Zanniat christian Fellowship kepong homecell

17/01/2026

⛪17.1.2026⛪

Niruk zan Pathian thangphat hnak

25/12/2025

MERRY CHRISMAS nia songlawi ah Ti le Rong ur ngai hmang tlang tuh in kawi tlang hang a sing ih law.
Bawi Khrih Hming in ning sawm ing.
Ang ze.

25/12/2025

Merry Christmas!!!
Rongsuang ben dawng hang i ing.

25/12/2025

30/11/2025

Bible study/ bible Sharing
Mtt 9:1-38
Siar tu - Tha Sin

Jesuh In Mizengpa A Damter
(Mar 2:1-12; Luk 5:17-26)
9Jesuh cu lawng sungah a lut ih tili khatlam ralih a khua Kapernaum ah a kirsal. 2 Cule mizeng pakhat cu a ihkhun thawn Jesuh hnenah an rak zawn. Zumnak an neih zia kha Jesuh in a hmuh tikah, mizengpa hnen ahcun, “Ka fapa, zianghman phang hlah. Na sualnak cu ngaidam a si zo,” tiah a ti.
3 Cule Daanthiam saya ṭhenkhat pawl in, “Hi pa hi Pathian thangsiat in a ṭong a si,” tiah an ti aw.
4 Cutiih an ruah cu Jesuh in a thei ih, “Ziangahso hibangtuk thil ṭha lo hi nan ruat? 5 ‘Na sualnak cu ngaidam a si zo,’ ti maw ‘Tho awla feh aw,’ ti so a ol sawn? 6 Milai Fapa in leilung parah misual ngaidam theinak thu a nei, tihi nan hmaiah ka langter ding,” tiah a ti ih mizengpa hnen ahcun, “Tho aw, na ihphah la awla inn ah va tin aw,” tiah a ti.
7 Mizengpa cu a tho ih a inn ah a tin. 8 Cumi cu mipi in an hmuh tikah an thin a phang ih cubangtuk thuneihnak cu milai hnenah a pek ruangah Pathian an thangṭhat.
Jesuh In Matthai A Ko
(Mar 2:13-17; Luk 5:27-32)
9 Cuih hmun ihsin Jesuh cu a suak ih a feh rero lai ah siahkhongtu pakhat Matthai an timi pa a zung sungih a to kha a hmu ih, “I thlun aw,” tiah a ti.
Matthai cu a tho ih Jesuh a thlun.
10 Jesuh cu Matthai inng ih zanriah a ei lai ah siahkhongtu dang tampi le misual an si, tiih hnonmi pawl in Jesuh le a dungthluntu pawl cu rawl an eipi. 11 Farasi ṭhenkhat pawl in cumi cu an hmuh tikah a dungthluntu pawl kha, “Nan sayapa hi ziangahso hibangtuk minung pawl thawn rawl an ei tlang?” tiah an sut.a
12 Cumi cu Jesuh in a theih tikah an hnenah, “A harhdammi in sibawi an hai lo, mina lawngin an ṭul a si. 13 Va feh uhla, ‘Ṭilva in thawinak pek ka ṭul lo, mi zangfahnak thinlung a si ka duh,’b tiah Ca Thianghlim ih a timi hi a tican va ruathnik uh. Miding pawl ko dingah ka ra lo, misual pawl ko dingah ka ra a si,” tiah a ti.
Rawl Ulhnak Thu
(Mar 2:18-22; Luk 5:33-39)
14 Cule baptisma petu Johan ih dungthluntu pawl Jesuh hnenah an ra ih, “Kannih le Farasi pawl cu rawl kan ul ṭheu nain ziangahso na dungthluntu pawl hmuah rawl an ulh dah lo?” tiah an sut.
15 Jesuh in, “Mo lomnak puai ih sawmmi pawl cu ziangahso mopa a um sungah cun riahsia in an um ding? Riahsia in an um lo ding! Sikhalsehla an hnen ihsin mopa lakhlo a si tikcu a thleng leh dingih cutikah rawl cu an ul leh ding.
16 “Zohman in angki hlun tlek parah puan thar an belh dah kel lo, ziangahtile belhmi thil thar kha a com dingih angki a tlekmi kha a kau sinsin ding. 17 Cuvek thotho in zohman in savun thawl hlun sungah sabitti thar an thun dah lo; an thun asile savun thawl cu a kuai dingih sabitti kha a zun hlo ṭheh dingih savun thawl cu a siatralta ding a si. Cu hnakin savun thawl thar sungih sabitti thar thun a si ahcun siatnak zianghman um lo in an pahnih in an him ding,” tiah a ti.
