03/05/2026
Happy Sunday❤️
𝗗𝗔𝗟𝗔𝗡, 𝗞𝗔𝗧𝗢𝗧𝗢𝗢𝗛𝗔𝗡, 𝗔𝗦𝗜𝗡 𝗕𝗨𝗛𝗔𝗬
𝘎𝘪𝘺𝘢 𝘴𝘢 𝘗𝘳𝘢𝘺𝘦𝘳-𝘔𝘦𝘦𝘵𝘪𝘯𝘨 𝘯𝘪𝘯 𝘮𝘨𝘢 𝘚𝘢𝘳𝘢𝘥𝘪𝘵 𝘯𝘢 𝘒𝘰𝘮𝘶𝘯𝘪𝘥𝘢𝘥 𝘯𝘪𝘯 𝘗𝘢𝘨𝘵𝘶𝘣𝘰𝘥 (𝘚𝘈𝘒𝘖𝘗) 𝘱𝘢𝘳𝘢 𝘴𝘢 𝘴𝘦𝘮𝘢𝘯𝘢 𝘬𝘢𝘯 𝘔𝘢𝘺𝘰 3-9, 2026. 𝘉𝘢𝘴𝘢𝘩𝘰𝘯 𝘢𝘯 𝘌𝘷𝘢𝘯𝘨𝘦𝘭𝘪𝘰 𝘨𝘪𝘬𝘢𝘯 𝘴𝘢 𝘑𝘶𝘢𝘯 14,1-12 (𝘐𝘬𝘢𝘭𝘪𝘮𝘢𝘯𝘨 𝘋𝘰𝘮𝘪𝘯𝘨𝘰 𝘬𝘢𝘯 𝘗𝘢𝘴𝘤𝘶𝘢 𝘬𝘢𝘯 𝘗𝘢𝘨𝘬𝘢𝘣𝘶𝘩𝘢𝘺-𝘓𝘪𝘸𝘢𝘵 - 𝘈).
…
Sa Evangelio nagpapaaram an satóng Kagurangnan Jesu Cristo sa Saiyang mga disipulos, asín sa pag-andam Niyá sainda sa Saiyang nagráraníng paghalè, padagos na nagtukdô Siyá dapít sa Saiyang sadiri. Sa Juán 14,6 sinabi Niyá: “Akó an dalan, an katotoohan, asín an buhay. Mayò nin makakadolok sa Amâ kundî huli Sakô.”
𝗦𝗶 𝗖𝗿𝗶𝘀𝘁𝗼 𝗮𝗻 𝗗𝗮𝗹𝗮𝗻.
Sa Saiya saná makúkuá an kaligtasan, Siyá saná an solamenteng agihan pasiring sa Kahadean nin langit. Sabi ni San Pablo sa 1 Timoteo 2,5-6: “Ta sarô saná an Diós, sarô saná man an tagatahaw nin Diós asín nin mga tawo, an tawo na si Cristo Jesús, si nagdolot kan sadiri bilang pantubós para sa gabós.”
Liniligtas kitá ni Jesús sa duwáng paagi: enot, bilang Diós na totoo, Siyá an Akì na pinadará kan Amâ sa katawohan; ikaduwá, bilang tawong totoo, pinapangenotan Niyá an katawohan sa pagdolot kan satóng sadiri asín pagbalík sa haróng kan Amâ.
Kayâ sinabi Niyá sa Juán 14,3-4: “Kun Akó makakalakáw asín makaandam nin lugár para saindo, mábalík Akó asín kukuahón Ko kamó para Sakuyà, tanganing kun saén Akó, dumán man kamó.”
𝗦𝗶 𝗖𝗿𝗶𝘀𝘁𝗼 𝗮𝗻 𝗞𝗮𝘁𝗼𝘁𝗼𝗼𝗵𝗮𝗻.
