United Missionary Church Of Africa UMCA Gra-Bida

United Missionary Church Of Africa UMCA Gra-Bida UMCA CHURCH GRA BIDA
(1)

22/05/2026

LITAFIGBA NYẠ YELI YELI 2026
ASIBIFO MAY 23
MATIU 8 : 23 - 27
EZANDONDO U LA NYẠGBẠN U SHISHI

Gạsikiya eduku nyạ enyạ edạsunzhi to nyạ wanikosa a ma yi kezhe, nạzhi eye e leye nạ, nạzhi tukpa yizhi ewo nạ to ekunzhi nyạ bazhiko. nạzhi Nạnạzhi kpata a zhe ke efeko nạ eku eya ci ece dạngạdạngạyi ta eti nuwonko o nạ. Fe patukpa gạ Jesu gạ, Mi a dạ be ye nyi kami ndondo. "Ebo kinnyạbo ye a sundạ aninga o?" Tsoci a bo yi nimi kami nyạ ebayiba dede nạnạ o (Jonah 2:9). Nimi yizhe o gbani yi a jin karanyi eba kendonạ enyạ dedezhi e loye lo nạ - Aizaya 51:20-21 Ama Tsoci gạ, "ye ga sundạ ma, Mi a dạ be ye nyi, ci a bo ye ya" Aizaya 41:10.

Ewondu : Alikawoli nyạ Soko a kara zhebạ a.

ADUWA : Soko, lugwa kagbo to yiko nyạ We u la u ma yi u kezhe ebo Sunnạ Jesu o, Ami.

21/05/2026

LITAFIGBA NYẠ YELI YELI 2026
JIMAFO MAY 22
ROMICIZHI 5 : 7 - 11
KAMI NẠ EZA WANGIZHI BE DE YEGUN NYẠ DOZHI BE A NẠ

Kato nạ Soko jin eza wangizhi foro nimi fushi u bo nạ lefi fe biye bi loye. Nimi foro jn nạnạ o, Soko ci be la yegun tula tatacin zawangizhi o. Tun acin, eza wangizhi nạvo nạ a lotunzhi nyạ gạsikiya nạ Rom. 1:28-32. Hari be gbani nyi, zawangizhi e ku dozhi yekạ nimi emapa nyạ kpikpe etun dede nạzhi a a lo nạ, a ma fi to Enạ Lilici yizhi o. Egạgocizhi a ga la manạ nyạ Soko nạ u ya yi be egwa Jesu Kristi nyi nạ a jin kafa ko ebade mạ. Lugwa yi le yizhe nimi Kristi o (1Kor. 5:14-15, Gal. 2:20). "Gbatawo nyạ lefi yi tsutsu, ama eriatwa efia nyạ Soko yi rayi hari lo nimi Kristi Jesu o Tsoci yi" (Rom. 6:23).

Ewondu : Mgba enyạ ninma u yi o nạ zạbajin to eli binạkun e be be tacin yi bo nạ o?

ADUWA : Nda Lilici, ya mi manạ nạ mi ga fedun lafiya be ezabaci mizhi ba eni ndondo nạ mi ga dạ nạ o ebo Sunnạ Jesu o, Ami.

20/05/2026

LITAFIGBA NYẠ YELI YELI 2026
ALAMIFO MAY 21
1 PITA 3 : 9 - 15
LUGWA YI KPATA FE EZA LILICIZHI

Jesu Kristi nạ yì Tsoci to Zabolugwa nyạ yì nạ yi Lilici nimi enyạ Kpata o, ebo wuncin u ge nạ yitso a fe dozhin u nạ l Pita 1:15. Yi ma jin wo ya eti yitso a, a fe be kagbo nyạ wun nạ wun yikunci eti kagbo nyạ kagbocizhio kpata nạ, Fili. 4:13. Kagbo nạ dạ nimi Sunnạ Jesu o nạ a gun 'kun ya yi. Ke be la Kodạri ci ebe gạ yi sun hari yi ci ebe la zhe makirizhi nyạ dozhi be o?. Yi ga fe ke kutijincizhi nạ ma, "eshi (eshigi) 'mizhiko nạ kpe tsoci u ye a nạ ma" (1 Pita 3:9). Lugwa yi ga dozhi gba be alubarika e ebo yi de edunfe nyạ lafiya be dozhi nyi kami ndondo. Dingbạn nạ we a jin enyạ wangi nimi yizhe nạnạ o nạ. Gạma eli wangi ga yi sunsun wangi nyạ Ruhu Lilici o. Ga tobo enyạ dạsun to wanikosa nyạ yizhe o da wa enyạ dede za ma, zunmago u ge a.

Ewondu : Fe jin enyạ wangi kami kpata nimi Edạsun nyạ Tsoci o.

ADUWA : Tsoci, a nyạgbạn mi she gạni be yekpa to aninyạ wangi nyi nyạ wuwa Wezhi, Ami.