Jesuh Puan A Thamtu Nunau Nu
(Mar 5:21-43; Luk 8:40-56)
18 Cuih thu Jesuh in a sim rero laifangah Judah mi lakih bawi pakhat Jesuh hnenah a ra ih khukbil in, “Tubai teah ka fanu a thi. Asinan nangmah na rat ih a parih na k*t na suan ahcun a nungsal ding,” tiah a ra ti.
19 Jesuh cu a tho ih cupa cu a thlun ih a dungthluntu pawl khal cun an thlun ve.
20 Culai ah nunaunu pakhat k*m hleihnih sung besia zet ih thidok natnak a tuartu Jesuh dunglam ihsin a ra ih Jesuh ih puanzim kha a tham. 21 “A puan zimte tal ka tham thei a si ahcun ka dam ko ding,” tiah a thinlung tein a ruat.
22 Cutikah Jesuh cu a her ih cunu cu a hmu. “Ka fanu, na thinphang hlah! Na zumnak in a lo damter zo,” tiah a ti. Cuve tein cunu cu a dam.
23 Cule Jesuh cu Judah hotupa ih inn sungah a lut. Mithi topinak khuangdar tumtu pawl le minung hnok celcel ih an um a hmuh tikah, 24 “Nan zate in suak ṭheh uh! Hi nauhaknu cu a thi lo, a itthat a si,” tiah a ti. Cutikah an hnihsan ṭheh. 25 Asinan mi an suah thluh ve tein Jesuh cu nauhaknu ih umnak khaan sungah a lut ih a k*t a vun kaih ve tein nauhaknu cu a hung tho. 26 Cuih thu cu a kiangkap ramsung hmuahhmuah ah a thang thluh.
Mitcaw Pahnih Khua A Hmuhter
27 Jesuh cu cuih hmun ihsin a suak ih a feh rero lai ah mitcaw pahnih in an dawi ih, “Maw David Fapa, in zangfah hram aw,” tiah an au. 28 Jesuh cu inn sungah a lut ih mitcaw pahnih cu a hnenah an ra ih Jesuh cun, “Ka lo damter thei ding tiin nan zum maw?” tiah a sut. “A si, Bawipa, kan zum,” tiah an ti.
29 Cutikah Jesuh in an mit a tham ih, “Nan zumnak vekin cang seh,” a ti ih, 30 khua an hmu theisal. Jesuh cun an hnenah, “Hi thu hi zohman nan sim lo pei,” tiah fek zet in a tiam.
31 Asinan an feh ih Jesuh ih thuhla cu cuih kiangkap khuazakip ah an than.
A Ṭong Thei Lomi A Ṭongter
32 Mipi an inn ih an tin rero lai ah midang pawl in khawsia in a polh ruangah a ṭong thei lomi mipa pakhat Jesuh hnen ahcun an rak hruai. 33 Jesuh in khawsia a dawisuak sak ve tein cupa cu a ṭong theisal ih mi hmuahhmuah an mang a bang ṭheh. “Israel mi lakah hibangtuk cu kan hmu dah hrih lo,” tiah an ti cio.
34 Sikhalsehla Farasi pawl cun, “Khawsia dawihlo theinak huham cu khawsia bawi in a hnenah a pek a si,” tiah an ti.c
Jesuh In Mipi A Zangfah
35 Cuticun Jesuh cu khual a tlawng ih khuapi siseh, khuate siseh, a pal phah vivo. Sinakok ah thu a zirh, vancung Uknak Thuthangṭha a sim ih natnak le damlonak phunphun a neitu pawl a damter vivo. 36 Misenpi pawl a hmuh tikah khaaltu nei lo tuu bangtukin rethei le awloksong ih an um ruangah an parah zangfahnak tampi a nei.d 37 Curuangah a dungthluntu pawl hnenah, “Rawl khawm ding tampi a um nain a khawmtu ding minung an malte a si. 38 Curuangah rawl lak ding neitu bawi hnenah rawl khawmtu ding milai tampi thlah dingah thlacam uh,” tiah a ti.e

