28/05/2025
Belgic Confession of Faith Article 13 | Live via Zoom
Time: May 28, 2025 08:00 PM Asia/Manila
Join Zoom Meeting
https://us06web.zoom.us/j/89964800626
Meeting ID: 899 6480 0626
Article 13: Ang Doktrina ng Pangangalaga or Probidensya ng Diyos
Sumasampalataya kami na matapos likhain ng mabuting Diyos ang lahat ng mga bagay, hindi Niya sila pinabayaan sa tyansa (chance) o kapalaran. Sa halip, Siya’y gumagabay at namamahala sa kanila ayon sa Kanyang banal na kalooban, sa paraang walang nangyayari sa mundong ito na labas sa Kanyang pagkakasa-ayos sa lahat. Ngunit ang Diyos ay hindi pinagmulan ng kasalanan, ni hindi Siya pwedeng sisihin sa anumang kasalanang nagaganap. Sapagkat ang Kanyang kapangyarihan at kabutihan ay sobrang dakila at hindi lubos na maunawaan sa paraang isinasa-ayos Niya at ginaganap ang Kanyang mga gawa nang napakahusay at makatuwiran kahit na ang mga demonyo at masasamang tao ay kumikilos nang walang katarungan. Hindi na namin pinagpipilitan na siyasatin pa, nang may hindi wastong pagtataka (curiosity), itong Kanyang pagkilos na higit sa kaunawaan ng tao at higit sa mismong kakayahan natin na maintindihan ito. Sa halip, may buong pagpapakumbaba at paggalang na minamahal namin ang mga matuwid na pasya ng Diyos, na siyang hindi namin lubusang nalalaman, at sapat na sa amin ang maging mga alagad ni Cristo, upang sa gayon ay matutunan namin kung ano lang ang Kanyang ipinapahayag sa Kanyang Salita at hindi na kami lumagpas sa mga ito. Ang doktrinang ito ay nagbibigay sa amin ng matinding kaaliwan (comfort) at pag-asa, sapagkat itinuturo nito sa amin na walang pwedeng mangyari nang dahil sa tsamba o tyansa lang kundi sa pamamagitan lamang ng pagkakasa-ayos ng aming mapag-biyayang Ama na nasa langit. Siya ay sumusubaybay sa amin nang may pag-aalaga tulad ng isang ama, at pinananatili Niya ang lahat ng mga nilalang sa ilalim ng Kanyang kapangyarihan, kaya’t wala kahit isang buhok sa ating mga ulo (sapagkat silang lahat ay bilang ng Diyos) o kahit ang isang maliit na ibon ang maaaring bumagsak sa lupa nang walang pahintulot ng aming Ama. Sa paniniwalang ito, kami ay may kapayapaan at kapahingahan ng loob, sapagkat alam namin na pinipigilan at binabantayan Niya rin ang mga diyablo at ang lahat ng aming mga kaaway, na silang walang akayahan na saktan kami kung hindi ito pinahintulutan at niloob ng Diyos. Dahil dito, aming tinatanggihan ang kasumpa-sumpang kamalian ng mga Epicureo (Epicureans), na nagtuturo na ang Diyos ay walang pakialam at hinahayaan na lang Niya ang lahat sa tyansa at kapalaran.
