17/08/2021
Our Daily Bread Pilipinas
Pagkaing Espirituwal Ngayong Miyerkules.
Agosto 18, 2021
Pamagat: Napapagod Ka Na Ba?
May anghel na kumalabit sa kanya at sinabi, “Bumangon ka at kumain.” -1 Hari 19:5
Basahin: 1 Hari 19:1-9 (Ang Salita ng Dios)
1 Ngayon, sinabi ni Ahab sa asawa niyang si Jezebel ang lahat ng ginawa ni Elias, at kung paano nito pinagpapatay ang lahat ng propeta ni Baal.
2 Kaya nagpadala si Jezebel ng mensahe para kay Elias na nagsasabi, “Lubusan sana akong parusahan ng mga dios kung sa ganitong oras bukas ay hindi pa kita napapatay, tulad ng ginawa mo sa mga propeta.”
3 Natakot si Elias, kaya tumakas siya papunta sa Beersheba na sakop ng Juda, at iniwan niya roon ang utusan niya.
4 Pagkatapos, naglakad siya ng isang araw papuntang ilang. Nagpahinga siya at umupo sa ilalim ng punongkahoy at nanalangin na mamatay na lang sana siya. Sinabi niya, “Sobra na po ito Panginoon! Kunin na lang ninyo ang buhay ko, wala naman akong ipinagkaiba sa aking mga ninuno.”
5 Pagkatapos, humiga siya sa ilalim ng punongkahoy, at nakatulog. Biglang may anghel na kumalabit sa kanya at sinabi, “Bumangon ka at kumain.”
6 Pagdilat niya, may nakita siyang tinapay sa ulunan niya, na niluto sa mainit na bato, at tubig na nakalagay sa sisidlan. Kumain siya at uminom, at nahigang muli.
7 Muling bumalik ang anghel ng Panginoon, kinalabit si Elias at sinabi, “Bumangon ka at kumain, dahil malayo pa ang iyong lalakbayin.”
8 Kaya bumangon si Elias, kumain, at uminom. Pinalakas siya ng kanyang kinain, at naglakbay siya sa loob ng 40 araw at 40 gabi, hanggang makarating siya sa Horeb,[a] ang bundok ng Dios.
9 Puma*ok siya sa isang kweba at doon natulog kinagabihan.
Ang Salita ng Dios (Tagalog Contemporary Bible)
Sinabi ni Zack Eswine sa kanyang libro na silang mga pastor ay lubhang napapagod sa bigat ng mga problemang pasan nila. Hindi man tayo ang mismong tinutukoy ni Zack, nakakaranas din tayo ng pisikal, mental at espirituwal na pagkapagod. Dahil ito sa mga problema at sa dami ng mga responsibilidad. Minsan nga ay gusto na lang natin itong tulugan.
Mababasa naman natin sa 1 Hari 19 ng Biblia ang tungkol kay Propeta Elias na nakaranas din ng matinding pagsubok. Nais siyang ipapatay ni Reyna Jezebel (TAL. 1-2) dahil sa pagpatay niya sa mga propeta ng dios-diosang si Baal (TINGNAN ANG 18:16-40). Natakot si Elias kaya tumakas siya at idinalangin niya sa Dios na mamatay na lang sana siya (19:3-4).
Humiga at nakatulog si Propeta Elias dahil sa lubhang pagkabalisa. Kinalabit siya ng isang anghel at sinabi na “bumangon [siya] at kumain” (TAL. 5, 7). Pinalakas siya ng pagkaing ipinagkaloob ng Dios at “naglakbay siya sa loob ng 40 araw at 40 gabi” hanggang sa makarating siya sa isang kuweba (T. 8-9). Kinausap siya doon ng Dios at pinalakas ang kanyang loob. Dahil doon, naging handa muli si Elias na ipagpatuloy ang ipinapagawa sa kanya ng Dios (TAL. 9-18).
Maraming paraan ang maaaring gamitin ng Dios upang palakasin ang ating loob. Maaaring sa pamamagitan ito ng ibang tao, isang awitin, pananalangin o pagbabasa ng Biblia.
Napapagod ka na ba dahil sa bigat ng iyong problema? Ipagkatiwala mo sa Dios ang mga ito. Papasanin Niya ang mga ito para sa iyo.
-Julie Schwab
Panginoon, salamat po sa kapahingahang ipinagkakaloob N’yo po sa akin sa tuwing lumalapit po ako sa Inyo sa panahon ng mga pagsubok.
