United Missionary Church Of Africa UMCA Gra-Bida

23/08/2026

LITAFIGBA NYẠ YELI YELI 2026
ATENIFO AUGUST 24
GẠCINZHI 4 : 10 - 19
KPIKPE WANGI YI ENYẠ WANGI MA

Gạcinkaci fe loye to gbani be shiawura wangi uzhi nyi. Ebokibo, Etsu Sulemanu ci dạ yi kpata shiawura wangi aniga o. Ebonạ wuntso de kagbin to bicicinzhi dokun bedzo u ci ka gạgba nạnạzhi ya yi nạ. Nupecizhi gạ enạ ga po we le ani, wo ga be le tutumpere ye, we a yaba ya u. Mgba acinga ga yi ma edạ egi yizhi shiawura ma o?

ADUWA : Tsoci, mi jin yebo ebonạ We wa gạ mi gbinka dạ lefijin bo a nạ. Mi wa gạ mi gbinka a, Ami.

23/08/2026

COMBINED SUNDAY SERVICE. 23/08/2026

23/08/2026

22/08/2026

LITAFIGBA NYẠ YELI YELI 2026
ALADEFO AUGUST 23
GẠCINZHI 4 : 20 - 27
NẠ ENYẠ DEDE JIN VO

Mgba nimi shiawura to gạgba nạzhi yi gba kpata ani nạ, kici gạ gạ zo nyi jin ya we o? Patukpa ke u jin gạni be kagbo nyạ wetso nyi wo a lamitu shiawura nạnạzhi a nạ. Ama yakpe gạ we a jin a wo gạni be ebawu to kagbo nyạ Soke e nạ, U ma a ba we jinre, Ami.

BARIKA YI BE ALADE E

21/08/2026

LITAFIGBA NYẠ YELI YELI 2026
ASIBIFO AUGUST 22
GẠCINZHI 4 : 1 - 9
ANFANI NYẠ EGBẠN

Eza nạ de egbạn nạ e jin ceto, u ci e ce eza wu. Wun e gạgạ, eza nạnạ jin dạngi mi a nyi a, tun acin wun a ce eza ndondo wu. Eza nạ de egbạn nạ e yakpe Soko to Jesu to Ruhu Lilici. Eza nạ de egbạn nạ, ela Soko shidzo be enyạ ndondo nạ wun ejin nạ. Wun e dada zhewun a, ko sun wun nyạ digaga a. Wun ewa ewuceci bedzo ezo u biye. Wun ejin enyạ nạ yi gboro to wangi nạ. Wun ejin zandoci egun a. U kpe enyạ nạ yi gboro nạ ye kperi be enyạ dede nyi. Wun e ce batạtạcizhi wu. Mgba acinga yi Kristenzhi ejin ma o? Egbạndeci ebu kuti kpe zabaci wun a.

ADUWA : O Tsoci, ba mitso jinre ebo mi la eza ndocizhi dạ yeko We bo, Ami.

20/08/2026

LITAFIGBA NYẠ YELI YELI 2026
JIMAFO AUGUST 21
GẠCINZHI 3 : 17 - 35
TWARIA YA EMILEGUNCI WEZHI

Nimi kin ndondo o, eza nạzhi a gba gwa nạ dokun gạ ewodecizhi. Nimi ezhiko ndoci o, ewodeci ndoci fe la boye u tula ya talakazhi. Ebogabo, jimafo e, barajincizhi ecinbo yegboro emi ewodeci wuncin bo a. Ama mi le kagbin guba ye be ewodecizhi to be barajincizhi ma. Mafari, barajinci ndocizhi lotun wo be egwa a zhi nyi, ama ebo eli wangi nyạ ewodeci wuncin o, a dạsạn nạ a lotun nạ a. Mgba, u ge nạ ewodeci a fe twaria acinga nạ? Baci, ewodeci wuncin yakpe Tsoci Jesu kponyi a. U ma a fe tuye gạ eriatwa nyạ nwi ga a la nwi lo alijenạ o. Mgba ewodeci wuncin de gạsikiya? Lugwa 'za eni u kpe egạ nạnạ ye.

ADUWA : Tsoci Soko, ba yi jinre nạ yi a fe lamitu gạmi Wezhi nạ, ebo Jesu o, Ami.

