21/12/2025
Pamagat: David: “Kung magkagayon na, aking tuturuang sa iyo lumapit ang makasalanan.”
Ito po ay bahagi ng kinathang awit ni David, ang Awit 51, nang siya’y harapin ni propeta Natan dahil sa kanyang kasalang nagawa na nilihim niya, pinagtakpan, hindi tunay na pinagsisihan.
Sa 2 Samuel 12, ganito po ang mababasa natin:
12 Isinugo ni Yahweh kay David ang propetang si Natan. Pagdating doon ay sinabi niya, “Sa isang lunsod ay may dalawang lalaki, mayaman ang isa at ang isa'y dukha. 2 Maraming kawan at bakahan ang mayaman, 3 samantalang ang dukha ay may isa lamang munting babaing tupa. Inalagaan niya ito at pinalaking kasama ng kanyang mga anak. Kinakalong niya itong parang anak na babae, isinasalo sa pagkain at pinapainom. 4 Minsan, may manlalakbay na naging panauhin ng mayamang lalaki. Sa halip na sa kanyang kawan kumuha ng hayop na papatayin, ang kaisa-isang tupa ng dukhang iyon ang kinuha ng mayaman. At iyon ang inihanda niya para sa kanyang panauhin.”
5 Napasigaw sa galit si David, “Saksi si Yahweh, ang Diyos na buháy,[a] dapat mamatay ang taong iyan! 6 Kailangang magbayad siya nang apat na beses sa kanyang ginawa, sapagkat inapi niya ang dukha.”
7 Sinabi agad ni Natan kay David, “Ikaw ang lalaking iyon! Ito ang ipinapasabi sa iyo ni Yahweh, ang Diyos ng Israel: ‘Ginawa kitang hari ng Israel, iniligtas kita mula sa mga kamay ni Saul. 8 Ibinigay ko na rin sa iyo ang sambahayan at mga asawa ni Saul pati ang mga lipi ng Israel at Juda. At mabibigyan pa kita ng higit pa riyan. 9 Bakit mo hinamak ang salita ni Yahweh at gumawa ka ng masama sa kanyang paningin? Ipinapatay mo ang Heteong si Urias sa mga Ammonita at kinuha mo pa ang kanyang asawa. 10 Dahil sa ginawa mong ito, at ako'y itinakwil mo, tandaan mong laging may mamamatay sa patalim sa iyong sambahayan.’ 11 Sinabi pa rin ni Yahweh, ‘Pag-aawayin ko ang iyong sambahayan; sa harapan mo'y ibibigay ko sa iba ang iyong mga asawa, at sisipingan sila kahit sa katanghaliang-tapat. 12 Ginawa mo ito nang lihim, hayag kitang paparusahan at makikita ito ng buong Israel.’”
13 Sinabi ni David kay Natan, “Nagkasala ako kay Yahweh.”
Sumagot si Natan, “Pinapatawad ka na ni Yahweh at hindi ka mamamatay.
Ang kasalanang ginawa ni David na pilit niyang pinagtakpan ay ang kasalanan ng pangangalunya at pagpatay. P**i basa nalamang 2 Samuel 11.
Nang ika nga’y ma-corner na si David ay pinahayag nanga niya na siya’y nagkasala, at pansinin po ninyo ang pag-amin niya, verse 13, “Nagkasala ako kay Yahweh.”
Maaari niyang sabihin kay propeta Natan, Nagkasala ako, oo pero huwag mo nang ipag-alala dahil ako ang pinakamakapangyarihan sa Israel, ako ang hari. O maaari niyang sabihing, nagkasala ako kay Batsheba ng pangangalunya, nagkasala ako ng pagpatay kay Urias, nagkasala ako sa pamilya nila, pamilya ko, nagkasala ako sa mamayang Israel bilang hari nila, ngunit walang pag-aalala dahil nga siya ang pinakamakapangyarihan sa Israel. Pero ang sinabi niya, “Nagkasala ako kay Yahweh.” Pagpapahayag niya siya man ang pinakamakapangyarihan sa Israel, siya’y nasa ilalim ng makapangyarihang Dios sa buong sangnilikha, kaya’t ang nagawa niyang kasalanan ay hindi lamang sa tao, kundi sa Dios.
Remember si apostol Pablo na umusig sa mga mananampalataya? Nang siya’y papuntang Damasco para usigin ang mga mananampalataya roon, siya’y sinalubong ng Panginoong Jesus sa pamamagitan ng liwanag na nakakasilaw at sinabi kay Pablo/Saulo: “Saulo, Saulo! Bakit mo ako inuusig?” “Ako si Jesus, ang iyong inuusig,” Gaw 9: 4 at 5
Opo, anumang gawin nating masama sa kapwa natin ay ginawa natin sa Panginoon. Kaya si David ito ang tugon kay propeta Natan: “Nagkasala ako kay Yahweh.”
Sa Awit 51 verse 4 wika niya: Sa iyo lang ako nagkasalang tunay, at ang ginawa ko'y di mo kinalugdan; kaya may katuwiran ka na ako'y hatulan, marapat na ako'y iyong parusahan.
Hindi lamang niya kinilala na sa Dios siya nagkasala, kundi tinanggap na marapat lamang siyang parusahan.
Pinarusahan nga siya ng Panginoon, ngunit hindi katumbas ng kanyang kasalanan; na ang katumbas ay kamatayan. Tugon ni propeta Natan sa kanya sa verse 13b ng 2 Samuel 12: “Pinapatawad ka na ni Yahweh at hindi ka mamamatay.
Pinatawad nga po siya ng Panginoon.
Opo, ang marapat sa atin ay parusa sa ating makasalanan, ang parusa ay kamatayan. Maaari niyang kunin ang ating buhay sa isang kisapmata, ngunit binibigyan niya tayo ng buhay at ito ay biyaya ng Dios at opo pagkakataon para tayo ay magsisi at manumbalik sa Kanya. Wika po ni apostol Pedro sa kanyang pangalawang sulat, chapter 3: 9 Ang Panginoon ay hindi nagpapabaya sa kanyang pangako (ang Siya’y muling babalik) gaya ng inaakala ng ilan. Sa halip, nagbibigay siya ng pagkakataon sa lahat sapagkat hindi niya nais na may mapahamak, kundi ang lahat ay makapagsisi at tumalikod sa kasalanan.
Nawa nga po ngayong kapaskuhan ay tunay mong maranasan ang tunay na hatid ng Dios sa araw ng Pasko, ang pagpapatawad Niya at gaya ni David, hindi lang natin masabi kundi gawin: “Kung magkagayon na, aking tuturuang sa iyo lumapit ang makasalanan.”Awit 51: 13
Hanggang sa muli po!:) Merry Christmas po! Tsup!
