23/08/2026
Yadda Maulidin Annabi ﷺ ya ke a wajen Sheikh Ibrahim Niass (R.T.A)
SHEHU IBRAHIM INYASS YA CE:
" Mun taru a wannan wuri daga sassa daban-daban na duniya domin girmama Annabi ﷺ da kuma girmama haihuwarsa.
An haifi Annabi ﷺ a daren 12 ga watan Rabi’ul-Awwal, a shekarar Giwa.
Girmama haihuwar Annabi yana kasancewa ta waɗannan abubuwan da zan ambata:
1- Ku yi taro kuna sauraron waƙoƙin yabo na Annabi ﷺ da kuma yin salati a gare shi ﷺ.
2- A yayin haka, ku roƙi Allah Maɗaukaki, ku yi addu'a domin kawunan ku, da iyayenku maza da mata, da ’yan’uwanku, da dukkan al'umar Musulmi a sassa daban-daban na duniya.
3- Ku ciyar da duk abin da kuke da iko domin girmama haihuwarsa da kuma nuna farin ciki da samuwarsa ﷺ.
4- Ku kwana kuna farke tsawon daren, kamar yadda Sayyadatuna Amina ta yi; domin ita ma ba ta yi barci a wannan dare ba.
5- Domin yin koyi da ita, mu kasance a farke duk daren, kada mu yi barci, a matsayin girmamawa ga wannan Annabi mai albarka.
Wannan Annabi mai albarka ya zo ne domin ’yantar da ɗan Adam, ya kuɓutar da shi daga bautar halittu da kuma bautar wanin Allah Maɗaukakin sarki.
Bikinmu na Maulidi wani nau'i ne na godiya ga wannan ni’ima da Allah Ya yi wa dukkan ’yan Adam, musamman ma mu Musulmi.
A taƙaice, a wajen Sheikh Ibrahim Niass, bikin Mauludi yana nufin:
1) Girmama haihuwar Annabi ﷺ da nuna farin ciki da zuwansa.
2) Yin salati ga Annabi ﷺ.
3)Yin waƙoƙin/wa’azin yabo (Amdahu) na Annabi ﷺ.
4) Yin addu’a ga kai, iyaye, ’yan’uwa da dukkan Musulmi.
5) Ciyarwa da sadaka gwargwadon iko domin nuna godiya da farin ciki.
6) Kasancewa a farke cikin dare domin ibada da girmama wannan dare.
Saboda haka, a taƙaice: Mauludi a wajen Sheikh Ibrahim Niass taro ne na tunawa da haihuwar Annabi ﷺ, tare da salati, yabo, addu’a, ciyarwa da nuna farin ciki da godiya ga Allah saboda zuwansa.
Alhamdulillah, mun godewa Allah bisa aiko mana annabin da ya ceto mu daga bautar wanin Allah zuwa ga bautar Allah shi kadai.