28/11/2025

Bible study/Bible Sharing
Mtt 8 :1-34
Siar tu - Merry

Jesuh In Miphaar Pakhat A Damter
(Mar 1:40-45; Luk 5:12-16)
8Jesuh cu tlangpar ihsin a rung ṭum ih mitampi in an thlun. 2 Cule miphaar pakhat a hnenah a ra ih a hmaiah a khukbil in a kun ih, “Bawipa, na duh ahcun i damter thei a si,” tiah a ti.
3 Jesuh cun a hei dawh ih a tham hnuah, “Ka lo damter ding, atu ihsin thiang thlang aw,” tiah a ti. Hmakhat teah cupa cu a dam. 4 Cule Jesuh in, “Ngai aw, hi thu hi zohman sim hlah; asinain puithiam hnenah va feh vurvo awla amah in rak lo zoh seh. Cun na dam zo a si, tiih mizapi theih dingah Moses thupekmi vekin thawinak va pe aw,” tiah a ti.a
Rom Ralbawi Ih Hnenum A Damter
(Luk 7:1-10)
5 Jesuh cu Kapernaum khua a thlen tikah Rom ralbawipa pakhat in a ra tong ih bomnak a ra dil. 6 “Bawipa, ka hnenumpa cu besia zet in a na ih cang thei lo in inn ah a it ringring a si,” tiah a ti.
7 “Ka ra pei ih ka damter pei,” tiah Jesuh in a ti.
8 Ralbawipa in, “Bawipa, cuticun si hlah seh; nang ka inn tiangih ratter dingah kei ka tlak lo. Damnak thu pe awla ka hnenumpa cu a dam ko ding. 9 Keimah khal ka tlunlam bawi pawl ih ukmi ka si ih ka k*thnuai khalah ralkap an um. Ka k*thnuai ralkap pakhatkhat cu, ‘Feh aw,’ ka tile a feh; ‘Ra aw,’ ka tile a ra. Ka hnenum khal, ‘Himi tuah aw,’ ka tile a tuah a si,” tiah a ti.
10 Cumi cu Jesuh in a theih tikah a mang a bang ngaingai ih amah a thluntu mizapi pawl hnenah, “Thungai in ka lo sim: Israel mi lak hmanah hi pa ih zumnak bangtuk ka hmu hrih lo. 11 Fiang tein ka lo sim: Nisuahnak le nitlaknak ihsin mi tampi an ra dingih vancung Uknak rawl einak puai ah Abraham le Isaak le Jakob thawn an to tlang ding.b 12 Asinan vancung Uknak co ding a simi pawl sawn kha ṭahnak le hacang rialnak hmun khawthim sungah hlon an si ding,” a ti.c 13 Cule Jesuh in ralbawipa hnenah, “Inn ah va tlung awla na zumnak vekin tuah sak na si ding,” tiah a ti.
Ralbawipa ih hnenum cu cuih caan cekci ah a rak dam.
Jesuh In Mi Tampi A Damter
(Mar 1:29-34; Luk 4:38-41)
14 Jesuh cu Piter inn ah a feh ih cutawkah Piter ih pizonf cu khurhnat in a na ih ihkhun ah a rak it kha a hmu. 15 Jesuh cun a k*t a vun tham ih a khurhnat cu a dam. Cule a tho ih Jesuh kha a tuamhlawm thei.
16 Zanlam a si tikah khawsia ih polhmi pawl kha Jesuh hnenah an ratpi. A ṭong kam khat in khawvang pawl cu a dawi ih mina pawl cu a damter ṭheh. 17 Hitiih a tuahnak cu profet Isaiah in, “Amah rori in kan natnak cu a lak ih kan dam lonak pawl cu a phurhlo a si,” d tiah a rak simmi kimternak dingah a si.
Jesuh Thluntu Ding Pawl
(Luk 9:57-62)
18 Jesuh in a kiangkap ih misenpi a hmuh tikah a dungthluntu pawl kha tili khatlam ralih feh dingah thu a pek.
19 Daanthiam saya pakhat a hnenah a ra ih, “Sayapa, na fehnak hmun kipah ka lo thlun ding,” tiah a ti.
20 Cutikah Jesuh in, “Cinghnia in kua an nei ih vate in bu an nei; asinain Milai Fapa cun riahnak hmun hman a nei lo,” tiah a ti.
21 A dungthluntu dang pakhat in Jesuh hnenah, “Bawipa, ka va kirta hrih dingih ka pa ka va phumta pei,” tiah a ti.
22 Jesuh in, “I thlun sawn aw, mithi pawl in mithi cu phum ko hai seh,” tiah a sawn.
Jesuh In Thlipi A Daiter
(Mar 4:35-41; Luk 8:22-25)
23 Jesuh cu a dungthluntu pawl in an thlun ih lawng sungah an lut. 24 Rinlopi ah thlipi a huk ih lawng cu a pil zik. Asinan Jesuh cu a itthat. 25 Dungthluntu pawl in an va ṭhang ih, “Bawipa, in run aw! Kan thizik thlang a si,” tiah an ti.
26 Cutikah Jesuh cun, “Ziangahso cuticun nan ṭih? Nan zumnak a va mal so!” tiah a ti. Cule a tho ih thli le tilet cu dai dingin thu a pe; hmakhat teah tili cu dai tein a umsal. 27 Mi hmuahhmuah an mang a bang ih, “Hi pa hi ziangbangtuk minung so a si? Thlipi le tilet hman in a thu an ngai!” tiah an ti.
Khawvang Polhmi Pahnih A Damter
(Mar 5:1-20; Luk 8:26-39)
28 Jesuh cu tili khatlam ral Gadara an timi ram ah a thleng ih cutawkih thlan lungkua sung ihsin a ra suakmi pahnih in an rak tong. Himi pahnih cu khawsia polhmi an si ih ṭihnung ngaingai an si ruangah cuih lamzin cu zohman in an zawh ngam lo. 29 Hmakhat teah an au ih, “Maw Pathian Fapa, nang le kannih ziangso kan seng aw? A tikcu a kim hlanah kanmah hrem dingah maw na rat?” tiah an ti.
30 Cutawk ihsin hla nawn ah rawl a ei reromi vokrual an um. 31 Khawsia pawl in Jesuh cu an dil ih, “In dawisuak ding a si ahcun khitawk ih vok pawl sungah khin in lutter aw,” an ti.
32 Jesuh cun, “Va lut uh,” tiah a ti. Khawsia pawl cu cuih mi pahnih sungin an suak ih vok pawl sungah an va lut. Vokrual cu cutawk khamhrap ihsin an dawp ciamco ih tili sungah an tlathat ṭheh.
33 Vok kiltu pawl cu khuasung ah an vung tlan ih cuih thuhla pawl le khawsia polhmi pahnih parih thil a cangmi pawl cu kim tein an sim ṭheh. 34 Curuangah khuasungmi hmuahhmuah cu Jesuh tong dingah an feh; Jesuh an hmuh tikah an ram ihsin hmundang ih feh dingah zangfah an dil.