19/08/2026

LITAFIGBA NYẠ YELI YELI 2026
ALAMIFO AUGUST 20
GẠCINZHI 3 : 19 - 26
MI TO WE A DẠBO LAFIYA

Wo ga de egbạn nyạ Soko, ka ezo to walazhi ga be dạbo ya zabaci wezhi, Soko a lugwa we dạbo be lafiya nyi. Ebonạ Soko, gạni be ebawu nyạ Ruhu Lilici nyi, a fe la yeko nyạ biboya wu we. Ka wetso a kpe a, sa yi wo ga ewoma nyạ lafiya nạ Soko eya we nạ. Ama patukpa ke gạ cincin nyạ Soko gạni be egwa nyạ Jesu nyi, ga we a de lafiya wo o, wo ga e lamitu egạwu uzhi nạ. Mgba we e nạ enạ dedezhi? Ko bando o, we ejin enyạ dede ndocizhi nạzhi shetan ela wu we, ke enyạ wangizhi nạ. Soko e ma eza cinle be edyạ dede nyi a, a fe de wotso ga enyạ dede ta tako bedzo.

ADUWA : Tsoci, ga lugwa mi jin kokạri gạ mi a ta We ma, ebonạ We Soko mi a ye ta a. Ba mi jinre nạ mi a wun We be gạsikiya e nạ, Ami.

18/08/2026

LITAFIGBA NYẠ YELI YELI 2026
LARUBAFO AUGUST 19
GẠCINZHI 3 : 11 - 18
EGBẠN A YA WE RAYI KPALO

Wosika nyạ Jemisi 3:13-17 ta ya yi eti egbạn yiri guba o. Egbạn nạ fe dạgạ eba Soko o be nạ, baci yi egbạn nyạ yizhe. Wunayike we lamitu egbạn nyạ Soko a nạ, wun ga la we ci e da jin efu o. Cigbe nạ ela ci ba nạ yeko sa guba nạ o. Kristen nyạ gạsikiya a wa gạ wụn de kpikpe nyạ efu jin a. Wo ga ejin efu ci yekosazhi o, we jin Kristen nyạ gạsikiya a, we ma kpe Jesu Kristi ye a. Egbạn nyạ yizhe ga we ma de o. Jesu ma a la we lo sạmạ a. Ka we ma ga de rayi kpalo, we a de mawo nyạ gạsikaya a. Ebonạ shetan ga yi gbere nyạ egbạn nyạ yizhe o.

ADUWA : Tsoci, jin hankuri la egbạn nyạ sạmạ twaria ya mi, ebo Jesu o, Ami.

17/08/2026

LITAFIGBA NYẠ YELI YELI 2026
TALATAFO AUGUST 18
GẠCINZHI 3 : 5 - 10
YAKPE SOKO BE NYẠGBẠN WE NYI KPATA

Ade shiawura nạ ge gạ nạnạ, ebo egi yizhi o nạ a. Wo ga de shiawura ala dạ egi wezhi ko dạngi wezhi ko eya wezhi, din a 'gwa lo Litafi nyạ Gạcinzhi. Kagạ a lamitu shiawura we a, fe jin aduwa ya a, ebo Ruhu Lilici u patukpa. Zunma wuncin o, dokun nyạ egi nạzhi lo makanta nyạ Legenlege (University) nạ, ekpaye gạ a de egbạn gạ enyạmạci azhi. Kpikpe to yema nyạ yizhe ga ela nyạgbạn a ci a kpe o. Ama egi nạ ga kpe Jesu ye be 'mi gạsikíya e nạ, bà nạ u ga jin makanta tu nạ, wun a gba kpikpe nyạ enyạmạci uzhi ye a. Gạcinzhi la shiawura kpataki dạ yi dạ nimi aya 9 to 10 bo. Dokun nyạ yi nạzhi egba YELI YELI nạ yi lamitu shiawura nạnạzhi.

ADUWA : Tsoci, yi jin yebo ebo alubarika nạzhi We ela dạ sunsun nyạ lati yizhi nạ. Wo ga wa ma, Lugwa akubarika nyạ We u fe loye kpe eti yi bo kandondo, ebo Jesu o, Ami.