19/05/2026

LITAFIGBA NYẠ YELI YELI 2026
LARUBAFO MAY 20
EZEKIEL 33 : 23 - 29
EZA WANGIZHI NYẠ GBANI WA SISẠTU SẠRẠNYI

Ke eye sisạtu o?, U yi yeko nạ ela kpe eza wangizhi tukpa eti enyạ bibici ko enyạ gboro nạzhi ga e loye tatachin eza wangizhi o, u ma gonyi a kpe akika nyạ elegi nạ a be gba u zunma nạ. Soko tun Anabi Ezekiel fi ezazhi nyạ Israyila ebo egia zhe ya nạ dạ tacin a bo kanga to enyạ shikạ ndocizhi nạ. Nạnạ yi, ebo nạ a la hankali tu eli to etun dede azhi nạ. Ke yi etun nyạ Enạ Lilici kami zuzoci nạnạ o?. Ke Enạ Lilici o tso yi kami nyạ gbani o?. Kagbocizhi e pe enyạ dede a ma a kpetso kagbo nyạ enyạ dede. To nyinạ ma, Tsoci jin eza wangizhi gạgba sạrạnyi nạ a ga etun to cli dede a zhi lugwa kpata nạ. Lugwa yi kpata tswa fushi nyạ Soko.

Ewondu : Enyạ dedejin e la lafiya ko ninma be nyi a.

ADUWA : Tsoci a kin nyạ yi yejin be yiko to kagbo nyạ We nyi, ebo eza wangizhi a de edạsun nyạ We ebo Sunnạ Jesu o, Ami.

18/05/2026

LITAFIGBA NYẠ YELI YELI 2026
TALATAFO MAY 19
MATIU 5 : 8 - 9
NYẠGBẠN LILICI E MA FI SOKO

Bambe lilicibo nyạ nyạgbạn e eza ndondo a le Soko ye. Ebogabo lugwa yi tswa yekpa nyạ nyạgbạn yizhi ebo yi be a shishikạ ma. MATIU 15:19-20 ji eli shikạ nạnạzhi ye, kici nimi eli shikạ nạnạzhi o, yi eli nyạ mi nyi o nạ e la mi shi shikạ eye Soko o nạ o? Ga lugwa eye, tukpa to nyạgbạn yizhi la kodari nyạ nạkạ a lo yizhele nyạ yì ma, wun e ma lefi - Eciaba 3:6-7. A shi yi shi be egia lomaci nyạ Kristi nyi. Eza dedezhi ma a dạ nimi egungicizhi nyạ sarota Soko bo a (1 Kor 6:9). To eza nạ ga dzo nyạ nimi Ruhu o nạ ama 'nyạ nimi Ruhu o, to eza nạ ga dzo 'nyạ nimi nạkạ o nạ, wun a ma'nyạ nimi nạkạ o ya nyinyiya (Gal. 6:7).

Ewondu : Ke eli we yi yi nạ o?

ADUWA : Tsoci Soko, ga lugwa mitso be egwa mi nyi a rayi to nạkạcigbąn nyạ mi jin asara ma ebo Sunnạ Jesu o, Ami.

17/05/2026

LITAFIGBA NYẠ YELI YELI 2026
ATENIFO MAY 18
1 PITA 3 : 3 - 6
TSWA ENYẠ NẠ A NYI RUHU LILICI NYẠGBạN NẠ

A ka wosika nyạ Pita nạnạ shishi ya egạgocizhi nyạ kami gbani. Gbani, ke Enạ Lilici nạ ke yi jin wo nạ yi ga kagwa sara nạzhi e loye gbani nimi Enạ Lilicio nạ o. Lugwa yi baza eti enyạ nạzhi a tungwa fi dạnạ nạ yi gba gbani da nạ o. Enyạzhi e biye bi nimi Ruhu o tacin yi bo kashi sisaloye gạ kayajin yiri nạnạzhi yi o? Gạsikiya nyạgbạn ga bo Soko gba dạ ga o, ama tunacin enyạzhi dokun lo dede be a. Ga lugwa nyạgbạn nyạ eza gạsikiyazhi a pạ yeshi eba kinnigi nyạ Ruhu o ebo ezạda to eli nyạ we bo ma. Gạmạ nạkạ nyạ yi yi kata nyạ Ruhu Lilici I Kor. 6:18-19.

Ewondu : Soko e wa lilicibo nyạ nạkạ cigbạn yizh.

ADUWA : Nda ya mi manạ nạ mi a kpe cinwon, to lilicibo nyạ We ye nạ ebo Sunnạ Jesu o, Ami.