26/11/2025

Bible study/ Bible Sharing
Mtt 7:1-29
Siar tu - Pa Tawk
Mi Soisel Hlah
(Luk 6:37-38, 41-42)
7“Mi va soi hlah; cuticun Pathian in a lo soi ve lo ding. 2 Ziangahtile mi na soi vekin nangmah khal Pathian in a lo soi ve dingih midang parih na hmanmi tahfung in Pathian in a lo tah ve ding.a 3 Na mit sungih thingtum hman poisa lo in na unau mit sungih mithnawm fate kha ziangahso na poisat? 4 Na mit sungah thingtum a um nacingin ziangtinso na unau cu ‘Na mithnawm ka lo coih sak ding,’ tiih na ti thei? 5 Mititer aw pa! Na mit sungih thingtum kha suah hmaisata awla cuticun na unau mit sungih mithnawm cu fiang tein na hmu thei dingih na coih sak thei ding.
6 “A thianghlimmi thil kha uico va pe hlah uh; her tahrat in nanmah riangri sawp seksek in a lo keu ding. Nan keplung mankhung pawl cu vok hmaiah thlak hlah uh; a ke in a pal lak men ding a si.
Dil Uh, Hawl Uh, King Uh
(Luk 11:9-13)
7 “Dil uh, nan ngah ding; hawl uh, nan hmu ding; king uh, nan hrangah sangka on a si ding. 8 Ziangahtile a diltu hmuahhmuah cun an ngah ding, a hawltu hmuahhmuah cun an hmu dingih a kingtu hmuahhmuah hrangah sangka cu on sak an si ding. 9 Nan faate pawl in sang an lo dil asile, nannih pale pawl in lungto nan pe ding maw? 10 Nga lo dil hai sehla rul nan pe ding maw? 11 Miṭha lo zet nan si nain nan faate pawl hrangah cun a ṭhami thil pek nan thiam a si ahcun vancung ih a ummi nan Pa in a diltu hnen ahcun ziangtinso thil ṭha pek lo in a um ding.
12 “Mi in kan parah tuah hai seh ti nan duh vekin midang parah tuah ve uh. Himi hi Moses Daan le profet pawl thuzirhnak ih sim duhmi taktak cu a si.b
Kotka Fiak
(Luk 13:24)
13 “A fiakmi kotka sungin feh uh, ziangahtile hell fehnak kotka cu a kau ih a lamzin khal a ol; curuangah a zawhtu khal an tam a si. 14 Sikhalsehla nunnak sungih luhnak kotka cu a fiak ih a fehnak lamzin khal a har; curuangah a thleng suaktu cu mi malte an si.
Thingkung Le A Rah
(Luk 6:43-44)
15 “Profet deu pawl khi ralring uh; an lenglam cun tuu bangin nan lakah an tlang; asinain an sunglam cu cinghnia hrang vek an si. 16 Mi ziangvek an si, ti cu an tuahmi in nan thei ding. Hling kung ihsin sabit a rah dah lo; lenhling khalin theipi a rah dah keel lo. 17 A harhdammi thingkung ṭha cun rah ṭha a rah ih thingkung ṭha lo cun rah sia a rah. 18 A harhdammi thingkung cun rah sia a rah thei lo ih thingkung ṭha lo cun rah ṭha a rah thei ve lo. 19 Cule rah ṭha a rah lomi thingkung cu an hau ih meisa sungah an paih ṭheu.c 20 Cuvekin profet deu pawl cu an tuahmi in nan theithiam ding.d
Ka Lo Thei Dah Lo
(Luk 13:25-27)
21 “‘Bawipa, Bawipa,’ tiih i kotu hmuahhmuah in vancung Uknak an thleng thluh lo ding; vancung ih a ummi ka Pa ih duhnak a tuahtu lawnglawng an thleng ding a si. 22 Thuṭhen Ni a thlen tikah mi tampi in ‘Bawipa, Bawipa, na hmin in thu kan sim, na hmin in khawsia tampi kan dawisuak ih mangbangza tampi kan tuah,’ tiah ka hnenah an ti ding. 23 Asinan kei cun, ‘Ka lo thei dah lo! Ka hnen ihsin tlan uh, nannih miṭha lo pawl!’ tiah ka ti hai ding.e
Inn Saktu Pahnih
(Luk 6:47-49)
24 “Curuangah hi ka ṭongmi a thei ih a thluntu cu lungpi parih inn saktu mifim pa bangtuk a si. 25 Ruah napi in a sur, ti a lian ih thlipi in a nuai ciamco nain lungpi parih sakmi inn a si ruangah a sawn lo.
26 “Sikhalsehla hi ka ṭongmi a thei nain a thlun lotu cu vunnel parih inn saktu mi-aa bangtuk a si. 27 Ruah napi in a sur, ti a lian ih thlipi in a nuai tikah a sawn mai; a tlu ih a siatbal thluh a si,” tiah a ti.
Jesuh Thuneihnak
28 Jesuh in hi thu hmuahhmuah a sim ṭheh tikah misenpi pawl cu a thuzirhmi kha an mang a bang ngaingai. 29 Anih cun Daanthiam pawl vek si lo in thunei zet in thu a zirh a si.f

