10/05/2026
𝐇𝐀𝐏𝐏𝐘 𝐌𝐎𝐓𝐇𝐄𝐑`𝐒 𝐃𝐀𝐘! 𝐍𝐚𝐧𝐚𝐲, 𝐦𝐚𝐦𝐚, 𝐦𝐨𝐦𝐦𝐲, 𝐢𝐧𝐚, 𝐢𝐧𝐚𝐲, 𝐥𝐨𝐥𝐚, 𝐓𝐢𝐭𝐚. 𝑾𝒆𝒍𝒐𝒗𝒆𝒚𝒐𝒖 𝒑𝒐.
PANALANGIN PARA SA MGA INA
Diyos na Pinagmumulan ng Buhay, Diyos ng mga babaeng banal tulad nina Sara, Ruth at Rebecca, Diyos ni Elizabet na ina ni Juan Bautista, Diyos ng Mahal na Birheng Maria na Ina ng Iyong Anak na si HesuKristo: dinggin po Ninyo ang aming panalangin, at pagkalooban ng pagbabasbas ang lahat ng mga ina at lola.
Basbasan Mo po sila ng lakas na nagmumula sa Iyong Banal na Espiritu, sapagkat sa pamamagitan nila natutunan ng mga anak at apo kung paanong tumayo at lumakad, kung paanong magsalita at maglaro, at kung paanong makalapit sa Iyong Banal na Harapan sa pamamagitan ng tapat na panalangin.
Pagkalooban Mo po sila ng biyayang makiisa sa Iyong Banal na Hapag at matanggap ang Pagkaing Nagbibigay-Buhay, sapagkat sila ang mga nagtaguyod at nagpakain sa amin, at sila rin ang nagturo sa amin kung paanong itaguyod ang aming mga sarili at ang aming mga pamilya.
Pagkalooban Mo po sila ng kalusugan at kapayapaan, ng galak at kaligayahan, at ng pagkakataong kami’y kanilang maipagmalaki bilang mga anak.
Pagkalooban Mo rin po sila ng mga kaibigang mananatiling tapat, upang kanilang patuloy na madama ang Iyong Pagkalinga’t Pagmamahal.
Gayundin, aming isinasama sa panalangin ang mga babaeng walang nakakaalaala,lalo na ang mga tahimik na itinataguyod ang kanilang pamilya, naglilingkod nang may kababaang-loob, at nagtitiis ng hirap sa buhay para sa kapakanan ng kanilang asawa’t mga anak.
Kaya ang aming hiling, Diyos ng Kadalisayan, na Ika’y Manahan sa aming lahat, sa Ngalan ng Ama, at ng Anak, at ng Espiritu Santo, AMEN.
HAPPY MOTHERS' DAY PO!
Pagbati mula sa: SPPC FRANCES PROPER.
