15/08/2026
Purihin ang maluwalhating pag-aakyat sa langit kay Maria!
Matapos ang ilang araw na singkad na pag-ulan, ang araw na ito ay tila mas maaliwalas—ang liwanag ng araw ay muli nating nasilayan. Tila nga nakikisaya ang langit sa dakilang kapistahang ating ipinagdiriwang ngayon, ang Asunción ng Mahal na Ina!
Ang pag-aakyat sa langit sa Mahal na Birhen ay magdulot nawa sa atin ng pag-asa. Anumang hirap, karamdaman, o kasawian ang ating kinasasadlakan, ang Diyos ay hindi nagkakait ng Kanyang pagpapala at pag-ibig, at sa Kanyang panahon ay Kanya tayong hahanguin at pananagumpayin sa mga pagsubok na ito. Tandaan nating walang makapaghihiwalay sa atin sa pag-ibig ng Panginoon! (Roma 8:35)
Ipinapahiwatig din sa atin ng kapistahang ito na ang kamatayan ay ang simula lamang ng ating paglalakbay pauwi sa Ama. Hindi nagtatapos ang ating kuwento sa ating pagyao sa lupa, bagkus ay panimula ito ng walang hanggang pag-iral at kaligayahan sa piling ng Maykapal. Inaalala natin at ipinagdarasal ang lahat ng ating kapatid na nasa bingit ng kamatayan – nawa’y ampatin ng Panginoon ang kanilang paghihirap at pawiin ang kanilang takot. Maging tuwa nawa nila ang pag-agapay ng Mahal na Birhen at ni San Jose hanggang sila’y makauwi sa Puso ni Hesus.
Masayang pagbati din ang ating ipinaaabot sa mga deboto ng Nuestra Señora de la Asunción sa buong bansa, lalong-lalo na sa ating mga kalalawigan sa Bulakan. Bulacan. Ang inyo nawang mga pagpaparangal sa Mahal na Birheng Iniakyat sa Langit ay maging daan sa pagbubuo ng mas payapa, mas mapanagutan, at mas banal na pamayanan.
Ave Maria Purisima, Regina in Caelum Assumpta!
