31/01/2023
Pagkaing Espirituwal ngayong Martes
Enero 31, 2023
Pamagat: Magpatawad
Huwag kayong papatalo sa masama kundi talunin ninyo ang masama sa pamamagitan ng paggawa ng mabuti. – Roma 12:21
Basahin: Roma 12:9–21
Ang Salita ng Dios (Tagalog Contemporary Bible)
9 Magmahalan kayo nang tapat. Iwasan ninyo ang masama at laging gawin ang mabuti.
10 Magmahalan kayo bilang magkakapatid kay Cristo at maging magalang sa isaʼt isa.
11 Huwag kayong maging tamad kundi magpakasipag at buong pusong maglingkod sa Panginoon.
12 At dahil may pag-asa kayo sa buhay, magalak kayo. Magtiis kayo sa mga paghihirap at laging manalangin.
13 Tulungan ninyo ang mga pinabanal ng Dios na nangangailangan, at patuluyin ninyo sa inyong mga tahanan ang walang matutuluyan.
14 Idalangin ninyo sa Dios na pagpalain ang mga taong umuusig sa inyo. Pagpalain ninyo sila sa halip na sumpain.
15 Makigalak kayo sa mga nagagalak, at makiramay kayo sa mga naghihinagpis.
16 Mamuhay kayo nang mapayapa sa isaʼt isa. Huwag kayong magmataas, sa halip ay makipagkaibigan kayo sa mga taong mababa ang kalagayan. Huwag kayong magmarunong.
17 Huwag ninyong gantihan ng masama ang mga gumagawa sa inyo ng masama. Gawin ninyo ang mabuti sa paningin ng lahat.
18 Hanggaʼt maaari, mamuhay kayo nang mapayapa sa lahat ng tao.
19 Mga minamahal, huwag kayong maghihiganti. Ipaubaya ninyo iyan sa Dios. Sapagkat sinabi ng Panginoon sa Kasulatan, “Ako ang maghihiganti; ako ang magpaparusa.”
20 Kaya, “Kung nagugutom ang iyong kaaway, pakainin mo. Kung siyaʼy nauuhaw, painumin mo. Dahil kapag ginawa mo ang mga ito, mapapahiya siya sa kanyang sarili.”
21 Huwag kayong patatalo sa masama kundi talunin ninyo ang masama sa pamamagitan ng paggawa ng mabuti.
Ang Salita ng Dios (Tagalog Contemporary Bible)
Copyright © 2009, 2011, 2014, 2015 by Biblica, Inc. ®
Used by permission of Biblica, Inc.® All rights reserved worldwide.
Noong taong 1994, binuwag ng bansang Timog Aprika ang sistema ng apartheid – pagtuturing na mababa ang iba. Pinalitan nila ito ng sistemang demokratiko. Naging mahirap sa simula ang pagpapalit ng sistema ng gobyerno. Sinabi ni Desmond Tutu, na sumulat ng aklat na No Future Without Forgiveness, “Maaari nating makamit ang katarungan kahit pa mahirapan ang bansa natin.”
Dahil sa pagkakaroon ng bagong pamunuan sa gobyerno, naging mahirap para sa Truth and Reconciliation Committee na magkaloob ng katotohanan, hustisya, at awa sa mga tao. Binigyan ng pagkakataong mapatawad at magbago ang mga taong nagkasala kung aamin sila sa mga pagkakamali nila at hihingi ng tawad. Mabubuo lamang muli ang bansang Timog Aprika kung matapang silang haharap sa katotohanan at magpapatawad.
Katulad ng Timog Aprika, nahihirapan din tayong magkaroon ng balanse sa pagkakaloob ng pagpapatawad at hustisya sa mga tao (Micas 6:8). Nararapat tayong magpakita ng pagpapatawad sa iba. Hindi tayo dapat gumanti sa iba para lang makamit nag hustisya.
Hinihikayat tayo ng Dios na lagi tayong magpakita ng pagpapatawad at pag-ibig sa iba. Hinihikayat Niya rin tayo na, “Iwasan ang masama at laging gawin ang mabuti (Roma 12:9). Hindi rin tayo dapat gumawa ng masama sa ating kapwa (13:10). Sa tulong ng Banal na Espiritu, makakaya nating magpatawad, magmahal, at huwag gumawa ng masama sa ibang tao (12:21).
Naranasan mo na ba na hindi mabigyan ng katarungan?
- Monica La Rose
Mapagmahal na Dios, sa tuwing nakakaranas ako ng kalungkutan at kawalan ng hustisya, tulungan Mo po akong magpatawad at piliing magmahal.
React, Share, and post your reflections.
Follow us on Twitter: twitter.com/odbpilipinas
and on Instagram: instagram.com/ourdailybreadpilipinas
Visit filipino-odb.org
to learn more about Our Daily Bread Ministries and our resources
Copyright © 2023 Our Daily Bread Ministries, All rights reserved.
Disclaimer: Please note that internet browsers and online platforms may have built-in translation features that may inadvertently change the meaning and overall thought of our content.
