02/08/2026
KAILANGAN ANG IGLESYA
Magpakatatag tayo sa ating pag-asa at huwag nang mag-alinlangan pa, sapagkat ang nangako sa atin ay maaasahan. 24Sikapin din nating gisingin ang damdamin ng bawat isa sa pagmamahal sa kapwa at sa paggawa ng mabuti. 25Huwag nating kaliligtaan ang pagdalo sa ating mga pagtitipon, gaya ng ginagawa ng ilan. Sa halip, palakasin natin ang loob ng isa't isa, lalo na ngayong nakikita nating malapit na ang araw ng Panginoon. (Hebreo 10:23-25)
Hindi lamang tayo iniligtas ng Diyos at pagkatapos ay hinayaang magpasiya kung ano ang ating gagawin sa buhay na nailigtas. Manapa, kasama ng pagliligtas ay ang paglalakip Niya sa atin sa ating mga kapwa mananampalataya, sa malaki o maliit man na mga kapulungan. Inilahok Niya tayo sa Kanyang iglesya upang dito ay palaguin sa pamamagitan ng iba at gamitin din naman upang sila rin ay palaguin sa pananampalataya.
Ang paglahok ng buhay sa isa't-isa ay kailangan ng bawat Kristiyano. Napakahangal ng iba sa pag-iisip na kaya nilang ipamuhay ang bagong buhay ng nakahiwalay sa iglesya. Hindi man lamang natatanto ng mga ito na ang mga utos sa mananampalataya ay laging nakakawins sa iglesya at kapwa nag-iiglesya. "Pray for one another; carry the burdens of one another, forgive one another, etc." Ito po ay mga utos na magagawa lamang kung tayo ay nakasawsaw sa buhay-pag-iiglesya.
Pagpasiyahan po nating ilahok ang ating buhay sa ating mga kapwa sa iglesya. Matapos matanto na ito na ang iglesyang kabibilangan, huwag matakot sa sakit o bigat na maaaring idulot ng pakikipag-relasyon sa ating kapwa. Ito mismo ang paraan ng Diyos upang tayo ay mabago at maiwangis sa Panginoong Jesus. Ang mga idudulot ng pakikisama at pakikikapatid ang mga pagbabagong kailangan ng bawat isa.
Doon sa mga ayaw na nasasaktan, at ayaw ding nakakasakit, sila ay dumadalo ngunit hindi nababago ayon sa kailangan. Sila, sa gayon, ay nalilinlang lamang. - Ptr. Mario Pingol