24/11/2025

Bible study/ Bible Sharing
Mtt 6:1-34 Siannak Thu
Siar tu - Kap Kap

Siannak Thu
MTT 6:1-34
“Biaknak lamih thil ṭha nan tuahmi hi mi in, in hmu hai seh tiin mizapi hmaiih tuah lo dingin ralring uh. Cutiih mipi hmaiih nan tuah ahcun vancung ih a ummi nan Pa hnen ihsin ṭhatman zianghman nan ngah lo ding.a
2 “Curuangah mi tlasam hnenah thil pakhatkhat nan ṭhen tikah mititeraw pawl in sinakok le zalamzin ih an tuah vekin tawtawrawt tum in uang aw hlah uh. Annih cun mipi pawl ih lom dingah an tuah. Fiang tein ka lo sim: An ngah dingmi cu an ngah ṭheh zo. 3 Sikhalsehla nannih cun mi tlasam nan bawm tikah nan vorhlam k*t ih tuahmi kha nan kehlam k*t khalin theih lo dingin va tuah uh. 4 Cuticun a thup teih nan tuahmi a hmutu nan Pa in ṭhatman a lo pek ding.
Thlacamnak Thu
(Luk 11:2-4)
5 “Thla nan cam tikah mititeraw pawl vekin cam hlah uh. Annih cun mi hmuahhmuah in, in hmu hai seh tiin sinakok le za lampi ah ding tahrat in thlacam an duh ngaingai. Fiang tein ka lo sim: An ngah dingmi an ṭhatman cu an ngah ṭheh zo.b 6 Sikhalsehla nannih cu thla nan cam tikah nan inn khaan sungah lut uhla sangka nan khar hnuah mithmuh lomi nan Pa hnenah thlacam uh. Cule a thup teih nan tuahmi a hmutu nan Pa in nan ṭhatman a lo pe ding.
7 “Thla nan cam tikah Pathian thei lomi pawl ih sullam nei tuk lomi ṭong tampi an ṭong vekin va tuah hlah uh. Annih cun reipi thla an cam tikah Pathian in a thei cuang ding tiah an ruat. 8 Anmah vek va si hlah uh. Nan ṭulmi cu nan dil hlan ihsin nan Pa in a thei cia zo. 9 Curuangah hibangtuk in thla nan cam pei:
‘Vancung ih a ummi kan Pa,
na hmin thianghlim cu upat si ko seh;
10 Na Uknak thleng hram seh;
Vancung ih na duhnak tuah a si bangin
leitlun khalah tuah si ve seh.
11 Nitin kan ṭulmi rawl in pe aw.
12 Mi in kan parah sualnak an tuah ih
kan ngaidam bangtukin,
Kanmah ih sualnak khal in ngaidam ve aw.
13 A harmi hniksaknak tuarter lo in,
siatnak ihsin in hum hram aw.’ec
14 “Nan parah sualnak a tuahtu pawl nan ngaidam a si ahcun vancung ih a ummi nan Pa in a lo ngaidam ve ding. 15 Sikhalsehla midang sualnak nan ngaidam lo a si ahcun nan sualnak cu nan Pa in a lo ngaidam ve lo ding.d
Rawl Ulhnak Thu
16 “Rawl nan ulh tikah mititeraw pawl vekin riahsia mithmai in um hlah uh. Mihrek in rawl an ulh kha mi hmuahhmuah in, in thei hai seh tiah an mithmai in an langter. Fiang tein ka lo sim: An ngah dingmi an ṭhatman an ngah ṭheh zo a si. 17 Nannih cu rawl nan ulh tikah nan hmai phiah in nan sam tla ṭha tein hriat uh. 18 Cuticun zohman in rawl nan ulh kha an lo thei lo dingih mithmuh lo nan Pa lawng in a lo thei ding. A thup teih nan tuahmi a hmutu nan Pa in ṭhatman a lo pek ding.
Vancung Ah Khawl Uh
(Luk 12:33-34)
19 “Tlap le nget ih a siatsuah theinak le rukru pawl in an bauh ih an ruk theinak hi leitlun ah nan sumsaw khawl hlah uh.e 20 Tlap le nget ih a siatsuah thei lonak le rukru pawl in an bauh ih an ruk thei lonak vancung ah nan sumsaw cu khawl sawn uh. 21 Ziangahtile nan sumsaw umnak ah nan thinlung khal a um ve ding.
Taksa Ruangpi Ih Tleunak
(Luk 11:34-36)
22 “Mit cu taksa ruangpi hrangah mei-inn a si. Nan mit a fim le nan taksa ruangpi cu a tleu ṭheh ding. 23 Sikhalsehla nan mit a ṭhat lo ahcun nan ruangpi cu thimnak sungah a um ding. Cuti a si ruangah nan sungih tleunak cu thimnak a si ahcun ziangtluk ṭihnungza so thimnak cu a si ding!
Pathian Le Tangka Thu
(Luk 16:13; 12:22-31)
24 “Zokhal in bawi pahnih a rian thei lo. Pakhat a duh dingih pakhat a hua ding. Pakhat hnenah rin tlak zet in a um dingih pakhat cu a hmuhsuam ding. Pathian le tangka nan rian tlang thei lo ding.
25 “Cuti a si ruangah ka lo sim: Nan nunnak hrangih nan ṭulmi ti le rawl le nan ruangpi hrangih hnipuan pawl thu ruat le donhar in um hlah uh. Thungai ih ti ahcun, nunnak hi rawl hnakin a thupi sawn lo maw? Hnipuan hnak khalin taksa ruangpi hi a thupi sawn lo maw? 26 Van ih a zuangmi vate khi zoh hnik uh; annih in thlaici an tuh lo, rawl khal an khawm lo ih cuam sung khalah an khawl lo. Asinan vancung ih a ummi nan Pa in a cawm thluh a si. Vate hnakin tampi nan sunglawi sawn a si lo maw? 27 Nan donhar ruangah nan nunnak caan tawite tal nan sauter thei maw?
28 “Cun ziangahso hnipuan thu ah nan don a har? Hramlak ih pangpar khi zoh hnik uh; hna an ṭuan lo, pathnuk in thiam an tak fawn lo. 29 Asinan atu ah ka lo sim: Siangpahrang Solomon hman, kha tluk in a lian nain, a lennak le a hnipuan in hi pangpar ih mawinak a tluk lo a si.f 30 Tuih sun ah a nung ih thai sun ah meisa sungih paih ding hrampi hman a ceimawitu Pathian cun cuih pawl hnakin nannih cu a lo thuam sawn lo ding maw? Nan zumnak a va mal lawmmam so!
31 “Curuangah ‘Ei in ding le sinfen ding tla khui-in so ka ngah ding,’ tiin donhar in um hlah uh. 32 Hi pawl cu Pathian thei lo khawvel pawl ih an helhkam ringringmi an si. Vancung ih a ummi nan Pa in hi thil pawl nan ṭul zia cu a thei a si. 33 Cuhnakin Pathian Uknak le a felnak hawl hmaisa sawn uhla thil dang hmuahhmuah cu a lo pebet ding a si. 34 Curuangah thai sun hrangah donhar in um hlah uh; thai sun in donharnak amah tawkin a nei ve ding. Ni, nikhat ih a phurhmi harsatnak tlunah a dang betcih ding a si lo.