Siyá an kapanoan kan pagpamidbid satô kan Diós Amâ. An pagpamidbid nin Diós nagpoón pa sa paglaláng alagad inuláng nin tentación asín kasâlan. Kayâ sa Lumang Tipan mababasa an padagos na pagpamidbid giraray nin Diós sa katawohan sa paagi kan Saiyang Piniling Banwaan Israel, sa mga Tugon ni Moisés asín sa mga profetas, maski nganì sa kadakul na beses daí sinda nagin maimbod. Kayâ kadakul nin mga pasuruhay si Jesús asín mga Fariséos asín escribas, nin huli ta sinasagwè asín tinatamà Niyá an saindang mga saláng katukdoán asín pagsabuhay kan pagpamidbid sainda nin Diós.
Sabi ni San Pablo sa 1 Timoteo 2,4: an Diós “boót na an gabós na tawo makaligtás, asín makaabót sa pagkamidbid sa katotoohan.” An katotoohan na nakakaligtas iyó si Cristo. Sabi Niyá sa Juán 14,11: “Magtubód kamó sakô: Akó yaon sa Amâ, asín an Amâ yaon sakô.”
An tandà na kitá nagtutubód iyó an satóng pagpahayag kan katotoohan ni Cristo sa satóng mga tataramon asín gibo. Sabi pa ni Jesús sa Juán 14,12: “an nagtutubód Sakô maggigibo man kan mga ginigibo Ko.”
𝗦𝗶 𝗖𝗿𝗶𝘀𝘁𝗼 𝗮𝗻 𝗕𝘂𝗵𝗮𝘆.
Siyá an burabod nin buhay. An paglakáw sa Saiyang dalan asín pagsunód sa Saiyang kabôtan an magdádará satô na mabuhay nin makahulugán, matalingkas, asín tunay na maogma. An pagsuway sa Saiyang kabôtan magdádará satô sa mga bisyo asín kasâlan na minaraót nin satóng buhay.
Alagad mas pa sa marhay na buhay digdi sa dagâ an boót Niyáng itaó satô. Nin huli ta yaon Saiya an buhay na daíng kasagkoran, asín pakatapos kan satóng buhay digdi sa dagâ, may naghahalat na estaran sa ikaduwáng buhay. Sa Juán 14,2-3, nanugâ Siyá: “Sa haróng kan sakong Amâ dakúl an dagosan.”
Alagad maskí an estadong iní bakô pa an kapanoan nin buhay. Huli ta an buhay na daíng kasagkoran bakô saná para sa kalág, kundî para sa bilog tang pagkatawo na linaláng nin Diós na kabaíng Niyá. Sa huríng panahón, sa pagkabuhay-liwát nin mga gadán, an hawak asín kalág na pinagbulág nin kagadanan magigin sarô giraray, asín daí na magágadán sagkod pa man.
Sabi ni Jesús sa Juán 6,40: “Ta uni an boót kan sakong Amâ, na an gabós na nakákahilíng sa Akì asín nagtútubód Saiya magkaigwá nin buhay na daíng kasagkoran, asín bubuhayon Ko siyá liwát sa huríng aldaw.”
…
𝗚𝗜𝗬𝗔 𝗦𝗔 𝗣𝗔𝗚𝗛𝗜𝗥𝗔𝗦 | Maghirás nin experiencia kun pàno mo isinabuhay an pag-akò ki Cristo bilang saimong dalan, katotoohan, asín buhay. | 𝗚𝗜𝗬𝗔 𝗦𝗔 𝗣𝗔𝗚𝗛𝗜𝗥𝗢 | Anó an pwede nindong magibo bilang komunidad/pamilya tanganing magsarabáy asín magmaimbod na magralakáw sa dalan na iyó si Jesús?
𝗣𝗔𝗦𝗨𝗡𝗢𝗗-𝗦𝗨𝗡𝗢𝗗 𝗞𝗔𝗡 𝗪𝗘𝗘𝗞𝗟𝗬 𝗦𝗔𝗞𝗢𝗣/𝗙𝗔𝗠𝗜𝗟𝗬 𝗣𝗥𝗔𝗬𝗘𝗥-𝗠𝗘𝗘𝗧𝗜𝗡𝗚 | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song
