoy ni Moises sa kanyang sinulat sa Kautusan, at gayun din ng mga propeta.” “May magmumula bang mabuti sa Nazaret?” Tanong ni Natanael. Sumagot si Felipe, “Halika’t tingnan mo.”

Nang malapit na si Natanael ay sinabi ni Hesus, “Masdan ninyo ang isang tunay na Israelita; siya’y hindi magdaraya!” Tinanong siya ni Natanael, “Paano ninyo ako nakilala?” Sumagot si Hesus, “Bago ka pa tawagin ni Felipe, nakita na kita nang ikaw ay nasa ilalim ng puno ng igos.” “Rabi, kayo po ang Anak ng Diyos! Kayo ang Hari ng Israel!” wika ni Natanael. Sinabi ni Hesus, “nanampalataya ka ba dahil sa sinabi ko sa iyong nakita kita sa ilalim ng puno ng igos? Makakikita ka ng mga bagay na higit kaysa rito!” At sinabi niya sa lahat, “Tandaan ninyo: makikita ninyong bukas ang langit, at ang mga anghel ng Diyos ay manhik-manaog sa kinaroroonan ng Anak ng Tao!”

Ang Mabuting Balita ng Panginoon.

24/08/2026

Agosto 24, 2026 Kapistahan ni Apostol San Bartolome (Jn. 1, 45-51) – Reb. Padre Boyet I. Asesor, MF

Unang Pagninilay:
Maraming mga dalubhasa sa Banal na Kasulatan o Bibliya ang nagsasabi na si Nathaniel at Bartolome ay iisang tao. Siya ay taga-Cana, Galilea, ang pinangyarihan ng unang himala ni Hesus. Ang Nazareth ay nasa ibabang bahagi ng Galilea; dito nanirahan si Hesus ng kanyang pagkabata. Tulad ni Pedro, nakilala niya si Hesus sa pamamagitan ni kanyang kapatid na si San Andres. Si Nathanael naman ay nakilala si Hesus sa pamamagitan ng kanyang kaibigang si Felipe. Hindi minamaliit ni Bartolome ang Nazareth ng sabihin niya na “may mabuti magmumula sa Nazareth” (Jn. 1:45). Inilahad lamang niya na sa Lumang Tipan ay walang nababanggit ukol sa Nazareth. Ito rin ang nagpapatotoo kung paano naging payapa, payak at lihim sa pampublikong mata ang pagkabata ni Hesus.
Sang-ayon sa mga dalubhasa sa Esekriptura, ang salitang Israel (etymology) ay nangangahulugang “nakita ang Diyos”. Napakapalad ni Bartolome sapagkat, tinugon niya ang paanyaya ni Felipe, “Halika at tingnan mo” (Jn. 1, 46). Hindi ba't masasabi natin na tayo ay mapalad din sapagkat sa mga sakramento, lalo na sa Eukaristiya, si Hesus ay ating nakikita at nakakasama”. Kapiling din natin si Hesus sa “salitang nagbibigay-buhay” at gabay natin sa gitna ng ating pang-araw-araw na gawain. Sinasamahan niya tayo sa krus ng ating buhay.
Sa pagbabalik ni Hesus sa Kanyang Ama sa kalangitan, tumugon si Bartolome sa atas na ipangaral ang Mabuting Balita. Nagtungo si Bartolome sa Armenia at India upang mangaral. Sinasaad sa mga aklat na siya ay namatay sa pamamagitan ng pag-aalis ng kanyang balat habang siya ay buhay pa at saka pinugutan ng ulo.

Ikalawang Pagninilay:
Sa ebanghelyo ngayon ay sinabi ni Hesus na “Masdan ninyo ang tunay na Israelita, hindi siya mandaraya” (Jn. 1). Sana masabi rin sa atin ito ng Panginoon sa ating panunungkulan at paglilingkod sa sambayanan na tayo ay tapat at hindi mandarayaang lingkod!

23/08/2026

Sunday Catechesis