18/11/2025

Bible study/ Bible Sharing
Mtt 5:1-48
Siar tu - Rang Bawi

Tlangpar Thuzirhnak
5Jesuh in mipi a hmuh tikah tlang parah a hung kai; cutawkah cun a to ih a dungthluntu pawl a hnenah an ra. 2 Cule a kam a kau ih hitiin thu a zirh:
3 “Thlarau lamah ka farah ti
a thei awtu pawl cu mi thluasuak an si;
Ziangahtile vancung Uknak cu
anmah ih ta a si.
4 Ninghang lungsia pawl cu
mi thluasuak an si;
Ziangahtile Pathian in a hnem hai ding.a
5 Lungnemmi pawl cu mi thluasuak an si;
Ziangahtile Pathian ih
kam cia mi an co ding.b
6 Pathian ih duhnak tuah dingih
a hiarhaltu pawl cu mi thluasuak an si;
Ziangahtile Pathian in
an lung di a riamter ding.c
7 Mi zangfah thiamtu pawl cu
mi thluasuak an si;
Ziangahtile Pathian in anmah
a zangfah ve ding.
8 Thinlung a thiangmi pawl cu
mi thluasuak an si;
Ziangahtile Pathian an hmu ding.d
9 Remnak a tuahtu pawl cu
mi thluasuak an si;
Ziangahtile Pathian ih fahniang
tiah kawh an si ding.
10 Pathian duhnak tuah ruangih
hremnak a tuartu pawl cu
mi thluasuak an si;
Ziangahtile vancung Uknak cu
anmah ih ta a si.e
11 “Keimah ih dungthluntu nan si ruangah mi in an lo hmuhsuam, an lo hrem ih thuphan a phunphun an lo puh tikah mi thluasuak nan si.f 12 Nan lungawi in nan aipuang uh, ziangahtile nan hrangah tuarman tampi vancung ah ret a si. Nan hlanih profet pawl khal cubangtuk in hrem an tuar zo.g
Cite Le Tleunak
13 “Nannih cu mi phunkip hrangah cite nan si. Sihmansehla cite cu a alnak a ziam asile altersal a theih nawn lo. Ṭhathnemnak zianghman a neih nawn lo ruangah hlon ding le pal men ding lawng a si.h
14 “Nannih cu leilung pumpi hrangah tleunak nan si. Tlang parih tohmi khua cu thuh a theih lo.i 15 Zohman in mei-inn an van tikah khengkuum an khuh dah lo. Mei-inn vannak tung parah an vang. Cutiin inn sungih a ummi zate hrangah tleunak a si.j 16 Cubangtuk in nan tleunak cu mi hmaiah tleuter ding nan si. Cuticun thil ṭha nan tuahmi cu mi in an hmu dingih van ih a ummi nan Pa kha an thangṭhat ding.k
Daan Thu Zirhnak
(Mar 9:50; Luk 14:34-35)
17 “Moses Daan pawl le profet pawl ih thuzirhmi siatsuah dingah a ra, tiah i ruat hlah uh. Cupawl siatsuah dingah ka ra lo, an zirhmi pawl kimter dingah ka ra sawn a si. 18 Hihi cing ṭha uh: Lei le van a um sung cu Daan sungih daanterek bik pakhat hman a hlo lo ding, ziang hmuahhmuah a kim ṭheh hlan cud pakhatte hman a hlo lo ding.l 19 Curuangah zokhal sisehla thukham sungih a thupi lo bik pakhatte hman kha a thlun lo ih midang khal thlun lo dingin a zirh ve a si ahcun amah cu vancung Uknak ah mi tenau a si ding. Cule zokhal sisehla Daan kha a thlun ih midang khal thlun ve dingih a zirh a si ahcun amah cu vancung Uknak ah mi thupi a si ding. 20 Fiang tein ka lo sim: Pathian duhmi tuahnak ah Daanthiam pawl le Farasi pawl hnakih nan fel sawn lo ahcun vancung Uknak ah nan lut thei lo ding.
Thinhennak Thu
21 “Hlanlai ahcun ‘Mi va that hlah, mi a thattu cu thuṭhennak a tuar ding a si,’ an rak timi nan thei zo.m 22 Asinan kei cun: A unau parah a thin a hengtu cu thuṭhennak a tuar ding; zokhal sisehla a unau kha ‘Zianghman ih ṭhahnem lo,’ a titu cu thuṭhentu hmaiah suahpi a si pei ih a unau kha, ‘Mi-aa,’ a titu cu hell meisa sungah a tla ding tiah phan a um a si, tiah ka ti. 23 Curuangah biakṭheng ah laksawng Pathian hnenih pek na tum lai ah na unau pakhatkhat na parah thinhennak a nei ti na thei a si ahcun, 24 biakṭheng hmaiah na laksawng cu taanlawk awla zamrang zet in na unau hnenah feh tahrat in remnak va tuah aw; cule rasal awla na laksawng cu Pathian hnenah pe aw.
