06/10/2026
DA ƊUMI-ƊUMI: KOTUN ƊAUKAKA ƘARA TA AJIYE HUKUNCIN ƘARAR EL-RUFA’I KAN BELI
Kotun Ɗaukaka Ƙara da ke Kaduna ta ajiye hukunci kan ƙarar tsohon Gwamnan Kaduna, Nasir El-Rufai, da yake ƙalubalantar matakin Babbar Kotun Jihar Kaduna na ƙin ba shi beli.
Kwamitin alƙalai mutum uku ƙarƙashin jagorancin Mai Shari’a Onyekachi Aja Otisi, ya ɗauki wannan mataki ne bayan sauraron hujjojin lauyoyin El-Rufai da na ICPC a zaman kotun na yau, Talata 6 ga Oktoba 2026.
Lauyan ICPC, Ayodeji Adedipe, ya nemi kotun ta yi watsi da ƙarar, yana mai cewa El-Rufai ya gabatar da buƙatar beli har sau uku a gaban kotun ƙasa, kuma duk an ƙi su. Ya kuma ce ƙarar da ake ɗaukaka ta shafi hukuncin buƙatar beli ta biyu.
Sai dai lauyan El-Rufai, Paul Erokoro, SAN, ya roƙi kotun da ta sauya hukuncin Babbar Kotun tare da ba El-Rufai beli, yana mai cewa laifukan da ake tuhumarsa da su ba na kisa ba ne kuma ci gaba da tsare shi na iya kawo cikas ga shirye-shiryen kare kansa.
A yanzu Kotun ta ajiye hukunci, amma ba ta sanya ranar da za ta karanta hukuncin ba.
Me kuke ganin zai kasance muhimmin abin da kotun za ta duba wajen yanke wannan hukunci?
Ku bayyana ra’ayinku cikin girmamawa.
