07/03/2026
Opisyal na Tugon ng ReBAPC Tungkol sa Isyu ng Covenant Theology
Magandang gabi, mga kapatid at mga kamanggagawa sa Panginoong Jesu-Cristo.
Kinikilala namin na maging sa aming bukluran ay may lumalagong pag-iral ng pagkakaiba-iba ng mga doktrinang may kinalaman sa aming pagkakailanlan bilang mga Particular Baptists, at sa aming pag-unawa sa pinanghahawakan naming pahayag - ang 1689 Baptist Confession of Faith. Ang usaping tungkol sa Covenant Theology ay isa sa mga punto ng aming pagkakaiba-iba. Kinikilala rin namin ang panganib ng pagkakahati-hati dulot ng mga pagtatalo; ito ay nagbibigay-daan sa diyablo upang lituhin ang mga iglesiya sa iisang layunin nito.
Gayun pa man, bilang tugon, kami na mga kaanib ng ReBAPC ay nakikiisa sa REBAP Luzon sa “pagsisikap na mapanatili ang pagkakaisa ng Espiritu sa buklod ng kapayapaan.” (Eph. 4:3)
Nakalakip sa aming sinumpaang tungkulin ang mga sumusunod:
1. Na ipamalas ang nakikitang pagkakaisa ng mga iglesiya ni Jesu-Cristo sa mundo. (John 17:20-26; Eph. 4:4-6);
2. Na panatilihin ang pagkakaisa ng pananampalataya at pamumuhay na nakapaloob sa aming pahayag ng pananampalatayang Cristiano (hal. Creeds and confessions), lalo na sa pagharap sa mga katanungang may kinalaman sa doktrina at pagsasabuhay nito. (Acts 15:1-29; 1 Cor. 14:33);
3. Na makibahagi sa paghasik ng Ebanghelyo, lalo na sa pagbabalik-búhay (revitalizing) at pagtatanim ng mga iglesiyang humahawak sa tradisyong Reformed, sa pagsuporta sa mga misyonaryo, at pagsasanay sa mga kalalakihan para sa paglilingkod. (Phil. 1:3-7; 2 Cor. 8:18).
Ang bawat iglesiyang kaanib ng ReBAPC ay magsisikap rin na gabayan ang aming mga lokal na iglesiya tungkol sa pakikitungo sa bawat isa nang may maka-Cristianong pag-ibig na humahawak sa katotohanan. Patuloy naming panghahawakan ang layunin ng pagtuturo sa mga banal: "hanggang makarating tayong lahat sa pagkakaisa ng pananampalataya, at sa ganap na pagkakilala sa Anak ng Diyos, hanggang maging taong may sapat na gulang, hanggang sa sukat ng ganap na kapuspusan ni Cristo." (Eph. 4:13)
Sa lahat ng mga pangyayaring ito, nawa, ang bawat iglesiya’y patuloy na pagkaisahin tungo sa ikapupuri ng Ama, sa pamamagitan ng Anak, at sa pagkilos ng Banal na Espiritu.
Kaming mga pinagbuklod ni Cristo sa pag-ibig,
Mga kaanib ng Reformed Baptist Association in the Province of Cavite (ReBAPC)
Cross Bearer Community Church
Grace of Calvary Community Church
Grace Through Faith Community Church
Reformed Life Community Church
Sovereign Grace of Christ Christian Church
(Litrato mula sa FB account ni Ptr. Romeo Endaya, mensahero ng Grace Reformed Baptist Church - Calauag, kaanib ng REBAP Luzon)
