29/05/2026
दाऊदले हामीलाई परमेश्वरको बारेमा के सिकाउँछन् त ?
तपाईं आफ्नो बारेमा के सोच्नुहुन्छ?
के तपाईं आफूलाई महत्त्वपूर्ण व्यक्ति ठान्नुहुन्छ?
कहिलेकाहीँ केही मानिसहरूले आफूलाई धेरै ठूलो र विशेष ठान्छन्।
तर धेरै मानिसहरू भने आफूमा खास केही छैन जस्तो महसुस गर्छन्।
आज “दाऊद” नाम संसारका धेरै ठाउँहरूमा प्रख्यात नाम हो।
तर यो नाम कहाँबाट आयो?
यो करिब ३००० वर्षअघि इस्राएलमा राज्य गरेका एक राजाबाट आएको हो।
उनले करिब चालीस वर्ष शासन गरे, र उनको शासनकाल इस्राएलको इतिहासकै सबैभन्दा उत्कृष्ट समयमध्ये एक मानिन्छ।
सायद तपाईंलाई यो कुरा पहिले नै थाहा थियो।
यदि थिएन भने — अब थाहा भयो।
तर दाऊदको कहानी सुरुमा यस्तो महान् थिएन।
दाऊदका बुबा यिशैका आठ जना छोरा थिए।
दाऊद सबैभन्दा कान्छो थिए।
एक दिन अगमवक्ता शमूएल, जो त्यस समय इस्राएलीहरूको मुख्य आत्मिक अगुवा थिए, बेथलेहेममा यिशैको घरमा आए।
उनको उद्देश्य नयाँ राजा छान्नु थियो।
त्यसपछि यिशैले आफ्ना छोराहरूलाई बोलाए।
तर एक जनालाई भने बोलाएनन् — जस्को नाम दाऊद हो ।
किनभने उनका बुबाले उनलाई अझै सानो ठाने।
सायद उनी किशोर उमेरमा पनि पुगेका थिएनन्।
हामीलाई ठीक उमेर थाहा छैन, तर यति थाहा छ कि दाऊद आफ्ना बुबाका भेडाबाख्रा चराइरहेका थिए।
समय आयो।
यिशैका जेठा छोरा एलीआब शमूएलको अगाडि आए।
उनी अग्ला थिए! बलिया थिए! राम्रा देखिन्थे!
शमूएलले तुरुन्तै मनमनै सोचे:
“निश्चय नै परमप्रभुले चुन्नुभएको व्यक्ति यही हो।”
तर परमेश्वर मानिसजस्तो हुनुहुन्न।
उहाँको सोचाइ हाम्रो भन्दा धेरै फरक हुन्छ।
त्यसैले परमेश्वरले शमूएललाई भन्नुभयो:
“उसको रूप वा उचाइलाई नहेर, किनकि मैले उसलाई अस्वीकार गरेको छु। मानिसले बाहिरी रूप हेर्छ, तर परमप्रभुले हृदय हेर्नुहुन्छ।”
(१ शमूएल १६ अध्याय)
त्यसपछि यिशैका अरू छोराहरू पनि एक-एक गरेर शमूएलको अगाडि आए।
तर परमेश्वरले कसैलाई पनि चुन्नुभएन।
अन्तमा सबै छोरा सकिए।
त्यसपछि शमूएलले यिशैलाई सोधे:
“के तिम्रा यिनै मात्र छोरा हुन्?”
यिशै अलि लाज मान्दै बोले:
“अझै कान्छो छोरा त छ, तर ऊ भेडाबाख्रा चराउँदैछ।”
शमूएलले भने:
“उसलाई बोलाऊ। ऊ नआएसम्म हामी बस्नेछैनौँ।”
त्यसपछि दाऊदलाई बोलाइयो।
उनी स्वस्थ थिए, अनुहार उज्यालो थियो, र देख्नमा राम्रो थिए।
तब परमप्रभुले भन्नुभयो:
“उठ, यसैलाई अभिषेक गर, यही नै हो।”
त्यसपछि शमूएलले तेलको सीङ लिएर उनका दाजुभाइहरूको सामु दाऊदलाई अभिषेक गरे।
र त्यस दिनदेखि परमप्रभुको आत्मा शक्तिशाली रूपमा दाऊदमाथि रहिरह्यो।
यो कथाले हामीलाई एउटा गहिरो शिक्षा दिन्छ।
मानिसहरू प्रायः बाहिरी कुराले प्रभावित हुन्छन् —
रूप, सुन्दरता, पैसा, शक्ति, लोकप्रियता, वा प्रतिभा।
तर परमेश्वरको दृष्टि फरक छ।
उहाँ हृदय हेर्नुहुन्छ।
यदि हामी साँच्चै परमेश्वरको स्वरूपमा सृष्टि भएका हौँ भने,
हामीले पनि उहाँजस्तै बन्न सिक्नुपर्छ।
बाहिरी कुराभन्दा भित्री कुरा हेर्न सिक्नुपर्छ।
मानिसको हृदय, उसको मन, उसको साँचोपन।
हामीसँग हरेक दिन एउटा छनोट हुन्छ —
आफ्नो जीवनमा केमा ध्यान दिने?
अरूलाई कसरी हेर्ने?
यदि हामीले परमेश्वरजस्तै हृदयलाई मूल्य दिन सिक्यौँ भने,
हाम्रो जीवन अझ सुन्दर, अझ शान्त, र अझ परमेश्वरको इच्छाअनुसार बन्न सक्छ।
र एउटा कुरा सम्झनुहोस् —
तपाईं कुनै पनि समयमा परमेश्वरसँग कुरा गर्न सक्नुहुन्छ।
साधारण रूपमा भन्नुहोस्:
“हे परमेश्वर पिता, येशू ख्रीष्टका पिता, तपाईं मेरो पनि पिता हुनुहुन्छ।”
त्यसपछि आफ्नो हृदयका सबै कुरा उहाँलाई भन्नुहोस्।
किनकि — परमेश्वर तपाईंको हृदय हेर्नुहुन्छ।