25 “Mi pakhatkhat in a lo khiing ih zungih a lo thlenpi a si ahcun, zung nan thlen hlan a tikcu um lai ah amah thawn remnak va tuah aw. Zung a lo thlenpi hnu ahcun thuṭhentu k*t ah a lo pe dingih thuṭhentu in palik hnenah a lo pe lala dingih thawng ah thlak na si ding. 26 Fiang tein ka lo sim, an lo cawhmi tangka na kuan ṭheh hlan lo thawng sungah na um ding.
Ṭaangṭawm Sualnak Thu
27 “Ṭaangṭawm sualnak nan tuah lo pei, an ti ṭheumi nan thei.n 28 Asinan kei cun: Nunau kha hahio mit in a zohtu cu a thinlung in cunu thawn ṭaangṭawm sualnak a tuah zo, tiah ka lo ti. 29 Curuangah na vorhlam mit in a lo sualter asile phorh awla hlon aw. Na ruangpi hell sungih hlon tuar hnak cun na taksa ṭhen pakhatkhat na sun cu na hrangah a ṭha sawn.o 30 Na vorhlam k*t in a lo sualter le sattan awla hlon aw. Na ruangpi hell sungih hlon tuar hnak cun na k*tke pakhatkhat tan a si cu na hrangah a ṭha sawn.p
Nupi Maaknak Thu
31 “Zokhal in a nupi a maak asile maaknak ca ken seh, timi nan thei.q 32 Asinan kei cun: Mi pakhat in a nupi kha, mipa dang thawn sualnak ruangah siar lo, a maak asile, a nupi cu pasal a neih tikah ṭaangṭawm sualnak tuahtu a siter. Curuangah cupa cu misual a si. Cutiih a maak minu a ṭhitu pa khal ṭaangṭawm sualnak tuahtu a si ve.r
Thukamnak Thu
(Mat 19:9; Mar 10:11-12; Luk 16:18)
33 “Khuahlan lai ahcun ‘Nan thukam pelhter hlah uh, Bawipa hnenih thu nan kammi cu tuahsuak uh,’ an ti ṭheumi nan thei.s 34 Asinan kei cun hitiin ka lo sim: Thukamnak nan tuah tikah ziangtik hmanah siatcam in tuah hlah uh. Vancung hmin saal in thu kam hlah uh, ziangahtile Pathian tonak a si.t 35 Leilung hmin saal khalin thu kam hlah uh, ziangahtile Pathian ke retnak a si. Jerusalem hmin saal khalin kam hlah uh, ziangahtile Siangpahrang maksak umnak khuapi a si.u 36 Nan lu saal khalin thu kam hlah uh, ziangahtile nan lu parih sam phangkhat hman kha nan dumter thei lo ih nan rangter thei fawn lo. 37 ‘A si,’ ‘a si lo,’ ti lawng hi sim uh; cuih hlei cu miṭha lo Khawsia hnen ihsin a suakmi an si.
Phulei Samnak Thu
38 “Mit ai ah mit, ha ai ah ha, tiih an simmi cu nan thei.v 39 Sikhalsehla kei cun hitiin ka lo sim. A lo tisiattu parah phulei va sam hlah uh; mi pakhatkhat in na vorhlam biang ah a lo beeng asile na kehlam biang khal tun lawlaw aw. 40 Cule mi pakhatkhat in na angki duh ah thuṭhennak zung tiang a lo thlenpi asile na kawt angki khal pe lawlaw aw. 41 Cun a lo uktu ralkap pakhatkhat in a thilri peng khat phur dingin a lo fial a si ahcun peng hnih tiang va phurhsak aw. 42 Mi pakhatkhat in thil pakhatkhat a lo dil a si ahcun va pe aw; na thil cawi a duhtu hnenah va coih aw.
Ral Pawl Duhdawtnak
(Luk 6:29-30)
43 “Nan rualpi nan duhdawt pei ih nan ral pawl nan hua pei,” timi cu nan thei zo.w 44 Asinan kei cun hitiin ka lo sim: Nan ral pawl duhdaw uhla a lo hremtu pawl hrangah thlacam uh; 45 cuticun vancung ih a ummi nan Pa ih fa nan si ding. Ziangahtile Pathian in miṭha le miṭha lo tlunah bangrep in ni a tlangter ih thil ṭha a tuahtu le thil sia a tuahtu tlunah bangran in ruah a surter. 46 A lo duhtu lawng nan duh a si ahcun ziangahso Pathian in laksawng a lo pek ding? Siahkhongtu hman in cubangtuk cun an tuah ve a si! 47 Nan rualpi ṭha pawl lawng nan biak ṭhat a si ahcun midang nan hleihnak ziangso a um cuang? Pathian bia lomi hman in cuvek cu an tuah a sisi! 48 Vancung ih a um nan Pa a famkim vekin nannih khal nan famkim ve pei.x

