23/10/2024
IKASIYAM ARAW NG PAGSISIYAM KAY SAN RAFAEL ARKANGHEL
Sa ngalan ng Ama + at ng Anak + at ng Espiritu Santo. Amen.
PAGSISISI
Panginoon naming Hesukristo, Diyos na totoo at tao namang totoo, na gumawa at sumakop sa amin. Sapagkat ikaw ang Diyos namin na iniibig namin nang masakit na masakit sa tanang loob namin ang pagkakasala sa iyo. Nagtitika kaming matibay na matibay na hindi na muling magkakasala sa iyo at ipinapangako namin na sa tulong ng mahal mong grasya na babaguhin na namin ang aming asal. Inaasahan namin sa iyo ang gawang walang hanggan, ang kapatawaran ng mga kasalanan namin at inihahain namin sa iyo na parang kawas ang aming buhay, ang madla naming gawang magaling, ang kamahal-mahalan mong dugo, ang maantak na Pasion at pagkamatay mo sa krus. Nagkasala kami, Panginoon. Maawa ka sa amin. Siya nawa.
PANALANGIN SA ARAW ARAW
Maluwalhating Arkanghel San Rafael, dakilang prinsipe ng pangkat ng mga anghel sa langit. Ikaw ang ilaw na lubhang maliwanag. Isa ka sa pitong matataas na parating humaharap sa luklukan ng Diyos, na iisa at tatlo sa pagka-persona. Iniaamo namin sa iyo, nang buong kapakumbabaan, na ikaw nawa ang maging pintakasi namin, upang sa gayon, ay kamtan namin ang aming ninanasa at hinihingi sa pagsisiyam na ito, kung yaon ay mauukol sa lalong kaluwalhatian ng Diyos, at kung hindi Arkanghel na Mahal, ay hingin mong ipagkaloob sa amin, ang lalong maging dapat sa karangalan niya at sa kagalingan ng kaluluwa namin. Siya nawa.
PANALANGIN SA IKASIYAM NA ARAW
ng mga Serapin, na sumisinta sa Iyo ng lubhang maningas na pagsinta: iniaalay ko sa Iyo ang mga karapatan nitong mga maningas na Espiritu at ng Arkanghel San Rafael, na sa apoy ng kanyang tapat na pagsinta ay pinapag-alab ang mga puso ng dalawang Tobias gayon din ng mga kasambahay nila. Pinaglagablab rin niya ang puso ng mga maawaing si San Juan de Dios na lagi nang umiibig sa Iyo, kayaโt sa oras ng kanyang pagpanaw sa buhay na ito, siya ay dinalaw ni San Rafael, kasama ni San Juan Ebanghelista, at silang dalawa ang nagsama sa kabanal-banalang Ina na siyang nagpahid sa mukha ng Banal nang ito ay naliligo sa pawis na malamig, pawis na hindi singaw ng sakit na taglay kundi bunga ng maningas na sinta niya sa Iyo. Ipagkaloob Mo sa akin ang kamahal-mahalang biyayang manatili sa biyaya Mo, at pakundangan sa mga sakit ng Mahal na Birhen Maria, at sa mabisang saklolo ni San Rafael at ni San Juan Ebanghelista ay kamtan ko sa oras ng kamatayan ang tunay na pagsisisi sa mga pagkakasala ko. Mag-alab nawa ang aking puso sa tapat na pagsinta sa Iyo at sa kaluwalhatian Mong walang hanggan. Ipagkaloob Mo rin nawa sa akin ang biyayang hinihingi ko sa pagsisiyam na ito kung nauukol sa lalong malaking kapurihan at kaluwalhatian Mo. Siya nawa.
PANAWAGAN
Kasama Kang tunay, Lubos
O bunying sugo ng Diyos
Ng Poong San Juan de Dios
Sa maysakit pagkukupkop
Pinagpala mong tanan
Tahanang mga hihigan
At sa salantang may damdam
Ang awa mo ay lubos naman
Gawa mong halimbawa
Sa amin ipakita mong pawa
Matuto kaming maawa
Sa maysakit at salanta.