16/05/2026

LITAFIGBA NYẠ YELI YELI 2026
ALADEFO MAY 17
ZABURA 127 : 1 - 2

Lugwa yi dạ bo nimi mimafi nyạ Etsu Soko, nạ jin enyạ kpata ci etswa enyạ kpata nạzhi u jin be egwa wuntso nyi nạ. Tsoci a fe ebatswaci ya yi nimi Sunnạ Jesu o. Ami.

BARIKA YI BE ALADE E

15/05/2026

LITAFIGBA NYẠ YELI YELI 2026
ASIBIFO MAY 16
DZUNDZUN 20 : 7
NIMI YEKO NDONDO O, YE GA TUN SUNNẠ NYẠ SOKO YE BANZA MA.

Tsoci Jesu Kristi gạ, "ye ga zhiba kami nạ ye jin alikawoli ndondo nạ ma. Wo de jin yeda ko wo nạvo" Matiu 5:24, 37 Ga kara la egạ shishi nyạ gạmạnạ nimi egạwu to aduwajin o ma, nạnạ e mafi Nda a. Ga fe erijinci nyạ gạmạnạ nimi yeko ndondo o ma. Ko ma ga gạgạ ndondo nyạ gạmạnạ ma - Dzun. 23:1. Egạgoci u wo egạ u dạ tukpa o be egwatso nyi, ama cinta wo ci o gạgạ, egạ wezhi ma u yi egạzhi nyạ yema Jem 1:19. Tsoci ma a la ruhu yi gboka wun ayike yi ga lamitu egạwu nạnạzhi yi ci tswa gintara to eli yizhi nạ.

Ewondu : Fe eza nạ a de gintara yeko nạ

ADUWA : Soko Lilici, won gintara nyạ mi dạ ebo mi ga fe egạnyạ gạci nimi yeko ndondo o ma ebo Sunnạ Jesu o, Ami.

14/05/2026

LITAFIGBA NYẠ YELI YELI 2026
JIMAFO MAY 15
1 PITA 2:19-25
LAMITU BICI KINKPE NYẠ KRISTI

Tile Kristi go wala ebo rayi nạzhi e la gbin nạ to rayi nạzhi a be a gbin nạ o. Egạgocizhi nyạ nyinạ, lugwa yi kpata jin hankali, yi ga lugwa yi a tsu nimi ruhu o mạ. Ebogabo yi a dingbạn ke eza fifocizhi nimi Kristi Jesu o nạ, nạ yi a dazạ be eli gạsikiya nyi, yi ci la etunzhi to elizhi nyạ gạmạnạ lugwa nạzhi de ajin gạni be kisazhi nyạ shetan nyi nạ. Egạgoci ndondo u ga to bo aziki wa o li ezazhi dạ ma, ama ye lagwasun egạwu nạ dạ aya 17 bo nạ.

ADUWA : Soko a mi fe eza lilici dạgạ nyạgbạnnin nyạ mi bo ebo Sunnạ Jesu o, Ami.

13/05/2026

LITAFIGBA NYẠ YELI YELI 2026
ALAMIFO MAY 14
FILIPAICIZHI 1 : 27 - 30
LUGWA YI LOTUN NINI NYẠ ANINYẠ WANGI NYẠ JESU KRISTI

Lugwa egạgocizhi a lotun nyạ wunwun nạnạ nạ yi labari wangi etun wonciko nạ Jesu Kristi la shishi bedzo u ci lo sạmạ nạ - Matiu 28:19-20. Nạ wazunjinci a jin ezazunmazhi ya Jesu wo nạ a fe eli wangi nyạ wuntso a lamitu egạwu u zhi. Egạ nyạ eli wangi nạnạ ga ma Tunci Paul e tu zunma nimi aya 27 bo o, "yiyakpe bambe etun nyi yi enyạ tsutsuci". Egạgoci ndondo yi eza nạ a sunwun be enyạ nạzhi e la wala to nạkạyekofu lo Enạ Lilici nyạ Kristi nạ. Tunci Paul ma ebe yi nyạgbạnwau ke yi ga kara sundạ makirizhi nyạ Kristi nạ ma. Be kagbo nyạ Soko e, yi ma ga nạsara gi. U ge nyạsạnyạsạnyi nạ egạgocizhi a fingwa ci bạ kagbozhi nyạ bazhikozhi ya to kagbo ndocizhi nạzhi zheyeku yi kami zuzoci nạnạ nạ a she be wala to be sungạzhi nyạ wunikosa to edạsunzhi nyi nạ.

Ewondu : Wo ma ajin shiri nạ we a lotun gạsikiya nạ?

ADUWA : Tsoci ya mi aninyạ wangi, nạ mi a dazạ be eli gạsikiya nyi nạ ebo Sunnạ Jesu o, Ami

Address

GRA BIDA
Bida
912101

Website

Alerts

Be the first to know and let us send you an email when United Missionary Church Of Africa UMCA Gra-Bida posts news and promotions. Your email address will not be used for any other purpose, and you can unsubscribe at any time.

Shortcuts

Share

Category