12/11/2025

Bible study/Bible Sharing
Mtt 4:1-25
Siar tu - Hmui Hmui

Jesuh Hniksaknak
4Cule Jesuh cu Satan ih hniksak dingah Thlarau in ramṭhing ah a fehpi.a 2 Ni sawmli le zan sawmli rawl lo ih a um hnuah Jesuh cu a ril a rawng ngaingai. 3 Cutikah Satan a hnenah a ra ih, “Pathian Fapa ngaingai na si ahcun hi lungto pawl hi sang ah cang dingin thu pe aw,” tiah a ti.
4 Asinan Jesuh cun, “Ca Thianghlim in ‘Milai nunnak cu rawl lawngin a si lo. Pathian hmurka in a suakmi ṭongkam in a si sawn,’ a ti,” b tiah a let.
5 Cule Satan in Jesuh cu Jerusalem Khuapi Thianghlim ih Biakinn zim ah a fehpi ih, 6 a hnenah, “Pathian Fapa na si ahcun hitawk ihsin dawp aw, ziangahtile Ca Thianghlim ah,
‘Pathian in na kiangih a ummi
vancungmi pawl thu a pe ding,
An k*t in an lo dom dingih
na ke cu lungto thawn a khawng
aw lo ding,’ tin a um,”c tiah a ti.
7 Asinan Jesuh cun, “Ca Thianghlim in ‘Bawipa na Pathian cu na hniksak lo pei,’ a ti a si,”d tiah a let.
8 Cule Satan in Jesuh kha tlang saangpi parah a fehpi ih leilungtlun ram hmuahhmuah kha an maksaknak thawn a hmuh ṭheh. 9 Cuih hnuah Satan cun, “Na khukbil tahrat in i biak ahcun hi hmuahhmuah hi ka lo pe ding,” tiah a ti.
10 Cutikah Jesuh in, “Satan, tlan aw, ziangahtile Ca Thianghlim in ‘Bawipa na Pathian na biak pei ih amah lawng na rian pei,’ a ti a si,” e tiah a let.
11 Cule Satan cun a tlansan; cuih hnuah vancungmi pawl in an rung tuamhlawm.
Jesuh Galilee Ah Hnaṭuan A Thok
(Mar 1:12-13; Luk 4:1-13)
12 Johan kha thawng ah an thlak ti a theih tikah Jesuh cu Galilee ah a feh.f 13 Nazareth ah um lo in Kapernaum khua ih um dingin a feh. Kapernaum khua cu Zebulun le Naftali phun pawl ramsung Galilee Tili kapih a ummi khua a si. 14 Hitiih a umnak cu profet Isaiah ih a rak sim cia mi kimternak dingah a si. Isaiah cun:
15 “Zentail mi pawl ih umnak
Galilee ramsung,
Jordan tiva ral khatih um,
Tipi lamah, Zebulun le Naftali ram,
16 Khawthim sungih a ummi pawl in,
Tleunak maksak an hmu ding.
Thihnak ram thim sungih a ummi
pawl parah tleunak a suak
ding,”g tiah a rak ti.
17 Cuih tikcu ihsin Jesuh in, “Nan sual sir uh, ziangahtile vancung Uknak a nai zo,” tiah thusim hram a thok.h
Jesuh In Ngakaitu Pali A Ko
(Mar 1:14-15; Luk 4:14-15)
18 Jesuh cu Galilee Tili kapih a feh rero lai ah ngakaitu unau pahnih, tili sungah sur vorh in nga an kaih rero kha a hmu. Cuih unau pahnih cu Simon (Piter tiih kawhmi) le a nau Andru an si. 19 Jesuh cun, “Ka hnenah ra uhla mikaitu ah ka lo tuah ding,” a ti. 20 Hmakhat teah an sur pawl cu an tanta ih amah cu an thlun.
21 A feh vivo ih Zebedi fapa pahnih Jeim le Johan teih unau a hmu. Anmah cu an pa Zebedi thawn an lawng sungah an um ih an sur pawl an tholh rero. Jesuh cun a vun ko ih, 22 hmakhat teah an lawng le an pa tanta in Jesuh cu an thlun.
Jesuh In A Zirh, Mi A Damter
(Mar 1:16-20; Luk 5:1-11)
23 Jesuh cu Galilee peng khuazakip ah a feh ih sinakok kipah thu a zirh vivo. Vancung Uknak Thuthangṭha a sim vivo ih natnak a phunphun a tuartu pawl kha a damter vivo.i 24 A thuhla cu Siria ram hmuahhmuah tiangin a thang thluh; curuangah cun natnak le harsatnak a phunphun a tuartu, khawsia ih polhmi pawl, merai nat nei pawl le a zengmi pawl kha a hnenah an ratpi ih an zate in a damter ṭheh. 25 Galilee le Dekhapolisc peng, Jerusalem le Judea peng le Jordan tiva ral ihsin mi tampi an ra ih amah cu an thlun.