PANALANGING PANGWAKAS SA ARAW ARAW
O dakilang prinsipe sa kalangitan, kalinis-linisang Arkanghel San Rafael, kami ay nagpupuri sa Panginoong Diyos na lumalang sa iyo. Naliligayahan ang aming kaluluwa, sapagkat ikaw ay espiritu sa langit. Isa sa pitong lalong malapit sa kamahalan ng Diyos. Ikaw ang saklolo ng mga naglalakad, aliw ng mga maawain, makapangyarihan sa mga inaalihan ng demonyo. Ikaw ang katibayan ng malilinis na loob, bunying sugo ng Diyos, sakdalan ng mga mag-asawa, pintakasi ng mga di magka-anak, at manggagamot ng mga maysakit sa mata. Kami ay nagpapasalamat sa Diyos na nagkaloob sa iyo ng malaking kapangyarihan, at maligayang inihahain namin sa iyo ang munting alay ng pagsisiyam na ito. Yayamang sa mahal na mga kamay mo ay marami ang gumiginhawa, kami ay humihingi sa iyo ng isang limos. At bagamat karapat-dapat na kami ay pagkaitan mo ng tulong ay umaasa pa rin kami na igagawad mo ang hinihingi namin. Nagmamakaawa kami sa iyo, alang alang sa Mahal na Pasion at pagkamatay ng ating Panginoong Hesukristo. Pakundangan rin naman sa mga karapatan ng kabanal-banalang ina niyang si Birheng Maria, gayon din sa pamamagitan ng mga anghel at banal sa langit. At sa mga karapatan noong mga nawili sa una, nawiwili hanggang ngayon, at mawiwili hanggang sa katapusan ng panahon sa pamimintakasi sa iyo na makakamit namin hinihingi naming biyaya sa pagsisiyam na ito kung yaon ay nauukol sa kaluwalhatian ng Diyos at sa ikabubuti ng aming kaluluwa. Purihin nawa ang Diyos at pasalamatan magpakailanman. Siya nawa.
PANALANGIN SA ARAW ARAW KAY SANTA MARIA
O kalinis-linisang Maria, kamahal-mahalang Birhen at Ina ng Diyos na makapangyayari sa lahat. Nagpapatirapa ngayon sa mahal Mong paanan itong dakilang makasalanan na pinarusahan na sana ng Diyos Ama kung hindi mo napamagitan sapagkat ikaw ang Ina ng mga makasalanan. Ipinagmamakaawa namin sa iyo nang buong pag-asa, ayon sa nakikita naming pagkamaawain mo, na huwag mong lingunin ang aming mga kasalanan, kundi ang mga karapatan ng alipin mong tapat, ang maluwalhating Arkanghel San Rafael, at hingin mo sa iyong Mahal na Anak na kami ay pagkalooban ng kanyang biyaya upang siya ay mapaglingkuran namin at huwag pagkasalahan. Matutuhan nawa naming pagsisihan ang mga nagawa naming sala at bukod sa biyayang hinihingi namin sa pagsisiyam na ito ay ipagkaloob mo rin naman ang pagkabantog ng Banal na Pananampalatayang Katoliko, ang kagalingan ng kanyang kabanalan, Papa Francisco, at ng mga obispo ng Diyosesis na ito. Loobin mo rin nawang magkaisa-isa ang lahat ng haring binyagan, ang kapayapaan at kaginhawaan nitong sangkapuluan at ang kapahingahan ng mga kaluluwa sa purgatoryo. O Maria, ilingon mo sa amin ang mga mata mong maawain sa mga hirap at mga panganib at huwag mo kaming lisanin hanggang sa kami ay makita mo sa langit. Upang doon ay purihin namin ang Ama, ang Anak at ang Espiritu Santo at ikaw rin naman na katamis-tamisang Ina namin, makarating saan man, siya nawa.
ANTIPONA
Maluwalhating Prinsipe, Rafael Arkanghel, alalahanin mo kami ngayon at kailanman, at parati mo kaming idalangin sa Anak ng Diyos.
V. Ang anghel ay nakatayong malapit sa dambana sa simbahan
R. Ang nasa kamay niyang insensaryo ay dalisay na ginto.
PANALANGIN
Diyos na inibig mong ang alipin mong si Tobias ay samahan sa mga lakad niya ng magandang palad na si San Rafael Arkanghel, isinasamo namin sa Iyo, na kaming mga alipin mo ay saklolohan ng maingat na pagtingin niya at parating kalingain ng kanyang tulong. Pakundangan sa Panginoon naming Hesukristo, Diyos na sumasaiyo, nabubuhay at naghaharing kasama ng Espiritu Santo, magpakailanman. Siya nawa.
+ Sa ngalan ng Ama, ng Anak, at ng Espiritu Santo.
Amen.
