04/10/2026
Programa Catequistakunaq Rimayñin / XXVII Domingo del Tiempo Ordinario / 𝖤𝗏𝖺𝗇𝗀𝖾𝗅𝗂𝗈 𝖽𝖾𝗅 día 𝖣𝗈𝗆𝗂𝗇𝗀𝗈 04 de Octubre del 𝟤𝟢𝟤6
𝑲𝒂𝒚𝒎𝒊 𝑺𝒂𝒏 Mateo 𝑸𝒉𝒆𝒍𝒒𝒂𝒔𝒒𝒂𝒏 𝑬𝒗𝒂𝒏𝒈𝒆𝒍𝒊𝒐 𝒘𝒊𝒍𝒍𝒂𝒓𝒊𝒌𝒖𝒚
Uvas chakra llank'aqkunamanta rikch'anachiy simi
Jesusmi nillarqantaq: –Wak rikch'anachiy simitawan uyariychis: Huk runan chakranpi uvasta plantarqan, hinaspan muyuriqta perqarqan, chaypitaq uvas sarunata t'oqorqan, qhawanapaq torretapas perqarqan. Hinaspataq llank'aqkunaman wakiypi qospa karuta ripurqan.
Cosecha tiempo chayamuqtintaq chakrayoqqa kamachinkunata llank'aqkunaman kacharqan, rurusqanta chaskimunankupaq. Llank'aqkunataq ichaqa kamachinkunata hap'ispa hukninta maqarqanku, huknintataq wañuchirqanku, huknintañataq ch'aqerqanku. Chaymi chakrayoqqa wak kamachikunatañataq kacharqan, ñawpaqkunamanta aswan askhata. Chay llank'aqkunataq wakinkunata hinallapuni ruwarqanku.
Qhepatañataq churinta paykunaman kacharqan: Churiytaqa respetanqakupunin, nispa.
Llank'aqkunataq ichaqa churita rikuspa rimanakurqanku: Kayqa chakrayoqpa churinmi, hamuychis wañurqachisun, chakrataq ñoqanchispaq kapunqa, nispa. Chaymi hap'ispa payta uvas chakramanta qarqomurqanku, hinaspan wañuchirqanku, nispa.
Jesusmi tapurqan:
–Uvas chakrayoq hamuspaqa, ¿imananqataq chay llank'aqkunata? nispa.
Hinan uyariqninkunaqa nirqanku:
–Chay millay runakunataqa mana khuyapayaspan wañuchinqa, hinaspan uvas chakranta wak llank'aqkunaman wakiypi qonqa, payman tupaq cosechata tiempollanpi qopunankupaq, nispa.
Jesustaq paykunata nirqan:
–¿Manachu Diospa Simin Qelqata leerqankichis?
“Wasi perqaqkunaq wikch'usqan rumin,
esquina hap'iq churasqa kapun.
Señor Diospa ruwasqanmi kayqa,
ñoqanchispaqtaqmi ancha musphana”, nispa, niqta.
Chayraykun niykichis: Diospa qhapaqsuyunqa qankunamanta qechusqan kanqa, paypa munayninman hina ruwaqkunamantaq qonqa.
𝘒𝘢𝘺𝘮𝘪 𝘛𝘢𝘺𝘵𝘢𝘯𝘤𝘩𝘪𝘴𝘱𝘢 𝘳𝘪𝘮𝘢𝘳𝘪𝘴𝘲𝘢𝘯 𝘴𝘪𝘮𝘪
𝗤𝗮𝗺𝗽𝗮𝗾 𝗚𝗹𝗼𝗿𝗶𝗮 𝗞𝗮𝗰𝗵𝘂𝗻 Apu Jesucristo
Sr. De Huanca san Salvador
