10/12/2025
Shugaban Kungiyar Jama'atu Izalatil Bidi'a Wa Ikamatis Sunnah ta tarayyar Najeriya Sheikh (Dr.) Abdullahi Bala Lau ya turo tawaga ta musamman Jihar Katsina
Daga: Yusuf Hassan Buhari
Da safiyar yau Talata 17 Jumada Thani, 1447 wanda yayi daidai da 09 Disamba, 2025 Shugaban Kungiyar Jama'atu Izalatil Bidi'a Wa Ikamatis Sunnah ta Jihar Katsina Sheikh (Dr.) Yakubu Musa Hassan Katsina (Sautus-Sunnah) ya karbi bakuncin tawagar Shugaban Kungiyar na Kasa, Sheikh (Dr.) Abdullahi Bala Lau
Jagoran tawagar Daraktan Agaji na Kasa, Engr. Mustapha Imam Sitti ya bayyana cewa Shugaba Sheikh Abdullahi Bala Lau ya turo wannan tawaga ne ta zo Katsina domin dubiyar rashin lafiya da wasu daga cikin manyan maluman wannan Kungiya mai albarka da ke wannan Jiha ta Katsina bisa jarabawar rashin lafiya da su ke fama da ita wato Mataimakin Shugaban Majalisar Malamai ta Kasa Sheikh Barr. Ibrahim Sabi'u Jibia wanda ya samu jarabawar karaya a kafarsa da kuma Shugaban Kwamitin Ayyuka na Kasa Sheikh Habibu Yahayya Kaura wanda ke fama da rashin lafiya ya ke kwance yanzu haka a asibitin koyarwa da ke Garin Katsina
A nashi jawabin Shugaban Kungiyar na Jihar Katsina Sheikh Sautus-Sunnah bayan godiya ga Allah (S.W.A) ya bayyana jin dadin shi da yin godiya bisa wannan tawaga da Shugaba ya turo ku domin jajanta mana bisa rashin lafiya da wadannan bayin Allah su ke cikin ta
Muna rokon Allah ya saka maku da alkhairi ya baku ladar sada wannan zumunci da akai su kuma muna rokon ya ba su lafiya ya kuma sanya kaffara ne
Bayan nan tawagar ta wuce gidan Sheikh Barr. Ibrahim Sabi'u Jibia domin duba lafiyarshi tare da isar da sakon Shugaba. Daga nan tawagar ta wuce asibitin koyarwa inda ta duba Sheikh Habibu Kaura shi ma domin duba yana yin na shi jikin inda yake karbar magani da dubawa ta musamman a asibitin koyarwa da ke cikin Garin Katsina
Tawagar wadda Daraktan Agaji na Kasa din ke jagoranta inda Shugaban Kungiyar na Jihar Kaduna Alh. Adamu Ibrahim da Shugaban Majalisar Malamai na Jihar Kaduna Imam Aliyu Abdullahi Talex su ka rufa ma shi baya
Inda su ka samu tarba daga Sakataren Majalisar Agaji ta Kasa Alh. Abba Yahayya, Daraktan Agaji na Jihar Katsina Alh. Garba Galadima Charanchi, P.R.O na Majalisar Agaji ta Kasa Alh. Aliyu Sani Abubakar, Auditor na Majalisar Agaji ta Kasa Alh. Sulaim Abukur, Shugaban Kwamitin matasa na Jiha Sheikh Safiyyu Alkasim Saulawa, Dr. Abdurrahim Sabi'u Rafin Dadi
Jibwis Nigeria
